نئی دہلی، ہندوستان اور بھوٹان نے توانائی منصوبوں کے لیے 4000 کروڑ روپے کی رعایتی قرض سہولت سے متعلق معاہدے کا خیرمقدم کیا ہے۔ دونوں ممالک نے پن بجلی کے شعبے میں تعاون بڑھانے اور بھوٹان میں ہندوستانی کمپنیوں کی شرکت پر بھی اطمینان کا اظہار کیا۔

وزارت خارجہ نے جمعہ کے روز بتایا کہ وزیر خارجہ ایس جے شنکر نے 16 سے 18 ستمبر تک بھوٹان کا سرکاری دورہ کیا۔ اس دوران دونوں فریقوں نے دوطرفہ تعاون کے تمام پہلوؤں کے ساتھ ساتھ علاقائی اور بین الاقوامی امور پر بھی تبادلہ خیال کیا۔

دورے کے دوران مشترکہ طور پر پانچ ترقیاتی منصوبوں کا افتتاح یا آغاز کیا گیا۔ ان میں مونگر میں 65 بستروں پر مشتمل گیالٹسون جیتسون پیما مدر اینڈ چائلڈ اسپتال، بھوٹان کے نیشنل اینیمل بریڈنگ سینٹر کے لیے ہندوستان سے 43 جرسی گایوں کی منتقلی، مشرقی بھوٹان میں جگناتھنگ پل، بھوٹان حکومت کو 54 الیکٹرک گاڑیاں فراہم کرنا اور 500 کلوواٹ کے لونا نا پن بجلی منصوبے کا سنگ بنیاد رکھنا شامل ہے۔

دونوں ممالک نے مارچ 2024 میں طے کیے گئے توانائی شراکت داری کے مشترکہ وژن کو نافذ کرنے میں ہوئی پیش رفت پر اطمینان کا اظہار کیا۔ دونوں فریقوں نے 1020 میگاواٹ کے پونتسانگ چھو-2 پن بجلی منصوبے کے افتتاح اور اس کے ٹیرف پروٹوکول پر دستخط کے ساتھ ساتھ 1200 میگاواٹ کے پونتسانگ چھو-1 منصوبے میں ڈیم کی تعمیر دوبارہ شروع ہونے کا بھی ذکر کیا۔

بھوٹان نے اپنے 13ویں پانچ سالہ منصوبے (2024-29) کے تحت ہندوستان کی حمایت کی ستائش کی۔ ہندوستان نے بھوٹان کے ترقیاتی اہداف اور ترجیحات کے لیے اپنی حمایت کا اعادہ کیا۔

دونوں ممالک نے بھوٹان میں توانائی منصوبوں کے لیے 4000 کروڑ روپے کی رعایتی قرض سہولت سے متعلق معاہدے پر دستخط کا خیرمقدم کیا۔ انہوں نے بھوٹان میں پن بجلی منصوبوں میں ہندوستانی کمپنیوں کی فعال شرکت کا بھی خیرمقدم کیا۔

دونوں فریقوں نے گیلیفو مائنڈفلنس سٹی سے متعلق تعاون کو آگے بڑھانے پر اتفاق کیا۔ ہندوستان نے آسام کے ہاتیسار میں امیگریشن چیک پوسٹ قائم کرنے کے اپنے عزم کا اعادہ کیا۔ بھوٹان نے گیلیفو کے سامنے ہاتیسار میں تیسرے ممالک کے شہریوں کی آمد و رفت کے لیے خصوصی عارضی امیگریشن سہولت قائم کرنے کے ہندوستان کے فیصلے کا خیرمقدم کیا۔ یہ سہولت آئندہ یکم نومبر سے پروجیکٹ 108 چورتن/ستُوپ کے لیے دستیاب ہوگی۔

ہندوستان اور بھوٹان کے درمیان تجارت، کاروبار اور ٹرانزٹ معاہدے کی تجدید پر بات چیت جاری ہے۔ بھوٹان نے ہندوستان کی جانب سے حال ہی میں بھوٹان سے 17 اقسام کی عمارتی لکڑی کی برآمد کی اجازت دینے کے فیصلے کی ستائش کی۔ بھوٹان نے عالمی سطح پر سپلائی میں رکاوٹوں کے درمیان پٹرول، ڈیزل اور ایل پی جی کی بلاتعطل فراہمی کے لیے بھی ہندوستان کا شکریہ ادا کیا۔

