سری نگر، جموں و کشمیر کے ڈائریکٹر جنرل آف پولیس (ڈی جی پی) نے منگل کے روز عید میلاد النبی اور آئندہ ہونے والی دیگر تقریبات، جن میں رکشا بندھن بھی شامل ہے، کے لیے سکیورٹی انتظامات کا جائزہ لیا۔ انہوں نے وادی میں خصوصاً اہم درگاہوں، مساجد اور دیگر مذہبی مقامات کے اطراف سخت نگرانی، فعال پولیسنگ اور فول پروف سکیورٹی انتظامات کی ہدایت دی۔

پولیس کنٹرول روم (پی سی آر) کشمیر میں منعقدہ اجلاس میں سینئر پولیس افسران نے شرکت کی۔ پولیس کے مطابق اجلاس میں سکیورٹی تیاریوں، فورسز کی تعیناتی، بھیڑ کے نظم و نسق اور ٹریفک کو منظم کرنے کے اقدامات پر تفصیلی تبادلہ خیال کیا گیا تاکہ تمام تقریبات پرامن اور محفوظ انداز میں منعقد ہوسکیں۔

ڈی جی پی نے خاص طور پر حضرت بل درگاہ اور دیگر اہم مذہبی مقامات پر سکیورٹی کے فول پروف انتظامات پر زور دیا، جہاں رات بھر کی عبادت اور بڑی تعداد میں عقیدت مندوں کی آمد متوقع ہے۔ افسران کو ہدایت دی گئی کہ مناسب سکیورٹی تعیناتی یقینی بنانے کے ساتھ تمام فیلڈ یونٹس کے درمیان قریبی رابطہ برقرار رکھا جائے تاکہ کسی بھی ہنگامی صورتحال سے بروقت نمٹا جاسکے۔

ڈی جی پی نے حساس اور خطرے سے دوچار مقامات پر نگرانی مزید مضبوط بنانے اور اہم و زیادہ بھیڑ والے علاقوں میں مناسب فورس تعینات کرنے کی بھی ہدایت دی۔ مذہبی مقامات اور جلوس کے راستوں کے اطراف ٹریفک کو منظم کرنے اور روٹ مینجمنٹ کا مؤثر منصوبہ تیار کرنے پر بھی زور دیا گیا۔

رکشا بندھن کے انتظامات کا جائزہ لیتے ہوئے انہوں نے بازاروں اور مندروں میں پیشگی سکیورٹی و ٹریفک انتظامات یقینی بنانے اور اہم مذہبی مقامات پر نگرانی بڑھانے کی ہدایت دی۔

اجلاس کے اختتام پر ڈی جی پی نے کہا کہ جموں و کشمیر میں آئندہ تمام تقریبات کے پرامن، محفوظ اور خوش اسلوبی سے انعقاد کے لیے ضروری انتظامات پیشگی مکمل کیے جائیں۔

یو این آئی۔ م س

سری نگر، نیشنل کانفرنس کے صدر فاروق عبداللہ کی جانب سے سری نگر کے رکن پارلیمنٹ روح اللہ مہدی کو لوک سبھا اور پارٹی سے استعفیٰ دے کر آزاد حیثیت سے دوبارہ انتخاب لڑنے کے چیلنج کے ایک روز بعد رکن پارلیمنٹ نے منگل کو کہا کہ وہ آئندہ چند دنوں میں اس مطالبے کا جواب دیں گے۔ تاہم انہوں نے فاروق عبداللہ کے لیے اپنے احترام کا بھی اظہار کیا۔

مسٹر روح اللہ نے براہ راست جواب دینے سے گریز کرتے ہوئے کہا کہ وہ اس مطالبے پر سنجیدگی سے غور کررہے ہیں اور ایک دو روز میں اپنا جواب دیں گے۔ انہوں نے صحافیوں سے کہا، ’’ایسا ممکن نہیں کہ ڈاکٹر صاحب مجھ سے کوئی چیز مانگیں اور میں انہیں نہ دوں۔ یہ ممکن نہیں کہ میں انہیں خالی ہاتھ واپس بھیج دوں۔‘‘

انہوں نے کہا کہ اس عمر میں فاروق عبداللہ نے ان سے کچھ مانگا ہے اور وہ ان کا احترام کرتے ہیں۔ روح اللہ کے مطابق وہ نہیں چاہتے کہ فاروق عبداللہ ان سے کچھ طلب کریں اور انہیں خالی ہاتھ واپس جانا پڑے۔ انہوں نے کہا کہ وہ چند دن میں جواب دیں گے۔

ان کے یہ بیانات ایک روز بعد آئے جب فاروق عبداللہ نے ایک انٹرویو میں اپنی پارٹی سے الگ موقف رکھنے والے رکن پارلیمنٹ کو لوک سبھا اور نیشنل کانفرنس سے استعفیٰ دے کر آزاد حیثیت سے انتخاب لڑنے کا کھلا چیلنج دیا تھا۔

مسٹر فاروق عبداللہ نے دعویٰ کیا تھا کہ روح اللہ نے اپنے تمام انتخابات نیشنل کانفرنس کے ٹکٹ اور تنظیمی حمایت کی بدولت جیتے ہیں اور پارٹی کی حمایت کے بغیر وہ کامیاب نہیں ہوسکتے تھے۔

