سری نگرامر سنگھ کلب سری نگر میں ڈیجیٹل ایڈکشن کے موضوع پر ایک پروگرام منعقد ہوا جس دوران اس اہم موضوع پر معروف معالجین نے کہاکہ ڈیجیٹل ڈیوائسز خاص کر موبائیل فون کے زیادہ استعمال کی وجہ سے بچے اور معمر شہری مختلف امراض کا شکار ہو رہے ہیں ۔

ڈاکٹر رازدان نے اس موقع پر کہاکہ موبائیل فون کے برے اثرات سے بچنے کی خاطر سائیکلنگ، تیراکی، ورزش ، فٹ بال اور کرکٹ جیسے کھیل کود اور دیگر سرگرمیوں کی طرف لوگوں کو اپنی توجہ مرکوز کرنی چاہئے۔

اطلاعات کے مطابق امر سنگھ کلب سری نگر میں ڈیجیٹل ایڈکشن (ایک وبائی بیماری)کے موضوع پر ایک پروگرام منعقد ہوا۔

کلب کے سیکریٹری ناصر حامد خان نے شرکا کا خیر مقدم کرتے ہوئے ڈاکٹر سشیل رازدان کی خدمات کو سراہتے ہوئے کہاکہ ڈاکٹر صاحب کے والد مرحوم ست لال رازدان جنہیں پیار سے ماسٹر جی کے نام سے بھی جانا جا تا تھا نے اپنی رہنمائی کے ذریعے کشمیری سماج کی کئی نسلوں کو متاثر کیا ہے۔

انہوں نے کہاکہ ڈاکٹر سشیل رازدان نے اپنے والد مرحوم کے مشن کو آگے بڑھایا اور کشمیر ی لوگوں کے لئے محبت اور احترام کے رشتوں کو مزید مضبوط و مستحکم کیا۔

ان کے مطابق کشمیری عوام ڈاکٹر رازدان کے خاندان کے مقروض ہیں۔

اس موقع پر ظفر شاہ نے کہاکہ اگر ڈیجیٹل ٹیکنالوجی سے منفی اثرات مرتب ہو رہے ہیں تو اس کا حل کیا ہے ۔

انہوں نے کہاکہ اس مسئلے کو حل کرنے کے لئے والدین ، عوام الناس اور حکومت کے تعاون کی اشد ضرورت ہے۔

ظفر شاہ کے مطابق آج کل بچے زیادہ تر وقت ان ہی اسکرینوں پر صرف کرتے ہیں اور اس کا ان پر اثر پڑتا ہے ۔ انہوں نے کہاکہ موبائیل فون کے زیادہ استعمال سے پیدا ہونے والی جسمانی کیفیت کے علاوہ اس سے بچے کے ذہن پر منفی اثرات مرتب ہو رہے ہیں۔

ان کے مطابق سری نگر میں پیدل چلتے یا پھر گاڑی چلاتے ہوئے دس لڑکیوں اور لڑکوں میں سے سات موبائیل فون کا استعمال کرتے ہوئے دیکھے جاتے ہیں ۔

پروگرام سے خطاب کے دوران معروف معالج ڈاکٹر سشیل رازدان نے کہاکہ گزشتہ چند دہائیوں میں ڈیجیٹل ٹیکنالوجی نے زندگی کو بدل کر رکھ دیا ہے۔

پہلے ہم ٹیکنالوجی استعمال کرتے تھے لیکن آج کل ہم ڈیجیٹل ٹیکنالوجی استعمال نہیں کر رہے ہیں بلکہ ڈیجیٹل ٹیکنالوجی ہمیں استعمال کر رہی ہے اور یہ کوئی معمولی بات نہیں ۔

انہوں نے شرکاءسے مخاطب ہوتے ہوئے کہاکہ ڈیجیٹل ٹیکنالوجی کے دور میں پید ا ہونے یا پرورش پانے والے بچوں کو ڈیجیٹل مقامی کہا جاتا ہے ۔

انہوں نے مزید بتایا کہ آج کل ڈیجیٹل ڈیوائسز استعمال کرنے کو ترجیح دی جارہی ہیں جس کے نتیجے میں ذہنی ، جسمانی اور تعلیمی نشود نما پر برے اثرات مرتب ہو رہے ہیں۔

ڈاکٹر سشیل رازدان نے کہاکہ ڈیجیٹل ڈیوائسز کا استعمال بچوں کو نشے میں مبتلا کرنے کا باعث بن رہا ہے اور ایم آر آئی اور دیگر ٹیسٹوں کے ذریعے اب یہ بات سائنسی طورپر بھی ثابت ہو چکی ہے ۔

عمر رسیدہ لوگوں کی طرف سے ڈیجیٹل آلات کے استعمال کے حوالے سے ڈاکٹر سشیل رازدان نے کہاکہ اس کے نتیجے میں جسمانی اور نفسیاتی بیماری جیسے سردرد، گردن میں درد ، نیند میں خلل ، بے چینی، اداسی، جنونی کیفیت ، سماجی میل جول میں کمی اور جاریحانہ رویہ پیدا ہورہا ہے۔

ڈاکٹر رازدان نے حاضرین کو بتایا کہ جب تک بچہ پانچ سال کی عمر پار نہ کریں تب تک اس کو موبائیل فون کے استعمال سے دور رکھا جائے۔

