ہندوستان

رنگ، عقیدت اور روایت: ہندوستان ہولی کا استقبال کیسے کرتا ہے

Published

6 months ago

March 4, 2026

: موسمی چوہان

نئی دہلی، 4 مارچ (یو این آئی) جیسے ہی رنگوں کے تہوار ہولی کی آمد ہوتی ہے، شمالی ہند کے قصبے اور گاوں موسیقی، رقص اور رنگین گلال کی دلکش چمک سے جگمگا اٹھتے ہیں اتر پردیش کے متھرا اور وِرنداون سے لے کر راجستھان، بہار اور جھارکھنڈ کے علاقوں تک لوگ صدیوں پرانی روایات کے ساتھ اس تہوار کو مناتے ہیں، جو اس خطے کی متمول ثقافتی وراثت کی مظہر ہیں متھرا اور وِرندا ون، جو بھگوان کرشن کی جائے پیدائش اور کھیل کی سرزمین سمجھے جاتے ہیں، ہولی یہاں نہایت ہی عقیدت اور جوش و خروش کے ساتھ منائی جاتی ہے۔ یہاں تقریبات کئی دن پہلے ہی لٹھ مار ہولی سے شروع ہو جاتی ہیں جو ایک منفرد روایت ہے جس میں خواتین مزاحیہ انداز میں مردوں کو لاٹھیوں سے ہلکے وار کرتی ہیں اور مرد خود کو بچانے کی کوشش کرتے ہیں۔ اس دوران لوک گیت اور رقص جاری رہتے ہیں۔

گلیوں میں گلال، پچکاریوں اور روایتی مٹھائیوں جیسے گجیا اور مال پوا کے اسٹال سجے ہوتے ہیں۔ مندروں میں بھجن گائے جاتے ہیں اور کرشن کی مدح میں عقیدت کا اظہار کیا جاتا ہے۔ ان شہروں میں عقیدت اور تفریح ایک ساتھ نظر آتی ہیں جہاں عقیدت مند کرشن اور رادھا کی محبت کے احترام میں گاتے اور رقص کرتے ہیں۔

راجستھان میں ہولی شاہانہ انداز میں منائی جاتی ہے خاص طور پر جے پور، ادے پور اور پشکر جیسے شہروں میں۔ گھومر اور کالبیلیا جیسے لوک رقص رنگوں کے تبادلے کے ساتھ پیش کیے جاتے ہیں جب کہ مقامی بینڈ ڈھولک اور منجیرا جیسے روایتی ساز بجاتے ہیں۔

دیہی علاقوں میں ہولیکا دہن کی رسم بھی ادا کی جاتی ہے جس میں الاؤ جلایا جاتا ہے جو نیکی کی بدی پر فتح کی علامت ہے۔ لوگ آگ کے گرد جمع ہو کر لوک گیت گاتے ہیں اور اناج، ناریل اور دیگر نذرانے پیش کرتے ہیں۔ اگلے دن لوگ سڑکوں پر نکل کر ایک دوسرے کو رنگ لگاتے ہیں، یوں میل جول اور خوشی کی قدیم روایت کو برقرار رکھتے ہیں۔

بہار اور جھارکھنڈ میں ہولی روحانی اور سماجی جوش کے امتزاج کے ساتھ منائی جاتی ہے۔ پھاگوا جیسے روایتی گیت اور علاقائی لوک رقص اس موقع کی پہچان ہیں جبکہ کھُرما، گجیا اور ٹھنڈائی جیسی مقامی مٹھائیاں پڑوسیوں اور اہلِ خانہ میں تقسیم کی جاتی ہیں۔

دیہاتوں میں لوگ ہفتوں پہلے تیاری شروع کر دیتے ہیں، پھولوں، ہلدی اور جڑی بوٹیوں سے قدرتی رنگ تیار کرتے ہیں تاکہ تہوار ماحول دوست اور محفوظ رہے۔ جھارکھنڈ میں قبائلی اثرات بھی نمایاں ہوتے ہیں جہاں مقامی برادریاں ڈھول، بانسری اور اپنے مخصوص ردھم کو تقریبات کا حصہ بناتی ہیں۔

اتر پردیش میں متھرا اور وِرنداون کے علاوہ ہولی سماجی انداز میں منائی جاتی ہے۔ خاندان اور دوست ایک دوسرے کے گھروں کو جاتے ہیں، گلال اور پانی میں رنگ گھول کر رنگین پانی سے ہولی کھیلتے ہیں، مٹھائیاں تقسیم کرتے ہیں اور مبارکباد پیش کرتے ہیں۔ آگرہ اور کانپور جیسے شہروں میں مقامی فنکاروں کے ثقافتی پروگرام، قصہ گوئی اور لوک موسیقی بھی تقریبات کو چار چاند لگاتے ہیں۔

