کٹھمنڈو، نیپال میں سیلاب سے مرنے والوں کی تعداد بڑھ کر 1127 ہو گئی ہے اور 4858 افراد اب بھی لاپتہ ہیں۔

اخبار ’دی کٹھمنڈو پوسٹ‘ نے بدھ کو پولیس کے حوالے سے یہ اطلاع دی ہے۔

رپورٹ میں کہا گیا ہے کہ سیلاب سے متاثرہ علاقوں سے 6541 افراد کو بچایا گیا ہے اور 4858 افراد اب بھی لاپتہ ہیں۔

واضح رہے کہ 26 اگست کی صبح شمالی نیپال میں اس وقت شدید سیلاب آ گیا تھا جب چین کی جانب سے پانی کا ایک بہت بڑا ریلہ بھوٹے کوشی ندی میں آ کر مل گیا تھا۔ یہ سیلاب ایک بڑے گلیشیئر کے ٹوٹنے اور اس کے بعد تودے کھسکنے کے باعث آیا تھا۔

یو این آئی۔ این یو۔

تہران، ایران نے اردن میں بیلسٹک میزائلوں سے امریکی فوجی اڈے پر حملہ کیا ہے۔

اسلامی انقلابی گارڈ کور (آئی آر جی سی) نے یہ اطلاع دی ہے۔ اس نے کہا کہ امریکہ کے حملوں کے جواب میں بیلسٹک میزائلوں سے اردن میں ایک امریکی فوجی اڈے پر حملہ کیا گیا ہے۔

آئی آر جی سی نے ایک بیان میں کہا کہ ’’ان جرائم کے جواب میں، آئی آر جی سی فضائیہ کے بہادر جوانوں نے اردن میں میرین کے گیریژن ’کیمپ ٹِٹِن‘ پر بھاری بیلسٹک میزائلوں سے حملہ کیا۔‘‘

آئی آر جی سی کا دعویٰ ہے کہ اس حملے میں بڑی تعداد میں امریکی فوجی ہلاک اور زخمی ہوئے، جبکہ بنیادی ڈھانچے اور فوجی ہیلی کاپٹروں کو بھی نقصان پہنچا۔

اس دوران، اردن کی مسلح افواج نے بدھ کو کہا کہ اردن کے فضائی دفاعی نظام نے 10 بیلسٹک میزائلوں کو روکا، جن میں سے تین ملک کی حدود کے اندر گرے۔

مسلح افواج نے ایک بیان میں کہا کہ ’’اردن کے فضائی دفاعی نظام نے ملک کی فضائی حدود میں داخل ہونے والے 13 بیلسٹک میزائلوں کے حملے کو روک دیا۔ ان میں سے 10 کو کامیابی سے روک کر تباہ کر دیا گیا، جبکہ تین رہائشی علاقوں سے دور گرے۔‘‘

یو این آئی۔ این یو۔

کیف، روس کی جانب سے یوکرین کے دارالحکومت کیف اور اس کے گرد و نواح میں کیے گئے بڑے پیمانے پر فضائی حملوں میں کم از کم 12 افراد ہلاک اور 21 زخمی ہو گئے۔

کیف کی علاقائی فوجی انتظامیہ کے سربراہ تیمور تکاچینکو نے منگل کو ٹیلی گرام پر بتایا کہ ’’کیف کے علاقے میں رات کے وقت روسی میزائلوں اور حملہ آور ڈرونز سے بڑے پیمانے پر حملہ کیا گیا۔‘‘

یوکرین کے صدر ولودیمیر زیلنسکی نے ’’روسی دہشت گردی‘‘ کی مذمت کرتے ہوئے کہا کہ ہلاک ہونے والوں میں ایک ہندوستانی شہری بھی شامل ہے۔ انہوں نے اتحادی ممالک سے یوکرین کے فضائی دفاع کو مزید مضبوط بنانے کی اپیل کی۔

کیف کے میئر وٹالی کلیچکو نے بتایا کہ رات بھر ہونے والے ڈرون اور میزائل حملوں میں شہر میں کم از کم آٹھ افراد ہلاک جبکہ پانچ دیگر زخمی ہوئے، جن میں دو بچے بھی شامل ہیں۔

یوکرینی استغاثہ نے بتایا کہ کیف کے علاقے میں مزید چار افراد ہلاک ہوئے۔ حکام کے مطابق بوریسپل کے مضافاتی علاقے میں ایک رہائشی عمارت کو نقصان پہنچا۔ زیلنسکی نے کہا کہ عمارت سے 50 افراد کو محفوظ مقام پر منتقل کیا گیا۔

زیلنسکی نے سوشل میڈیا پر کہا، ’’روس ہمیشہ اپنے حملوں کی منصوبہ بندی اس انداز میں کرتا ہے کہ لوگوں کی زندگیوں کو زیادہ سے زیادہ نقصان پہنچایا جا سکے، اور اسے کامیابی صرف اسی وقت ملتی ہے جب فضائی دفاع کی صلاحیتیں ناکافی ہوں۔‘‘

