خبراردو:

حریت کانفرنس (ع) چیرمین میر واعظ عمر فاروق نے نئی دہلی کے ایک اخبار کو انٹرویو دیتے ہوئے کشمیر تصفیہ کے پرامن حل، سابق وزیر اعظم اٹل بہاری واجپائی اور نریندرمودی کے طریق کار میں غیر یکسانیت اور موجودہ صورتحال میں حریت کے رول پر تبادلہ خیال کیا۔انہوں نے بتایا کہ نئی دہلی کی کشمیر پالیسی میں کافی تبدیلی واقع ہوچکی ہیں ۔بی جے پی کی موجودہ قیادت اپنے سابق وزیر اعظم اٹل بہاری واجپائی کے اپروچ سے مکمل طورپر انحراف کرچکی ہے۔ انہوں نے کہا کہ واجپائی کی قیادت والی حکومت میں کشمیر کو ایک انسانی مسئلہ تصور کیا جاتا تھایہی وجہ ہے واجپائی نے بار بار اس بات کو دہرایا کہ وہ مسئلہ کشمیر کا حل انسانیت کے دائرے میں تلاش کریں گے۔ انہوں نے کہا کہ سابق وزیر اعظم اٹل بہاری واجپائی کے اپروچ نے حریت کانفرنس کے لیے راہیں کھول دیں تھی تاکہ ہم نئی دہلی کے ساتھ ساتھ پاکستان کے ساتھ بھی بات چیت شروع کریں۔میر واعظ کے مطابق اس قسم کا اپروچ تکونی تھا کیوں کہ اس میں ہر کوئی فریق ایک دوسرے کے ساتھ ملوث تھا تاہم موجودہ صورتحال میں اس قسم کا اپروج زمینی سطح پر بالکل غائب ہے۔ اس وقت کشمیر کے چپے چپے میں ظلم اور جبر کا سلسلہ جاری ہے۔

واجپائی کے اپروچ کی جگہ اب ڈوول ڈاکٹرائن نے سنبھال لی ہے۔فی الوقت ریاستی عوام کو آئے روز محاصروں اور تلاشی آپریشنوں کا سامنا رہتا ہے۔میر واعظ نے کہا کہ اٹل بہاری واجپائی امن کی باشا پر یقین رکھتے تھے تاہم نریندر مودی پر جنگی جنون سوار ہے اور جنگ اور تباہی کی باتیں اُن کا تکیہ کلام ہے۔ایک سوال کے جواب میں میر واعظ نے بتایا کہ پاکستانی وزیر اعظم عمران خان نے بارہا اس بات کو سامنے لایا کہ اگر ہندوستان ایک قدم آگے بڑھنے کے لیے تیار ہے تو پاکستان دو قدم آگے بڑھے گا۔عمران خان چاہتے ہیں کہ مسئلہ کے تصفیہ کی خاطر بات چیت کا آغاز کیا جائے تاہم یہ عمل تب تک بے معنی ہے جب تک نہ دونوں فریق بات چیت کو شروع کرنے پر رضا مند ہوجائے۔انہوں نے بتایا کہ پاکستانی وزیر اعظم عمران خان نے بار بارہندوستان کو مذاکرات کی اپیل کی تاہم ہندوستان نے ہر وقت ان کی باتوں کو ان سنی کردیا۔ اصل میں نئی دہلی موجودہ صورتحال میں نہ پاکستان سے اور نہ ہی کشمیریوں کے ساتھ بات چیت کے لیے تیار ہے۔ممکن ہے کہ ہندوستان میں آنے والے انتخابات تک صورتحال جوں کی توں رہے گی کیوں کہ بی جے پی کا ایجنڈا ہندوتوا پر مبنی ہے اور ایسا لگتا ہے کہ وہ فی الوقت اپنے ایجنڈا کو آگے لیجانے میں ہی مصروف عمل ہیں۔بات چیت اور تشدد کے ایک ساتھ جاری رہنے پر میر واعظ نے بتایا کہ بہت سے لوگوں کا ماننا ہے کہ اگر بھارتیہ جنتا پارٹی کے اندر کمزوری پائی جاتی ہے تو اس کو دور کرنے کے لیے وہ کشمیر اور پاکستان کا کارڈ استعمال کرسکتی ہے۔ پاکستان ، دہشت گردی اور کشمیر ایسے معاملات ہیں جنہیں بی جے پی قومی سطح پر اچھال کر بڑے پیمانے پر ووٹ بنک بناسکتی ہے۔

