ہندوستان

پنجاب، ہریانہ اور دہلی میں بھاری بارش، ژالہ باری اور 60 کلومیٹر فی گھنٹہ کی رفتار سے ہوائیں چلنے کی پیشگوئی

Published

1 week ago

October 15, 2026

نئی دہلی، محکمہ موسمیات (آئی ایم ڈی) نے جمعرات کو پنجاب، ہریانہ، چنڈی گڑھ اور دہلی کے کچھ علاقوں میں بھاری سے بہت بھاری بارش کی وارننگ دی ہے۔ اس کے ساتھ ہی ژالہ باری، بجلی گرنے اور 60 کلومیٹر فی گھنٹہ کی رفتار سے تیز ہوائیں چلنے کا بھی امکان ہے۔ محکمہ نے جنوبی ہند میں شمال مشرقی مانسون کی بارش شروع ہونے کے آثار بھی ظاہر کیے ہیں۔

آئی ایم ڈی نے جمعرات کی صبح جاری تازہ بلیٹن میں 15 اکتوبر کو پنجاب، ہریانہ، چنڈی گڑھ، دہلی، ہماچل پردیش اور جموں و کشمیر میں وسیع پیمانے پر بارش کا تخمینہ لگایا ہے۔ 16 اکتوبر سے شمال مغربی ہند میں بارش کی سرگرمی کمزور ہونے کے آثار ہیں۔ جمعرات کو پنجاب، ہریانہ، چنڈی گڑھ اور دہلی کے کچھ حصوں میں بجلی کڑکنے کے ساتھ آندھی طوفان آنے اور 40-50 کلومیٹر فی گھنٹہ (جو 60 کلومیٹر فی گھنٹہ تک پہنچ سکتی ہے) کی رفتار سے ہوائیں چلنے کا امکان ہے۔ اتراکھنڈ، مغربی اتر پردیش اور مشرقی راجستھان سمیت اس پورے علاقے کے کچھ حصوں میں ژالہ باری کا بھی تخمینہ ہے۔ جموں و کشمیر کے اوپر ایک ‘ویسٹرن ڈسٹربنس’ سرگرم تھا، جبکہ شمال مغربی اتر پردیش اور جنوب مغربی راجستھان کے اوپر الگ الگ سائیکلونک سرکولیشن برقرار ہیں۔

آئی ایم ڈی کے مطابق، 14 اکتوبر کی صبح 8:30 بجے سے 15 اکتوبر کی صبح 5:30 بجے کے درمیان پنجاب، ہریانہ، چنڈی گڑھ، دہلی اور مغربی راجستھان کے کئی علاقوں میں بارش درج کی گئی۔ انبالہ میں 3 سینٹی میٹر، جبکہ پٹیالہ اور سری گنگانگرمیں 1-1 سینٹی میٹر بارش ہوئی۔ جموں اور کُکیرناگ میں 3-3 سینٹی میٹر، اور قاضی گنڈ، سری نگر نیز کٹرا میں 2-2 سینٹی میٹر بارش درج کی گئی۔

محکمہ نے 16 اکتوبر کو پنجاب، ہریانہ، چنڈی گڑھ اور دہلی میں کچھ جگہوں پر بارش کا تخمینہ لگایا ہے، جس کے بعد 17 سے 21 اکتوبر تک موسم خشک رہنے کا امکان ہے۔

محکمہ نے وارننگ دی ہے کہ ژالہ باری اور تیز ہواؤں سے کھڑی فصلوں، باغبانی، بجلی اور مواصلاتی لائنوں، اور کمزور ڈھانچوں کو نقصان پہنچ سکتا ہے۔ کسانوں کو صلاح دی گئی ہے کہ وہ اپنے باغوں اور سبزیوں کی فصلوں کو اولوں سے ہونے والے نقصان سے بچائیں۔

دریں اثنا، آئی ایم ڈی نے بتایا کہ ملک کے باقی حصوں سے جنوب مغربی مانسون کی واپسی اور 15 اکتوبر سے جنوبی ہند میں شمال مشرقی مانسون کی بارش شروع ہونے کے لیے موافق حالات بن گئے ہیں۔ جمعرات کو کیرالہ، ماہے، تمل ناڈو، پڈوچیری اور کرائیکل کے کچھ علاقوں میں بھاری سے بہت بھاری بارش کا تخمینہ لگایا گیا ہے۔ 16 اکتوبر کو جنوبی کرناٹک کے اندرونی علاقوں میں بھی اسی طرح کے حالات رہنے کا امکان ہے۔

