جموں،وزیر اعظم نریندر مودی نے جموں و کشمیر کے ضلع ریاسی میں منعقدہ ایک شاندار تقریب میں 46 ہزار کروڑ روپے سے زائد مالیت کے ترقیاتی منصوبوں کا سنگِ بنیاد رکھا، متعدد منصوبوں کا افتتاح کیا اور کئی دیگر قوم کے نام وقف کیے۔ اس موقع پر انہوں نے چناب ریل پل (دنیا کا سب سے اونچا ریل آرچ پل) اور انجی پل (بھارت کا پہلا کیبل اسٹے ریل پل) کا افتتاح کیا، اور کٹرا سے وادی کشمیر کے درمیان وندے بھارت ٹرین سروس کو جھنڈی دکھا کر روانہ کیا۔ انہوں نے جموں میں نئے میڈیکل کالج کا بھی سنگِ بنیاد رکھا۔

اس موقع پر وزیر اعظم نے کہا کہ دشوار گزار پہاڑی علاقوں اور برفانی موسم کے باوجود اس پروجیکٹ کو مکمل کیا گیا، جو بھارتی انجینئروں اور مزدوروں کی عظمت کا ثبوت ہے۔

انہوں نے چناب پل کو ایفل ٹاور سے بھی بلند قرار دیا اور کہا کہ یہ پل نہ صرف انفراسٹرکچر کا شاہکار ہے بلکہ ایک سیاحتی مرکز بھی بنے گا۔انہوں نے انجی پل کو بھارت کا پہلا کیبل اسٹے ریل پل قرار دیتے ہوئے اسے بھی انجینئرنگ کا کمال بتایا۔

وزیر اعظم نے کہا کہ یہ پل جموں و کشمیر میں ترقی کے گیٹ وے ثابت ہوں گے۔ ریل رابطہ بہتر ہونے سے سیاحت، باغبانی، دستکاری، اور دیگر شعبے ترقی کریں گے۔ انہوں نے کہا کہ اب کشمیری سیب، خشک میوہ جات اور پشمینہ شال بھارت کے کونے کونے تک کم لاگت میں پہنچ سکیں گی۔

وزیر اعظم نے ایک طالب علم کا حوالہ دیتے ہوئے کہا کہ کچھ دیہی علاقوں میں اب بھی ٹرین صرف ویڈیوز میں دیکھی جاتی ہے، مگر اب وہ اپنی آنکھوں سے اسے چلتا دیکھیں گے۔

وزیر اعظم نے جموں و کشمیر میں قائم کی گئی دو ریاستی سطح کی کینسر انسٹی ٹیوٹس اور سات نئے میڈیکل کالجوں کا ذکر کرتے ہوئے بتایا کہ ایم بی بی ایس نشستیں 500 سے بڑھا کر 1300 کر دی گئی ہیں۔ انہوں نے شری ماتا ویشنو دیوی انسٹی ٹیوٹ آف میڈیکل ایکسیلینس کی خدمات کو سراہا اور اعلان کیا کہ اس اسپتال کی گنجائش 300 سے بڑھا کر 500 بستروں کی جائے گی۔

انہوں نے پچھلے 11 سالوں میں کروڑوں افراد کو غربت سے نکالنے والے منصوبوں جیسے آواس یوجنا، اجولا اسکیم، آیوشمان بھارت، جل جیون مشن اور کسان سمان ندھی کا بھی تفصیلی ذکر کیا۔

وزیر اعظم نریندر مودی نے تاریخی آپریشن ’سندور‘ کو یاد کرتے ہوئے کہا کہ جب بھی پاکستان کو آپریشن سندور کا نام سنائی دے گا، اُسے اپنی ذلت آمیز شکست یاد آئے گی۔

انہوں نے کہا کہ پاکستان کے دہشت گرد نیٹ ورک اور فوجی حلقے بھارت کی اس دلیرانہ کارروائی کا تصور بھی نہیں کر سکتے تھے، مگر بھارت نے وہ کر دکھایا جو انہوں نے خواب میں بھی نہیں سوچا تھا۔