انہوں نے بتایا کہ ہندوستان کی طرف سے پاکستان پر بار بار دہشت گردی اور تشدد کا الزام عائد کرنا بالکل بے بنیاد ہے کیوں کہ کشمیر میں جاری تحریک کشمیریوں کی اپنی شروع کی ہوئی تحریک ہیں جس میں کشمیر کی اپنی نئی نسل قربان ہورہی ہے۔ مسئلہ کشمیر کے پرامن حل اور حریت کے رول سے متعلق ایک سوال کے جواب میں میر واعظ نے بتایا کہ آپ بھلا اُس صورت میں کیا کرسکتے ہیں جب دوسرا فریق مسئلہ کو متنازعہ ماننے کو تیار ہی نہیں ! ہندوستان صرف فوجی طاقت کا سہارا لے رہا ہے۔ آپ اس طرح کی صورتحال میں اس کے علاوہ کچھ بھی نہیں کرسکتے ہیں کہ آپ اپنے مؤقف پر چٹان کی طرح ڈٹے رہیں۔حریت اپنے مؤقف پر ڈٹی ہوئی ہے اور کشمیری عوام پر اس حوالے سے وعدہ بند ہے۔ حریت خاموش تماشائی بن کر نہیں بیٹھی ہے بلکہ ہمیں ہر روز کسی نہ کسی معاملے سے سابقہ درپیش رہتا ہے۔ کبھی غیر ریاستی آبادیوں کو یہاں بسانے کے منصوبے ترتیب دئے جاتے ہیں ، کبھی یہاں کے اداروں کی خودمختاری پر ضرب لگائی جاتی ہے وغیرہ وغیرہ لیکن حریت کو اس طرح کے مسائل سے بھی نمٹنا پڑتا ہے۔

کشمیر میں دولت اسلامیہ اور القاعدہ کی موجودگی سے متعلق ایک سوال کے جواب میں میر واعظ عمر فاروق نے بتایا کہ جہاں تک کشمیریوں کی جدوجہد کا تعلق ہے آپ اس کو دولت اسلامیہ یا القاعدہ کے ساتھ نہیں جو ڑ سکتے۔ کشمیر میں دولت اسلامیہ یا القاعدہ کا کوئی نام و نشان موجود نہیں ہے۔یہاں تک حزب المجاہدین اور دیگر کشمیر نژاد عسکری جماعتوں نے ببانگ دھل یہ بات واضح کی ہے کہ اُن کا نصب العین کیا ہے؟ کشمیر کی تحریک آزادی میں رول ادا کرنے والی عسکری جماعتوں کا دائرہ کار صرف کشمیر تک محدود ہے۔ ممکن ہے کہیں پر کمزور ی موجود ہو، چند نوجوان اس میں ملوث ہوں، جب آپ نوجوانوں پر ظلم و جبر کے پہاڑ توڑدیں گے تو لازمی بات ہے کہ وہ دوسرے آپشنز کی طرف بھی سوچ سکتے ہیں۔ جہاں تک میرا ذاتی تعلق ہے ہم نے یہ بات کئی بار واضح کی ہے کہ مسئلہ کشمیر ایک سیاسی مسئلہ ہے، ہم نے کبھی بھی یہ دعویٰ نہیں کیا کہ یہ ہندوستان میں رہ رہے ہندوؤں اور کشمیری مسلمانوں کے درمیان کوئی جنگ ہے۔وادی میں جاری نوجوانوں کے قتل عام پر ردعمل ظاہر کرتے ہوئے حریت (ع) چیر مین نے بتایا کہ نئی دہلی نے ہمیشہ کشمیر پر اپنا دعویٰ جتاتے ہوئے اسے اپنا اٹوٹ انگ قرار دیا ہے۔ ہندوستان نے کبھی بھی کشمیریوں کو اپنا نہیں مانا اور نہ ہی ان کو کبھی کشمیریوں کی فکر لاحق ہوئی۔وہ صرف کشمیر کی بات کررہے ہیں نہ کہ کشمیریوں کی جس سے صاف ظاہر ہورہا ہے کہ وہ مسئلہ کے تئیں فوجی قوت کے ساتھ ڈیل کررہے ہیں۔