محکمہ نے 15 سے 20 اکتوبر کے درمیان تمل ناڈو، کیرالہ اور جنوبی کرناٹک کے اندرونی علاقوں میں وسیع پیمانے پر بارش کا تخمینہ لگایا ہے۔ اس کے علاوہ، آندھرا پردیش، تلنگانہ اور ساحلی کرناٹک کے کچھ حصوں میں بھی الگ الگ دنوں میں بھاری بارش ہونے کا امکان ہے۔ محکمہ نے تنبیہ دی ہے کہ تیز بارش اور آندھی طوفان کی وجہ سے حساس علاقوں میں مقامی سطح پر سیلاب اور پانی جمع ہو سکتا ہے، لینڈ سلائیڈنگ، کھڑی فصلوں کو نقصان پہنچ سکتا ہے اور سڑک و ریل نقل و حمل میں رکاوٹ آ سکتی ہے۔

پچھلی مشاہداتی مدت کے دوران تمل ناڈو کے ناگپٹنم میں 9 سینٹی میٹر بارش درج کی گئی، اس کے بعد کرائیکل میں 8 سینٹی میٹر اور وشاکھاپٹنم میں 3 سینٹی میٹر بارش ہوئی۔ اس کے علاوہ 15 سے 20 اکتوبر کے دوران مدھیہ پردیش، چھتیس گڑھ اور ودربھ میں کہیں کہیں بارش ہونے کا اندازہے۔ اس دوران اڈیشہ، مغربی بنگال، بہار، جھارکھنڈ اور شمال مشرقی ریاستوں کے کچھ حصوں میں بھی بارش ہونے کے آثار ہیں۔ آئی ایم ڈی نے بتایا کہ 14 اکتوبر کو گجرات کے ڈیسا میں سب سے زیادہ درجہ حرارت 40.2 ڈگری سیلسیس درج کیا گیا۔

یواین آئی۔الف الف

ہندوستان

اگلے 30 سال تک اپوزیشن کی حکومت نہیں بنے گی: شاہ

Published

41 minutes ago

October 22, 2026

Online Desk

نئی دہلی، مرکزی وزیر داخلہ و امدادباہمی امت شاہ نے کہا کہ اپوزیشن جس طرح کی منفی سیاست کررہی ہے، اس کے پیش نظر اگلے 30 سال تک اس کی حکومت بننے کا کوئی امکان نہیں ہے۔

مسٹر شاہ یہاں یمنا کی بحالی سے متعلق 8,941 کروڑ روپے کے منصوبوں کے افتتاح اور سنگِ بنیاد کی تقریب سے خطاب کررہے تھے۔ انہوں نے کانگریس لیڈر راہل گاندھی اور عام آدمی پارٹی کے قومی کنوینر اروند کیجریوال کو نشانہ بناتے ہوئے الزام لگایا کہ اپوزیشن جماعتیں انتخابات میں شکست کے بعد ای وی ایم، ووٹ چوری اور الیکشن کمیشن کو لے کر بہانے بناتی ہیں۔ انہوں نے کہا کہ اپوزیشن جس طرح کی منفی سیاست کررہی ہے، اس سے اگلے 30 سال تک اس کی حکومت بننے کا امکان نہیں ہے۔

انہوں نے کہا کہ اپوزیشن جماعتیں کبھی ای وی ایم تو کبھی ووٹ چوری کا بہانہ بناتی ہیں۔ جب وہ کہتے ہیں کہ اگلے 30 سال تک ان کی پارٹی کی حکومت رہے گی تو اپوزیشن جماعتیں عوام سے کہتی ہیں کہ ووٹ چوری ہورہی ہے، ورنہ امت شاہ جی کو یہ بات کیسے معلوم ہوئی۔