روس کی وزارت دفاع نے کہا کہ رات کے دوران کیف اور اوڈیسا میں فوجی اور توانائی کے مراکز کے ساتھ ساتھ ان شہروں کے گرد و نواح کے علاقوں کو بھی نشانہ بنایا گیا۔

یوکرین کی سرحدی سروس نے بھی بتایا کہ روسی افواج نے رومانیہ کی سرحد پر واقع اورلیوکا فیری چیک پوائنٹ کو نشانہ بنایا۔ رومانیہ نیٹو کا رکن ہے۔

یوکرینی فضائیہ کے ترجمان یوری ایہنات نے کہا کہ روس ایسے ڈرون استعمال کر رہا ہے جنہیں مار گرانا زیادہ مشکل ہے۔ ان کے مطابق گزشتہ چھ دنوں کے دورانروس نے یوکرین کی جانب 2,800 جیٹ انجن والے ڈرون بھیجے، جن میں سے صرف 60 فیصد کو روکا جا سکا۔

مسلسل ڈرون حملوں کا مقصد شہری زندگی متاثر کرنا ہے

کیف سے الجزیرہ کی نمائندہ آڈری میک الپائن نے بتایا کہ دن کے اوقات میں مسلسل ڈرون لہروں کی صورت میں بھیجنے کی روسی حکمت عملی کا مقصد شہری زندگی کو متاثر کرنا ہے۔انہوں نے کہا کہ جب بھی فضائی حملے کا سائرن بجتا ہے تو لوگوں کو بعض تجارتی عمارتوں سے باہر نکلنا پڑتا ہے جبکہ اسکولوں کو زیرِ زمین منتقل ہونا پڑتا ہے۔ ان کے مطابق یوکرین کے جدید خوراک ذخیرہ کرنے کے نظام کا تقریباً 90 فیصد تباہ ہو چکا ہے، جس کے باعث گروسری اسٹورز میں اشیائے ضروریہ کی فراہمی کم ہو رہی ہے۔

ادھر روس میں یوکرینی ڈرون حملے کے نتیجے میں شمال مغربی علاقے کی بڑی برآمدی بندرگاہ اوسٹ-لوگا کے علاقے میں آگ بھڑک اٹھی، جبکہ ماسکو نے ڈرونز کو پسپا کرنے کی کارروائی کی۔

ساما را کے علاقے میں بھی یوکرینی ڈرون حملے نے نووکوئیبیشیوسک شہر کو نشانہ بنایا، جس کے نتیجے میں ایک رہائشی عمارت کی کھڑکیاں ٹوٹ گئیں۔ علاقائی گورنر ویاچسلاو فیڈوریشیف نے ٹیلی گرام پر یہ اطلاع دی۔

وولگا دریا کے کنارے واقع نووکوئیبیشیوسک اور اس کے گرد و نواح میں روس کی متعدد بڑی تیل ریفائنریاں موجود ہیں، جنہیں سرکاری تیل کمپنی روس نیفٹ چلاتی ہے۔

روس کے بیلگورود علاقے کے قائم مقام گورنر نے بتایا کہ یوکرینی حملے میں ایک شخص ہلاک ہوا۔

روس اور یوکرین دونوں جان بوجھ کر شہریوں کو نشانہ بنانے کی تردید کرتے ہیں۔

دریں اثنا، یوکرین کی ڈرون فورسز کے کمانڈر نے دعویٰ کیا کہ اگست میں روس کے ’’شیڈو فلیٹ‘‘ سے وابستہ 54 بحری جہازوں کو نشانہ بنایا گیا، تاکہ تیل کی فروخت سے روس کی جنگی کارروائیوں کی مالی معاونت کو روکا جا سکے۔

یہ حملے ایسے وقت میں ہوئے ہیں جب یورپی یونین کے دفاع اور خارجہ امور کے وزرا یوکرین کے فضائی دفاع کو مضبوط بنانے کے لیے آئرلینڈ میں جمع ہوئے ہیں۔

یوکرین کو فضائی دفاع کے لیے استعمال ہونے والے انٹرسیپٹر میزائلوں کی کمی کا سامنا ہے، خاص طور پر بیلسٹک میزائلوں کے خطرے سے نمٹنے کے لیے استعمال ہونے والے امریکی ساختہ پیٹریاٹ نظام کی۔

گزشتہ چند ماہ کے دوران روس اور یوکرین دونوں نے طویل فاصلے تک مار کرنے والے حملوں میں اضافہ کیا ہے۔ ان حملوں میں گوداموں، کاروباری مراکز، تیل اور بندرگاہوں کی تنصیبات سمیت مختلف بنیادی ڈھانچے اور بحری جہازوں کو نشانہ بنایا گیا ہے، جس کے نتیجے میں شہری ہلاکتوں میں بھی اضافہ ہوا ہے۔

یو این آئی۔ ع ا۔