سری نگر، جموں و کشمیر کرائم برانچ کے اکنامک آفینسز ونگ کشمیر نے محکمہ تعلیم میں جعلی ٹیچر کی تقرری کے حکم نامے کے معاملے میں پانچ افراد کے خلاف چارج شیٹ داخل کی ہے۔

حکام نے بدھ کے روز یہ معلومات دی۔ انہوں نے بتایا کہ یہ چارج شیٹ بڈگام کے چیف جوڈیشل مجسٹریٹ کی عدالت میں آر پی سی کی مختلف دفعات کے تحت داخل کی گئی تھی۔

جن افراد کے خلاف چارج شیٹ داخل کی گئی ہے ان میں پلوامہ کی اقبال کالونی (ترال) کے رہنے والے نثار احمد بھٹ، شوپیاں کے کچدورا کے رہنے والے شاکر گل، شوپیاں کے تکی پورہ (رتنی پورہ) کے محمد ایاز راتھر، شوپیاں کے کچدورا کے رہنے والے شیخ روحیل احمد اور اننت ناگ کے خود پورہ مووگام کے رہنے والے تنویر احمد راتھر شامل ہیں۔

یہ معاملہ ڈائریکٹوریٹ آف اسکول ایجوکیشن، کشمیر سے ملنے والی اطلاع کے بعد شروع ہوا، جس میں تین افراد کے بارے میں بتایا گیا تھا جنہوں نے زون ناگام، چرار شریف (بڈگام) میں ٹیچر کے طور پر ملازمت شروع کی تھی۔ انہوں نے یہ ملازمت ڈائریکٹوریٹ آف اسکول ایجوکیشن، کشمیر کی جانب سے مبینہ طور پر جاری کردہ ٹرانسفر کے حکم کی بنیاد پر حاصل کی تھی۔

اس اطلاع کے بعد تحقیقات کے احکامات دیے گئے۔ کرائم برانچ نے بتایا کہ تفتیش کے دوران پتہ چلا کہ جن آرڈرز پر سوال اٹھائے گئے تھے، ان پر جعلی دستخط تھے اور ان پر درج آرڈر اور ڈسپیچ نمبرز بھی جعلی تھے۔

زونل ایجوکیشن افسر (ناگام) اور چیف ایجوکیشن افسر (بڈگام) سے حاصل کردہ ریکارڈز نے اس بات کی تصدیق کی کہ محمد ایاز راتھر، شیخ روحیل احمد اور تنویر احمد راتھر کا تبادلہ ان ہی مشکوک دستاویزات کی بنیاد پر کیا گیا تھا۔ ڈائریکٹوریٹ آف اسکول ایجوکیشن، کشمیر کے ساتھ کی گئی چھان بین سے یہ بھی انکشاف ہوا کہ ان کی آرڈر بک 31 دسمبر 2019 کو بند کر دی گئی تھی، جس سے یہ ثابت ہوتا ہے کہ مشکوک دستاویزات میں بتائے گئے آرڈر اور ڈسپیچ نمبرز جعلی تھے۔

کرائم برانچ کے مطابق تفتیش میں یہ بات بھی سامنے آئی کہ ان تینوں افراد کو محکمہ تعلیم میں کبھی کہیں بھی مقرر نہیں کیا گیا تھا۔ ای او ڈبلیو نے کہا کہ تحقیقات سے پتہ چلا کہ ملزم نثار احمد بھٹ اور شاکر گل نے مبینہ طور پر اس معاملے میں دلالی کی تھی۔ نثار احمد بھٹ پر جعلی سرکاری دستاویزات بنانے اور چھاپنے کے لیے ضروری وسائل اور مشینری کا انتظام کرنے کا بھی الزام ہے۔

انہوں نے بتایا کہ تفتیش کے دوران الزامات درست پائے گئے اور اس کے بعد عدالتی فیصلے کے لیے عدالت میں چارج شیٹ پیش کر دی گئی۔

یو این آئی۔ م ع

سرینگر، جموں و کشمیر کے میڈیکل کالجوں اور اسپتالوں میں ایم بی بی ایس اور بی ڈی ایس انٹرنز کے ماہانہ وظیفے میں اضافے کے لیے جاری احتجاج کے دوران پیپلز ڈیموکریٹک پارٹی (پی ڈی پی) کی رہنما التجا مفتی نے منگل کے روز گورنمنٹ میڈیکل کالج (جی ایم سی) سرینگر میں مظاہرین سے یکجہتی کا اظہار کیا اور موجودہ 12,300 روپے کے وظیفے کو بڑھا کر 30,000 روپے کرنے کے ان کے مطالبے کی بھرپور حمایت کی۔

التجا مفتی نے کہا کہ یہ بات انتہائی تشویش ناک ہے کہ جموں و کشمیر کے میڈیکل انٹرنز کو سخت ڈیوٹی اور کام کے بھاری بوجھ کے باوجود ملک بھر میں سب سے کم وظیفہ دیا جا رہا ہے۔ انہوں نے کہا، “انٹرنز کو معمول کے مطابق 12 سے 48 گھنٹے تک کی ڈیوٹیاں انجام دینا پڑتی ہیں اور جموں و کشمیر میں اکثر انہیں بنیادی اور ضروری چھٹیوں سے بھی محروم رکھا جاتا ہے۔”

