ماسکو، امریکی صدر ڈونالڈ ٹرمپ نے ایک ریلی میں دعویٰ کیا کہ امریکہ نے ایران کو فوجی، اقتصادی اور دیگر شعبوں میں شکست دے دی ہے اور واشنگٹن جلد اس تنازع سے باہر نکل سکتا ہے۔

ٹرمپ نے کہا کہ امریکہ ابھی اس تنازع سے نکل سکتا ہے، تاہم وہ اس بات کو یقینی بنانا چاہتا ہے کہ حاصل شدہ نتائج طویل عرصے تک برقرار رہیں۔

امریکی صدر نے اپنی پہلی مدتِ صدارت کے دوران مشترکہ جامع منصوبہ عمل (جے سی پی او اے) سے امریکہ کو الگ کرنے کے اپنے فیصلے کا بھی دفاع کیا۔ انہوں نے کہا کہ جے سی پی او اے ایران کے لیے جوہری ہتھیار حاصل کرنے کا راستہ تھا اور انہوں نے اسے ختم کردیا۔

ٹرمپ نے یہ دعویٰ بھی دہرایا کہ ایران کبھی جوہری ہتھیار حاصل نہیں کر سکے گا اور ایرانی جوہری تنصیبات کے خلاف امریکی فوجی کارروائیوں کی تعریف کی۔

یو این آئی۔ م س

کیف، یوکر ینی صدر ولودیمیر زیلینسکی نے کہا ہے کہ یوکرین موجودہ جنگی محاذ پر تنازع کو منجمد کرنے اور روس کے ساتھ جنگ کے خاتمے کے لیے سفارتی مذاکرات شروع کرنے کے لیے تیار ہے۔

بدھ کے روز فاکس نیوز سے بات کرتے ہوئے زیلینسکی نے کہا کہ یوکرین روس سے کم از کم جنگ بندی کی توقع کرے گا جس کے بعد کیف امریکہ اور یورپی ممالک سے سیکیورٹی ضمانتیں حاصل کرنے کی کوشش کرے گا۔ انہوں نے کہا کہ اس وقت ہمیں تنازعےکو منجمد کرنا ہوگا اور میرے خیال میں اس جنگ کو ختم کرنے کا یہ ایک حقیقی طریقہ ہے۔

جب ان سے پوچھا گیا کہ کیا یوکرین جنگ کے خاتمے کے بدلے دونباس کا علاقہ روس کے حوالے کر دے گا، تو زیلینسکی نے کہا کہ یوکرینی لڑائی سے تھک چکے ہیں لیکن وہ آسانی سے اپنی زمین نہیں چھوڑ سکتے۔

انہوں نے ان دعووں کو مسترد کر دیا کہ روس میدانِ جنگ میں جیت رہا ہے انہوں نے کہا کہ ماسکو کیف پر اپنے علاقے سے پیچھے ہٹنے کے لیے دباؤ ڈالنے کی کوشش کر رہا ہے۔ انہوں نے اس بات کا اعادہ کیا کہ مذاکرات میدانِ جنگ میں موجودہ پوزیشنوں سے شروع ہونے چاہئیں اور سفارت کاری کے ذریعے امن منصوبہ تیار کیا جانا چاہیے۔

زیلینسکی نے منگل کے روز اوسلو میں امریکی خصوصی ایلچی اسٹیو وٹکوف کے ساتھ اپنی ملاقات کو کامیاب قرار دیا۔ انہوں نے ان مذاکرات کی میزبانی کرنے پر ناروے کے وزیر اعظم کا شکریہ ادا کیا، جس میں یورپی رہنما اور امریکی حکام بھی شامل تھے، بشمول جیرڈ کشنر جنہوں نے ویڈیو لنک کے ذریعے شرکت کی۔

زیلینسکی نے کہا کہ بات چیت میں امن کے لیے ممکنہ اقدامات پر توجہ مرکوز کی گئی، انہوں نے امید ظاہر کی کہ روس میں وٹکوف کی ملاقات سے مزید معلومات حاصل ہوں گی۔

انہوں نے کہا کہ کشیدگی کم کرنے کی طرف ابتدائی اقدامات میں ایسی جنگ بندی شامل ہو سکتی ہے جو غذائی تحفظ، سمندری سرگرمیوں اور توانائی کے بنیادی ڈھانچے کا احاطہ کرے۔

زیلینسکی نے مزید کہا کہ انہوں ن
ے امریکی صدر ڈونلڈ ٹرمپ کی توانائی کے شعبے میں جنگ بندی کی تجویز کی فوری طور پر حمایت کی تھی جبکہ مجھے امید ہے کہ آج کچھ گھنٹوں میں ہمارے پاس کچھ نتائج ہوں گے۔

یو این آئی۔ ع ا۔

قاہرہ، مصر کے صدر عبدالفتاح السیسی نے کہا ہے کہ سعودی عرب کی جانب سے درخواست کیے جانے پر مصری فوج مملکت کی سرزمین اور سرحدوں کے دفاع میں مدد کرے گی، تاہم یہ کردار یمن کے خلاف کسی حملے تک محدود نہیں ہوگا۔ مصری صدارتی ترجمان نے بدھ کو اس حوالے سے باضابطہ بیان جاری کیا۔

السیسی کا یہ بیان ایسے وقت میں سامنے آیا ہے جب حوثیوں کی جانب سے سعودی عرب پر حملوں میں اضافہ ہوا ہے۔ اس سے قبل مصری وزیر خارجہ بدر عبدالعاطی اور انٹیلی جنس چیف حسن رشاد نے سعودی ولی عہد محمد بن سلمان سے ریاض میں ملاقات کی، جس میں علاقائی صورت حال اور دوطرفہ تعلقات پر تبادلہ خیال کیا گیا۔

مصری صدر نے کہا کہ مصر کسی بھی ایسے عرب ملک کی سرزمین کے دفاع میں مدد کے لیے تیار ہے جو اس سے درخواست کرے۔ انہوں نے واضح کیا کہ مصری فوجی کارروائی مصر یا اس عرب ملک کی سرزمین سے باہر نہیں جائے گی جس کی سلامتی اور استحکام کے تحفظ کے لیے مدد طلب کی جائے۔

مصر کی پارلیمنٹ نے سعودی عرب کو دفاعی فوجی مدد فراہم کرنے کے لیے صدر کو اختیار دینے سے متعلق ووٹنگ 26 اکتوبر تک ملتوی کر دی ہے۔ آئینی طور پر بیرون ملک فوجی مشن کے لیے قومی دفاعی کونسل سے مشاورت اور پارلیمنٹ میں دو تہائی اکثریت کی منظوری درکار ہے۔

مصر اور سعودی عرب کے درمیان قریبی اسٹریٹجک اور اقتصادی تعلقات ہیں۔ السیسی نے خلیجی ممالک کی سلامتی کو مصر کی قومی سلامتی سے منسلک قرار دیتے ہوئے عرب قومی سلامتی کو مشترکہ قرار دیا ہے۔

یو این آئی۔ م س