ناروے کے سابق وزیر اعظم کے ساتھ حال ہی میں ہوئی میٹنگ پر بات کرتے ہوئے حریت (ع) چیرمین نے بتایا کہ اس طرح کا عمل قریبا 6برس بعد واقع ہوا جب کسی غیر ملکی سیاسی لیڈر شپ نے کشمیر کا دورہ کرکے حریت کے ساتھ بات چیت کی۔انہوں نے بتایا کہ وفد میں شامل لوگوں نے نہ صرف حریت کے ساتھ بات چیت کی بلکہ انہوں نے نئی دلی اور پاکستان جاکر وہاں پر بھی لوگوں کے ساتھ تبادلہ خیال کیا کیوں متازعہ خطوں میں اُن کو ایک وسیع تجربہ رہا ہے۔میر واعظ نے بتایا کہ وفد نے یہ بات دہرائی کہ مسائل کے حل کی خاطر کشمیریوں کی شمولیت ناگزیر ہے اور کشمیر کا کوئی فوجی حل نہیں ہے۔انہوں نے کہا کہ وفد نے آمد ایک نیک شگون ہے جو چند قوتوں کی کوششوں کے بعد ہی ممکن ہوپائی۔کشمیر حل میں ناروے وفد کے رول پر میر واعظ نے بتایا کہ بین الاقوامی سطح پر کشمیر کے حوالے سے حالات تبدیل ہورہے ہیں۔ حالیہ یو این رپورٹ کے بعد اس طرح کے امکانات موجود ہیں۔ ہم امید رکھتے ہیں کہ اس طرح کی مشق جاری و ساری رہے تاکہ مسئلہ کشمیر کے پرامن حل کی راہیں مستقبل قریب میں کھل جائیں۔حالیہ بلدیاتی انتخابات سے متعلق بائیکاٹ کال پر بولتے ہوئے حریت (ع) چیرمین نے بتایا کہ جہاں تک ہندنواز سیاسی پارٹیوں بشمول این سی، پی ڈی پی ، بی جے پی وغیرہ کا تعلق ہے تو اس سے ہمیں کوئی فرق نہیں پڑتا۔ کشمیرمیں اگر نئی دہلی کی پالیسیوں کو نافذ کرنے والا ادارہ موجود ہے تو وہ فوج اور فورسز ہے۔ ہمیں نہیں لگتا ہے کہ بی جے پی سے ہمیں کوئی مسئلہ ہوگا کیوں وہ صرف مال اور طاقت کے ذریعے یہاں پر موجود ہیں۔میر واعظ نے بتایا کہ حال ہی میں این سی اور پی ڈی پی کو نئی دہلی نے پاکستانی ایجنٹ قرار دیا جنہوں نے آج تک یہاں پر ہندوستان کے لیے کیا کچھ نہیں کیا۔لہٰذا انہیں اس معاملے پر سنجیدگی سے غور کرنا چاہیے کہ اُن کے لیے کیا ٹھیک ہے اور کیا نہیں۔
کے این ایس