مسٹر شاہ نے کہا کہ وہ یہیں پیدا ہوئے ہیں، یہیں رہتے ہیں اور ملک کے عوام کے درمیان رہتے ہیں۔ انہیں ہر چھ ماہ میں بیرون ملک جانے کی ضرورت نہیں پڑتی۔ انہوں نے کہا کہ اپوزیشن جس طرح کی منفی سیاست کررہی ہے، اس کے پیش نظر اگلے 30 سال تک اس کی حکومت نہیں بنے گی۔ ملک کی مختلف ریاستوں میں بی جے پی کی حکومتیں منتخب ہونے سے اپوزیشن جماعتیں پریشان ہیں اور اسی وجہ سے وہ ووٹ چوری کا مسئلہ اٹھارہی ہیں۔ انہوں نے الزام لگایا کہ اپوزیشن جماعتیں ووٹ چوری کا شور مچا کر دراندازوں کے ووٹ بچانا چاہتی ہیں۔

انہوں نے کہا کہ اپوزیشن انتخابات میں شکست کے بعد الیکشن کمیشن اور ووٹر لسٹ پر سوال اٹھاتی ہے، جب کہ جیتنے پر انہی انتظامات کو درست قرار دیتی ہے۔ انہوں نے کیرالہ، تلنگانہ، ہماچل پردیش اور تمل ناڈو کے انتخابات کا ذکر کرتے ہوئے اپوزیشن پر دوہرے معیار اپنانے کا الزام لگایا۔ انہوں نے کہا کہ اپوزیشن جماعتیں آس پاس کی ریاستوں سے اپنے کارکنوں کو جمع کرکے دہلی میں مظاہرے کرنے کے ذریعے عوام کے فیصلے کو جھٹلا نہیں سکتیں۔ جمہوریت میں انتخابات جیتنے کے لیے عوام کے درمیان جانا، ان کے مسائل کو سمجھنا اور انہیں حل کرنا ضروری ہے۔ دھرنے، مظاہروں اور سیاسی ہتھکنڈوں کے ذریعے عوامی فیصلے کو چیلنج نہیں کیا جاسکتا۔ انہوں نے کہا کہ بی جے پی کے بوتھ سطح کے کارکنوں سے لے کر وزیر اعظم نریندر مودی تک، پارٹی کے کروڑوں کارکن عوام کے درمیان رہ کر ان کے مسائل حل کرنے کے لیے کام کرتے ہیں۔

مسٹر شاہ نے مسٹر کیجریوال کو نشانہ بناتے ہوئے کہا کہ دہلی کے سابق وزیر اعلیٰ انتخابات میں شکست کے بعد پنجاب میں ڈیرہ ڈالے ہوئے ہیں اور وہاں کے وزیر اعلیٰ کو کام نہیں کرنے دے رہے ہیں۔ انہوں نے پنجاب میں منشیات کے کاروبار کے معاملے پر ریاستی حکومت کو نشانہ بنایا اور دعویٰ کیا کہ آئندہ انتخابات میں پنجاب کے عوام بی جے پی کو اقتدار میں لانے کا فیصلہ کرچکے ہیں۔ انہوں نے کہا کہ بی جے پی 2029 تک پنجاب سے منشیات کے کاروبار کو ختم کرنے کے لیے پُرعزم ہے۔ انہوں نے الزام لگایا کہ دہلی کی سابقہ حکومت نے تحریک کے نام پر اقتدار حاصل کیا، لیکن جمنا کی صفائی اور بنیادی شہری سہولتوں کی فراہمی کے لیے خاطر خواہ کام نہیں کیا۔

یمنا کی بحالی کا ذکر کرتے ہوئے مسٹر شاہ نے کہا کہ دہلی میں بی جے پی کی حکومت بننے کے بعد وزیر اعظم مودی نے دریا کو آلودگی سے پاک بنانے کے لیے ایک لائحہ عمل تیار کرنے کی ہدایت دی تھی۔ انہوں نے دعویٰ کیا کہ منصوبے کا 40 فیصد سے زیادہ کام مکمل ہوچکا ہے اور مرکز کے ساتھ دہلی، ہریانہ اور اتر پردیش کی حکومتوں نے یمنا کو صاف کرنے کے لیے مقررہ مدت پر مبنی لائحہ عمل تیار کیا ہے۔ انہوں نے اعتماد ظاہر کیا کہ مئی 2029 سے پہلے یمنا کو صاف و شفاف بنانے کا ہدف حاصل کرلیا جائے گا۔

یواین آئی ۔ ایف اے

ہندوستان

مودی اور نیتن یاہو کے درمیان فون پر بات چیت، مغربی ایشیا میں امن کی بحالی پر زور

Published

42 minutes ago

October 22, 2026

Online Desk

نئی دہلی، وزیر اعظم نریندر مودی اور اسرائیل کے وزیر اعظم بنیامن نیتن یاہو نے جمعرات کو مغربی ایشیا کی صورتِ حال پر تبادلۂ خیال کیا اور خطے میں امن و استحکام کی بحالی کی فوری ضرورت پر زور دیا۔

