وادی کشمیر میں اتوار کی صبح کا آغاز اُس وقت افسوسناک خبر سے ہوا،جب حکومتی ترجمان نے روہت کنسل نے سوشل میڈیا کے ذریعے اس بات کی تصدیق کی کشمیر میں کورونا وائرس میں مبتلاء ایک اور مریض کی موت بھی سرکاری اسپتال میں ہوئی اور اس طرح کشمیر میں اموات کی تعداد اب2ہوگئی۔ادھر کورونا وائرس میں مبتلاء مریضوں کی تعداد میں مسلسل اضافہ ہورہا ہے،اتوار کو سرکاری ترجمان نے مزید5مثبت کیسز کی تصدیق کی اور اس طرح وادی کشمیر میں یہ تعداد38تک پہنچ گئی۔ادھر نئے کیسز سامنے آنے کے بعد مذکورہ افراد کے اہلخانہ اور دیگر رشتہ داروں کو قرنطینہ مراکز منتقل کیا گیا۔وادی کشمیر میں 11ویں روز بھی لاک ڈاؤن سختی کیساتھ جاری رہا جبکہ اس لاک ڈاؤن نے اب کرفیو کی شکل اختیار کی ہے۔صورتحال انتہائی گمبھیر ہوتی جارہی ہے جبکہ لاک ڈاؤن کی وجہ سے گھروں میں مقید لوگوں کی پریشانیوں میں مزید اضافہ ہورہا ہے۔
عالمی وبا کورونا وائرس کی وجہ سے جموں وکشمیر میں بھی لاک ڈان کا سلسلہ لگاتار 11ویں دن بھی جاری رہا۔21دنوں کے لاک ڈاون پر سختی سے عمل کیا جا رہا ہے۔بغیر ایمرجنسی کسی بھی فرد کو باہر نکلنے کی اجازت نہیں دی جارہی ہے۔ لاک ڈاون کی خلاف ورزی کرنے والے عام لوگوں کے خلاف ایف آر درج کی جارہی ہیں۔اب تک 38افراد کروناوائرس سے متاثر ہوچکے ہیں جبکہ دو مریضوں کی موت ہوئی ہیں۔ حکام نے لوگوں کو گھر کے اندر رہنے کی اپیل کرنے کے لئے آئمہ وعلماسے مدد طلب کی ہے۔علما نے لوگوں سے کہا تھا کہ وہ گھر میں ہی نماز پڑھیں اور مساجد سے پرہیز کریں۔ سری نگر کے چھاتی کی بیماری سے متعلقہ ہسپتال ڈلگیٹ میں صبح قریب 4بجے کورونا وائرس سے متاثرہ 62سالہ شخص کی موت ہوگئی۔ انتظامیہ کے ترجمان روہت کنسل نے کووڑ۔19سے متاثرہ اس شخص کی ہلاکت کی تصدیق کی ہے۔
انہوں نے اپنے ایک ٹویٹ میں کہا’دن کی شروعات بری خبر سے ہورہی ہے،سرینگر میں آج صبح ایک مریض کی کورونا وائرس سے بدقسمت موت واقع ہوئی‘۔ ٹنگمرگ سے تعلق رکھنے والے شخص، جس کا کورونا وائرس ٹیسٹ ایک روز قبل یعنی ہفتہ کو مثبت آیا تھا، کی اتوار کی علی الصبح قریب چار بجے سری نگر کے ڈل گیٹ علاقے میں واقع امراض سینہ کے ہسپتال میں موت واقع ہوئی۔ڈاکٹروں کے مطابق متوفی جگر کے امراض میں بھی مبتلا تھا۔ ایک سینئر سرکاری عہدیدار کے حوالے سے کہا گیا ہے کہ متوفی کو ہفتہ کے روز سری نگر کے شری مہاراجہ ہری سنگھ ہسپتال سے امراض سینہ کے ہسپتال منتقل کیا گیا تھا اور ان کا کورونا وائرس ٹیسٹ مثبت آیا تھا۔ انہوں نے کہا ہے کہ متوفی کی جاری ایڈوائزری کے تحت آخری رسومات کی تیاریاں شروع کردی گئی ہیں۔اس دوران جونہی مرحوم کی میت آبائی گاؤں پہنچی تو وہاں صف ماتم بچھ گئی۔بعدازاں پروٹوکول کے مطابق اُسکی آخری رسومات انجام دی گئی۔یاد رہے کہ سی ڈی اسپتال میں 26مارچ کو زیر علاج 65 سالہ کورونا وائرس سے متاثرہ مریض کی دل کا دورہ پڑنے سے موت واقع ہوئی تھی۔