وزیر اعظم نے مزید کہا کہ دہائیوں کی محنت سے بنائی گئی دہشت گردی کی بنیادوں کو بھارت نے صرف چند منٹوں میں مٹی میں ملا دیا۔ پاکستان اس شدید ضرب سے بوکھلاہٹ اور مایوسی میں مبتلا ہو گیا، جس کے بعد اس نے جموں، پونچھ اور دیگر اضلاع میں عام شہریوں کو نشانہ بنانا شروع کر دیا۔

انہوں نے پاکستان کی درندگی کی شدید مذمت کرتے ہوئے کہا کہ پوری دنیا نے دیکھا کہ کس طرح پاکستان نے بےگناہ شہریوں کے گھروں کو تباہ کیا، اسکولوں اور اسپتالوں کو بمباری کا نشانہ بنایا، اور مندروں، مساجد اور گردواروں تک پر گولہ باری کی۔

وزیر اعظم مودی نے جموں و کشمیر کے عوام کے حوصلے اور استقامت کی بھرپور تعریف کرتے ہوئے کہا کہ پاکستان کی بربریت کا جس دلیری سے مقامی لوگوں نے مقابلہ کیا، وہ ہر بھارتی کے دل میں بس چکا ہے۔ انہوں نے یقین دلایا کہ ہر بھارتی شہری متاثرہ خاندانوں کے شانہ بشانہ کھڑا ہے اور ان کے ساتھ مکمل یکجہتی اور عملی تعاون جاری رکھا جائے گا۔

وزیر اعظم نے اعلان کیا کہ بارڈر فائرنگ سے متاثرہ خاندانوں کو مالی مدد دی جا رہی ہے، اور اب شدید نقصان والے گھروں کو دو لاکھ جبکہ جزوی نقصان والوں کو ایک لاکھ روپے اضافی مدد دی جائے گی۔ 10,000 نئے بنکروں کی تعمیر، دو نئی بارڈر بٹالینز اور دو خواتین بٹالینز کی تشکیل کا بھی اعلان کیا۔

انہوں نے کٹھوعہ-جموں ہائی وے کو چھ رویہ ایکسپریس وے اور اکھنور-پونچھ ہائی وے کو وسیع کرنے کے منصوبوں کا بھی اعلان کیا، ساتھ ہی 1800 کلومیٹر نئی سڑکیں بنائی جا رہی ہیں جن سے 400 گاؤں کو ہر موسم میں جوڑا جائے گا۔

وزیر اعظم نے ’آپریشن سندور‘ کو آتم نربھر بھارت کی طاقت کی علامت بتایا اور کشمیری نوجوانوں سے کہا کہ وہ مینو فیکچرنگ انقلاب میں شامل ہوں۔ انہوں نے ’مشن مینو فیکچرنگ‘ کی اہمیت بیان کی اور نوجوانوں کو جدید خیالات اور اختراعات کے ذریعے بھارت کو دنیا کے چوٹی کے دفاعی برآمد کنندگان میں شامل کرنے کا ہدف دیا۔

وزیر اعظم نے آخر میں کہا کہ مرکزی اور ریاستی حکومت مل کر جموں و کشمیر کو ترقی کی راہ پر لے جا رہے ہیں۔ انہوں نے ماتا ویشنو دیوی کے آشیرواد سے متاثر ہو کر اس وعدے کا اعادہ کیا کہ وہ جموں و کشمیر کو ترقی یافتہ بنانے کی ہر ممکن کوشش کریں گے۔

اس موقع پر لیفٹیننٹ گورنر منوج سنہا، وزیر اعلیٰ عمر عبداللہ، مرکزی وزرا اشونی ویشنو اور ڈاکٹر جتیندر سنگھ بھی موجود تھے۔

یو این آئی- ارشید بٹ