واشنگٹن، امریکی عہدیدار کے مطابق وینزویلا اپنی یومیہ 12 لاکھ 50 ہزار بیرل تیل کی پیداوار میں سے 5 لاکھ سے زائد بیرل خلیجِ میکسیکو کے ساحلی علاقوں میں قائم ریفائنریوں کو بھیج رہا ہے۔

ایک اعلیٰ امریکی عہدیدار کے مطابق وینزویلا اپنی تیل کی پیداوار کا تقریباً نصف حصہ امریکہ برآمد کر رہا ہے۔ یہ پیش رفت واشنگٹن کی جانب سے صدر نکولس مادورو کو حراست میں لیے جانے اور کراکس میں عبوری حکومت قائم کیے جانے کے سات ماہ بعد سامنے آئی ہے۔

امریکی محکمہ توانائی کے انڈر سیکریٹری کائل ہاوسٹویٹ نے منگل کو ہیوسٹن میں تیل کی صنعت سے متعلق ایک تقریب سے خطاب کرتے ہوئے کہا کہ وینزویلا سے اب روزانہ 5 لاکھ سے زائد بیرل تیل امریکہ پہنچ رہا ہے، جبکہ ملک کی مجموعی یومیہ پیداوار تقریباً 12 لاکھ 50 ہزار بیرل ہے۔

انہوں نے کہا کہ یہ تیل ایسی ریفائنریوں کو بھیجا جا رہا ہے جو ’’خاص طور پر اسی قسم کے خام تیل کو پراسیس کرنے کے لیے بنائی گئی ہیں‘‘۔

امریکی انرجی انفارمیشن ایڈمنسٹریشن کے مطابق وینزویلا کے پاس دنیا کے سب سے بڑے ثابت شدہ تیل کے ذخائر موجود ہیں، جن کا تخمینہ 303 ارب بیرل ہے۔ یہ عالمی ذخائر کا تقریباً 17 فیصد بنتے ہیں۔

تاہم کئی دہائیوں تک سرمایہ کاری کی کمی اور امریکی پابندیوں کے باعث وینزویلا کی پیداوار عالمی پیداوار کے تقریباً ایک فیصد تک محدود ہو گئی تھی۔ 2025 کے اختتام پر ملک میں روزانہ تقریباً 10 لاکھ بیرل تیل پیدا ہو رہا تھا، جس میں سے تقریباً ایک لاکھ 35 ہزار بیرل یومیہ امریکہ بھیجا جاتا تھا۔

وینزویلا کا خام تیل بھاری اور زیادہ سلفر والا ہوتا ہے، جسے پراسیس کرنے کے لیے امریکی خلیجی ساحل کی ریفائنریاں خاص طور پر تیار کی گئی ہیں۔ اس لیے وینزویلا سے تیل کی درآمد دوبارہ شروع ہونا ان ریفائنریوں کے لیے براہ راست فائدہ مند ہے۔

ہاوسٹویٹ نے کہا کہ واشنگٹن وینزویلا میں تیل کی پیداوار بڑھانے میں بھی مدد کر رہا ہے۔ ان کے مطابق امریکہ روزانہ ایک لاکھ بیرل سے زائد نیفتھا وینزویلا بھیج رہا ہے، جسے وہاں بھاری خام تیل کے ساتھ ملایا جاتا ہے۔انہوں نے اس انتظام کو ’’ایک خوبصورت توانائی شراکت داری‘‘ قرار دیتے ہوئے کہا کہ ’’دونوں جانب تجارت سے حقیقی قدر پیدا ہو رہی ہے‘‘۔

اسی تقریب میں وینزویلا کے حکام نے کہا کہ ملک اپنی تیل کی پیداوار میں مزید اضافہ کرنے کی امید رکھتا ہے۔

سرکاری تیل کمپنی پی ڈی وی ایس اے کے نائب صدر جووانی مارٹینیز نے کہا کہ اگست کے اختتام تک وینزویلا کی خام تیل کی پیداوار 12 لاکھ 45 ہزار بیرل یومیہ تک پہنچ جائے گی، جبکہ رواں سال تیل کی برآمدات میں 19.7 فیصد اضافہ ہوا ہے۔

انہوں نے بتایا کہ رواں سال اب تک ایندھن کی پیداوار میں 12.9 فیصد اضافہ ہوا ہے، جبکہ ملک میں مقامی طور پر دستیاب ایندھن میں 5.4 فیصد اضافہ ہوا ہے۔

جاری۔ یو این آئی۔ ع ا۔

واشنگٹن، سات ترک امریکی تنظیموں نے امریکی کانگریس کے اراکین کو بھیجے گئے ایک خط میں قانون سازوں پر زور دیا ہے کہ وہ ترکیہ کو ایف-35 جنگی طیاروں کی فروخت کی حمایت کریں۔

خط میں کہا گیا ہے کہ “تقریباً 75 سالہ نیٹو اتحادی اور ایک سیکورٹی اور سفارتی شراکت دار کے طور پر جمہوریہ ترکیہ کی امریکی دفاعی نظام تک مسلسل رسائی بنیادی امریکی اسٹریٹجک مفادات کے عین مطابق ہے ، اس لیے ہم احترام کے ساتھ درخواست کرتے ہیں کہ آپ امریکی ایف-35 جنگی طیاروں کی زیر التوا فروخت کی حمایت کریں اور اس تعاون کی راہ میں حائل غیر ضروری پابندیوں اور رکاوٹوں کو دور کریں۔”

