واشنگٹن، امریکہ کی فوج ایران میں شادی کی ایک تقریب پر مبینہ حملے کی اطلاعات کی تحقیقات کر رہی ہے، جبکہ امریکی حملوں میں ہلاک ہونے والوں کی تعداد بڑھ کر 18 ہو گئی ہے۔

امریکی سینٹرل کمانڈ (سینٹ کام) کے ترجمان کیپٹن ٹم ہاکنز نے کہا کہ امریکی فوج واقعے سے متعلق ایرانی سرکاری میڈیا کی جانب سے سامنے آنے والی اطلاعات کا جائزہ لے رہی ہے۔ دوسری جانب ایران کے وزیر صحت محمد رضا ظفرقندی کے مطابق امریکی حملوں میں 108 افراد زخمی بھی ہوئے ہیں۔

ہاکنز نے کہا کہ امریکی فوج کو ان اطلاعات کا علم ہے اور ان کی تحقیقات کی جا رہی ہیں۔ انہوں نے دعویٰ کیا کہ امریکی فوج عام شہریوں کو نشانہ نہیں بناتی۔

اطلاعات کے مطابق بدھ کی صبح امریکہ نے ایران میں مختلف اہداف پر بڑے پیمانے پر حملوں کا ایک نیا سلسلہ شروع کیا، جس میں جنوبی صوبہ ہرمزگان میں شادی کی ایک تقریب بھی مبینہ طور پر نشانہ بنی اور متعدد افراد جانی نقصان کا شکار ہوئے۔

اقوام متحدہ کے ترجمان اسٹیفان دوجارک نے کہا کہ اقوام متحدہ کے سیکریٹری جنرل انتونیو گوتریس ایران پر امریکی فضائی حملوں کے بعد عام شہریوں کے جانی نقصان کی اطلاعات پر تشویش میں مبتلا ہیں۔

یو این آئی۔ م س

واشنگٹن، امریکی صدر ڈونلڈ ٹرمپ نے ایران پر مزید فوجی حملوں کا عندیہ دیتے ہوئے کہا ہے کہ واشنگٹن جب چاہے ایران کو نشانہ بنا سکتا ہے، جبکہ ایران نے تازہ امریکی حملوں میں 18 افراد کی ہلاکت اور 108 سے زائد کے زخمی ہونے کی اطلاع دی ہے۔

وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ امریکہ نے گزشتہ شب ایران پر انتہائی سخت حملہ کیا اور آبنائے ہرمز کے اطراف ایران کی نئی فوجی تنصیبات اور سازوسامان کو نشانہ بنایا۔ انہوں نے کہا کہ امریکہ مزید کارروائی کے لیے بھی تیار ہے اور ضرورت پڑنے پر کسی بھی وقت حملہ کیا جا سکتا ہے۔

تازہ کشیدگی کے دوران امریکی فوج نے آبنائے ہرمز کے قریب ایران کے جنوبی ساحلی علاقوں میں متعدد مقامات کو نشانہ بنایا، جس کے جواب میں ایران نے مشرق وسطیٰ میں موجود امریکی اڈوں پر حملوں کا دعویٰ کیا، جن میں بحرین، عراق اور اردن کے مقامات شامل ہیں۔

ایرانی وزیر صحت محمد رضا ظفرقندی کے مطابق امریکی حملوں میں کم از کم 18 افراد ہلاک ہوئے، جن میں دو بچے بھی شامل ہیں، جبکہ 108 سے زیادہ افراد زخمی ہوئے۔

ایرانی وزارت خارجہ کے ترجمان اسماعیل بقائی نے کوہستک پر حملے کو ’’جنگی جرم‘‘ قرار دیتے ہوئے کہا کہ شہریوں کو نشانہ نہ بنانے کے امریکی دعوے زمینی حقائق سے مطابقت نہیں رکھتے۔

یو این آئی۔ م س

غزہ، غزہ میں رواں سال جنگ بندی کے باوجود اسرائیلی حملوں میں 900 سے زائد افراد ہلاک ہو چکے ہیں۔ غزہ کی وزارت صحت کے تازہ اعداد و شمار کے مطابق 10 اکتوبر کو جنگ بندی کے اعلان کے بعد سے غزہ میں ہلاک ہونے والے فلسطینیوں کی مجموعی تعداد 1300 سے تجاوز کر گئی ہے، جن میں 301 بچے بھی شامل ہیں۔

وزارت کے مطابق حماس اور اسرائیل نے امریکی صدر ڈونالڈ ٹرمپ کے 20 نکاتی امن منصوبے کو قبول کرنے کے بعد جنگ بندی پر اتفاق کیا تھا۔ منصوبے میں فضائی اور توپ خانے سے بمباری سمیت تمام فوجی کارروائیاں روکنا شامل تھا۔

وزارت صحت ہلاکتوں کی براہ راست ذمہ داری اسرائیلی فوجی کارروائیوں پر عائد کرتی ہے، تاہم اس کے اعداد و شمار میں عام شہریوں اور جنگجوؤں کے درمیان فرق نہیں کیا گیا ہے۔ اقوام متحدہ ان اعداد و شمار کو قابل اعتماد سمجھتا ہے اور آزاد ماہرین کے تجزیے بھی وزارت صحت کے اعداد و شمار سے مطابقت رکھتے ہیں۔

’بی بی سی ویریفائی‘ نے ایک رپورٹ میں کہا ہے کہ اس نے جنگ بندی کے بعد سے غزہ میں بنائی گئی متعدد ویڈیوز کا جائزہ لیا ہے۔ ایک ویڈیو میں 18 اگست کو غزہ سٹی کے ساحل پر واقع ایک کیفے پر حملے کے بعد ہنگامی خدمات کے اہلکاروں کو لوگوں کی مدد کرتے ہوئے دیکھا جا سکتا ہے۔ وزارت صحت کے مطابق اس حملے میں چھ افراد ہلاک ہوئے تھے۔ اگلے روز الطفاح علاقے میں پولیس ہیڈکوارٹرز پر ہونے والے حملے میں نو افراد کی ہلاکت کی اطلاع ہے، جن میں 13 سالہ بچہ بھی شامل تھا۔

اسرائیلی دفاعی افواج (آئی ڈی ایف) نے وزارت صحت کے اعداد و شمار پر سوال اٹھاتے ہوئے کہا ہے کہ یہ ماننے کی کوئی بنیاد نہیں کہ فہرست میں شامل تمام افراد اسرائیلی کارروائیوں میں مارے گئے ہیں۔

ایف نے کہا کہ وہ معاہدے کے مطابق خطرات ختم کرنے اور اپنے فوجیوں و اسرائیلی شہریوں کی حفاظت کے لیے درست اور ہدفی کارروائیاں کر رہا ہے اور شہریوں کو پہنچنے والے نقصان کو حتی الامکان کم کرنے کی کوشش کرتا ہے۔

اعداد و شمار کے مطابق اپریل سے اگست کے درمیان ہر ماہ 100 سے زائد افراد کی ہلاکتیں ریکارڈ کی گئیں۔

رواں سال کے آغاز میں اسرائیلی میڈیا نے ایک اسرائیلی سکیورٹی عہدیدار کے حوالے سے بتایا تھا کہ غزہ تنازع میں 70 ہزار سے زائد افراد ہلاک ہو چکے ہیں، جن میں 20 ہزار سے زیادہ جنگجو شامل تھے۔

یو این آئی۔ ع ا۔