دونوں ممالک نے آسام کے سمرنگ میں نئے لینڈ کسٹمز اسٹیشن کے آغاز کا خیرمقدم کیا۔ گیلیفو-کوکراجھار اور سامتسے-بنارہاٹ سرحد پار ریلوے رابطے قائم کرنے کی سمت پیش رفت پر بھی تبادلہ خیال کیا گیا۔

بھوٹانی شہریوں کے لیے ہندوستان میں بھوٹانی موبائل ایپ کے ذریعے ڈیجیٹل ادائیگی کی سہولت شروع کیے جانے کا دونوں فریقوں نے خیرمقدم کیا۔ خلائی شعبے میں تعاون جاری رکھنے اور گلیشیئرز، جنگلاتی وسائل، سیلاب اور زراعت جیسے شعبوں میں سیٹلائٹ ڈیٹا کے استعمال پر بھی زور دیا گیا۔

تعلیم کے شعبے میں ہندوستان نے بھوٹانی طلبہ کے لیے انڈین کونسل فار کلچرل ریلیشنز کی اسکالرشپ کے تحت نشستیں 30 سے بڑھا کر 60 اور نالندہ یونیورسٹی اسکالرشپ اسکیم کے تحت نشستیں 30 سے بڑھا کر 55 کرنے کا فیصلہ کیا ہے۔ نہرو-وانگچک اسکالرشپ سے متعلق معاہدے کی بھی تجدید کی جائے گی۔

ہندوستان نے 2028-29 کے لیے اقوام متحدہ کی سلامتی کونسل کی غیر مستقل رکنیت کے لیے اپنی امیدواری کی حمایت کرنے پر بھوٹان کا شکریہ ادا کیا۔ دونوں ممالک نے علاقائی اور عالمی حالات پر بھی خیالات کا تبادلہ کیا۔ وزیر خارجہ جے شنکر نے بھوٹان کے وزیر خارجہ و بیرونی تجارت کو اپنی سہولت کے مطابق ہندوستان آنے کی دعوت دی۔

یو این آئی۔ م س

نئی دہلی، وزیراعظم نریندر مودی نے جمعرات کو کہا کہ ایسے وقت میں جب دنیا میں سپلائی چین کو ہتھیار کے طور پر استعمال کیا جا رہا ہے ہندوستان عالمی کمپنیوں کے لیے قابل بھروسہ سیمی کنڈکٹر مینوفیکچرنگ کا مقام ثابت ہو سکتا ہے مسٹر مودی نے یہاں یشوبھومی میں سیمی کون انڈیا 2026 کے افتتاح کے موقع پر کہا کہ آج دنیا ایک ایسی سیمی کنڈکٹر مینوفیکچرنگ کی جگہ کی تلاش میں ہے جو قابل بھروسہ ہو۔ ہندوستان وہ متبادل بن سکتا ہے۔ انہوں نے کہا کہ ہندوستان ہر وہ قدم اٹھا رہا ہے جو ہمیں سیمی کنڈکٹر صنعت کے لیے ایک پسندیدہ جگہ بناتا ہے۔ کچھ سال پہلے ہی ملک کے آئین کو 75 سال ہوئے ہیں۔ ایسا ملک جب ایک اہم صنعت میں آگے بڑھتا ہے تو اس سے پوری دنیا کی سپلائی چین کو طاقت ملتی ہے۔

وزیراعظم نے کہا، “آج جب سپلائی چین کو ہتھیار بنایا جا رہا ہے تب تو اس کی اہمیت بہت بڑھ جاتی ہے۔ ہندوستان میں ہو رہی اس ترقی کو ہمیں اس وسیع نقطہ نظر سے بھی دیکھنا ہے۔” انہوں نے کانفرنس میں حصہ لے رہے ملک و بیرون ملک کی سیمی کنڈکٹر کمپنیوں کے نمائندوں سے کہا کہ ملک میں اس صنعت کے لیے صلاحیتوں کا بہت بڑا ذخیرہ ہے۔ پچھلے چار سال میں 70 ہزار چپ ڈیزائن انجینئروں کو تربیت دی گئی ہے۔

