صنعا، یمنی فوج نے ایران کی حمایت یافتہ حوثی تحریک کے خلاف جاری بڑے فوجی حملے کے دوران اہم بحری گزرگاہ باب المندب کے قریب ذباب علاقے کا کنٹرول سنبھال لیا ہے۔ یمنی فوجی حکام اور علاقائی ذرائع نے یہ اطلاع دی۔

یمن کے صدر اور صدارتی قیادت کونسل کے چیئرمین رشاد العلیمی نے اتوار کو ’’ڈان آف یمن‘‘ کے نام سے بڑے فوجی آپریشن کا اعلان کیا تھا، جس کا مقصد حوثیوں کے قبضے میں موجود علاقوں کو دوبارہ حاصل کرنا اور ریاستی اداروں کی بحالی ہے۔

صدارتی قیادت کونسل کے سربراہ نے کہا کہ اس کارروائی کا مقصد ریاستی اداروں کو بحال کرنا، صنعا کو آزاد کرانا اور بغاوت کا خاتمہ کرنا ہے۔

العلیمی نے پیر کو کہا، ’’اپنی قوم کی قوت ارادی، اپنی فوج کی بہادری اور اپنے بھائیوں کی حمایت سے یمن ایک نئی صبح کی جانب بڑھے گا۔‘‘سرکاری فوج ذباب کی جانب کہبُوب کے پہاڑی علاقے سے فوجی نقل و حرکت کے ذریعے پیش قدمی کر رہی ہے۔

سرکاری فوجی دستے مغربی ساحل کے ساتھ شمال کی جانب المخا کی طرف بھی پیش قدمی کر رہے ہیں، جبکہ اطلاعات کے مطابق باب المندب اور میون جزیرے کے اطراف حوثی فورسز پر دباؤ بڑھ گیا ہے۔

یمنی مسلح افواج کے ترجمان میجر جنرل ماجد عبداللہ النزیلی نے کہا کہ تازہ حملے ملک کی سیاسی قیادت کی ہدایات پر کیے گئے۔

الجزیرہ کے مطابق یمنی مسلح افواج نے حوثیوں کے قبضے سے ریاستی اداروں کو واپس لینے اور ان کی بغاوت ختم کرنے کے لیے ’’آزادی کی جنگ‘‘ شروع کرنے کا اعلان کیا ہے۔

النزیلی نے کہا، ’’ہماری مسلح افواج منظور شدہ منصوبوں کے مطابق مختلف جنگی محوروں اور محاذوں پر اپنی فوجی کارروائیاں جاری رکھے ہوئے ہیں۔ ہماری مسلح افواج نے صعدہ، الجوف اور تعز میں حوثی ملیشیا کے بنیادی ڈھانچے کے 1,122 اہداف کو نشانہ بنایا۔‘‘

انہوں نے مزید کہا، ’’میدانی اطلاعات کے مطابق ان کارروائیوں کے نتیجے میں ملیشیا کے 1,747 عناصر کو غیر مؤثر بنایا گیا جبکہ 364 فوجی گاڑیوں، سازوسامان اور رسد کی نقل و حمل کے یونٹس کو تباہ یا ناکارہ بنا دیا گیا۔‘‘

اس فوجی حملے کے باعث تعز میں لڑائی شدت اختیار کر گئی ہے۔ تعز ایک اہم صوبہ ہے جو یمن کے حوثیوں کے زیر قبضہ شمالی علاقوں کو جنوب میں حکومت کے زیر کنٹرول علاقوں سے ملاتا ہے۔

اس خطے میں بندرگاہی شہر المخا بھی واقع ہے اور یہ باب المندب کے قریب ہے، جو دنیا کی اہم ترین بحری گزرگاہوں میں شمار ہوتا ہے۔

العلیمی نے اتوار کو فوجی مہم کا اعلان کرتے ہوئے اسے حوثیوں کے زیر کنٹرول علاقوں کو دوبارہ حاصل کرنے کی حکومتی کوششوں کا نیا مرحلہ قرار دیا۔

جاری۔ یو این آئی۔ ع ا۔

نئی دہلی، وزیراعظم نریندر مودی نے گڈز اینڈ سروسز ٹیکس (جی ایس ٹی) کی اصلاحات کے اگلے مرحلے کی حمایت کرتے ہوئے کہا ہے کہ مجوزہ تبدیلیاں ٹیکس کے نظام کو مزید سادہ بنائیں گی اور ٹیکس کی ذمہ داریوں کا پہلے سے اندازہ لگانا آسان ہو جائے گا۔