انہوں نے 30,000 روپے ماہانہ وظیفے کے مطالبے کو معقول اور جائز قرار دیتے ہوئے نشاندہی کی کہ کئی ریاستیں اپنے انٹرن شپ کے وظیفے میں نمایاں اضافہ کر چکی ہیں۔ انہوں نے بتایا کہ اوڈیشہ اور مغربی بنگال تقریباً 45,000 روپے فراہم کرتے ہیں، جب کہ اتر پردیش نے اپنا وظیفہ 12,000 سے بڑھا کر 25,000 روپے کر دیا ہے اور بہار نے بھی اس پر نظر ثانی کی ہے۔ التجا مفتی نے کہا کہ حکومت کو اپنی ترجیحات پر سنجیدگی سے غور کرنے کی ضرورت ہے۔

انہوں نے جموں و کشمیر حکومت پر زور دیا کہ وہ احتجاج کرنے والے انٹرنز کے ساتھ فوری طور پر بامقصد مذاکرات شروع کرے، ان کے خدشات کو دور کرے اور بغیر کسی تاخیر کے وظیفہ بڑھا کر 30,000 روپے کرے۔ ساتھ ہی ان کے کام کے حالات کو بہتر بنانے، مناسب رخصت اور تحفظات کی فراہمی کو بھی یقینی بنایا جائے۔

ادھر جموں و کشمیر کی وزیر صحت سکینہ اِتو نے کہا کہ حکومت نے میڈیکل انٹرنز کے وظیفے میں اضافے کا عمل پہلے ہی شروع کر دیا ہے۔

دریں اثنا، جموں و کشمیر پردیش کانگریس کمیٹی کے صدر طارق قرہ نے وزیر اعلیٰ عمر عبداللہ کو خط لکھ کر انٹرنز کے مطالبات پر ان کی “فوری توجہ” مبذول کرانے کی درخواست کی۔ طارق قرہ نے کہا کہ میڈیکل انٹرنز نظامِ صحت کا ایک لازمی حصہ ہیں اور وہ معمول کے مطابق 36 گھنٹے طویل شفٹوں میں کام کرتے ہیں۔ جموں و کشمیر اسٹوڈنٹس ایسوسی ایشن (جے کے ایس اے) نے بھی عمر عبداللہ کو خط لکھ کر ایم بی بی ایس اور بی ڈی ایس انٹرنز کے دیرینہ مطالبات پر فوری مداخلت کی اپیل کی اور خبردار کیا کہ مسلسل انتظامی تاخیر سے صورتحال مزید بگڑ سکتی ہے اور پورے مرکز کے زیر انتظام علاقے میں صحت کی خدمات متاثر ہو سکتی ہیں۔

یو این آئی ۔ م ع

سرینگر، اپنی پارٹی کے شعبۂ خواتین (ویمنز ونگ) نے منگل کے روز سرینگر میں بڑھتی ہوئی مہنگائی اور 2024 کے اسمبلی انتخابات کے دوران عوام سے کیے گئے وعدوں کی عدم تکمیل کے خلاف ایک زبردست احتجاجی مظاہرہ کیا۔

اس احتجاج کی قیادت پارٹی رہنما دلشاد شاہین نے کی۔ اپنی پارٹی کی خواتین رہنما اور کارکنان سرینگر کی پریس کالونی میں جمع ہوئیں اور زبردست نعرے بازی کی۔ مظاہرین نے حکومت کی ناکامیوں، بڑھتی ہوئی مہنگائی، بے روزگاری اور عوام کو درپیش دیگر بنیادی مسائل حل کرنے میں ناکامی پر سخت برہمی کا اظہار کیا۔

نامہ نگاروں سے گفتگو کرتے ہوئے دلشاد شاہین نے الزام لگایا کہ جموں و کشمیر حکومت ہر محاذ پر ناکام ہو چکی ہے اور حکمران جماعت انتخابات کے دوران کیے گئے وعدوں کو پورا کرنے میں بری طرح ناکام رہی ہے۔

انہوں نے کہا، “حکومت نے عوامی مینڈیٹ کے ساتھ دھوکہ کیا ہے اور 2024 کے اسمبلی انتخابات کی مہم کے دوران جھوٹے وعدے کر کے لوگوں کو گمراہ کیا۔ اپنی پارٹی حکومت کی ناکامیوں کے خلاف اپنا احتجاج جاری رکھے گی اور عوامی مسائل و شکایات کو مسلسل اٹھاتی رہے گی۔”

اس موقع پر بات کرتے ہوئے پارٹی ترجمان عشرت بھٹ نے الزام لگایا کہ حکمران جماعت نے ووٹ مانگتے وقت بلند بانگ دعوے کر کے عوام کو فریب دیا اور اب وہ اپنی ذمہ داریوں سے راہِ فرار اختیار کر رہی ہے۔

انہوں نے سوال اٹھایا، “حکمران این سی نے اقتدار سنبھالنے کے چھ ماہ کے اندر بے روزگار نوجوانوں کو ایک لاکھ نوکریاں فراہم کرنے کا دعویٰ کیا تھا۔ وہ نوکریاں کہاں ہیں؟” انہوں نے مزید کہا، “اس نے ڈیلی ویجرز کو مستقل کرنے کا بھی وعدہ کیا تھا۔ وہ اس وعدے کو پورا کرنے میں کیوں ناکام رہی؟ آج ان ڈیلی ویجرز کو برائے نام تنخواہیں دی جا رہی ہیں۔ اتنی قلیل اجرت میں وہ اپنے خاندانوں کی کفالت کیسے کر سکتے ہیں، خاص طور پر ایسے وقت میں جب مہنگائی اس قدر تیزی سے بڑھ رہی ہے؟”

یو این آئی ۔ م ع