عالمگیر وبا کی لپیٹ میں 180ممالک

Published

7 years ago

March 20, 2020

کورونا وائرس دنیا کے180 ممالک میں پھیل گیا ہے جس کے بعد ہلاکتوں کی تعداد 10 ہزار32 تک پہنچ چکی ہے جبکہ متاثرین کی تعداد2 لاکھ 44ہزار602 سے تجاوز کرچکی ہے۔وائرس کے خوف سے دنیا بھر میں کئی شہروں کو لاک ڈاؤن بھی کردیا گیا ہے۔جہاں کورونا وائرس سے بڑی تعداد میں لوگ متاثر ہوئے ہیں وہیں اب تک 86 ہزار33 افراد صحت یاب بھی ہوچکے ہیں۔چین:چین سے پھیلنے والے کورونا وائرس نے جہاں دنیا کو اپنی لپیٹ میں لے لیا ہے وہیں چین میں اس پر کافی حد تک قابو پالیا گیا ہے اور مسلسل دو روز سے وائرس کے مرکز چین کے شہر ووہان سے ایک بھی مقامی کیس کا نہ آنا اس بات ثبوت ہے۔
تاہم دوسری جانب اب چین کو بیرون ملک سے آنے والے وائرس کے کیسز میں ریکارڈ اضافے کا سامنا ہے۔رائٹرز کی رپورٹ کے مطابق چینی ہیلتھ کمیشن کا کہنا تھا کہ ملک میں گزشتہ 24 گھنٹوں کے دوران 228 نئے کیسز سامنے آئے جن میں سے تمام بیرون ملک سے آنے والے افراد شامل ہیں۔چین میں اب تک کورونا وائرس کے 81 ہزار250 کیسز سامنے آئے جن میں سے 3 ہزار253 افراد ہلاک اور71 ہزار 266 صحت یاب ہوچکے ہیں۔اٹلی:چین کے بعد اٹلی وائرس سے سب سے زیادہ متاثر ہونے والا ملک ہے جہاں وائرس سے3 ہزار4 سو5 افراد ہلاک ہوئے ہیں جبکہ 41ہزار 35 افراد متاثر ہیں۔اٹلی میں کورونا وائرس سے ہلاکتوں کی تعداد چین سے زیادہ ہوچکی ہے جبکہ ملک میں اب تک وائرس سے صحت یاب ہونے والوں کی تعداد 4 ہزار 440 ہے۔
خیال رہے کہ کورونا وائرس کے کیسز میں اضافے کے بعد حکومت نے اقدامات کرتے ہوئے ملک کے بیشتر حصے کو لاک ڈاؤن کردیا تھا۔ایران:اٹلی کے بعد کورونا وائرس سے سب سے زیادہ متاثر ہونے والے ممالک میں تیسرا نمبر ایران کا ہے جہاں آج نئے پارسی سال کی خوشیاں منائی جارہی ہیں وہیں لوگ کورونا وائرس سے متاثر ہونے کے خوف میں بھی مبتلا ہیں۔ خبر رساں ادارے ایسوسی ایٹڈ پریس (اے پی) کی رپورٹ کے مطابق ایرانی صدر حسن روحانی نے سال نو روز کے موقع پر ایرانی عوام سے بہتر معیشت کا وعدہ کرتے ہوئے کہا کہ ’ہم کورونا وائرس کو متحد ہوکر، محنت سے اور ایک دوسرے کے تعاون سے پیچھے چھوڑ کر آگے بڑھیں گے‘۔ایران میں عالمی وبا سے18 ہزار 77 افراد متاثر ہوئے ہیں جن میں ایک ہزار 284 افراد موت کے منہ میں جا چکے ہیں جبکہ 5 ہزار 979 صحت یاب بھی ہوچکے ہیں۔جرمنی:جرمن چانسلر اینجیلا مارکل نے جرمنی میں کورونا وائرس کے پھیلاؤ کے خدشے کے سبب لاک ڈاؤن کا عندیہ دے دیا ہے۔فرانسیسی خبر رساں ادارے اے ایف پی کی رپورٹ کے مطابق جرمن چانسلر نے ایک میگزین کو انٹرویو دیتے ہوئے کہا کہ ’ہم رواں ہفتے کے اختتام پر اپنی عوام کا رد عمل دیکھیں گے اور ہفتے کا روز فیصلے کا دن ہوگا‘۔
واضح رہے کہ دنیا بھر میں پھیلی وبا سے متاثر ہونے والے ممالک میں جرمنی کا نمبر پانچواں ہے جہاں اب تک 16 ہزار290 افراد متاثر اور44 ہلاک اور 115 صحت یاب ہوچکے ہیں۔امریکا:امریکا میں کورونا وائرس سے اب تک 205 افراد ہلاک اور14 ہزار 250 افراد متاثر ہوچکے ہیں۔خبر رساں ادارے ایسوسی ایٹڈ پریس (اے پی) کی رپورٹ کے مطابق امریکی ریاست کیلی فورنیا کے گورنر گیون نیوسم کا کہنا ہے کہ کیلی فورنیا کی 56 فیصد آبادی کے کورونا وائرس سے متاثر ہونے کا خدشہ ہے جبکہ اس ریاست کے شہر لاس اینجلس میں شاپنگ مراکز، انڈور مالز اور غیر ضروری ریٹیل تجارتی سینٹر بند کر دیے گئے ہیں۔
دوسری جانب ارجنٹائن نے لاک ڈاؤن کا اعلان کردیا ہے جس کے بعد وہ جنوبی امریکا کا پہلا ملک ہے جو لاک ڈاؤن میں چلا گیا ہے۔فرانس:فرانس کے جنوب مشرقی شہر نائس کے میئر کا کہنا ہے کہ وہ وہاں کے معروف پرومینیڈ دس اینگلیس کو بند کریں گے۔خبر رساں ادارے رائٹرز کی رپورٹ کے مطابق میئر کرسچن ایستروسی کا کہنا تھا کہ ’میں آج سے ہی کرفیو لگانے کے فیصلے پر غور کر رہا ہوں‘۔خیال رہے کہ اس شہر کے میئر میں خود بھی کورونا وائرس کی تصدیق ہوئی ہے۔واضح رہے کہ فرانس میں اب تک 10 ہزار 891 کورونا وائرس کے کیسز سامنے آچکے ہیں جن میں سے 371 افراد ہلاک اور12 صحت یاب ہوچکے ہیں۔ہندوستان:بھارت میں کورونا وائرس سے ہلاک ہونے والوں کی تعداد 5ہو گئی ہے جبکہ223افراد متاثر ہیں۔جمعہ کو ایک خاتون سیاح کی موت ہوئی،جو کووڈ۔19میں مبتلاء تھیں۔پاکستان:پاکستان میں کورونا وائرس کے کیسز کی تعداد میں اضافہ ہورہا ہے، ملک میں وائرس سے متاثرہ افراد کی تعداد 448ہوچکی ہے جبکہ وائرس نے اب تک ملک میں 3افراد کی جان بھی لے چکا ہے۔
اقوام متحدہ کے سیکریٹری جنرل انتونیو گوتریس نے عالمی رہنماؤں سے اس مشکل گھڑی میں مل کر کام کرنے کی اپیل کی ہے۔یاد رہے کہ گزشتہ سال31 دسمبر کو چینی حکام نے عالمی ادارہ صحت کو نوول کورونا وائرس کی وبا سے آگاہ کیا تھا جسے20 فروری2020 کو سارز کووڈ 2 کا نام دیا گیا جبکہ اس سے ہونے والی بیماری کو کووڈ۔19 کا نام دیا گیا۔یہ وبا چین کے شہر ووہان میں سامنے آئی تھی جس کے بعد اس نے دیکھتے ہی دیکھتے دنیا بھر کو اپنی لپیٹ میں لے لیا۔

