خبراردو:
مرکزی وزارت برائے فروغ انسانی وسائل نے اپنے آن لائن رابطہ پورٹل سے کشمیری پنڈتوں کی طرف سے اعتراض کئے جانے کے بعد کشمیری زبان کو ہذف کردیا ہے۔معلوم ہوا ہے کہ مرکزی وزارت نے محکمہ کی طرف سے جاری مختلف زبانوں کے کیے دستیاب آن لائن پورٹل ’بھاشا سنگم‘ سے کشمیری زبان کو کشمیری پنڈتوں کے اعتراض کے بعد ہٹا دیا ہے۔ معلوم ہوا ہے کہ محکمہ نے کشمیری زبان کے چند جملوں بشمول ’’السلام علیکم‘‘ اور ’’تویہ چھو ہز ٹھیک پیٹھ‘‘ شامل ہیں۔ محکمہ کے اعلیٰ ذرائع نے بتایا کہ اس حوالے سے پارلیمنٹ میں موجود ماہر لسانیات سے مدد طلب کی جائے گی اور اس طرح کے جملوں کے صحیح معنی حاصل کئے جائیں گے۔یا درہے مذکورہ سروس مودی حکومت کی طرف سے قائم کی گئی ہے تاکہ ملک بھر میں مختلف زبانوں سے ملکی عوام واقف ہوں ۔ انہوں نے کہا کہ آن لائن پورٹل پر کسی بھی زبان کا ترجمہ شائع کرنے سے قبل این سی ای آر ٹی اور ماہر لسانیات سے تبادلہ خیال کیا جاتا ہے جس کے بعد ہی مواد کو آن لائن دستیاب رکھا جاتا ہے۔

ذرائع سے معلوم ہوا ہے کہ کشمیری پنڈتوں نے کشمیر زبان کے چند جملوں پر اعتراض جتایا ہے جس کے بعد محکمہ نے اپنے پورٹل پر کشمیری زبان کو مکمل طور پر ہذف کردیا۔ کشمیری پنڈتوں نے کشمیری زبان کا لفظ ’السلام علیکم‘ پر اعتراض جتایا ہے جو انگریزی لفاظ ’ہیلو‘ کا ترجمہ ہے۔ انہوں نے بتایا پنڈتوں کا ماننا ہے کہ ’السلام علیکم‘ زیادہ مسلمانیت سے تعلق رکھتا ہے جبکہ ہندو جو کشمیری سماج کا ایک حصہ ہے، اس کو اپنی زبان میں ’نمسکار ‘ سے تعبیر کرتے ہیں۔پنڈتوں کا کہنا ہے کہ ’السلام علیکم‘ کہنے سے زیادہ تر مسلمانیت جھلکتی ہے جبکہ ہندوبرادری ’نمسکار‘ کے ذریعے اپنی برادری کے درمیان استقبال کرتے ہیں۔معلوم ہے کہ پنڈتوں نے آن لائن پورٹل پر دوسرے انگریزی لفظ ’ہاؤ آر یو‘ کے کشمیری ترجمے پر بھی اعتراض جتایا ہے۔ ان کاکہنا ہے کہ محکمہ کے پورٹل پر کشمیری زبان کے ترجمے کے مطابق اس کاترجمہ ’توہیہ چھوہز ٹھیک‘ کیا گیا ہے۔ پنڈتوں کا کہنا ہے اس طرح کا ترجمہ صرف مسلمانیت سے تعلق رکھتا ہے جبکہ ہندو برادری کے درمیان کشمیری لفظ ’ہز‘ کا ترجمہ مہرا‘ کیا جا تاہے۔ادھر سینئرصحافی راہل پنڈتا جو ایسے پہلے شخص ہے جنہوں نے اس معاملے پر اعتراض اُٹھایا ہے ، نے بتایا کہ مرکزی وزارت برائے فروغ انسانی وسائل کو کشمیری زبان کا ترجمہ پورٹل پر جاری کرنے سے قبل کشمیری پنڈتوں کے احساسات کو مدنظر رکھنا چاہیے ۔

