سری نگر: پی ڈی پی صدر اور سابق وزیر اعلیٰ محبوبہ مفتی کا الزام ہے کہ الیکشن کمیشن آف انڈیا کے رائے دہندگان کی رجسٹریشن کے متعلق جاری تازہ حکمنامے سے یہ بات صاف ہوجاتی ہے کہ جموں میں حکومت ہند کے نوآباد یاتی نظام کے پروجیکٹ پر کام شروع ہوچکا ہے۔

انہوں نے کہا کہ اس کا پہلا دھچکا ڈوگرہ ثقافت، شناخت، روزگار اور تجارت کو پہنچے گا۔

موصوف سابق وزیر اعلیٰ نے ان باتوں کا اظہار بدھ کو اپنے ٹویٹر ہینڈل پر ٹویٹس میں کیا۔

انہوں نے یہ ٹویٹس ضلع انتظامیہ جموں کے اس حکمنامے کے رد عمل میں کئے جس کے مطابق ریونیو کو اہلکاروں کو ان غیر مقامی لوگوں کو بھی ووٹر لسٹ میں شامل کرنے کی ہدایت دی گئی ہے جو جموں میں ایک سال کے زائد عرصے سے مقیم ہیں۔محبوبہ مفتی نے اپنے ٹویٹ میں کہا: ’الیکشن کمیشن آف انڈیا کے نئے ووٹروں کی رجسٹریشن کے بارے میں جاری تازہ حکمنامے سے یہ بات واضح ہوجاتی ہے کہ حکومت ہند کا جموں میں نوآبادیاتی نظام کے پروجیکٹ کا کام شروع ہوا ہے‘۔

انہوں نے اس ٹویٹ میں کہا کہ اس سے سب سے پہلا دھچکا ڈوگرہ ثقافت، شناخت، روز گار اور تجارت کو پہنچے گا۔موصوفہ نے اپنے ایک اور ٹویٹ میں کہا: ’بی جے پی کی جموں اور کشمیر کے درمیان مذہبی و علاقائی بنیادوں پر ڈالی جانی والی پھوٹ کی کوششوں کو ناکام بنایا جانا چاہئے کیونکہ چاہئے وہ کشمیری ہو یا ڈوگرہ،ہمارے حقوق اور شناخت کا تحفظ تب ہی ممکن ہوسکتا ہے جب ہم ایک ہو کر جد وجہد کریں گے‘۔

دریں اثنا جموں و کشمیر پیپلز کانفرنس نے بھی اس حکمنامے پر اپنے رد عمل کا اظہار کرتے ہوئے ٹویٹ میں ضلع انتظامیہ جموں کے اس حکمنامے کو مشکوک قرار دیا ہے اور کہا ہے کہ یہ حکمنامہ عدالت عظمیٰ کے فیصلے کے خلاف ہے۔

انہوں نے اپنے ٹویٹر ہینڈل پر ٹویٹ کرکے کہا ہے: ’ضلع مجسٹریٹ جموں کا حالیہ حکمنامہ، جس میں ریونیو اہلکاروں کو جموں میں ایک سال کے عرصہ سے زیادہ مدت سے مقیم غیر مقامی باشندوں کو رہائشی سند اجرا کرنے کا اختیار دیا گیا ہے،مشکوک ہے اوراس کا مقصد انہیں ووٹ ڈالنے کے اہل بنانا ہے‘۔

ٹویٹ میں کہا گیا: ’یہ حکمنامہ عدالت عظمیٰ کے فیصلے کے خلاف ہے اور ہمارے شبہات کو غلط ثابت کرنے کی ذمہ داری ایک بار پھر الیکشن کمیشن اور جموں و کشمیرانتظامیہ پر عائد ہوجاتی ہے، وہ یہ واضح کریں کہ کیا اس قسم کی ہدایت جائز ہے‘۔

ادھر کانگریس کے جموں وکشمیر یونٹ کے صدر وقار رسول وانی نے عجلت میں بلائی گئی پریس کانفرنس کے دوران بتایا کہ ضلع ترقیاتی کمشنر جموں کا فیصلہ ناقابل برداشت ہے۔ انہوں نے بتایا کہ بی جے پی الیکشن میں جیت حاصل کرنے کی خاطر مختلف ممالک کے ووٹروں کا یہاں پر اندراج کرا سکتی ہے کیونکہ بھاجپا کو کسی بھی صورت میں اقتدار چاہئے اس کے لئے وہ کچھ بھی کرنے کو تیار ہیں۔

انہوں نے بتایا کہ چیف الیکٹورل آفیسر نے پہلے ہی واضح کیا تھا کہ 25لاکھ ووٹروں کا اندراج کرنے کا ایک ہدف مقرر کیا گیااور جوں ہی اس کا بیان سامنے آیا تو سبھی سیاسی پارٹیوں نے اس پر شدید رد عمل کا اظہا رکیا جس کے بعد چیف الیکٹورل آفیسر نے سبھی سیاسی پارٹیوں کی میٹنگ طلب کی جس دوران غیر مقامی ووٹروں کے اندراج کے حوالے سے قیاس آرائیوں کو ختم کیا لیکن ضلع ترقیاتی کمشنر جموں کی جانب سے جو آرڈر جاری کیا گیا اُس سے بھاجپا کی نیت سب کے سامنے آشکار ہوئی ہے۔

