سری نگر، نو قائم شدہ جموں و کشمیر سائبر کرائم کوآرڈی نیشن سینٹر (جے کے فور سی) مرکز کے زیر انتظام خطے میں سائبر جرائم سے نمٹنے کے لیے متاثرین پر مرکوز طریقہ کار اختیار کرے گا، جس میں بنیادی توجہ مالی دھوکہ دہی کے معاملات اور متاثرین کو بروقت مدد فراہم کرنے پر ہوگی۔

نو قائم شدہ جے کے فور سی مرکز کے زیر انتظام خطے میں سائبر جرائم سے متعلق رابطہ کاری کے لیے نوڈل ایجنسی کے طور پر کام کرے گا۔ اسے جموں و کشمیر میں سائبر جرائم کی روک تھام، ان کا پتہ لگانے اور تحقیقات کے لیے مختلف کوششوں کے درمیان تال میل قائم کرنے کی ذمہ داری سونپی گئی ہے۔ مرکز کی سربراہی شیخ جنید محمود کر رہے ہیں، جو اس کے پہلے چیف ایگزیکٹو آفیسر (سی ای او) ہیں۔

جموں و کشمیر سائبر کرائم کوآرڈی نیشن سینٹر کے سینئر سپرنٹنڈنٹ آف پولیس محمد یاسین کچلو نے کہا کہ یہ مرکز خصوصی طور پر سائبر جرائم سے متعلق شکایات سے نمٹنے اور جموں و کشمیر میں ایسے جرائم کی روک تھام، نشاندہی اور تحقیقات کے لیے جاری کوششوں میں تال میل قائم کرنے کے مقصد سے قائم کیا گیا ہے۔

انہوں نے کہا کہ جے کے فور سی کو انڈین سائبر کرائم کوآرڈی نیشن سینٹر (آئی فور سی) کی طرز پر تشکیل دیا گیا ہے، جو قومی سطح کی نوڈل ایجنسی ہے اور پورے ملک میں سائبر جرائم سے متعلق کوششوں میں تال میل قائم کرتی ہے۔ نیا مرکز قومی سائبر کرائم نظام کے ساتھ قریبی تال میل میں کام کرے گا۔

کچلو نے ایک پریس کانفرنس سے خطاب کرتے ہوئے کہا کہ جے کے فور سی میں سائبر آپریشنز ونگ، سائبر انویسٹی گیشن ونگ اور آن لائن کرائم اگینسٹ ویمن اینڈ چلڈرن (او سی ڈبلیو سی) ونگ سمیت کئی خصوصی شعبے قائم کیے گئے ہیں۔ سائبر آپریشنز ونگ 1930 ہیلپ لائن چلائے گا، جس کے ذریعے شہری سائبر جرائم سے متعلق شکایات درج کراسکتے ہیں اور یہ شکایات متعلقہ پولیس اسٹیشن کو بھیج دی جائیں گی۔

جاری۔یواین آئی ظا

سری نگر، جموں و کشمیر اور لداخ ہائی کورٹ کی سری نگر بنچ نے حضرت بل درگاہ کے معزول امام کی عرضی پر متعلقہ حکام کو نوٹس جاری کیا ہے۔ انہیں 2024 میں ایک ہندو شخص کے مبینہ جبری مذہب تبدیل کرنے کے واقعے کی نگرانی کرنے کے بعد عہدے سے ہٹا دیا گیا تھا۔

عدالت نے حکام کو یہ بھی ہدایت دی کہ معزول امام ڈاکٹر کمال الدین فاروقی کی جانب سے جون 2024 میں اپنی برطرفی کے خلاف پیش کی گئی عرضداشت پر قواعد کے مطابق غور کیا جائے۔

یہ ہدایت ہائی کورٹ نے 15 ستمبر کو فاروقی کی جانب سے دائر کی گئی عرضی پر سماعت کے دوران دی۔ عرضی میں حضرت بل درگاہ میں ان کی ڈیوٹی پر مسلسل پابندی کو چیلنج کیا گیا ہے۔

عرضی میں جموں و کشمیر وقف بورڈ کے 8 اپریل 2024 کے اس حکم کو چیلنج کیا گیا ہے، جس کے تحت انہیں انکوائری مکمل ہونے تک امام و خطیب کے عہدے سے سبکدوش کردیا گیا تھا۔

عرضی کے مطابق فاروقی، جو شیرِ کشمیر یونیورسٹی آف ایگریکلچرل سائنسز اینڈ ٹیکنالوجی کے سابق پروفیسر اور پروفیسر ایمریٹس ہیں، 5 اپریل 2024 کو نماز سے کچھ دیر قبل حضرت بل میں اپنی ذمہ داریاں انجام دے رہے تھے، اسی دوران ایک شخص کو ان کے سامنے لایا گیا جو اسلام قبول کرنا چاہتا تھا۔