وہ ذیابیطس اور ہائی بلڈ پریشر جیسی بیماریوں میں بھی مبتلا تھے۔ متوفی شخص جن کا تعلق سرینگر کے مضافاتی علاقہ حیدر پورہ سے تھا، تبلیغی جماعت کے ایک سینئر رہنما تھے۔ انہوں نے فروری میں نئی دہلی کا سفر کیا تھا اور وہاں قریب ایک ماہ تک مقیم رہے جس دوران انہوں نے وہاں تبلیغی جماعت کے ایک بین الاقوامی اجتماع میں شرکت کی تھی۔ اس اجتماع میں انڈونیشیا اور ملائشیا سے تعلق رکھنے والے علماء اور تبلیغی جماعتوں کے کارکنوں نے شرکت کی تھی۔جموں وکشمیر میں ہفتہ کو ایک ہی13 افراد کے کورونا وائرس ٹیسٹ کے نتائج مثبت آئے۔اس دوران اتوار کے روز کشمیر میں ناول کوویڈ۔19کے مزید 5 متاثرہ افراد سامنے آئے جس سے جموں و کشمیر بھر میں کیسوں کی کل تعداد38ہوگئی ہے۔انتظامیہ کے ترجمان روہت کنسل نے بتایا کہ کشمیر میں مزید5کورونا مثبت کیسز کی تعداد ہوگئی ہے۔
ان کا کہناتھا کہ ان میں 2کاتعلق سرینگر،2کا تعلق بڈگام اور ایک کا تعلق بارہمولہ سے ہے۔ذرائع سے معلوم ہوا ہے کہ سرینگر کے2نئے کیسز میں سے ایک تعلق ہاک با زار حول اور دوسرے کا تعلق مہجور نگرسرینگر سے ہے۔اس دوران درجنوں افراد کو مختلف قر نطینہ مراکز منتقل کیا گیا،جن میں ان افراد کے رشتہ دار اور افر اد خانہ شامل ہیں،جن کے کورونا ٹیسٹ مثبت آئے ہیں جبکہ وہ افراد بھی قر نطینہ مراکز منتقل کیا گیا جن کے رابطہ مثبت کورونا مریضوں کیساتھ ہوا ہے۔ادھر ڈسٹرکٹ مجسٹریٹ بڈگام نے نوڈل افیسران کے ساتھ ایک اہم میٹنگ کی جس میں ضلع میں پہلے سے قائم قرنطین مرکزمیں مزید1200بیڈ کا اضافہ کیا گیا تاکہ ضلع میں کوڈ۔19کے انفیکشن کو پھیلنے سے روکا جاسکے۔ نوڈل افسران کی مدد کے لئے12پروبیشنری کے اے ایس افسران کو اختیارات دیئے گئے ہیں جو مختلف صلاحیتوں میں انتظامیہ کی مدد کے لئے مصروف رہیں گے۔اس دوران عالمی وبا کورونا وائرس سے پیش ہونے والی اموات اور متاثرہ افراد کی تعداد میں مسلسل اضافے کے چلتے جاری لاک ڈاؤن غیر اعلانیہ کرفیو کی شکل اختیار کرچکا ہے۔ تاہم صورتحال کی سنگینی کے پیش نظر لوگ بھی اپنے گھروں تک ہی محدود رہ کر رضاکارانہ طور پر ’سول کرفیو‘ نافذ کرچکے ہیں۔ اتوار کو مسلسل 11 ویں روز بھی مکمل لاؤن جاری رہا۔ لاک ڈاؤن پر عمل درآمد کو یقینی بنانے کے لئے سڑکوں اور گلی کوچوں میں جو قدغنیں لگائی گئی ہیں، ان سے لگتا ہے کہ پوری وادی میں گویا غیر اعلانیہ کرفیو نافذ ہے۔ تاہم وادی میں پہلی بار لوگوں کی اکثریت کرفیو جیسی پابندیوں پر راضی نظر آرہی ہے اور مقامی لوگ سوشل میڈیا پر ایک دوسرے کو گھروں میں ہی بیٹھنے کا مشورہ دیتے ہوئے دیکھے جاسکتے ہیں۔
وادی میں کورونا وائرس کے مہلوکین اور متاثرین کی تعداد میں تشویشناک اضافے کی وجہ سے لوگوں میں شدید خوف و ہراس پھیل گیا ہے۔ ٹی آر سی سے ہری سنگھ ہائی اسٹریٹ تک کا حصہ جو ہر اتوار کو ’سنڈے مارکیٹ‘کے سبب گاہکوں سے کھچا کھچ بھرا رہتا تھا، خال خال ہی کوئی راہگیر چلتا ہوا نظر آتا ہے۔ سیکورٹی فورسز بالخصوص جموں وکشمیر پولیس نے شہر میں جگہ جگہ پر ناکے بٹھائے ہیں جہاں ہر آنے والے کو پوچھ گچھ کے بعد ہی آگے جانے دیا جاتا ہے۔ شہر کی اکثر سڑکیں گذشتہ 11 دنوں سے سیل ہی ہیں۔لاک ڈاؤن،کرفیو،سیول کرفیو،کورونا ہلاکتوں اور متاثرین میں مسلسل اضافے کے نتیجے میں گھروں میں مقید لوگوں کی پریشانیوں میں مسلسلس اضافہ ہورہا ہے۔کشمیری عوام مشکل حالات میں کورونا کے خلاف مقابلہ کرکے ایک بڑی جنگ لڑ رہے ہیں۔