نئی دہلی، ہندوستان اور برازیل نے آئندہ پانچ برسوں میں باہمی تجارت کو دوگنا کرکے 30 ارب ڈالر تک پہنچانے کا ہدف مقرر کیا ہےبرازیل کے دارالحکومت برازیلیا میں منعقدہ بھارت-برازیل تجارتی نگرانی نظام (ٹی ایم ایم) کے آٹھویں اجلاس میں بھارت -برازیل اسٹریٹجک شراکت داری کو مضبوط بنانے والے ادارہ جاتی ڈھانچے اور دونوں ممالک کے درمیان اسٹریٹجک و اقتصادی تعلقات کو مزید مستحکم کرنے کے مشترکہ عزم پر تبادلہ خیال کیا گیا۔ دونوں فریقوں نے زیادہ متنوع، متوازن اور پائیدار شراکت داری کے ذریعے، بالخصوص دواسازی، کیمیکلز، انجینئرنگ مصنوعات اور مشینری کے شعبوں میں، 2030 تک باہمی تجارت کو 30 ارب ڈالر تک پہنچانے کے عزم کا اظہار کیا۔

اجلاس کی مشترکہ صدارت وزارت تجارت کے سکریٹری راجیش اگروال اور برازیل کی خارجہ تجارت کی سکریٹری تاتیانا لاسردا پرازیریس نے کی۔ راجیش اگروال نے برازیل کی حکومت میں ترقی، صنعت، تجارت اور خدمات کے وزیر مارسیو الیاس روزا سے بھی ملاقات کی اور باہمی تجارت و سرمایہ کاری کے تعلقات کو مزید مضبوط بنانے اور ترجیحی شعبوں میں اقتصادی تعاون بڑھانے پر تبادلہ خیال کیا۔

بھارت اور برازیل کے درمیان باہمی تجارت میں مسلسل اضافہ دیکھا گیا ہے۔ مالی سال 2025-26 میں یہ تجارت 15.07 ارب ڈالر تک پہنچ گئی ہے۔

بات چیت کے دوران دونوں فریقوں نے بھارت-مرکوسور کے حوالے سے طے شدہ شرائط پر ہونے والی پیش رفت کا جائزہ لیا۔ سال 2025 میں طے پانے والے اس معاہدے کے تحت بھارت-مرکوسور باہمی تجارت کو 20.84 ارب ڈالر تک پہنچانے کا ہدف مقرر کیا گیا ہے۔ بھارت-مرکوسور ترجیحی تجارتی معاہدے میں توسیع اور جدید کاری کے وسیع امکانات موجود ہیں۔

اجلاس میں بھارتی دواسازی کی مصنوعات کے لیے مارکیٹ تک رسائی کو آسان بنانے پر بھی تبادلہ خیال کیا گیا۔ بھارت نے زیادہ مستحکم ضابطہ جاتی طریقہ کار کی حمایت اور مارکیٹ تک وسیع رسائی کو آسان بنانے کی ضرورت پر زور دیا۔ بھارت نے کہا کہ وہ سستی اور معیاری ادویات کی دستیابی میں اپنا کردار ادا کرسکتا ہے اور زیادہ قابل رسائی صحت خدمات کی فراہمی کی کوششوں کو مزید مضبوط بنا سکتا ہے۔

جاری۔یواین آئی۔ ظ ا

کاس گنج، اتر پردیش میں کاس گنج ضلع کے کوتوالی علاقے میں پیر کی صبح ہونے والے سڑک حادثے میں کم از کم چھ عقیدتمندوں کی موت ہو گئی جبکہ 20 دیگر شدید طور پر زخمی ہو گئے۔

پولیس نے بتایا کہ حادثہ کوتوالی نگر علاقے کے موہن پورہ میں ہاتھرس ضلع کی سرحد کے قریب صبح تقریباً پونے چار بجے پیش آیا۔ میکس پک اپ گاڑی میں سوارعقیدتمند راجستھان کے کرولی ضلع سے اپنے آبا و اجداد اور اہل خانہ کی استھیاں بہانے کے لیے سورونجی تيرتھ استھل جا رہے تھے۔ اسی دوران پک اپ کی 22 پہیوں والے ٹرک سے زبردست ٹکر ہو گئی۔ حادثے میں تین افراد کی موقع پر ہی موت ہو گئی جبکہ شدید طور پر زخمی چھ افراد میں سے تین نے علی گڑھ میڈیکل کالج میں دم توڑ دیا۔ ہلاک ہونے والوں میں چار خواتین اور دو مرد شامل ہیں۔ ہلاکتوں کی تعداد میں مزید اضافے کا خدشہ ظاہر کیا جا رہا ہے۔

ایس پی اوم پرکاش سنگھ نے جائے وقوعہ کا معائنہ کرنے کے بعد بتایا کہ حادثے میں 23 زخمی مسافروں کو مقامی لوگوں اور پولیس کی مدد سے ضلع اسپتال کاس گنج پہنچایا گیا۔ ان میں سے آٹھ کی حالت تشویشناک ہونے پر انہیں بہتر علاج کے لیے علی گڑھ میڈیکل کالج ریفر کیا گیا تھا جہاں تین افراد کی موت کی اطلاع ہے۔

