سری نگر، حریت کانفرنس کے چیئرمین اور کشمیر کے اہم مذہبی رہنما میرواعظ عمر فاروق نے منگل کے روز مرکزی حکومت سے جموں و کشمیر میں سماجی اور سیاسی تنظیموں پر مبینہ پابندیاں عائد کرنے کی پالیسی پر ازسرنو غور کرنے کی اپیل کرتے ہوئے کہا ہے کہ اس طرح کی سخت پابندیاں مقامی شہریوں اور تنظیموں کے لیے ہراسانی اور ڈرانے دھمکانے کا ذریعہ نہیں بننی چاہئیں۔

میرواعظ نے سوشل میڈیا پر لکھا کہ امن بحالی اور استحکام کے لیے یہ ضروری ہے کہ مرکزی حکومت عوامی جذبات اور اپیلوں کو سنے اور پابندیوں کی پالیسی پر دوبارہ غور کرے۔ انہوں نے اس بات پر زور دیا کہ جب ایسی پابندیوں کو عدالتوں میں چیلنج کیا جاتا ہے، تو قانونی عمل کو شفافیت اور غیر جانبداری کے ساتھ چلنے دینا چاہیے اور حکام کو کسی بھی ایسی یکطرفہ کارروائی سے گریز کرنا چاہیے جو قانونی راستوں کو بے معنی بنا دے۔ انہوں نے ضبط کی گئی جائدادوں اور تعلیمی اداروں کے حوالے سے ضبط و تحمّل برتنے اور قانون و عدالتی عمل کی مکمل پاسداری کرنے کی اپیل کی۔

انہوں نے یہ بھی کہا کہ حقیقی عوامی حمایت رکھنے والی آوازوں کو نظر انداز کر کے یا ان کی جگہ سہولت بخش متبادل کھڑے کر کے کوئی بھی پائیدار سیاسی عمل شروع نہیں کیا جا سکتا۔ انہوں نے کہا کہ حقیقی سماجی اور سیاسی اثر و رسوخ رکھنے والے گروہوں کو جگہ دی جانی چاہیے اور ان کے ساتھ بات چیت کے عمل سے جڑنا چاہیے۔

قابلِ ذکر ہے کہ میرواعظ کا یہ بیان پیپلز ڈیموکریٹک پارٹی (پی ڈی پی) کی صدر محبوبہ مفتی کے بیان کے ایک روز بعد سامنے آیا ہے۔ محبوبہ مفتی نے بھی جماعتِ اسلامی سے منسوب جائیدادوں کے معاملے میں حکومت سے مناسب قانونی طریقۂ کار اختیار کرنے کی اپیل کی تھی۔

وزارتِ داخلہ نے یو اے پی اے قانون کے تحت اس تنظیم پر 2019 میں پانچ سال کی پابندی عائد کی تھی، جسے فروری 2024 میں مزید پانچ سال کے لیے بڑھا دیا گیا ہے۔

یو این آئی۔ م ع

سری نگر، احتجاج کرنے والے میڈیکل انٹرنز کی جانب سے 48 گھنٹے کی بھوک ہڑتال شروع کیے جانے کے درمیان جموں و کشمیر کے وزیر اعلیٰ عمر عبداللہ نے پیر کو اس مسئلے کے جلد حل پر زور دیتے ہوئے کہا کہ اس معاملے کے صحت خدمات اور انٹرنز کی تربیت پر سنگین اثرات مرتب ہو رہے ہیں۔

انہوں نے واضح کیا کہ اس معاملے پر پہلا فیصلہ محکمہ صحت کو ہی کرنا ہوگا۔

سری نگر میں صحافیوں سے بات کرتے ہوئے عمر عبداللہ نے کہا کہ یہ مسئلہ بنیادی طور پر محکمہ صحت کے دائرۂ کار میں آتا ہے اور دیگر سرکاری محکمے اسی وقت کارروائی کرسکتے ہیں جب محکمہ صحت اس سلسلے میں فیصلہ کرے۔

عمر عبداللہ نے کہاکہ ’’یہ افسوسناک ہے۔ معاملہ اس مرحلے تک نہیں پہنچنا چاہیے تھا۔‘‘ انہوں نے مزید کہا کہ محکمہ صحت کو اس معاملے میں پہلا فیصلہ کرنا ہوگا۔

عمر عبداللہ نے کہا کہ وزیر صحت سکینہ ایتو نے احتجاج کرنے والے ڈاکٹروں سے بات کی ہے اور ان کی معلومات کے مطابق انہیں یقین دہانی بھی کرائی گئی ہے۔

انہوں نے کہاکہ ’’لیکن اس کے بعد کیا ہوگا، یہ آپ کو سکینہ سے پوچھنا چاہیے۔‘‘

وزیر اعلیٰ نے کہا کہ وہ چاہتے ہیں کہ اس مسئلے کو جلد از جلد حل کیا جائے، کیونکہ یہ تعطل کسی کے مفاد میں نہیں ہے۔

انہوں نے کہاکہ ’’سب سے پہلے تو ان کا کام متاثر ہو رہا ہے۔ ان کی انٹرن شپ متاثر ہو رہی ہے۔ اور ہم نہیں چاہتے کہ ہمارے بچے اس طرح کی صورت حال سے گزریں۔‘‘

