امشی پورہ شوپیان میں جاں بحق کئے گئے راجوری کے 3نوجوانوں جن میں ایک کم عمر بھی ہے، کی نعشیں سنیچر کی علی الصبح75روز بعد قبر کشائی کے بعد لواحقین کے سپرد کر دی گئیں۔اس دوران جونہی جاں بحق کئے گئے تینوں نوجوانوں کی میتیں آبائی گاؤں پہنچا ئی گئیں،تو وہاں کہرام اور صف ماتم بچھ گئی۔بعد ازاں پُر نم آنکھوں کیساتھ تینوں جاں بحق نوجوانوں کی میتوں کو اپنے اپنے آبائی قبرستانوں میں سپرد خاک کیا گیا۔اس دوران جاں بحق کئے گئے لواحقین نے انصاف کے تقاضے پورے کرنے کا مطالبہ کرتے ہوئے کہا کہ قصور واروں کو قرار واقعی سزا ملنی چاہئے۔کشمیر نیوز سروس کے مطابق پیر پنچال کے پہاڑی وسرحدی ضلع راجوری سے تعلق رکھنے والے اْن3 مزدوروں کی لاشیں سنیچرکی علی الصبح قبر کشائی کے بعد لواحقین کے سپرد کی گئیں جنہیں جنوبی ضلع شوپیان کے امشی پورہ علاقے میں 18 جولائی کے دوران فرضی جھڑپ میں جاں بحق کیا گیا تھا۔اطلاعات کے مطابق قبر کشائی کا عمل صبح چھ بجے شیری بارہمولہ میں شروع ہوا جہاں اْنہیں دفن کیا گیا تھا۔یاد رہے کہ یہ وہ قبرستان ہے،جہاں غیر مقامی اور عدم شناخت عسکریت پسندوں کو دفن کیا جاتا ہے جو فورسز کیساتھ مختلف معرکہ آرائیوں میں جاں بحق ہوتے ہیں۔قابل ذکر ہے کہ رواں برس کے18جولائی کو فوج نے دعویٰ کیا تھا کہ اْنہوں نے امشی پورہ شوپیان میں ایک معرکہ آرائی کے دوران3عدم شناخت جنگجوؤں کو جاں بحق کیا ہے۔تاہم تینوں کی لاشوں کی تصاویر سوشل میڈیا پر وائرل ہونے کے بعد راجوری ضلع کے 3 گھرانوں نے دعویٰ کیا کہ مہلوکین جنگجو نہیں بلکہ اْن کے افراد خانہ ہیں جو مزدوروی کی غرض سے شوپیان گئے ہوئے تھے۔انہوں نے تینوں کی شناخت20سالہ امتیاز احمد، 25سالہ ابرار احمد اور 16سالہ محمد ابرار کے طور کرتے ہوئے الزام عائد کیا کہ تینوں کو فورسز نے فرضی معرکہ آرائی کے دوران جاں بحق کیا ہے۔ اس الزام کے بعد فوج اور پولیس نے الگ الگ اس معرکہ آرائی کی تحقیقات شروع کیں جس کے دوران یہ بات سامنے آگئی کہ تینوں کا تعلق راجوری سے ہی تھا اور25ستمبر کو تینوں کے ڈی این اے نمونے اْن کے والدین کے ڈی این اے نمونوں سے میل کھا گئے۔بعد ازاں متعلقہ گھرانوں کی طرف سے لاشوں کا مطالبہ کیا گیا جس کے بعد سبھی قانونی لوازمات پوری کرنے کے بعد ہلاکت کے75روز بعد قبر کشائی کے ذریعے لاشیں نکال کر لواحقین کے سپرد کی گئیں۔غور طلب بات یہ ہے کہ18ستمبر کو فوج نے کورٹ آف انکوائری کے بعد کہا تھا کہ اس آپریشن میں قواعد کی خلاف ورزی کی گئی اور آرمڈ فورسز اسپیشل پاورز ایکٹ 1990 سے تجاوز کیا گیا۔اس خصوصی قانون کے تحت فوج کو جموں و کشمیر میں بے پناہ اختیارات حاصل ہیں۔بیان میں کہا گیا کہ فوج کے وضع کردہ طریقہ کار کی بھی خلاف ورزی کی گئی جس کی پاداش میں اس آپریشن میں شامل افسران اور سپاہیوں کے خلاف آرمی ایکٹ کے تحت تادیبی کارروائی کی جائے گی۔ڈی جی پی نے گزشتہ دنوں کہا تھا کہ امشی پورہ شوپیان معاملے کی تحقیقات آخری مرحلے میں ہیں۔اس دوران شوپیان میں اس معاملے کی نسبت2افراد کو گرفتار کیا ہے،جنہیں عدالت میں پیش کر نے کے بعد 8روز کے لئے جوڈیشل ریمانڈ میں لیا گیا۔ادھر جونہی تینوں جاں بحق کئے گئے نوجوانوں کی میتیں آبائی گاؤں پہنچائی گئیں،تو وہاں کہرام اور صف ماتم بچھ گئی۔اطلاعات کے مطابق تینوں جاں بحق کئے گئے نوجوانوں کی میتیں آبائی قبرستانوں میں پُرنم آنکھوں کیساتھ سپرد خاک کیا۔اس دوران یہ مطالبہ لواحقین نے دوہرا یا کہ قصور واروں کو قرار واقعی سزا دی جائے۔