اُن کے مطابق بی جے پی ہر حلقے میں لگ بھگ 90ہزار غیر مقامی ووٹروں کے اندراج کا منصوبہ بنا چکی ہے اور اس پر اب کام بھی شروع کیا گیا ہے۔ پردیش کانگریس کے صدر نے بتایا کہ فیصلہ کو کسی بھی صورت میں قبول نہیں کیا جائے گا اور اس کے خلاف سبھی کو متحد ہو کر آگے آنے کی ضرورت ہے تاکہ بی جے پی کے منصوبوں کو ناکام بنایا جاسکے۔

علاوہ ازیں جموں وکشمیر نیشنل کانفرنس نے انتظامیہ کی طرف سے غیر مقامی شہریوں کو باضابطہ طور پر ووٹر فہرستوں میں شامل کرنے کے لئے جاری کئے گئے احکامات کو ناقابل قبول قرار دیتے ہوئے کہاہے کہ عوامی ناراضگی اور بھاجپا کو چھوڑ کر تمام سیاسی جماعتوں کی مخالفت کے باوجودبھی حکومت 25 لاکھ غیر مقامی افراد کو ووٹرفہرست میں شامل کرنے کے اپنے منصوبے کے ساتھ آگے بڑھ رہی ہے۔

ان باتوں کا اظہار پارٹی کے ریاستی ترجمان عمران نبی ڈار نے آج پارٹی ہیڈکوارٹر ایک پریس کانفرنس کے دوران کیا۔ ترجمان نے کہا کہ جب پہلی بار سی ای او نے ایک پریس کانفرنس کے دوران یہاں غیر مقامی لوگوں کو ووٹر فہرستوں میں شامل کرنے کی بات کہی تو اس کے بعد عوامی ردعمل دیکھ کر حکومت کی طرف سے اس بات کا دعویٰ کیا گیا کہ ایسا کوئی بھی منصوبہ زیر غور نہیں اور غیر مقامی لوگوں کو ووٹر فہرستوں میں شامل نہیں کیا جارہاہے۔

لیکن کل جس طرح سے ضلع ترقیاتی کمشنر جموں کی طرف سے غیر مقامی شہریوں کو ووٹرفہرستوں میں شامل کرنے کا حکمنامہ جاری کیا گیا اْس سے عوامی خدشات سچ ثابت ہوگئے اور یہ بات واضح ہوگئی ہے کہ حکومت غیر مقامی شہریوں کو یہاں کی ووٹر فہرستوں میں شامل کرنے کے منصوبے کیساتھ آگے بڑھ رہی ہے۔

انہوں نے کہاکہ بھاجپا کے بغیر تمام سیاسی جماعتوں نے اس اقدام کی مخالفت کی تھی اور عوامی سطح پر بھی اس منصوبے کیخلاف سخت ناراضگی پائی جارہی ہے۔ انہوں نے کہاکہ حقیقت یہ ہے کہ بھاجپا انتخابی میدان میں اترنے سے خوفزہ ہے، اسمبلی نشستوں کی من پسند حدبندی اور سیٹوں کی ہیراپھیری کے باوجود بھی بھاجپا والوں کو انتخابات میں جیت ملتی دکھائی نہیں دے رہی ہے اور اب اسی لئے ایسے حربے اپنائے جارہے ہیں۔ عمران نبی ڈار نے کہا کہ بھاجپا جموں وکشمیر کے عوام کو بے اختیار کرنے پر تلی ہوئی ہے اور وقت کا تقاضا ہے کہ لوگ ان منصوبوں کو وقت رہتے سمجھے اور اس سازشوں کا مقابلہ کرنے کیلئے اپنا رول نبھائیں۔

انہوں نے عوام سے اپیل کی کہ وہ اولین فرصت میں ووٹر فہرستوں میں نام درج کرائیں اور الیکشن کے وقت جوق در جوق نکل کر اپنی حق رائے دہی کا استعمال کریں اور جموں و کشمیر کیخلاف ہورہی سازشوں کو ناکام بنائیں۔

عمران نبی ڈار نے کہا کہ یہ سارے اقدامات جموں وکشمیر تنظیم نو ایکٹ 2019کے تحت کئے جارہے ہیں، جسے نیشنل نے چیلنج کیا ہے اور جس کی جوازیت سپریم کورٹ میں زیر سماعت ہے۔

انہوں نے کہاکہ ایسے اقدامات براہ راست سپریم کورٹ کی توہین کے مترادف ہے اور ہمیں اْمید ہے کہ ملک کی سب سے بڑی عدالت جلد سے جلد اس کیس پر سماعت کرکے جموں وکشمیر کے عوام کے حقوق کو بحالی کریں۔

یو این آئی