نئی دہلی، کانگریس کے صدر ملکارجن کھرگے نے معیشت کے سلسلے میں وزیرِ اعظم نریندر مودی کونشانہ بناتے ہوئے کہا ہے کہ حکومت مجموعی گھریلو پیداوار (جی ڈی پی) کی شرحِ نمو کا جشن منا رہی ہے لیکن حقیقت یہ ہے کہ عام آدمی بے روزگاری، مہنگائی اور بڑھتے ہوئےعدم مساوات جیسے مسائل سے پریشان ہے اور اس کے لیے اس حکومت میں کچھ نہیں بدلا ہے۔

مسٹر کھرگے نے منگل کے روز سوشل میڈیا ‘ایکس’ پر لکھی ایک پوسٹ میں کہا کہ تبدیلی کی بات کرنے والی مودی حکومت کو سمجھنا چاہیے کہ عوام سے جھوٹ بولنے کے علاوہ بی جے پی کے اقتدار میں کچھ نہیں بدلا ہے۔ عام لوگ غیرمعمولی بے روزگاری، ناقابلِ برداشت مہنگائی اور بے لگام عدم مساوات کے بوجھ تلے دبے ہوئے ہیں ۔

کانگریسی صدر نے کہا کہ مسٹر مودی ملک میں جی ڈی پی کی شرح میں اضافے کا جشن منانے کی بات کہہ رہے ہیں، لیکن عام آدمی کے پاس ایسی خوشی منانے کی سہولت نہیں ہے۔ انہوں نے کہا کہ عام لوگوں پر تین ‘یو’—غیرمعمولی بے روزگاری، ناقابلِ برداشت مہنگائی اور بے لگام عدم مساوات کا بوجھ ہے اور اس کے لیے وزیرِ اعظم ذمہ دار ہیں۔

انہوں نے کہا کہ ملک میں بے روزگاری 50 سال کی اعلیٰ ترین سطح پر ہے اور 40 فیصد نوجوان گریجویٹ بے روزگار ہیں۔ جولائی 2026 میں 15 سے 29 سال کی عمر کے ہر چھ میں سے ایک نوجوان بے روزگار تھا۔ انہوں نے کہا کہ ہر سال دو کروڑ روزگار دینے کا وعدہ اب ٹوٹ چکا ہے۔

کانگریسی صدر نے کہا کہ خردہ مہنگائی 19 مہینے کی اعلیٰ ترین سطح پر ہے۔ چینی، پیاز، ٹماٹر، دال، خوردنی تیل، چاول اور دودھ جیسی روزمرہ کی ضروری اشیاء کی قیمتیں بڑھی ہوئی ہیں۔ پیٹرول، ڈیزل، رسوئی گیس اور سی این جی بھی عام لوگوں کے لیے مہنگے ہوتے جا رہے ہیں۔ انہوں نے کہا کہ متوسط طبقے کے خاندان کسی طرح گزارا کر رہے ہیں، جبکہ غریبوں نے امید چھوڑ دی ہے۔

مسٹر کھرگے نے الزام لگایا کہ ملک میں اقتصادی نابرابری برطانوی حکومت کے دور سے بھی بدتر صورتحال میں پہنچ گئی ہے۔ انہوں نے دعویٰ کیا کہ سب سے اوپر کے ایک فیصد لوگوں کے پاس ہندوستان کی کل جائداد کا 40 فیصد حصہ ہے، جبکہ نیچے کے 50 فیصد لوگ صرف 15 فیصد جائداد پر انحصار کر رہے ہیں۔ انہوں نے الزام لگایا کہ حکومت نے آزاد ہندوستان کی تاریخ میں غریبوں سے امیروں کی طرف جائداد کی سب سے بڑی منتقلی کو فروغ دیا ہے۔

انہوں نے حکومت پر ‘کرونی کیپٹلزم’ کو اپنی واحد اقتصادی پالیسی بنانے کا الزام لگایا۔ انہوں نے کہا کہ سال 2014 سے کمپنیوں کے 16 لاکھ کروڑ روپے سے زائد کے قرضے رائٹ آف (بٹے کھاتے) کیے جا چکے ہیں۔ انہوں نے ایک حالیہ معاملے کا حوالہ دیتے ہوئے کہا کہ 22,006 کروڑ روپے کے منظور شدہ مطالبات کے مقابلے قرض دہندگان کو صرف 6.5 کروڑ روپے کی وصولی ہوئی، یعنی 99.97 فیصد کی ‘ہیئر کٹ’ یعنی قرض کی قدرمیں کمی ہوئی۔