خط میں مزید کہا گیا ہے کہ اس سودے کی حمایت کرنا نیٹو کے اتحاد، علاقائی استحکام اور حقیقی و بڑھتی ہوئی قدر کے حامل دوطرفہ تعلقات میں ایک سرمایہ کاری ہے، ہم آپ کی حمایت کے طلبگار ہیں اور اس معاملے پر مزید بات چیت کے موقع کا خیرمقدم کرتے ہیں۔”

اس خط پر اسمبلی آف ٹرکش امریکن ایسوسی ایشنز، ٹرکش امریکن کوالیشن، فیڈریشن آف ٹرکش امریکن ایسوسی ایشنز، ٹرکش امریکن نیشنل اسٹیرنگ کمیٹی، مو سیاد یو ایس اے، ٹرکش امریکن چیمبر آف کامرس آف دی ساؤتھ اور اسکون یو ایس اے نے دستخط کیے۔

امریکہ نے 2019 میں ترکیہ کی جانب سے روسی ایس-400 فضائی دفاعی نظام کی خریداری پر اعتراض کے بعد اسے ایف-35 پروگرام سے معطل کر دیا تھا؛ امریکہ کا دعویٰ تھا کہ مذکورہ نظام جنگی طیاروں کو خطرے میں ڈالے گا اور یہ نیٹو سسٹمز کے ساتھ ہم آہنگ نہیں ہے۔

ترکیہ نے بارہا کہا ہے کہ دونوں نظاموں کے درمیان کوئی ٹکراؤ نہیں ہے اور اس معاملے کی جانچ کے لیے ایک کمیشن قائم کرنے کی پیشکش کی تھی۔

یو این آئی۔ ع ا۔

سیول، جنوبی کوریا اور امریکہ نے جاری الچی فریڈم شیلڈ (یوایف ایس) مشترکہ فوجی مشقوں کا دورانیہ 11 دن سے گھٹا کر پانچ دن کرنے کا فیصلہ کیا ہے۔

جنوبی کوریا کے جوائنٹ چیفس آف اسٹاف (جے سی ایس) کے حوالے سے کے بی ایس براڈکاسٹر نے بتایا کہ یہ فیصلہ امریکی فریق کی تجاویز پر کیا گیا ہے۔ اس کے ساتھ ہی، فیلڈ ٹریننگ مشقوں کی تعداد بھی نصف کر دی جائے گی۔ پیر سے شروع ہونے والی یہ فوجی مشقیں پہلے 27 اگست تک جاری رہنے والی تھیں۔ جے سی ایس نے بتایا کہ مشترکہ فیلڈ ٹریننگ ایکسرسائز (ایف ٹی ایکس) کی مدت میں بھی جزوی طور پر کمی کا فیصلہ کیا گیا ہے اور دونوں فریق فی الحال اس کی تفصیلی ترتیب پر ہم آہنگی پیدا کر رہے ہیں۔

براڈکاسٹر کے مطابق اس کٹوتی کا اثر زیادہ تر مجوزہ فیلڈ مشقوں پر پڑے گا۔ رواں سال پہلے ہی ان کی تعداد 17 سے گھٹا کر 14 کر دی گئی تھی۔ اب 14 مجوزہ مشترکہ فیلڈ مشقوں میں سے آدھے سے زیادہ کے منسوخ ہونے کا امکان ہے۔ جے سی ایس نے یہ بھی بتایا کہ مشترکہ کمان جنگی وقت کی کمان کے دو مراکز— سی پی ٹیگو اور کیمپ ہمفریز—کا استعمال کرتے ہوئے مشقیں کر رہی ہے۔ براڈکاسٹر کے مطابق، یوایف سی کے دوران عموماً مشترکہ کمان کا ہیڈ کوارٹر صرف سی پی ٹیگو میں ہوتا تھا، لیکن اس بار امریکی جانب سے کیمپ ہمفریز کو بھی استعمال کرنے پر زور دیا گیا ہے۔

براڈکاسٹر نے مشقوں میں کٹوتی کے فیصلے کو امریکی صدر ڈونلڈ ٹرمپ کے حالیہ حکم سے جوڑتے ہوئے بتایا کہ انہوں نے امریکہ-جنوبی کوریا کی مشترکہ فوجی مشقوں کی سطح کرم کرنے کی ہدایت دی ہے۔

گزشتہ 16 اگست کو مسٹر ٹرمپ نے سوشل میڈیا ‘ٹروتھ’ پر کہا تھا کہ شمالی کوریا کے لیڈر کم جونگ ان کے ساتھ ان کے “بہت اچھے تعلقات” ہیں اور انہیں جنوبی کوریا کے ساتھ مشترکہ فوجی مشقوں میں حصہ لینے کے امریکہ کے دیرینہ معاہدے پر اعتراض ہے۔ امریکی صدر نے امریکی وزیر دفاع پیٹ ہیگسیٹھ کو دونوں ممالک کی مشترکہ فوجی مشقوں کی سطح کو کافی حد تک کم کرنے کی ہدایت کی ہے۔

یواین آئی۔الف الف