دنیا

اسرائیلی انتخابات سے قبل نیتن یاہو کی لیکوڈ اور آئزنکوٹ کی یاشار پارٹی کے درمیان سخت مقابلہ

Published

13 hours ago

October 23, 2026

Online Desk

یروشلم، اسرائیل میں منگل کو ہونے والے انتخابات سے قبل وزیر اعظم بنجامن نیتن یاہو کی حمایت کرنے والے اور ان کی مخالفت کرنے والے جماعتی اتحادوں کے درمیان سخت مقابلہ ہے۔ تاہم، زمان اسرائیل کے ایک تازہ ترین سروے کے مطابق، کسی بھی اتحاد کو 120 رکنی کنیسٹ (اسرائیلی پارلیمان) میں اکثریت حاصل ہوتی دکھائی نہیں دے رہی ہے۔

14 اور 15 اکتوبر کو 500 یہودی اور عرب افراد کے درمیان کیے گئے اس سروے میں یہودی قیادت والے دونوں بڑے سیاسی اتحادوں کو 51، 51 نشستیں ملنے کا اندازہ ظاہر کیا گیا ہے، جو حکومت تشکیل دینے کے لیے درکار 61 نشستوں سے کافی کم ہے۔

عرب قیادت والی جماعتوں کو مجموعی طور پر 14 نشستیں ملنے کا امکان ظاہر کیا گیا ہے، جبکہ کسی اتحاد کا حصہ نہ بننے والی ریزروسٹس پارٹی کو چار نشستیں ملنے کی توقع ہے۔