ایس پی نے بتایا کہ ہلاک ہونے والوں اور زخمیوں کے اہل خانہ کو حادثے کی اطلاع دے دی گئی ہے۔ واقعے کے بعد علاقے میں امن و امان کی صورتحال معمول کے مطابق ہے۔ پولیس نے حادثے کی وجوہات کی جانچ شروع کر دی ہے۔

پولیس کے مطابق کاس گنج کوتوالی علاقے کے موہن پورہ میں ہوئے حادثے میں موقع پر جن تین افراد کی موت ہوئی، ان کی شناخت امیش (26) ولد ببلو ساکن گاؤں ریوئی، تھانہ مہوا، ضلع دؤسا، راجستھان؛ نہرو (25) ولد رام کھلاڑی ساکن گاؤں نتھولی کا پورا، تھانہ سوروٹھ، ضلع کرولی، راجستھان اور پریم زوجہ تیج رام ساکن گاؤں نتھولی کا پورا، تھانہ سوروٹھ، ضلع کرولی، راجستھان کے طور پر ہوئی ہے۔

حادثے میں زخمی آٹھ افراد کو ضلع اسپتال کاس گنج سے علی گڑھ میڈیکل کالج ریفر کیا گیا تھا۔ ان میں سے دورانِ علاج رینا زوجہ کرم ویر ساکن سلیم پور کلاں، ضلع بھرت پور، راجستھان؛ رنجیت (33) ولد تیج رام ساکن نتھولی کا پورا، تھانہ سوروٹھ، ضلع کرولی اور انجلی زوجہ منیش ساکن ریوئی، تھانہ مہوا، ضلع دؤسا کی موت ہو گئی۔

اس طرح حادثے میں اب تک کل چھ افراد کی موت ہو چکی ہے۔ حادثے میں 20 افراد زخمی ہوئے ہیں، جن میں سے پانچ کا علاج علی گڑھ میڈیکل کالج اور 15 کا کاس گنج ضلع اسپتال میں جاری ہے۔ پولیس اور انتظامیہ کی جانب سے امدادی و بچاؤ کام جاری ہے۔

یواین آئی۔الف الف

رائے پور، چھتیس گڑھ میں سوائن فلو (ایچ 1 این 1) انفیکشن کے دس نئے کیسز سامنے آنے کے بعد ریاست میں متاثرین کی تعداد بڑھ کر 115 ہو گئی ہے۔ وہیں فعال مریضوں کی تعداد بھی بڑھ کر 28 تک پہنچ گئی ہے۔

صحت سے متعلق اعداد و شمار کے مطابق دارالحکومت رائے پور میں تین نئے مریضوں میں ایچ 1 این 1 انفیکشن کی تصدیق ہوئی ہے۔ اس کے بعد ضلع میں کل متاثرین کی تعداد 51 سے بڑھ کر 54 ہو گئی ہے۔

رائے پور میں ایکٹو کیسز بھی چھ سے بڑھ کر نو ہو گئے ہیں۔ درگ ضلع میں بھی تین نئے مریض ملے ہیں۔ اس کے ساتھ ہی یہاں کل مریضوں کی تعداد سات سے بڑھ کر 10 ہو گئی ہے، جبکہ ایکٹو مریضوں کی تعداد دو سے بڑھ کر پانچ ہو گئی ہے۔

اس دوران انفیکشن کا دائرہ ان اضلاع تک بھی پہنچ گیا ہے جہاں اس سے پہلے کوئی کیس درج نہیں ہوا تھا- بلودا بازار – بھاٹا پارا، موہلا – مانپور – انبا گڑھ چوکی اور شمالی بستر کانکیر میں ایک ایک نیا مریض ملا ہے۔ ان تینوں اضلاع میں ملنے والے مریض فی الحال زیرِ علاج ہیں۔ دھمتری ضلع میں اب تک سات متاثرین سامنے آ چکے ہیں، جن میں چار کا علاج جاری ہے۔ اسی طرح کوربا میں پانچ مریضوں میں سے ایک کا علاج جاری ہے، جبکہ بپمترا میں تین متاثرین میں سے ایک مریض زیرِ علاج ہے۔

دارالحکومت رائے پور میں واقع سینٹرل جیل سے وابستہ ایک اہلکار میں بھی ایچ 1 این 1 انفیکشن کی تصدیق ہوئی ہے۔ اہلکار کا علاج رائے پور کے ایک نجی اسپتال میں جاری ہے۔ اطلاعات کے مطابق اہلکار اپنے خاندان کے ساتھ کانکیر گئے تھے، جہاں انہیں بخار، زکام اور سانس لینے میں دشواری ہوئی۔ جانچ کرائے جانے پر ان میں سوائن فلو کی تصدیق ہوئی۔

محکمہ صحت نے متاثرہ اہلکار کے اہل خانہ کی کانٹیکٹ ٹریسنگ کر لی ہے۔ خاندان کے دیگر افراد کو صحت مند بتایا گیا ہے۔

یواین آئی۔الف الف