سری نگر، کشمیر کے میر واعظ عمر فاروق نے جمعہ کو کہا کہ انہیں ایک بار پھر گھر میں نظر بند کر دیا گیا ہے اور تاریخی جامع مسجد سری نگر جانے سے روک دیا گیا ہے، جہاں انہیں ایک مذہبی تقریب کی صدارت کرنی تھی۔

میر واعظ نے کہا کہ یہ پابندیاں انہیں عوام کی آواز اٹھانے سے نہیں روک سکیں گی۔

میر واعظ نے ’ایکس‘ پر جاری بیان میں کہا، “جامع مسجد کے منبر کو خاموش کرنے اور لوگوں کے خدشات اٹھانے، ان کے حقوق اور انصاف کے حق میں کھڑے ہونے کی سزا دینے کی پالیسی بلا روک ٹوک جاری ہے۔

آج جمعہ کے دن مجھے پھر سے گھر میں نظر بند کر دیا گیا ہے۔”

انہوں نے کہا، “خاص طور پر جمعہ کے دن جامع مسجد میں نمازیوں سے خطاب کرنے اور میر واعظ کی حیثیت سے اپنی ذمہ داریاں ادا کرنے سے روکنے والی یہ پابندیاں ذاتی طور پر انتہائی تکلیف دہ ہیں، لیکن یہ مجھے اپنی ذمہ داریاں پوری کرنے اور لوگوں کے حقوق کے لیے ان کی آواز اٹھانے سے نہیں روک سکتیں۔”
دریں اثنا، میر واعظ نے کہا کہ سری نگر کی ایک عدالت میں جموں و کشمیر لبریشن فرنٹ (جے کے ایل ایف) کے صدر یاسین ملک کا حلف نامہ، جس میں خاص طور پر خود کو بے قصور قرار دیتے ہوئے مقدمے کی مزید پیروی نہ کرنے اور سزائے موت کا مطالبہ کرنے کا فیصلہ کیا گیا ہے، انتہائی تشویش ناک ہے۔

حریت کے صدر میر واعظ نے کہا، “یہ فیصلہ ان سے کیے گئے وعدوں پر سنجیدہ غور و فکر کا تقاضا کرتا ہے اور مناسب قانونی عمل، غیر جانب داری اور انسانی نقطۂ نظر کی ضرورت کو اجاگر کرتا ہے۔”

سری نگر کی ایک عدالت کے سامنے حال ہی میں داخل کیے گئے حلف نامے میں جیل میں بند ملک نے 1990 میں کشمیری پنڈت نرس سرلا بھٹ کے قتل میں اپنے کسی بھی کردار سے انکار کیا ہے، اس کے باوجود انہوں نے اپنے لیے سزائے موت کا مطالبہ کرتے ہوئے اس معاملے میں مزید اپنی پیروی نہ کرنے کے فیصلے کا اعلان کیا ہے۔

یو این آئی۔ ایم جے

سری نگر، نوی ممبئی سے سری نگر آ رہی انڈیگو کی ایک پرواز جمعہ کی صبح ہوائی اڈے کے طیارہ پارکنگ مقام پر کھڑی ہونے کے دوران وی ڈی جی ایس کے کھمبے سے ٹکرا گیا۔

ہوائی اڈے کے افسران نے بتایا کہ طیارہ صبح تقریباً 9 بجے پارکنگ مقام نمبر 6 پر لگے وی ڈی جی ایس کے کھمبے سے ٹکرا گیا۔

افسران کے مطابق طیارے میں سوار تمام مسافر اور عملے کے ارکان پوری طرح محفوظ ہیں اور کسی کے ہلاک یا زخمی ہونے کی اطلاع نہیں ہے۔ مسافروں اور عملے کے ارکان کو دستی سیڑھیوں کی مدد سے بحفاظت باہر اتارا گیا۔ مقررہ طریقہ کار کے تحت متعلقہ افسران اس واقعے کے حالات اور وجوہات کی گہرائی سے جانچ کریں گے۔

افسران نے کہا کہ جانچ مکمل ہونے کے بعد ہی واقعے کی اصل وجہ کا پتہ چل سکے گا۔ فی الحال اس مرحلے پر حادثے کی وجوہات کے بارے میں کوئی نتیجہ اخذ نہیں کیا جا رہا ہے۔

دریں اثنا، ہوائی اڈے پر پروازوں کا کام پوری طرح معمول کے مطابق رہا اور پروازوں کی آمد اور روانگی اپنے مقررہ وقت کے مطابق جاری رہی۔

یو این آئی، ایم جے

سری نگر، وسطی کشمیر کے بڈگام ضلع کے اونچے علاقوں میں شروع کی گئی تلاشی مہم جمعہ کی صبح دوبارہ شروع ہوئی۔ سکیورٹی فورسز نے پیر پنجال سلسلے کے دشوار گزار علاقوں میں تلاشی کا عمل تیز کر دیا ہے۔

ذرائع نے بتایا کہ بڈگام-پونچھ سرحد کے قریب تقریباً 15,000 فٹ کی بلندی پر واقع ایک جنگلاتی علاقے میں چلائی جا رہی ہے۔ دشوار گزار راستوں کی وجہ سے یہ تلاشی مہم کافی چیلنجنگ ہے۔

یہ علاقہ پیر پنجال سلسلے میں آتا ہے، جو کشمیر وادی کو پونچھ – راجوری علاقے سے جوڑتا ہے۔

علاقے میں دہشت گردوں کی موجودگی کی اطلاع ملنے کے بعد مشترکہ سکیورٹی فورسز نے محاصرہ اور تلاشی مہم (سی اے ایس او) شروع کی تھی، جس کے بعد جمعرات کی شام گولی چلنے کی آوازیں سنی گئی تھیں۔

ذرائع نے بتایا کہ رات کے وقت مہم روک دی گئی تھی اور جمعہ کی صبح اسے دوبارہ شروع کیا گیا۔ سکیورٹی فورسز نے مشتبہ علاقے کے چاروں طرف سخت گھیراؤ برقرار رکھا ہوا ہے اور تلاشی جاری ہے۔

انہوں نے بتایا کہ مہم میں مدد کے لیے اضافی سکیورٹی اہلکاروں کو بھی علاقے میں بھیجا گیا ہے۔

اس مہم کے بارے میں اب تک پولیس یا فوج کی جانب سے کوئی سرکاری بیان سامنے نہیں آیا ہے۔

یو این آئی۔ ایم جے