دونوں میں سے کسی بھی اتحاد کے لیے بعض حریف جماعتوں کے ساتھ حکومت نہ بنانے سے متعلق انتخابی وعدوں سے پیچھے ہٹے بغیر اکثریت حاصل کرنا مشکل ہوگا۔

اگر کوئی اتحاد حکومت تشکیل دینے میں ناکام رہتا ہے تو 2027 کے اوائل میں دوبارہ انتخابات کرائے جا سکتے ہیں اور اس دوران نیتن یاہو نگراں وزیر اعظم برقرار رہیں گے۔

ٹائمز آف اسرائیل کے ایک الگ سروے کے مطابق، تقریباً 60 فیصد جواب دہندگان چاہتے ہیں کہ اگر نیتن یاہو حکومت بنانے میں ناکام رہتے ہیں تو وہ سیاست سے سبکدوش ہوجائیں۔

ٹائمز آف اسرائیل کے جماعت وار اندازوں کے مطابق، اپوزیشن رہنما گادی آئزنکوٹ کی یاشار پارٹی 23 نشستوں کے ساتھ پہلے مقام پر ہے، اگرچہ گزشتہ ہفتے کے مقابلے میں اس کی متوقع نشستوں میں تین کی کمی آئی ہے۔

دوسری جانب نیتن یاہو کی لیکوڈ پارٹی 21 نشستوں کے ساتھ دوسرے مقام پر ہے۔ امریکی صدر ڈونالڈ ٹرمپ کی جانب سے نیتن یاہو کی حمایت کے چند روز بعد لیکوڈ کی متوقع نشستوں میں ایک کا اضافہ ہوا ہے۔

اسرائیل کے سابق وزیر اعظم نفتالی بینیٹ کی جماعت بی یاخاد کو 11 نشستیں ملنے کا امکان ہے، جبکہ سخت گیر موقف رکھنے والی یسرائیل بیتینو کو نو نشستیں مل سکتی ہیں۔ عرب قیادت والے جوائنٹ لسٹ اتحاد کو بھی نو نشستیں ملنے کی توقع ہے۔

انتہائی قدامت پسند مذہبی جماعتوں شاس اور یونائیٹڈ توراہ جوڈازم، بائیں بازو کی ڈیموکریٹس اور انتہائی دائیں بازو کی اوتسما یہودیت، ہر ایک کو آٹھ نشستیں ملنے کا اندازہ ہے۔ مذہبی صہیونیت پارٹی کو چھ، تاریخی طور پر اسلام پسند جماعت راعم کو پانچ اور ریزروسٹس پارٹی کو چار نشستیں ملنے کی توقع ہے۔

اوفیر ونٹر کی قیادت والی دائیں بازو کی پیپلز آف اسرائیل پارٹی کے بارے میں اندازہ ہے کہ وہ انتخابی حد عبور نہیں کر پائے گی۔ اس جماعت نے وعدہ کیا ہے کہ وہ

جاری ۔ یو این آئی۔ ع ا۔

دنیا

سرائیلی فوج کے سربراہ نے کنیسٹ انتخابات سے قبل ایران پر حملے کی ضرورت مسترد کردی

Published

13 hours ago

October 23, 2026

Online Desk

یروشلم، اسرائیلی فوج کے سربراہ لیفٹیننٹ جنرل ایال زامیر نے فی الحال ایران پر حملے کے لیے کسی عملی ضرورت سے انکار کیا ہے۔ چینل 13 نے جمعرات کو یہ اطلاع دی۔ ان کا یہ بیان اسرائیل میں 27 اکتوبر کو ہونے والے کنیسٹ انتخابات سے قبل ایران کے ساتھ جنگ دوبارہ شروع ہونے کے خدشات کے درمیان سامنے آیا ہے۔

چینل 13 کے مطابق، زامیر نے حالیہ ایک نجی اجلاس میں کہا، ”ہمیں ایسے کوئی اشارے نہیں ملے ہیں جن سے ظاہر ہو کہ انتخابات سے پہلے ایران پر حملہ ضروری ہے۔ اگر ہم اس نتیجے پر پہنچے کہ ایران پر حملہ ضروری ہے تو ہم ایسا کریں گے۔”

وزیر اعظم بنجامن نیتن یاہو کے اہم حریف اور یاشار پارٹی کے سربراہ گادی آئزنکوٹ نے بھی جمعرات کو اسی طرح کا موقف ظاہر کیا۔ انہوں نے چینل 13 سے کہا، ”ایران کی جانب سے کوئی ایسا براہ راست اور فوری خطرہ نہیں ہے جو انتخابات سے پہلے جنگ شروع کرنے کو ضروری بنائے۔”

نیتن یاہو کو ناقدین کی جانب سے ان الزامات کا سامنا ہے کہ وہ اسرائیلی انتخابات پر اثرانداز ہونے یا انہیں ملتوی کرانے کے لیے ایران کے خلاف جنگ دوبارہ شروع کرنے کی کوشش کر رہے ہیں۔ تاہم، انہوں نے ان الزامات کی تردید کی ہے۔