ان تمام ریاستوں میں ہولی کی ایک مشترکہ روحانیت نظر آتی ہے۔ یہ تہوار عمر، جنس اور سماجی حدود سے بالاتر ہو کر لوگوں کو جوڑتا ہے۔ ہولیکا دہن، بھجن اور رنگوں کے خوشگوار تبادلے جیسی روایتی رسومات جدید رجحانات جیسے میوزک فیسٹیول، ماحول دوست رنگ اور تخلیقی پیشکشوں کے ساتھ ہم آہنگ دکھائی دیتی ہیں۔

جب ہندوستان ہولی کے رنگوں میں رنگ جاتا ہے تو یہ ملک نہ صرف اپنی ثقافتی وراثت کو اجاگر کرتے ہیں بلکہ دنیا کو خوشی، اتحاد اور رنگوں کے اس پیغام کی یاد دلاتے ہیں جو یہ تہوار لے کر آتا ہے۔ وِرندا ون کی روحانی عقیدت سے لے کر راجستھان کی لوک رونق اور بہار، جھارکھنڈ اور اتر پردیش کی سماجی ہم آہنگی تک، ہولی ایک ایسا جشن ہے، جو لازوال، پاکیزہ اور گہری معنویت سے بھرپور ہندوستانی تہوار ہے۔

ہندوستان

گجرات میں زہریلی شراب سے 13 اموات کے معاملے میں بھرت پور سے دو ملزمان گرفتار

Published

6 hours ago

August 27, 2026

Online Desk

بھرت پور، گجرات کے بھاو نگر میں زہریلی شراب سے 13 افراد کی موت کے معاملے میں گجرات پولیس نے راجستھان کے بھرت پور میں نقلی اور زہریلی شراب بنانے کے کاروبار سے مبینہ طور پر وابستہ دو افراد کو گرفتار کیا ہے۔

پولیس ذرائع کے مطابق گجرات پولیس نے مَتھرا گیٹ تھانہ علاقے کی ہاؤسنگ بورڈ کالونی میں چھاپہ مار کر شیر سنگھ کو گرفتار کیا، جبکہ وجے نگر سے کومل نامی شخص کو حراست میں لیا گیا ہے۔ معاملے کی مزید تحقیقات جاری ہیں۔

یو این آئی۔ م س

ہندوستان

ہفتے کے روز ازبکستان اور کرغزستان کے چار روزہ دورے پر جائیں گے مودی

Published

7 hours ago

August 27, 2026

Online Desk

نئی دہلی، وزیرِ اعظم نریندر مودی ہفتے کے روز ازبکستان اور کرغزستان کے چار روزہ دورے پر جائیں گے جہاں وہ بشکیک میں 26 ویں شنگھائی تعاون تنظیم (ایس سی او) کے سربراہ اجلاس میں شرکت کریں گے۔

وزارتِ خارجہ میں سکریٹری (مغرب) سیبی جارج نے جمعرات کے روز یہاں ایک پریس کانفرنس میں وزیرِ اعظم کے دورے کے بارے میں معلومات دیں۔ انہوں نے کہا کہ مسٹر مودی 29 اور 30 اگست کو ازبکستان میں نیز 31 اگست سے یکم ستمبر تک کرغز جمہوریہ میں رہیں گے۔

انہوں نے کہا کہ وزیرِ اعظم ازبکستان کے صدر شوکت میرضیایف کی دعوت پر تاشقند جائیں گے اور یہ اس ملک کا ان کا چوتھا دورہ ہوگا۔ وہ اس سے پہلے 2015، 2016 اور 2022 میں ازبکستان گئے تھے۔ ازبکستان کے صدر 2018 میں ہندوستان آئے تھے اور 2019 میں انہوں نے وائبرنٹ گجرات کانفرنس میں حصہ لیا تھا۔ اس کے علاوہ دونوں رہنماؤں نے سال 2020 میں ورچوئل ذریعے سے کانفرنس میں شرکت کی تھی۔

اس دوران دونوں رہنماؤں کے درمیان تجارت، سرمایہ کاری، دفاع، توانائی سمیت مختلف شعبوں میں دوطرفہ بات چیت ہوگی۔ اس کے علاوہ علاقائی اور بین الاقوامی اہمیت کے موضوعات پر بھی تبادلۂ خیال کا امکان ہے۔

مسٹر جارج نے کہا کہ ازبکستان سے مسٹر مودی کرغز جمہوریہ کے صدر، صدر جاپاروف کی دعوت پر بشکیک جائیں گے جہاں وہ 26 ویں ایس سی او سربراہ اجلاس میں حصہ لیں گے۔ انہوں نے کہا کہ ایس سی او کا قیام بنیادی طور پر دہشت گردی، علیحدگی پسندی اور انتہا پسندی کی تین برائیوں کا مقابلہ کرنے کے مقصد سے کیا گیا تھا اور یہ تمام آج بھی چیلنج بنے ہوئے ہیں۔

