سرینگر، وادی کشمیر میں جنگلی سوروں کی تیزی سے بڑھتی ہوئی آبادی کی اصل کا پتہ لگانے کے لیے سائنسدانوں نے جینیاتی تحققی کام شروع کر دیا ہے۔

شیرِ کشمیر زرعی سائنس اور ٹیکنالوجی یونیورسٹی کشمیر (ایس کے یو اے ایس ٹی-کے) کے وائلڈ لائف سائنس ڈیپارٹمنٹ کے سربراہ پروفیسر خورشید احمد نے بتایا کہ جانور کا ایک نمونہ پہلے ہی جمع کر لیا گیا ہے۔ اب جموں اور ہندوستان کے اہم حصوں میں پائی جانے والی جنگلی سوروں کی آبادی کے ساتھ ان کے تعلق کا پتہ لگانے کے لیے جینیاتی تجزیہ کیا جائے گا۔

مسٹر خورشید نے یو این آئی کو بتایا، “ہم جینیاتی طور پر یہ ثابت کرنا چاہتے ہیں کہ کیا ان کا تعلق اہم آبادی (جموں یا ہندوستان کے اہم حصے کی آبادی) سے ہے یا پھر ان کا تعلق کشمیر کے دوسری طرف یعنی لائن آف کنٹرول (ایل او سی) کے پار کی آبادی سے ہے۔”

یہ مطالعہ کشمیر میں اس نوع کی موجودگی کو لے کر بڑھتی ہوئی تشویش کے درمیان ہو رہا ہے کیونکہ وادی کے کئی علاقوں میں کسان زراعت اور سبزیوں کی فصلوں کو بھاری نقصان پہنچنے کی بات کہہ رہے ہیں۔ قابلِ ذکر ہے کہ جنگلی سور کو کشمیر کا مقامی جانور نہیں مانا جاتا ہے اور 1980 کی دہائی میں اس علاقے میں انہیں مقامی طور پر معدوم قرار دے دیا گیا تھا۔ مسٹر خورشید کے مطابق اس نوع کو مہاراجہ گلاب سنگھ کے دورِ حکومت میں شکار کے مقصد سے کشمیر لایا گیا تھا، خاص طور پر داچی گام نیشنل پارک کے آس پاس کے جنگلات اور اس سے ملحقہ علاقوں میں۔ داچی گام میں تین جنگلی سور 2013 میں دوبارہ دیکھے گئے تھے۔ اس سے پہلے 1984 میں اس نوع کو آخری بار دیکھا گیا تھا۔

آبادی کے ساتھ ان کے تعلقات کی جانچ کی جائے گی اور اس کے بعد پورے کشمیر میں جنگلی سوروں کی آبادی کا جینیاتی تخمینہ لگایا جائے گا۔ اس تحقیق سے یہ پتہ چل سکتا ہے کہ کشمیر کے الگ الگ حصوں میں پائے جانے والے جانور ایک ہی، باہم جڑی ہوئی آبادی کا حصہ ہیں یا الگ الگ آبادی ہیں۔ اس سے جین کے بہاؤ، نقل و حرکت کے انداز اور وادی میں اس نوع کی توسیع کے بارے میں بھی معلومات مل سکتی ہیں۔

یواین آئی۔الف الف

سرینگر، وسطی کشمیر کے ضلع بڈگام کے بالائی علاقوں میں ہونے والے مقابلے کے ایک دن بعد، جموں و کشمیر پولیس نے ہفتے کے روز آپریشن میں ہلاک ہونے والے دہشت گرد کی شناخت لشکرِ طیبہ سے وابستہ پاکستانی شہری یاسر کے طور پر کی ہے۔

پولیس نے ‘ایکس’ پر ایک پوسٹ میں کہا، “آپ بھاگ سکتے ہیں لیکن چھپ نہیں سکتے! ‘آپریشن اشدر’ کے دوران ہلاک کیے گئے دہشت گرد کی شناخت یاسر کے طور پر ہوئی ہے، جو لشکرِ طیبہ کا ایک پاکستانی شہری تھا۔”

یہ دہشت گرد جمعرات کی شام علاقے میں دہشت گردوں کی موجودگی کے بارے میں مخصوص انٹیلی جنس معلومات کی بنیاد پر ہندستانی فوج، جموں و کشمیر پولیس اور سی آر پی ایف کی جانب سے شروع کیے گئے ایک مشترکہ آپریشن کے دوران ہلاک ہوا۔ فوج نے بڈگام میں اس آپریشن کو ‘آپریشن اشدر’ کا کوڈ نام دیا ہے۔