یو این آئی۔ ع ا۔

جموں و کشمیر

عمر عبداللہ کی لوگوں سے باغِ گلِ داؤد کی خوب صورتی سے لطف اندوز ہونے کی اپیل

Published

13 hours ago

October 23, 2026

Online Desk

سری نگر، جموں و کشمیر کے وزیر اعلیٰ عمر عبداللہ نے جمعہ کو کہا کہ سری نگر کا پہلا مخصوص گلِ داؤدی باغ، ‘باغِ گلِ داؤد’، سیاحوں کو پھولوں کی ایک منفرد دل کشی فراہم کرکے کشمیر میں سیاحتی موسم کو وسعت دینے میں مددگار ثابت ہوگا۔

باغ کا دوسری مرتبہ افتتاح کرنے کے بعد صحافیوں سے بات کرتے ہوئے عمر عبداللہ نے کہا کہ اس اقدام کا مقصد کشمیر کے سیاحتی موسم کے آغاز اور اختتام، دونوں ادوار میں سیاحوں کے لیے خصوصی کشش کے مقامات تیار کرنا ہے۔

انہوں نے کہاکہ ”اس باغ کو تیار کرنے کے پیچھے ہمارا مقصد سیاحتی موسم کو فروغ دینا ہے۔” انہوں نے مزید کہا کہ محکمۂ گل کاری نے باغِ گلِ داؤد کو اس لیے تیار کیا ہے تاکہ ایسے عرصے میں سیاحوں کو ایک منفرد تجربہ فراہم کیا جا سکے، جب سیاحت کے لیے خاص کشش رکھنے والے مقامات نسبتاً کم ہوتے ہیں۔

زبرون پہاڑیوں کے دامن میں واقع اور ڈل جھیل کے چمکتے پانیوں کا نظارہ پیش کرنے والا یہ خوب صورت، زینہ دار باغ سری نگر کے مشہور ٹیولپ گارڈن کے قریب واقع ہے۔

عمر عبداللہ نے لوگوں کو باغ کی سیر کی دعوت دیتے ہوئے کہاکہ ”میں نہ صرف ملک بھر کے ان لوگوں کو کشمیر آنے کی دعوت دیتا ہوں جو یہاں کی سیر کے خواہش مند ہیں، بلکہ اس سے بھی بڑھ کر سری نگر اور آس پاس کے علاقوں میں رہنے والے اپنے لوگوں سے اپیل کرتا ہوں کہ وہ آئیں اور اس باغ کی خوب صورتی سے لطف اندوز ہوں۔”

انہوں نے سیاحوں پر زور دیا کہ وہ باغ میں تصاویر کھینچیں اور یہاں کی خوب صورتی کی یادیں ہمیشہ کے لیے محفوظ کریں۔

گزشتہ سال باغ کے افتتاح کے بعد ہونے والی پیش رفت کا ذکر کرتے ہوئے وزیر اعلیٰ نے کہا کہ باغ میں نمایاں بہتری آئی ہے اور اسے مزید دل کش بنانے کی کوششیں جاری رہیں گی۔

انہوں نے کہاکہ ”آپ میں سے جو لوگ گزشتہ سال افتتاح کے موقع پر میرے ساتھ تھے اور جنہوں نے اس مرتبہ یہاں آنے کا موقع حاصل کیا ہے، انہوں نے خود دیکھا ہوگا کہ اس باغ نے کتنی ترقی کی ہے۔”

وزیر اعلیٰ نے کہا کہ پائیداری کے اعتبار سے بھی اس باغ کو ایک فائدہ حاصل ہے، کیونکہ اس کے پودوں کو مقامی طور پر افزائش دے کر بڑھایا جا سکتا ہے، جب کہ ٹیولپ کے بلب بار بار درآمد کرنے پڑتے ہیں۔

انہوں نے کہاکہ ”اس باغ کا ایک بڑا فائدہ یہ ہے کہ ٹیولپ گارڈن کے برعکس، جس کے لیے ہمیں بار بار بیرونِ ملک سے بلب منگوانے پڑتے ہیں، باغِ گلِ داؤد کے پودوں کا مواد ہمارے اپنے پاس موجود ہے۔ ہم خود ان کی افزائش کرتے ہیں اور ان کی تعداد بڑھاتے ہیں۔”

انہوں نے مزید کہا کہ حکومت ہر سال باغ میں نئی خصوصیات متعارف کرانے کی کوشش کرے گی تاکہ اس کی کشش برقرار رہے اور سیاحتی مقام کے طور پر اس کا کردار مزید مستحکم ہو۔

یواین آئی۔ ظ ا