انہوں نے کہاکہ بچوں کو بیرونی سرگرمیاں جیسے سائیکلنگ، تیراکی، ورزش ، فٹ بال اور کرکٹ جیسے کھیل کود اور دیگر سرگرمیوں کی طرف راغب کریں ۔

ڈاکٹر قیصر احمد نے اس موقع پر کہاکہ ڈیجیٹل ڈیوائسز کے استعمال کا مسلہ دراصل ایک سے 18سال کی عمر کے افراد میں کافی سنگین پایا گیا ۔ انہوں نے کہاکہ ہم دیکھتے ہیں کہ چار سے چھ سال کے بچے فون پر توجہ مرکوز کرنے کی کوشش کرتے ہیں جس کی وجہ سے ان کا دماغ متاثر ہو رہا ہے۔

انہوں نے کہاکہ موبائیل فون کے استعمال سے آنکھوں پر بھی منفی اثرات مرتب ہوتے ہیں اور بعض صورتوں میں ان کے ذہن ڈیجیٹل ڈیوائس کو اپنے والدین سمجھ رہے ہیں۔

انہوں نے کہاکہ بصارت اور سماعت کی خرابی، موٹا پا، ہابیر ایکٹیویٹی، بچوں میں زیادہ جاریحانہ رویہ ، ڈپرشن اور پریشانی ، سماجی مہارتوں اور تعلقات میں کمی اور یاداشت کم ہونے واقعات میں تیزی سے اضافہ ہورہا ہے۔

ڈاکٹر نوید شاہ نے اس موقع پر کہاکہ آج کل یہ مسئلہ صرف بچوں تک ہی محدود نہیں بلکہ بڑوں اور بزرگوں کا بھی یہی حال ہے اور اس مسئلے کو حل کرنا وقت کی اہم ضرورت ہے۔

انہوں نے کہاکہ ڈیجیٹل ڈیوائسز کے استعمال کی وجہ سے جسم کمزور ہوتا ہے جس کے نتیجے میں مختلف بیماریاں بھی سماج میں پھیل رہی ہے۔

ان کے مطابق والدین کو چاہئے کہ وہ بچوں کو موبائیل فون کے استعمال سے پرے رکھنے کی کوشش کریں ۔

انہوں کے مطابق ڈیجیٹل لت کے خطرات کے بارے میں بیداری پیدا کرنا اور متوازن طرز زندگی کی وکالت کرنا ایک صحت مند معاشرے کی علامت ہے۔

ڈاکٹر ماجد شاہ نے اپنے خیالات کا اظہار کرتے ہوئے کہاکہ سمارٹ فونز کے زیادہ استعمال سے نیند میں کمی، ڈپرشن، اضطراب اور دوسری بیماری پیدا ہو سکتی ہے۔

انہوں نے کہاکہ ڈیجیٹل میڈیا کے صحت مند استعمال کے بارے میں بچوں اور بڑوں کے لئے طبی رہنما خطوط ناگزیر ہے۔

انہوں نے آسٹریلیا کی مثال دی جہاں 16 سال کی عمر تک سوشل میڈیا پر پابندی لگا دی گئی ہے۔

انہوں نے کہا کہ ڈیجیٹل ٹکنالوجی کے استعمال کے لیے رہنما اصولوں کی ضرورت ہے کیونکہ ہم اسے غیر منظم ہونے کی اجازت نہیں دے سکتے۔ انہوں نے بچوں کی پرورش مناسب ماحول میں کرنے کی ضرورت پر زور دیا۔

ڈاکٹر طارق ترمبو نے اپنے طبی تجربے کا اشتراک کرتے ہوئے کہا کہ نوجوانوں میں بہت سے عضلاتی امراض ظاہر ہو رہے ہیں، خاص طور پر گردن میں درد ۔

انہوں نے شرکاءکو بتایا کہ جب ہم اپنے اسمارٹ فون کو دیکھنے کے لیے اپنی گردن کو موڑتے ہیں تو گردن کا ساٹھ ڈگری موڑ آپ کی گردن پر 27 کلوگرام کے برابر بوجھ ڈالتا ہے جو آپ کے پہلووں کے جوڑوں پر اثر انداز ہوتا ہے جس کے نتیجے میں جوڑوں کا درد شروع ہو جاتا ہے۔

ڈاکٹر نجیب درابو نے بتایا کہ اسمارٹ فونز اور ڈیجیٹل ٹیکنالوجی کے زیادہ استعمال کے نتیجے میں کلائی کے اعصاب میں پھنسنے، گردن اور ریڑھ کی ہڈی کے مسائل میں مبتلا مریضوں میں اضافہ ہوا ہے۔

انہوں نے کہا کہ میں نے خود ڈیجیٹل استعمال کے اثرات کو محسوس کیا ہے جس کی وجہ سے ان کی توجہ کا دورانیہ کم ہو گیا ہے۔

ڈاکٹر خورشید احمد نے کہا کہ اسمارٹ فونز کا انحصار ہر گزرتے دن کے ساتھ بڑھتا جارہا ہے اور اب یہ نہ صرف ایک دوسرے سے رابطے کے آلات ہیں بلکہ ایک سماجی ضمنی ڈیوائس میں تبدیل ہوگئے ہیں۔

انہوں نے کہا کہ ہماری آنکھیں سب سے پہلے اس سے متاثر ہونے والے اعضا ہیں۔

یو این آئی، ارشید بٹ