جمعہ کو، فوج کی سرینگر میں قائم چنار کور نے کہا کہ تلاشی مہم میں مصروف فورسز نے مشکوک نقل و حرکت دیکھی اور چیلنج کرنے پر دہشت گردوں نے فائرنگ کر دی، جس سے فائرنگ کا تبادلہ شروع ہو گیا۔

فوج نے بتایا کہ اس کے بعد ہونے والے آپریشن میں ایک دہشت گرد ہلاک ہو گیا، جبکہ موقع سے ایک اے کے سیریز رائفل اور دیگر جنگی سامان برآمد ہوا ہے۔

یہ آپریشن بڈگام-پونچھ سرحد کے قریب تقریباً 15,000 فٹ کی بلندی پر واقع ایک گھنے جنگلاتی علاقے میں انجام دیا گیا، جہاں سکیورٹی فورسز کو دشوار گزار راستوں کی وجہ سے مشکل حالات کا سامنا کرنا پڑا۔

یہ علاقہ پیر پنجال کے پہاڑی سلسلے پر واقع ہے جو وادیِ کشمیر کو پونچھ-راجوری خطے سے جوڑتا ہے۔

فائرنگ کے کچھ گھنٹوں بعد، فوج کے ناردرن کمانڈر لیفٹیننٹ جنرل پرتیک شرما نے بڈگام کے عمومی علاقے اشدر گلی میں ایک دہشت گرد کو ہلاک کرنے کے لیے سرینگر میں قائم چنار کور کی فوری اور درست کارروائی کی ستائش کی۔

سکیورٹی فورسز نے جموں و کشمیر کے بالائی علاقوں، خاص طور پر جنگلاتی اور دشوار گزار علاقوں میں اپنی موجودگی تیز کر دی ہے جہاں دہشت گردوں کے پناہ لینے کا شبہ ہے۔ ان علاقوں میں مسلسل سکیورٹی موجودگی برقرار رکھنے کی حکمتِ عملی کے تحت، بالائی علاقوں میں کئی مقامات پر عارضی آپریٹنگ بیسز (ٹی اوبی) قائم کیے گئے ہیں۔

جموں و کشمیر پولیس کے سربراہ نالن پربھات نے گزشتہ ماہ ان عارضی آپریٹنگ بیسز کے کام کاج اور خطے میں سکورٹی انتظامات کا جائزہ لیا تھا۔

یواین آئی۔الف الف

سرینگر، حکام نے بتایا کہ جمعہ کے روز بڈگام-پونچھ سرحد کے قریب اشدر گلی علاقے میں سیکیورٹی فورسز کے ساتھ فائرنگ کے تبادلے میں ایک نامعلوم دہشت گرد ہلاک ہو گیا۔

یہ آپریشن ہندوستانی فوج، جموں و کشمیر پولیس اور سی آر پی ایف نے علاقے میں دہشت گردوں کی موجودگی سے متعلق مخصوص انٹیلی جنس معلومات کی بنیاد پر شروع کیا تھا۔

فوج کی سرینگر میں قائم چنار کور کے مطابق تلاشی آپریشن کرنے والے اہلکاروں نے مشکوک نقل و حرکت دیکھی۔ للکارنے پر دہشت گردوں نے فائرنگ کر دی، جس سے فائرنگ کا تبادلہ شروع ہو گیا۔

فوج نے بتایا کہ اس کے بعد ہونے والے آپریشن میں ایک دہشت گرد کو ہلاک کر دیا گیا، جبکہ واقعے کی جگہ سے ایک اے کے سیریز کی رائفل اور دیگر جنگی سامان برآمد ہوا ہے۔

آخری اطلاعات ملنے تک تلاشی آپریشن جاری تھا۔

سرکاری ذرائع نے بتایا کہ یہ آپریشن بڈگام-پونچھ سرحد کے قریب تقریباً 15,000 فٹ کی بلندی پر ایک گھنے جنگلاتی علاقے میں چلا یا جا رہا ہے، جہاں سیکیورٹی فورسز کو ناہموار اور مشکل علاقے کی وجہ سے سخت حالات کا سامنا ہے۔

یہ علاقہ پیر پنجال کے پہاڑی سلسلے کے ساتھ واقع ہے، جو وادی کشمیر کو پونچھ-رجوری خطے سے جوڑتا ہے۔

یواین آئی۔ ظ ا