دونوں رہنماؤں نے ہندوستان اور اسرائیل کے درمیان خصوصی اسٹریٹجک شراکت داری کو مزید مضبوط بنانے کے عزم کا بھی اعادہ کیا۔

وزیر اعظم کے دفتر کے مطابق، مسٹر مودی نے اسرائیلی وزیر اعظم نیتن یاہو سے ٹیلی فون پر بات چیت کی۔

اس دوران دونوں رہنماؤں نے ہندوستان اور اسرائیل کے تعلقات میں مسلسل برقرار رفتار کا خیرمقدم کیا اور باہمی شراکت داری کو آگے بڑھانے پر اتفاق کیا۔

وزیر اعظم مودی نے مغربی ایشیا میں امن کی بحالی کے لیے بات چیت اور سفارت کاری کا راستہ اختیار کرنے کی ہندوستان کی اپیل کا اعادہ کیا۔ دونوں رہنماؤں نے آئندہ بھی رابطے میں رہنے پر اتفاق کیا۔

یواین آئی ۔ ایف اے

ہندوستان

سونیا گاندھی کی خودنوشت کا 10 نومبر کوہوگا اجرا، انسٹاگرام پر بھی ہوئیں سرگرم

Published

8 hours ago

October 22, 2026

Online Desk

نئی دہلی، کانگریس پارلیمانی پارٹی کی لیڈر سونیا گاندھی کی خودنوشت کتاب کا اجراء’بیلونگنگ: اے جرنی آف لو’ 10 نومبر کو عمل میں آئیگا۔

محترمہ گاندھی کی یہ کتاب باضابطہ طور پر سوشل میڈیا پلیٹ فارم انسٹاگرام پر بھی پیش کی گئی ہے اور اسی کے ساتھ محترمہ گاندھی نے بھی انسٹاگرام پر اپنی موجودگی درج کرائی ہے۔

محترمہ گاندھی نے اپنی کتاب کی پہلی جھلک شیئر کرتے ہوئے کہا کہ یہ محبت، فرض، جدائی اور اپنائیت کی تلاش کی کہانی ہے۔ انہوں نے کہا کہ وہ اس کتاب کو سب کے ساتھ شیئر کرنے کے لیے پُرجوش ہیں۔

محترمہ گاندھی نے انسٹاگرام پر لکھا، ”نمسکار، آپ سب کے ساتھ یہ لمحہ شیئر کرتے ہوئے مجھے بے حد خوشی ہو رہی ہے۔ یہ میری کتاب کی پہلی جھلک ہے۔ یہ محبت، فرض، کھونے کے درد اور اپنائیت کی تلاش کی کہانی ہے۔ میں اسے آپ سب کے ساتھ شیئر کرنے کے لیے پُرجوش ہوں۔”

شیئر کی گئی ریل میں محترمہ گاندھی کافی خوش نظر آ رہی ہیں۔ وہ اپنی کتاب کے بارے میں بات کرتے ہوئے بتاتی ہیں کہ اس میں کئی تصاویر بھی شامل ہیں۔ ریل میں کانگریس کی جنرل سکریٹری پرینکا گاندھی واڈرا بھی دکھائی دیتی ہیں، جو سونیا گاندھی کو مٹھائی کھلاتی نظر آ رہی ہیں۔

کتاب میں اٹلی میں ان کے بچپن، راجیو گاندھی سے ملاقات، شادی اور ہندوستانی سیاست میں ان کی آمد تک کے سفر کا ذکر کیا گیا ہے۔ یہ کتاب ان کی نجی زندگی، خاندانی رشتوں اور ہندوستان میں ان کے طویل سیاسی سفر کی جھلک پیش کرے گی۔

کانگریس کے شعبۂ مواصلات کے انچارج جے رام رمیش نے سوشل میڈیا پلیٹ فارم ایکس پر کہا کہ محترمہ گاندھی کی یادداشتوں پر مبنی کتاب کا طویل عرصے سے انتظار کیا جا رہا تھا۔ یہ کتاب 10 نومبر کو جاری کی جائے گی۔

یواین آئی ۔ ایف اے