فاروقی نے دعویٰ کیا ہے کہ ان کا اس شخص سے پہلے کوئی تعلق نہیں تھا اور نہ ہی انہوں نے اسے اسلام قبول کرنے کے لیے بلایا یا اس پر زور دیا تھا۔

انہوں نے بتایا کہ انہوں نے سب کے سامنے اس شخص سے پوچھا تھا کہ آیا اس کا فیصلہ رضاکارانہ اور جبر، دھمکی، دباؤ، زور زبردستی یا کسی لالچ سے پاک ہے۔ اس کے بعد مذکورہ شخص نے اپنی رضامندی کی تصدیق کی اور کلمہ شہادت پڑھا۔

اس کے بعد بی جے پی رہنما ڈاکٹر درخشاں اندرابی کی سربراہی والے وقف بورڈ نے 8 اپریل کو فاروقی کو ان کی ذمہ داریوں سے سبکدوش کردیا اور ایک انکوائری کمیٹی تشکیل دیتے ہوئے اسے سات دن کے اندر حقائق پر مبنی رپورٹ پیش کرنے کی ہدایت دی۔

فاروقی نے اس کارروائی کو چیلنج کرتے ہوئے کہا ہے کہ انکوائری مکمل ہونے سے پہلے ہی حکم میں اس واقعے کو ’’جبری تبدیلی مذہب‘‘ قرار دیا گیا تھا۔ انہوں نے الزام عائد کیا کہ انہیں نہ تو وجہ بتاؤ نوٹس دیا گیا اور نہ ہی اپنا موقف پیش کرنے کا موقع فراہم کیا گیا، جو فطری انصاف کے اصولوں کے خلاف ہے۔

درخواست گزار نے مزید دعویٰ کیا ہے کہ انکوائری رپورٹ یا اس سلسلے میں کوئی حتمی فیصلہ انہیں نہیں بتایا گیا اور حضرت بل درگاہ سے ان کی دوری غیر معینہ مدت تک جاری ہے۔

ہائی کورٹ میں فاروقی نے 8 اپریل کے حکم کو منسوخ کرنے، امام و خطیب کے عہدے پر بحال کرنے، انکوائری رپورٹ اور متعلقہ کارروائی کی تفصیلات فراہم کرنے کے علاوہ اس کے نتیجے میں ملنے والے دیگر فوائد کی بھی درخواست کی ہے۔

متبادل طور پر انہوں نے متعلقہ مواد فراہم کرنے اور اپنا موقف پیش کرنے کا موقع دینے کے بعد آزادانہ اور مقررہ مدت میں دوبارہ غور کرنے کی درخواست کی ہے۔

ہائی کورٹ کے حکم کے مطابق جواب دہندگان نمبر 2 سے 4 اور 7 — جموں و کشمیر وقف بورڈ بذریعہ چیف ایگزیکٹو افسر، وقف بورڈ کی چیئرپرسن ڈاکٹر درخشاں اندرابی، ایگزیکٹو مجسٹریٹ (تحصیلدار)، جموں و کشمیر وقف بورڈ اور منتظم/انچارج، آثارِ شریف حضرت بل کو نوٹس ان کے وکیل کی جانب سے قبول کیے جانے کے باعث جاری نہیں کیا گیا۔ مذکورہ جواب دہندگان نے اپنا جواب یا اعتراضات داخل کرنے کے لیے مزید وقت مانگا، جسے عدالت نے منظور کرلیا۔ عدالت نے انہیں اگلی سماعت سے قبل درخواست گزار کو جواب کی پیشگی نقل فراہم کرنے کی ہدایت بھی دی۔

باقی جواب دہندگان، یعنی جواب دہندہ نمبر 1، یونین ٹیریٹری جموں و کشمیر بذریعہ پرنسپل سکریٹری، محکمہ داخلہ، جواب دہندہ نمبر 5، سینئر سپرنٹنڈنٹ آف پولیس، سری نگر اور جواب دہندہ نمبر 6، اسٹیشن ہاؤس آفیسر، پولیس اسٹیشن نگین، کو نوٹس اگلی سماعت پر جواب کے لیے قابلِ واپسی قرار دیا گیا، بشرطیکہ درخواست گزار نوٹس کی تعمیل کے لیے ضروری اقدامات کرے۔

