باغپت، اتر پردیش میں باغپت کے کھیکڑا علاقے میں ایسٹرن پیریفرل ایکسپریس وے پر اتوار کی دیر رات تقریباً 1 بجے دردناک سڑک حادثہ پیش آیا۔ کھیکڑا کوتوالی علاقے میں بسی اور بڑا گاؤں ٹول کے درمیان عقیدتمندوں سے بھرا کینٹر بے قابو ہو کر ڈیوائیڈر سے ٹکرا کر الٹ گیا۔ حادثے میں ایک سال کی بچی سمیت پانچ کی موقع پر ہی موت ہو گئی، جبکہ 27 افراد شدید طور پر زخمی ہو گئے۔

پولیس کی معلومات کے مطابق، کینٹر میں سوار تمام افراد بدایوں ضلع کے اجھانی تھانہ علاقے کے الہاپور گاؤں کے رہنے والے ہیں۔ یہ تمام لوگ راجستھان کے ہنومان گڑھ میں واقع گوگامیڑی مندر (باگڑ دھام) کی یاترا کے بعد واپس لوٹ رہے تھے۔ پک اپ میں گنجائش سے زیادہ تقریباً 32 افراد سوار تھے۔

سپرنٹنڈنٹ آف پولیس سورج رائے نے بتایا کہ ابتدا میں ٹائر پھٹنے کی بات سامنے آئی تھی، لیکن زخمی کنور پال اور ڈرائیور نے بتایا کہ پیچھے سے آنے والی ایک تیز رفتار گاڑی نے ان کے کینٹر کو ٹکر مار دی، جس سے گاڑی کئی بار الٹ گئی۔ حادثے کے وقت تمام لوگ سو رہے تھے کہ اچانک تیز دھماکے کے ساتھ چیخ و پکار مچ گئی۔ دیر رات ہی پولیس نے تمام زخمیوں کو کھیکڑا اور باغپت کے ضلع اسپتال پہنچایا۔

ضلع اسپتال میں فارماسسٹ مکیش کمار نے بتایا کہ 18 شدید زخمیوں کو بہتر علاج کے لیے میرٹھ کے ہائر سینٹر ریفر کر دیا گیا ہے، جبکہ 3 افراد کا ضلع اسپتال میں علاج جاری ہے۔

حادثے کی اطلاع ملتے ہی ڈی ایم اسمیتا لال اور ایس پی سورج کمار رائے ضلع اسپتال پہنچے اور زخمیوں کی مزاج پرسی کی، نیز ہیلتھ ورکرز کو بہترین علاج کی ہدایات دیں۔ ڈی ایم نے بتایا کہ وزیر اعلیٰ یوگی آدتیہ ناتھ نے حادثے پر گہرے دکھ کا اظہار کیا ہے اور متوفین کے لواحقین سے تعزیت کرتے ہوئے زخمیوں کے مفت علاج کی ہدایات دی ہیں۔ پولیس متوفین کی شناخت میں مصروف ہے اور لواحقین کو فون پر اطلاع دے دی گئی ہے۔ پولیس نے امداد کے لیے ہیلپ لائن نمبر 9454417383 جاری کیا ہے۔

یواین آئی۔الف الف

گونڈہ، اتر پردیش میں ضلع گونڈہ کے کھرگو پور علاقے میں پیر کے روز تیز رفتار جیپ اور بائیک کے تصادم میں بائیک سوار دو طلبہ کی موت ہو گئی۔

پولیس ذرائع کے مطابق، کھرگو پور-اٹیا تھوک روڈ پر قصبہ بازار کے رہائشی امن (14) اور وپن موریہ (15) بائیک سے کوچنگ جا رہے تھے۔ اسی دوران تیز رفتار بے قابو جیپ نے ان کی بائیک کو ٹکر مار دی۔ حادثے میں دونوں طلباء شدید طور پر زخمی ہو گئے اور ان کی موقع پر ہی موت ہو گئی۔

اطلاع ملنے پر پولیس موقع پر پہنچی اور دونوں لاشوں کو تحویل میں لے کر پوسٹ مارٹم کے لیے بھیج دیا۔

پولیس نے بتایا کہ حادثے کے بعد جیپ ڈرائیور کے خلاف قانونی کارروائی کی جا رہی ہے۔

یو این آئی۔الف الف

نئی دہلی، صدر جمہوریہ دروپدی مرمو نے تعلیم کو آئین میں درج مساوی مواقع کے آدرش کو عملی جامہ پہنانے کا سب سے مؤثر ذریعہ قرار دیتے ہوئے پرائمری اسکولوں میں پڑھائی چھوڑنے والے بچوں کی تعداد میں کمی لانے میں اساتذہ کی کوششوں کو اہم بتایا ہے۔

محترمہ دروپدی مرمو نے یوم اساتذہ کے موقع پر ہفتہ کو یہاں منعقدہ تقریب میں ملک بھر کے بہترین اساتذہ کو قومی ایوارڈز سے نوازا۔ صدر جمہوریہ نے کہا کہ اسکول کی تعلیم پورے تعلیمی نظام کی بنیاد ہے۔ ابتدائی کلاسوں میں بچوں کی ذہنی، جسمانی اور اخلاقی ترقی پر توجہ دے کر اساتذہ بہترین طالب علم اور ذمہ دار شہری تیار کر سکتے ہیں۔ انہوں نے کہا کہ معاشی طور پر کمزور خاندانوں کے بچوں، پہلی نسل کے علم حاصل کرنے والوں، گاؤں سے بڑے شہروں کے اسکولوں میں آنے والے طلباء، شرمیلے بچوں، باصلاحیت لیکن اعتماد کی کمی والے طلباء اور خصوصی ضروریات والے بچوں میں اعتماد پیدا کرنا اساتذہ کی خاص ذمہ داری ہے۔

انہوں نے کہا کہ تعلیمی عمدگی، ہنرمندی کا فروغ اور کاروباری صلاحیت ملک کی ترقی کے لیے انتہائی اہم ہیں۔ انہوں نے کہا کہ ملک کو دنیا کی مہارت کی راجدھانی اور علم کی عظیم طاقت بنانا حکومت کی قومی ترجیحات میں شامل ہے۔ صدر جمہوریہ نے کہا کہ وکست بھارت کا ہندوستان کا ہدف عالمی سطح کے تعلیمی نظام کے ذریعے ہی حاصل کیا جا سکتا ہے۔ انہوں نے زور دیا کہ ملک کا ایک بھی طالب علم معیاری تعلیم کے موقع سے محروم نہ رہے اور اساتذہ اپنی محبت اور لگن سے طلباء میں علم، تحریک، اخلاقیات اور حساسیت پیدا کریں۔

یواین آئی ایف اے