انہوں نے کہا کہ ڈیٹا سینٹروں کے انتظام میں ایک بڑا چیلنج توانائی کا انتظام ہے۔ ان چیلنجوں کے درمیان دنیا کو مینوفیکچرنگ کے لیے نئی اور قابل بھروسہ جگہوں کی بھی ضرورت سب سے زیادہ ہو رہی ہے۔ انہوں نے یقین دلایا کہ ہندوستان اس کے لیے خود کو مسلسل تیار کر رہا ہے۔ وزیراعظم نے کہا کہ آج دنیا کے سامنے ایک بڑاچیلنج توانائی کا تحفظ بھی ہے۔ جیسے جیسے اے آئی کی مانگ بڑھ رہی ہے، ڈیٹا سینٹروں کے لیے توانائی سکیورٹی کی مانگ بھی بڑھ رہی ہے۔ ڈیٹا سینٹروں کو بھاری مقدار میں توانائی کی ضرورت ہوتی ہے۔ اسے پورا کرنے کے لیے توانائی کی سکیورٹی کو یقینی بنانا ضروری ہے۔

یواین آئی ایف اے

نئی دہلی، ہندستان نے امریکی کانگریس میں روس-ایران پابندیوں کا قانون منظور ہونے پر ایک محتاط ردِعمل دیتے ہوئے کہا ہے کہ وہ اس معاملے میں آئندہ کی پیش رفت پر نظر رکھے ہوئے ہے اور ملک کی توانائی کی سلامتی کو یقینی بنانے کے لیے پوری طرح سے پرعزم ہے۔

وزارتِ خارجہ نے جمعرات کے روز ایک بیان جاری کر کے کہا کہ ہندستان نے اس معاملے کا نوٹس لیا ہے۔ حکومت اس معاملے کی آئندہ کی صورتِ حال پر گہری نظر رکھے ہوئے ہے۔ وزارت نے کہا کہ ہندستان اپنے 1.4 ارب عوام کی توانائی کی سلامتی کو یقینی بنانے کے لیے مضبوطی سے پرعزم ہے۔ اس کے لیے ہندستان مارکیٹ کے بدلتے ہوئے حالات کے مطابق مختلف ذرائع سے توانائی کی خریداری جاری رکھے گا۔

بیان میں کہا گیا ہے کہ گزشتہ چند مہینوں میں اس مسئلے پر حکومت کی جانب سے مختلف امریکی نمائندوں کے ساتھ اعلیٰ سطح پر گفتگو ہوئی ہے۔ ہندستانی فریق نے اس قانون کے ممکنہ اثرات کو نہ صرف ہندستان-امریکہ دوطرفہ تعلقات بلکہ بین الاقوامی توانائی کی مارکیٹ کے تناظر میں بھی واضح طور پر سامنے رکھا ہے۔

ہندستان نے یہ بھی واضح کیا ہے کہ وہ اپنے تجارتی اور معاشی مفادات کے تحفظ کے لیے تمام ضروری اقدامات کرنے کے لیے پرعزم ہے۔ حکومت نے کہا کہ ان پیش رفت کے اثرات سے نمٹنے کے لیے وہ ہندستانی تجارتی اور صنعتی تنظیموں کے ساتھ مل کر کام کرے گی۔

قابلِ ذکر ہے کہ امریکی پارلیمنٹ کی جانب سے منظور شدہ ‘لنڈسے او۔ گراہم سینکشننگ رشیا اینڈ ایران ایکٹ آف 2026’ روس اور ایران پر سخت معاشی پابندیاں عائد کرنے والا ایک نیا بل ہے۔ اس قانون کے تحت امریکی صدر کو روس سے خام تیل یا قدرتی گیس خریدنے والے سرفہرست پانچ ممالک اور پابندیوں سے بچنے میں مدد کرنے والوں پر 100 فیصد تک درآمدی ڈیوٹی عائد کرنے کا اختیار حاصل ہے۔

یواین آئی۔الف الف