راہل کے مطابق انگریزی لفظ ’ہیلو‘ کشمیری زبان میں دو طرح سے بولا جاتا ہے۔ انہوں نے کہا کہ کشمیری مسلمان اس لفظ کو اپنے طریقے سے استعمال کرتے ہیں جبکہ ہندؤں کا اپنا الگ طریقہ ہے۔مرکزی وزارت برائے فروغ انسانی وسائل کے آن لائن پورٹل کو چاہیے تھا کہ دونوں تراجم عوام کے لیے دستیاب رکھتے لیکن انہوں نے صرف ایک ترجمہ پر ہی اکتفا کیا ہے۔لسانیات کے اسکالر ڈاکٹر اُدے ککرو کا کہنا ہے کہ اردو لفظ ’آپ‘ جو کہ ادب و احترام کے لیے استعمال کیا جاتا ہے ، بھی مسلمانوں اور ہندؤں کے درمیان دو الگ الگ ترجموں میں بولا جاتا ہے۔انہوں نے الزام عائد کرتے ہوئے کہا کہ فی الوقت وادی کشمیر میں تہذیبی یلغار پر کام ہورہا ہے جبکہ ایک ہی لفظ کے لیے مختلف تراجم موجود ہیں۔انہوں نے کہا کہ مسلمانوں کے درمیان بول چال کا الگ طریق کار ہے۔ مسلمانوں کی اپنی زبان اردو اور فارسی سے متاثر ہے جبکہ ہندؤں کی اپنی زبان سنسکرت سے متاثر ہے۔ ڈاکٹر ادے ککرو نے بتایا کہ کشمیری زبان اسلام اور صوفی ازم سے قبل سنسکرت زبان سے متاثر تھی لیکن بعد میں اس زبان پر اردو اور فارسی کا غلبہ رہا۔ادھر کشمیر یونیورسٹی میں شعبہ کشمیری زبان کے پروفیسر مجروح رشید نے بتایا کہ ہر ایک زبان فطرتی طور پر مختلف مراحل سے گزرتی رہتی ہے۔انہوں نے کہا کہ جب یہاں ہندو مہاراجاؤں کا راج تھا تو تب یہ زبان سنسکرت سے متاثر تھی اور جب بعد میں یہاں مسلم حکمرانوں کا غلبہ ہوا تو یہ زبان فارسی سے متاثر ہوئی۔انہوں نے بتایا کہ جب یہاں ڈوگرہ حکرانی کا دور دورہ تھا تب کشمیری زبان اردو سے متاثر رہی جبکہ فی الوقت اس زبان پر انگریزی نے بھی اپنی چھاپ ڈالنی شروع کی ہے۔

پروفیسر رشید کاماننا ہے کہ جب کشمیری مسلمان ایک دوسرے کا استقبال کرتے ہیں تو وہ ’ہزُ کا لفظ استعمال کرتے ہیں اور جب کشمیری پنڈت اپنی برادری میں ایک دوسرے کا استقبال کرتے ہیں تو وہ لفاظ ’مہرا‘ استعمال کرتے ہیں ، تاہم دونوں ترجمے ٹھیک ہیں۔اس دوران لبرٹی فورم بانڈی پورہ نے مرکزی حکومت کے اس اقدام کی نکتہ چینی کرتے ہوئے کہا کہ چند شرپسند عناصر کی طرف سے آن لائن پورٹل سے کشمیری زبان کو ہذف کرنا ایک سیاسی حربہ ہے۔فورم نے مرکزی وزارت برائے فروغ انسانی وسائل سے فیصلے پر نظر ثانی کی اپیل کرتے ہوئے کہا کہ اس طرح کی مذموم حرکات اور سیاسی چالبازیوں کی قطعی طور پر اجازت نہیں دی جائے گی۔فورم نے چند منفی کشمیری پنڈتوں کی طرف سے آن لائن پورٹل سے کشمیری زبان کو ہٹانے کی کوششوں پر افسوس کا اظہار کرتے ہوئے ایسے عناصر کو خبردار کرتے ہوئے کشمیری زبان کے ساتھ کسی بھی چھیڑ چھاڑ سے پرہیز کا مشورہ دیا۔ انہوں نے بتایا کہ محکمہ کی ویب سائٹ سے کشمیری زبان کو ہٹانے سے قبل سرکار کو جملہ ماہر لسانیات کے ساتھ باہمی مشورہ اور تبادلہ خیال کرنا چاہیے تھا۔