انہوں نے نیشنل کانفرنس میں 1984 کی بغاوت کا حوالہ دیتے ہوئے 14 ارکان اسمبلی کے پارٹی سے الگ ہوکر غلام محمد شاہ کی حمایت کرنے کا ذکر بھی کیا تھا، جس کے نتیجے میں ان کی حکومت گر گئی تھی اور کانگریس کی حمایت سے غلام محمد شاہ وزیراعلیٰ بنے تھے۔ فاروق عبداللہ نے کہا تھا کہ وہ ارکان آج ’’غیر اہم‘‘ ہوچکے ہیں۔

سری نگر کے رکن پارلیمنٹ روح اللہ مہدی طویل عرصے سے نیشنل کانفرنس کے مختلف معاملات پر موقف پر تنقید کرتے رہے ہیں۔ جموں و کشمیر کی خصوصی حیثیت، شناخت، ریزرویشن اور سیاسی قیدیوں جیسے اہم معاملات پر ان کا موقف وادی میں انہیں خاصی مقبولیت دلا چکا ہے۔

کشمیری پنڈتوں کے قتل سے متعلق مقدمات دوبارہ کھولنے کے سوال پر مسٹر روح اللہ نے کہا کہ انصاف ضرور فراہم کیا جانا چاہیے، تاہم اس عمل کو انتقام کا ذریعہ نہیں بننے دیا جانا چاہیے۔

یو این آئی۔ م س

سری نگر، جموں و کشمیر میں سکیورٹی فورسز نے مختلف مشترکہ کارروائیوں کے دوران 8 مبینہ دہشت گرد ساتھیوں کو گرفتار کرکے کشمیر میں امن و سلامتی کو متاثر کرنے کی کوششوں کو ناکام بنانے کا دعویٰ کیا ہے۔ پلوامہ، شوپیان اور سوپور میں کی گئی کارروائیوں کے دوران اسلحہ، گولہ بارود اور دیگر قابل اعتراض مواد بھی برآمد کیا گیا۔

جنوبی کشمیر کے پلوامہ اور شوپیان اضلاع میں الگ الگ مشترکہ کارروائیوں کے دوران مجموعی طور پر 8 مبینہ دہشت گرد ساتھی گرفتار کیے گئے۔ پلوامہ میں دو افراد کو گرفتار کرکے ایک پستول، 12 کارتوس اور ایک دستی بم برآمد کیا گیا، جبکہ شوپیان میں پولیس، فوج اور سی آر پی ایف کی مشترکہ کارروائیوں میں 6 افراد کو گرفتار کرکے دستی بم، اے کے-47 میگزین، گولہ بارود اور دیگر مواد برآمد کیا گیا۔

پولیس کے مطابق پلوامہ میں راجپورہ کے یروان جنگلات میں دہشت گردانہ سرگرمیوں سے متعلق خفیہ اطلاع ملنے پر پولیس، فوج کی 44 راشٹریہ رائفلز اور سی آر پی ایف کی 183 بٹالین نے مشترکہ کارروائی شروع کی۔ سی بی ناتھ کے قریب یروان جنگلات میں تلاشی کے دوران دو مشتبہ افراد کو گاؤں کی جانب آتے ہوئے دیکھا گیا، جنہیں فورسز نے فوری طور پر گرفتار کرلیا۔

گرفتار افراد کی شناخت پلوامہ کے لسی ڈبن کے رہنے والے لطیف احمد اور بون کھا بامنو کے رہنے والے اعجاز احمد کے طور پر ہوئی ہے۔ تلاشی میں ان کے قبضے سے ایک پستول، 12 کارتوس اور ایک دستی بم برآمد ہوا۔ راجپورہ تھانے میں اسلحہ ایکٹ کی دفعہ 7/25 اور غیر قانونی سرگرمیاں (روک تھام) ایکٹ کی دفعات 13، 18، 23 اور 39 کے تحت مقدمہ درج کیا گیا ہے۔

شوپیان میں ایک ناکہ چیکنگ کے دوران ہیئرپورہ علاقے میں موٹر سائیکل پر سوار تین افراد کو روکا گیا۔ ان کی شناخت کلگام کے رہنے والے جنید مظفر ڈار، عامر یوسف اور جنید بشیر ڈار کے طور پر ہوئی ہے۔ ان کے قبضے سے دو دستی بم اور قابل اعتراض پوسٹر برآمد کیے گئے۔

ایک اور کارروائی میں شوپیان کے امام صاحب علاقے میں پولیس، 34 راشٹریہ رائفلز اور سی آر پی ایف کی 178 بٹالین کی مشترکہ گشت ٹیم نے مزید تین افراد کو گرفتار کیا۔ ان کی شناخت اننت ناگ کے حارث منظور، عاشق حسین اور عارف احمد کمار کے طور پر ہوئی ہے۔ ان کے قبضے سے ایک دستی بم، دو اے کے-47 میگزین، 20 کارتوس اور قابل اعتراض پوسٹر برآمد ہوئے۔

پولیس کے مطابق دونوں معاملات میں متعلقہ دفعات کے تحت مقدمات درج کرکے مزید تحقیقات جاری ہیں، جن کا مقصد گرفتار افراد کی سرگرمیوں اور ان کے مبینہ دہشت گرد روابط کا پتہ لگانا ہے۔

ایک الگ کارروائی میں سوپور کے منجسیر علاقے میں فوج، سی آر پی ایف اور جموں و کشمیر پولیس نے خفیہ اطلاع کی بنیاد پر مشترکہ تلاشی مہم چلائی۔ فوج کی چنار کور کے مطابق کارروائی کے دوران ایک اے کے سیریز رائفل، تین میگزین، چار دستی بم، بڑی مقدار میں گولہ بارود اور دیگر جنگی سازو سامان برآمد کیا گیا۔ تلاشی مہم جاری تھی۔

یو این آئی۔ م س