جموں کشمیر کے انتظامی امور چلانے کیلئے قوانین وضع
نوٹیفیکیشن جاری،پبلک آرڈر،پولیس، آل انڈیا سروسز اور انسدادِرشوت بیورو کا کنٹرول براہ راست لیفٹیننٹ گورنر کو دے دیاگیا
خبراردو:-

سرینگر:جموں وکشمیر تنظیم نو ایکٹ2019 کے تحت مرکزی حکومت نے جمعہ کو ایک غیر معمولی فیصلے کے ذریعے جموں کشمیر کے انتظامی امور چلانے کے حوالے سے قوانین وضع کردیئے۔مرکزی وزارت داخلہ نے اس ضمن میں باضابطہ طور ایک نوٹیفیکیشن جاری کی جسکے تحت پبلک آرڈر،پولیس، آل انڈیا سروسز اور انسدادِرشوت بیورو کو لیفٹیننٹ گورنر کے براہ راست کنٹرول میں دے دیا۔

کشمیر نیوز سروس کے مطابق مرکزی وزارتِ داخلہ نے جمعہ کے روزجموں کشمیر میں انتظامی امور چلانے کیلئے قوانین جاری کرتے ہوئے پبلک آرڈر، پولیس، آل انڈیا سروسز اور انسدادرشوت بیورو کو لیفٹیننٹ گورنرمنوج سنہا کے براہ راست کنٹرول میں دے دیا۔

اس سلسلے میں مرکزی وزارت ِ داخلہ نے ایک نوٹیفیکیشن بھی جاری کی۔مرکزی داخلہ سیکریٹری، اجے بھلا نے جموں وکشمیر تنظیم نو ایکٹ2019کے تحت نوٹیفیکیشن کے ذریعے قوانین جاری کرتے ہوئے واضح کیا کہ اگر کسی معاملے کو لیکر لیفٹیننٹ گورنر اور وزراء کونسل(جب وہ قائم کی جائے) کے مابین اختلاف پیدا ہو تو وہ معاملہ مرکز کو روانہ کیا جائے گا تاکہ صدر ہندکا موقف حاصل کرکے اْس پر عمل در آمدکیا جائے۔

مرکزی وزارت داخلہ کی نوٹیفکیشن میں مزید کہا گیا ہے کہ مرکز ی زیر انتظام جموں و کشمیر کے39محکمے ہیں جن میں بشمول ایگریکلچر، سکول ایجو کیشن،اعلیٰ تعلم،ہارٹیکلچر،فلوری کلچر، الیکشن،جنرل ایڈمنسٹریشن،داخلہ،مائننگ،پاؤر،پی ڈبلیو ڈی،ٹرانسپورٹ اور قبائیلی امور شامل ہیں۔یاد رہے کہ جموں کشمیر کی خصوصی آئینی حیثیت5اگست2019کو ختم کرکے خطے کو مرکز کے زیر انتظام 2 خطوں میں تقسیم کیا گیا۔

جموں وکشمیر کو اسمبلی اختیارات کیساتھ مرکزی زیر انتظام علاقہ قرار دیا گیا جبکہ خطہ لداخ کو اسمبلی اختیارات کے بغیر مرکزی زیر انتظام علاقہ قرار دیا گیا ہے۔بعد ازاں مرکزی زیر انتظام علاقوں نے31اکتوبر2019کوکام کرنا شروع کیا۔جموں وکشمیر کے پہلے لیفٹیننٹ گورنر جے سی مرمو نے اپنی ذمہ داریوں کا عہدہ سنبھالا تھا،تاہم 9ماہ بعد ہی لیفٹیننٹ گورنر کی تبدیلی میں لاکر15اگست2020کو منوج سنہا کو جموں وکشمیر کا دوسرا لیفٹیننٹ گورنر مقرر کیا گیا۔مرکزی وزارت ِ داخلہ کی نوٹیفیکیشن میں بتایا گیا ہے کہ لیفٹیننٹ گورنر کو پولیس، پبلک آرڈر، آل انڈیا سروسز اور انسداد رشوت ستانی بیورو کا براہ راست کنٹرول سونپا گیا ہے۔

لیفٹیننٹ گورنر ہی وزیر اعلیٰ کے مشورے پر(جب وہ منتخب ہو) وزرا ء کے قلمدان تقسیم کریں گے اور انہیں مختلف محکموں کے چارج دیں گے۔نوٹفکیشن کے مطابق مرکز کی طرف سے بشمول وزیر اعظم اور دیگر وزراء کی طرف سے حاصل ہونے والی سبھی اطلاعات سیکریٹری کے ذریعے چیف سیکریٹری، انچارج وزیر، چیف منسٹر اور لیفٹیننٹ گورنر تک پہنچنی چاہئے۔نوٹیفیکیشن کے مطا بق چیف سیکریٹری کو چاہئے کہ وہ مرکز اور مرکز ی زیر انتظام جموں کشمیر کی انتظامیہ کے مابین کسی بھی ممکنہ اختلافی معاملے کو جلد ازجلد لفٹیننٹ گورنر اور وزیر اعلیٰ کی نوٹس میں لائیں۔

لیفٹیننٹ گورنر اور وزیر اعلیٰ کے مابین کسی بھی اختلافی معاملہ کو لیکر دو ہفتوں کے اندر زیر بحث لانے اور اس کو حل کرنے کی ذمہ داری لیفٹیننٹ گورنر پر عائد ہوگی جبکہ کسی بھی اختلافی معاملہ کو مرکز کے پاس بھی بھیجا جاسکتا ہے تاکہ اْس کے بارے میں صدر ہند کی رائے حاصل کی جاسکے۔