وزیر اعلیٰ نے ایک بار پھر کہا کہ پہلے محکمہ صحت کو فیصلہ کرنا ہوگا، جس کے بعد حکومت کے دیگر محکمے اس معاملے میں کارروائی کرسکیں گے۔

جموں و کشمیر کے مختلف میڈیکل کالجوں اور اسپتالوں میں ایم بی بی ایس اور بی ڈی ایس انٹرنز گزشتہ ایک ہفتے سے کام معطل کیے ہوئے ہیں اور اپنے اسٹائپنڈ میں اضافے کا مطالبہ کر رہے ہیں۔ ان کا کہنا ہے کہ گزشتہ تقریباً سات برس سے وظیفے میں کوئی اضافہ نہیں کیا گیا ہے۔ فی الحال انٹرنز کو تقریباً 12,300 روپے ماہانہ یعنی تقریباً 400 روپے یومیہ وظیفہ ملتا ہے، جسے بڑھا کر 30,000 روپے ماہانہ کرنے کا مطالبہ کیا جا رہا ہے۔

کچھ میڈیکل کالجوں کے انٹرنز نے آج سے 48 گھنٹے کی بھوک ہڑتال بھی شروع کردی ہے۔

یواین آئی۔ ظ ا

جموں، بین ریاستی منشیات اسمگلنگ کے خلاف ایک بڑی کارروائی میں جموں و کشمیر پولیس نے پیر کو کٹھوعہ ضلع میں ایک بین ریاستی منشیات اسمگلنگ نیٹ ورک کا پردہ فاش کرتے ہوئے افیون کی بڑی مقدار کے ساتھ چار افراد کو گرفتار کرلیا۔

ایک سرکاری ترجمان نے بتایا کہ کٹھوعہ کی ایس ایس پی موہیتا شرما کی مجموعی نگرانی میں لکھن پور میں پولیس کی ایک ٹیم نے ایک کمرشل گاڑی کو روک کر اس میں سے 2.672 کلو گرام منشیات (افیون) برآمد کی اور سپلائی چین میں ملوث چار افراد کو گرفتار کرلیا۔

انہوں نے بتایا کہ منشیات کی نقل و حرکت سے متعلق قابلِ اعتماد اطلاع ملنے پر پولیس اسٹیشن لکھن پور کی ایک خصوصی ٹیم نے فرسٹ کلاس ایگزیکٹو مجسٹریٹ (ای ایم آئی سی) کی موجودگی میں لکھن پور کے شمشان گھاٹ کے قریب بائی پاس روڈ پر ناکہ لگایا اور ایک ٹرک کو روکا۔

ترجمان کے مطابق گاڑی کی مکمل تلاشی کے دوران 1.026 کلو گرام افیون برآمد ہوئی۔ انہوں نے بتایا کہ متعلقہ این ڈی پی ایس ایکٹ کی دفعات کے تحت منشیات اور ٹرک کو موقع پر ہی قبضے میں لے لیا گیا۔

گاڑی میں سوار ڈرائیور اور اس کے ساتھی ملزم کو حراست میں لے لیا گیا۔ ان کی شناخت گروِندر سنگھ اور سکھ دیو سنگھ کے طور پر ہوئی ہے، جو دونوں پنجاب کے ضلع ترن تارن کے رہنے والے ہیں۔

مسلسل پوچھ گچھ کے دوران ملزم سکھ دیو سنگھ نے انکشاف کیا کہ یہ کھیپ گجرات سے روانہ ہوئی تھی اور راجستھان میں ایک نامعلوم شخص نے اسے اس کے حوالے کیا تھا۔ اسے ہدایت دی گئی تھی کہ کھیپ کا ایک حصہ پنجاب میں موجود ایک وصول کنندہ تک پہنچایا جائے۔

اس انکشاف کے بعد پولیس نے فوری کارروائی کرتے ہوئے ایک خصوصی چھاپہ مار ٹیم کو مقررہ مقام پر روانہ کیا، جو گاؤں نکی، پرمانند، پٹھان کوٹ میں واقع تھا۔

مطلوبہ وصول کنندہ پٹھان کوٹ کے گاؤں نکی کے رہائشی راکیش کمار کا سراغ لگانے کے دوران معلوم ہوا کہ منشیات کا پیکٹ اس کے پڑوسی اجے کمار کے گھر میں چھپایا گیا تھا۔

ترجمان نے بتایا کہ بعد ازاں اجے کمار کے گھر کی تلاشی لی گئی، جہاں چھپائی گئی منشیات کا پیکٹ فوری طور پر برآمد کرکے ضبط کرلیا گیا۔

ترجمان نے بتایا کہ اس طرح مجموعی طور پر 2.672 کلو گرام افیون برآمد کی گئی اور دونوں ملزمان کو گرفتار کرکے پولیس اسٹیشن لکھن پور لایا گیا۔

ترجمان نے کہا، ’’متعلقہ دفعات کے تحت مقدمہ درج کرکے تحقیقات شروع کردی گئی ہیں، جبکہ بین ریاستی منشیات کے اس سنڈیکیٹ کے آگے اور پیچھے کے روابط کا پردہ فاش کرنے کے لیے مزید تفتیش جاری ہے۔‘‘

یواین آئی۔ ط ا