سربراہ اجلاس سے الگ مسٹر مودی کی روس کے صدر کے ساتھ ساتھ دیگر رکن ممالک کے رہنماؤں کے ساتھ دوطرفہ بات چیت کا بھی امکان ہے۔

ایس سی او ممالک کے ساتھ ہندوستان کے مسلسل مضبوط ہوتے تعلقات کے پیشِ نظر اس دورے کو اہم مانا جا رہا ہے۔

یو این آئی ایف اے

ہندوستان

پی ایم مودی نے ہندستان سے اولمپک میں رسائی بڑھانے، 2036 کھیلوں کی تیاریاں ابھی سے شروع کرنے پر زور دیا

Published

11 hours ago

August 27, 2026

Online Desk

نئی دہلی، وزیرِ اعظم نریندر مودی نے جمعرات کے روز ہندستان سے اولمپک کے مختلف شعبوں میں اپنی شرکت کو وسعت دینے اور 2036 کے اولمپکس کے لیے ایتھلیٹوں کی تیاری فوری طور پر شروع کرنے کا اعادہ کرتے ہوئے کہا کہ ملک کا کھیل کا وژن صرف تمغے جیتنے تک محدود نہیں ہے بلکہ یہ وکست بھارت کی تعمیر میں کھیلوں اور نوجوانوں کی طاقت کو بروئے کار لانے کے ایک بڑے مشن کا حصہ ہے۔

کھیلو انڈیا ڈائیلاگ سے ویڈیو کانفرنسنگ کے ذریعے خطاب کرتے ہوئے وزیرِ اعظم نریندر مودی نے کھیلوں، نوجوانوں کی قیادت، فٹنس، شہری ذمہ داری اور قومی تعمیر پر ملک گیر بحث کے ایک حصے کے طور پر ملک بھر کے نوجوانوں کے ساتھ تبادلۂ خیال کیا۔

کھیلوں کے قومی دن 2026ء کی تقریبات کے حصے کے طور پر ‘میرا یووا بھارت'(مائی بھارت ) کے ذریعہ منعقدہ اس پروگرام کا مقصد نوجوانوں کو ہندستان کے کھیلوں کے سفر سے جڑنے، اپنی امنگوں کا اشتراک کرنے اور ملک کے نوجوانوں اور کھیلوں کے ماحولیاتی نظام کو مضبوط بنانے کے لیے خیالات پیش کرنے کا ایک پلیٹ فارم فراہم کرنا ہے۔ ہر ضلع کے دو کالجوں کے طلبہ کی شرکت کے ساتھ تمام ریاستوں اور مرکز کے زیرِ انتظام علاقوں میں اس کا انعقاد کیا جا رہا ہے۔

وزیرِ اعظم نریندر مودی نے کہا کہ انہوں نے 15 اگست کو لال قلعہ کی فصیل سے یومِ آزادی کے خطاب کے دوران ہندستان کے وسیع تر کھیلوں کے وژن کو اجاگر کیا تھا۔

انہوں نے کہا، “جب میں کھیلوں کے بارے میں بات کرتا ہوں تو یہ صرف تمغے جیتنے کے بارے میں نہیں ہے۔ یہ ایک ترقی یافتہ ہندستان کی تعمیر میں ہندستان کی کھیل کی صلاحیت اور نوجوانوں کی طاقت کو ایک ساتھ لانے کی مہم ہے۔”

بین الاقوامی مقابلوں میں زیادہ سے زیادہ شعبوں میں حصہ لینے کی ضرورت پر زور دیتے ہوئے وزیرِ اعظم نے کہا کہ ملک نے تاریخی طور پر اولمپکس میں شامل تقریباً نصف مقابلوں میں حصہ نہیں لیا ہے۔

انہوں نے کہا، “دوسرے ممالک ان کھیلوں میں تمغے جیتتے ہیں جن میں ہم حصہ بھی نہیں لیتے ہیں۔ اگر ہم اپنے تمغوں کی تعداد میں اضافہ کرنا چاہتے ہیں تو ہمیں ان کھیلوں میں بھی بہترین کارکردگی حاصل کرنی ہوگی۔”

وزیرِ اعظم نریندر مودی نے کہا کہ اولمپک کے متعدد شعبوں میں ہندستان کی عدم موجودگی نے ملک کے لیے تمغوں کی دوڑ میں مقابلہ کرنے کے مواقع کو محدود کر دیا ہے اور انہوں نے ملک کے کھیلوں کے دائرہ کار کو وسعت دینے کے لیے منظم کوششوں کی اپیل کی۔

انہوں نے کہا، “اولمپکس میں شامل مختلف کھیلوں میں سے ہندستانی ٹیمیں تقریباً نصف میں حصہ نہیں لیتی ہیں۔ اس کا مطلب ہے کہ ہم تمغوں کی بڑی تعداد کے لیے مقابلہ بھی نہیں کرتے۔ یہ دہائیوں سے جاری ہے۔”

جاری ۔ یو این آئی ایف اے