عدالت نے کہاکہ ’’اس دوران جواب دہندگان/غیر درخواست گزاروں کو ہدایت دی جاتی ہے کہ وہ درخواست گزار کی جانب سے 12 جون 2024 کو پیش کی گئی عرضداشت پر قواعد کے مطابق غور کریں۔‘‘
اس معاملے کو 14 اکتوبر کو سماعت کے لیے فہرست میں شامل کیا گیا ہے۔

یواین آئی۔ ظ ا

سری نگر، کشمیر کے امام میرواعظ عمر فاروق نے جمعہ کو عوام سے اپیل کی کہ وہ جموں و کشمیر کی متحدہ مجلس علماء (ایم ایم یو) کی جانب سے حال ہی میں شروع کیے گئے سماجی اصلاح کے اقدامات کی حمایت کریں اور ان میں فعال طور پر حصہ لیں۔ انہوں نے کہا کہ بامعنی تبدیلی کے لیے معاشرے کی اجتماعی شرکت ضروری ہے۔

تاریخی جامع مسجد سری نگر میں نماز جمعہ کے اجتماع سے خطاب کرتے ہوئے میرواعظ نے کہا کہ حالیہ علماء کانفرنس میں مختلف علاقوں اور مکاتب فکر سے تعلق رکھنے والے علماء نے سماج کو درپیش اہم مسائل پر غور و خوض کیا۔ ان مسائل میں منشیات کی لت، نوجوانوں میں خودکشی اور ذہنی و جذباتی پریشانی، سوشل میڈیا کا غلط استعمال، خاندانی رشتوں کی کمزوری، ماحولیاتی تنزلی اور فرقہ وارانہ ہم آہنگی کو مضبوط بنانے کی ضرورت شامل ہیں۔

انہوں نے کہا کہ صرف کانفرنسیں منعقد کرنے اور قراردادیں منظور کرنے سے تبدیلی نہیں آسکتی، جب تک عوام خود اس کوشش کا حصہ نہ بنیں۔ ان کے مطابق اس اقدام کا مقصد سماجی مسائل پر تشویش اور بحث کو عملی اقدامات میں تبدیل کرنا ہے، جس کا آغاز خاندانوں، مساجد، محلوں اور برادریوں سے ہونا چاہیے۔
میرواعظ نے کہا کہ اصلاح کا آغاز اندر سے ہونا چاہیے اور معاشرہ ہمیشہ دوسروں کے اقدام کا انتظار نہیں کرسکتا۔

انہوں نے کہاکہ ’’ہمیں اجتماعی طور پر سوچنا، غور کرنا اور عمل کرنا ہوگا۔ علماء، والدین، نوجوانوں، مساجد، مدارس اور پورے معاشرے، بالخصوص والدین، کا اس میں اہم کردار ہے۔‘‘ انہوں نے زور دیا کہ سماجی اصلاح کو مشترکہ ذمہ داری کے طور پر لیا جانا چاہیے۔

میرواعظ نے کہا کہ معاشرے کو درپیش مشترکہ مسائل پر شریک مساجد میں جمعہ کے خطبات کے دوران گفتگو کی جائے گی، تاکہ ان معاملات پر مسلسل توجہ برقرار رکھی جاسکے جو سماج کو متاثر کر رہے ہیں۔

انہوں نے عوام سے اپیل کی کہ وہ اس اقدام کی حمایت کریں اور ان مباحث کو اپنے گھروں اور برادریوں تک لے جائیں۔

میرواعظ نے مزید اجتماع کو ایران کے صدر ڈاکٹر مسعود پزشکیان اور وزیر خارجہ عباس عراقچی کے ساتھ اپنی حالیہ ملاقاتوں کے بارے میں آگاہ کیا۔ انہوں نے کہا کہ انہوں نے ایرانی عوام کے ساتھ یکجہتی کا اظہار کیا اور کشمیر اور ایران کے درمیان تاریخی، ثقافتی اور مذہبی تعلقات پر تبادلہ خیال کیا۔

انہوں نے کہا کہ ایرانی قیادت نے کشمیر کا دورہ کرنے میں دلچسپی ظاہر کی ہے اور انہوں نے انہیں وادی کا دورہ کرنے کی دعوت بھی دی ہے۔

جامع مسجد میں ایران، فلسطین، لبنان، یمن، یوکرین اور دنیا کے دیگر تنازعات سے متاثرہ علاقوں میں امن اور بے گناہ افراد کی تکالیف و جانی نقصان کے خاتمے کے لیے خصوصی دعائیں بھی کی گئیں۔ اجتماع میں جنگ اور تباہی سے متاثرہ افراد کے لیے رحمت، امن، انصاف اور راحت کی دعا کی گئی۔

یواین آئی۔ ظ ا