جی ایس ٹی کونسل کی میٹنگ 7 اکتوبر کو ہونے جا رہی ہے جس میں اس بالواسطہ ٹیکس کے نظام میں اصلاحات کے اگلے دور پر بات چیت کی امید ہے۔

خزانہ اور کارپوریٹ امور کی وزیر نرملا سیتارمن کے ‘ایکس’ کے ایک پوسٹ کو شیئر کرتے ہوئے وزیراعظم نے کہا، “اگلی نسل کا جی ایس ٹی نظام ٹیکسیشن کو مزید سادہ بنائے گا اور اس کے بارے میں اندازہ لگانا آسان ہوگا۔ اس سے تعمیل آسان ہوگی، ریفنڈ کے طریقہ کار میں بہتری آئے گی اور تاجروں کو سرمایہ کاری نیز توسیع کے لیے زیادہ اعتماد ملے گا۔ حکومت ان اصلاحات کو ‘وکسِت بھارت’ کے ہدف سے جوڑ کر دیکھ رہی ہے۔” انہوں نے کہا کہ اصلاحات سے تجارتی اداروں اور خاندانوں کو مدد مل رہی ہے۔

مسٹر مودی نے کہا کہ یہ اصلاحات معاشی سرگرمیوں کو بڑھانے، ریونیو کو مضبوط کرنے اور ملک بھر کے کاروباری اداروں کے لیے نئے مواقع پیدا کرنے میں مدد کر رہی ہیں۔ انہوں نے کہا کہ جی ایس ٹی اصلاحات کے اگلے مرحلے میں تعمیل کو آسان بنانے اور ریفنڈ کے عمل کو بہتر کرنے پر توجہ دی جائے گی، جس سے تاجروں کو سرمایہ کاری اور ترقی کے لیے مزید اعتماد ملے گا۔ اس سے ترقی یافتہ ہندستان کی بنیاد مزید مضبوط ہوگی۔ رجسٹریشن سے لے کر ریفنڈ تک اس کی تعمیل آسان ہوگی۔

وزیر خزانہ محترمہ سیتارمن نے اپنے پوسٹ میں کہا کہ جی ایس ٹی اصلاحات کا اگلا مرحلہ پہلے سے کی گئی تبدیلیوں کو آگے بڑھائے گا اور ٹیکس کے نظام کو ٹیکس دہندگان کے لیے مزید سازگار بنانے پر مرکوز ہوگا۔

انہوں نے کہا کہ اگلی نسل کے جی ایس ٹی کے دوہرے مقاصد—ٹیکس دہندگان کو راحت اور معیشت کو مزید رفتار—کو پورا کیا جا رہا ہے۔ اگلے مرحلے میں رجسٹریشن، ریٹرن فائل کرنے، ریفنڈ، تنازعات کے حل اور ان پٹ ٹیکس کریڈٹ (آئی ٹی سی) سے جڑی تعمیل کو سادہ بنانے پر خاص توجہ دی جائے گی۔

حکومت کی توجہ اب صرف جی ایس ٹی کی شرحوں کو مناسب بنانے سے آگے بڑھ کر ٹیکس انتظامیہ سے جڑے طریقہ کار کو بہتر کرنے پر ہے۔ اس کا مقصد تاجروں اور ٹیکس دہندگان کے لیے تعمیل میں لگنے والے وقت اور لاگت کو کم کرنا نیز ٹیکس کے نظام کو مزید قابلِ اعتماد بنانا ہے۔ حکومت نے گزشتہ سال جی ایس ٹی نظام میں بڑی تبدیلیاں کی تھیں۔ جی ایس ٹی کونسل کے 56 ویں اجلاس کے فیصلوں کے تحت 22 ستمبر 2025 کو جی ایس ٹی کے ڈھانچے میں بڑی تبدیلیاں نافذ کی گئیں اور زیادہ تر مصنوعات کو 5 فیصد اور 18 فیصد ٹیکس کے تحت لادیا گیا۔ اس کے ساتھ ہی 28 فیصد کا معاوضہ سیس بھی ختم کر دیا گیا۔