کانگریسی صدر نے وزیرِ اعظم پر ایک قریبی کاروباری دوست کے مفادات کو فروغ دینے کا الزام لگاتے ہوئے کہا کہ ملک نے وزیرِ اعظم کو اپنے کاروباری دوست کے لیے ‘ذاتی ٹریول ایجنٹ’ کی طرح کام کرتے دیکھا ہے۔

انہوں نے کہا کہ وزیرِ اعظم کا ہندوستانیوں سے سونا نہ خریدنے اور بیرونِ ملک سفر نہ کرنے کا بار بار اصرار بھی زمینی حقیقت کو نہیں بدل سکتا۔ مسٹر کھرگے نے کہا کہ اصل بات یہ ہے کہ مودی کے اقتدار میں لوگوں سے جھوٹ بولنے کے علاوہ کچھ بھی نہیں بدلا ہے۔

یو این آئی ایف اے

الموڑا، اتراکھنڈ کے ضلع الموڑا کے سومیشور میں شدید بارش کے باعث منگل کے روز ایک مکان گرنے سے اس میں سوئے ہوئے تین افراد کی دردناک موت ہو گئی۔

الموڑا ڈسٹرکٹ ایمرجنسی آپریشن سینٹر کی رپورٹ کے مطابق یہ واقعہ سومیشور تحصیل کے گرام سبھا وڈیوڑا میں آج تڑکے 3:30 بجے پیش آیا۔ بتایا جا رہا ہے کہ علاقے میں کل سے مسلسل تیز بارش ہو رہی ہے۔ جب گاؤں میں تمام لوگ سو رہے تھے، اسی دوران راجیندر رام کا مکان اچانک گر گیا اور راجیندر رام کی بیوی پریما دیوی (42)، بیٹی کلپنا آریا (19) اور بیٹا منیش کمار (18) ملبے تلے دب گئے۔

اطلاع ملتے ہی ایس ڈی آر ایف، پولیس، فائر بریگیڈ، محکمہ مال، سومیشور تھانہ پولیس اور ڈیزاسٹر مینجمنٹ ڈیپارٹمنٹ کی تمام ٹیموں نے مقامی لوگوں کے ساتھ مل کر ملبے میں دبے لوگوں کو باہر نکالا۔ تینوں کی موقع پر ہی موت ہو گئی۔ ریونیو سب انسپکٹر پاتلی بگڑ کی رپورٹ میں تین افراد کی موت کی تصدیق کی گئی ہے۔

یو این آئی۔ م ع۔ایف اے

نئی دہلی، کانگریس نے کہا ہے کہ مودی حکومت ہر ہفتے مہنگائی کا نیا ریکارڈ قائم کر رہی ہے اور اس کا اثر اب صرف رسوئی تک محدود نہیں رہا، بلکہ گھر بنانے سے لے کر بجلی کے سامان تک کی بڑھتی ہوئی قیمتوں نے غریب اور متوسط طبقے کی مشکلات بڑھا دی ہیں۔

کانگریس کے جنرل سکریٹری جے رام رمیش نے منگل کے روز سوشل میڈیا ایکس پر لکھا، “جعلی ہیڈ لائنز میں مصروف وزیرِ اعظم نریندر مودی نے عام آدمی کے گھر بنانے کا خواب بھی چھین لیا ہے۔”

انہوں نے کہا کہ تانبے کا تار 850 روپے سے بڑھ کر 1,700 روپے فی کلوگرام اور ایلومینیم 350 روپے سے بڑھ کر 650 روپے فی کلوگرام ہو گیا ہے۔ اس کے باعث 1,000 مربع فٹ کے مکان کی وائرنگ کا خرچ 50,000 روپے سے بڑھ کر تقریباً ایک لاکھ روپے ہو گیا ہے۔

مسٹر رمیش نے کہا کہ سولر پینل 10 سے 15 فیصد مہنگے ہو گئے ہیں۔ پنکھے اور فالس سیلنگ کی لاگت میں بھی اضافہ ہوا ہے۔ پریس جیسے گھریلو سامان کی قیمتوں میں 20 فیصد تک کا اضافہ ہوا ہے، جبکہ ایل ای ڈی اور ہیلوجن کی قیمتوں میں بھی تقریباً 20 فیصد کا اچھال آیا ہے۔ سوئچ ساکیٹ، مین لائن کیبل، ٹائلز، وائرنگ اور مزدوری سمیت گھر بنانے سے جڑا ہر خرچ بڑھ رہا ہے۔

کانگریس کے جنرل سکریٹری نے الزام لگایا کہ مہنگائی ہر طرف سے عوام کی جیب پر اثر ڈال رہی ہے لیکن مودی حکومت مہنگائی کی اس حقیقت پر پردہ ڈالنے اور اعداد و شمار کی شعبدہ بازی سے عوام کو گمراہ کرنے میں لگی ہوئی ہے۔

یو این آئی ایف اے