جی ایس ٹی کی شروعات یکم جولائی 2017 کو ہوئی تھی۔ اس کے تحت مرکز اور ریاستوں کے متعدد بالواسطہ ٹیکسوں کو ایک مربوط نظام میں لایا گیا اور ملک میں ایک مشترکہ قومی مارکیٹ تیار کی گئی۔ اس کے بعد سے جی ایس ٹی کی شرحوں، طریقہ کار اور تکنیکی نظام میں کئی تبدیلیاں کی جا چکی ہیں۔

سرکاری اعداد و شمار کے مطابق، جی ایس ٹی کے تحت رجسٹرڈ ٹیکس دہندگان کی تعداد 2017 میں تقریباً 66.5 لاکھ تھی، جو مئی 2026 تک بڑھ کر 1.65 کروڑ ہو گئی۔

جی ایس ٹی میں اصلاحات پر غور کے لیے جی ایس ٹی کونسل کی قانون سے متعلق کمیٹی نے جی ایس ٹی قوانین کے تحت مجرمانہ زمرے میں رکھے گئے افعال کو غیر مجرمانہ بنانے اور نفاذ سے جڑے التزامات میں تبدیلی کی تجاویز پر غور کیا ہے۔ کونسل کے اس آئندہ اجلاس میں اس پر بحث ہو سکتی ہے۔ اس میں سنٹرل گڈز اینڈ سروسز ٹیکس (سی جی ایس ٹی) ایکٹ کی دفعہ 69 کے تحت دستیاب گرفتاری کے آزادانہ اختیار کو ہٹانے کا امکان بھی شامل ہے۔

فی الحال دفعہ 69 کے تحت کمشنر کو ایسے شخص کو گرفتار کرنے کی اجازت دینے کا اختیار حاصل ہے، جس کے بارے میں یہ ماننے کی ٹھوس وجہ ہو کہ اس نے سی جی ایس ٹی ایکٹ کی دفعہ 132 کے تحت متعین جرم کیا ہے۔ فرضی انوائس، فرضی طریقے سے ان پٹ ٹیکس کریڈٹ حاصل کرنے یا اس کا غلط استعمال کرنے جیسے سنگین معاملات میں اس التزام کا استعمال کیا گیا ہے۔

یواین آئی۔الف الف

سری نگر، 5 اکتوبر (یو این آئی) جموں و کشمیر کے بارہمولہ ضلع میں پولیس نے مقررہ ضوابط کی پابندی یقینی بنانے اور غیر قانونی سرگرمیوں کی روک تھام کے لیے مختلف کاروباری اداروں میں جانچ اور معائنہ مہم چلائی۔

پولیس نے بتایا کہ یہ جانچ اور معائنہ بارہمولہ تھانہ اور وسن پولیس چوکی کے دائرہ اختیار میں کیا گیا۔

بارہمولہ تھانے کی پولیس نے موبائل فون کی دکانوں، سم فروخت کرنے والوں اور جراثیم کش ادویات کے ڈیلروں کا معائنہ کیا، جبکہ وسن پولیس چوکی کی جانب سے موبائل مرمت کی دکانوں اور موبائل فون فروخت کرنے والوں کی جانچ کی گئی۔

معائنے کے دوران دکانداروں اور فروخت کنندگان کو ہدایت دی گئی کہ وہ ضابطوں کے مطابق تمام لازمی ریکارڈ اور رجسٹر برقرار رکھیں، جن میں صارفین اور آلات سے متعلق مکمل تفصیلات بھی شامل ہیں۔

پولیس نے اداروں سے مشتبہ لین دین اور سرگرمیوں کے خلاف بیدار رہنے اور قانون نافذ کرنے والے اداروں کے ساتھ تعاون کرنے کے لئے بھی کہا، تاکہ موبائل فون، سم خدمات اور جراثیم کش ادویات کے غیر قانونی مقاصد کے لیے غلط استعمال کو روکا جا سکے۔

پولیس نے بتایا کہ ضابطوں کی پابندی کو مضبوط بنانے اور تجارتی خدمات و مصنوعات کے غلط استعمال کو روکنے کے لیے ضلع بھر میں اس طرح کی جانچ اور معائنہ مہم جاری رہے گی۔

یو این آئی۔ این یو۔