نئی دہلی، وزیر خارجہ ایس جے شنکر نے کہا ہے کہ عالمی غیر یقینی صورتحال اور سپلائی چینز میں رکاوٹوں کے موجودہ دور میں ہندوستان اور لگژمبرگ کے تعلقات انتہائی اہم ہیں۔

مسٹر جے شنکر نے ہندوستان کے دورے پر آئے لگژمبرگ کے نائب وزیر اعظم اور وزیر خارجہ زیویئر بیٹل کے ساتھ پیر کے روز یہاں بات چیت کی۔ اس دوران دونوں رہنماؤں نے تجارت، سرمایہ کاری، مالیاتی ٹیکنالوجی، اسٹارٹ اپ، کلین ٹیکنالوجی، خلائی شعبہ، صحت، تعلیم اور لوگوں کے باہمی آمد و رفت سمیت دوطرفہ تعاون پر تفصیلی تبادلہ خیال کیا۔ بعد میں وزیر خارجہ نے سوشل میڈیا پر ایک پوسٹ میں کہا کہ عالمی غیر یقینی صورتحال کے دور میں ہند-لگژمبرگ تعلقات انتہائی اہم ہیں۔

انہوں نے کہا ، ” نئی دہلی میں آج لگژمبرگ کے نائب وزیر اعظم اور وزیر خارجہ زیویئر بیٹل کا خیرمقدم کیا۔

ہندوستان اور لگژمبرگ کے درمیان قابل اعتماد شراکت داری عالمی غیر یقینی صورتحال اور رکاوٹوں کے دور میں اہم ہے۔ تجارت، سرمایہ کاری، مالیاتی ٹیکنالوجی، اسٹارٹ اپ، کلین ٹیکنالوجی، خلائی شعبہ، صحت، تعلیم اور آمد و رفت سمیت دوطرفہ تعاون پر تفصیلی تبادلہ خیال کیا۔ اس کے ساتھ ہی عالمی پیش رفت اور کثیر جہتی تعاون پر بھی غور و خوض ہوا۔ ہند-لگژمبرگ شراکت داری اور ہندوستان-یورپی یونین تعلقات کو مضبوط کرنے کے لیے لگژمبرگ کے نائب وزیر اعظم کی حمایت قابل ستائش ہے۔ ” مسٹر بیٹل کا منگل کے روز چنئی جانے کا پروگرام ہے۔

یو این آئی ۔ این یو۔ م الف

نئی دہلی، کانگریس کے سابق صدر اور لوک سبھا میں قائد حزب اختلاف راہل گاندھی نے یہاں ستیہ نکیتن میں عمارت گرنے کے واقعے پر مرکز اور دہلی حکومت پر حادثات کی روک تھام کے لیے ضروری اقدامات نہ کرنے کا الزام لگاتے ہوئے پیر کو کہا کہ حادثہ کے بعد بیان بازی ہوتی ہے اور چھوٹے حکام پر ذمہ داری ڈال کر اصل ذمہ داروں کو جوابدہی سے بچایا جاتا ہے۔

مسٹر گاندھی نے سوشل میڈیا ایکس پر کہا کہ ستیہ نکیتن میں طلباء سے بھری عمارت کا گرنا کوئی تنہا المیہ نہیں ہے۔ گزشتہ چار مہینوں میں سید العجائب میں ایسے ہی المئے میں چھ لوگوں کی موت ہوئی، جبکہ ہوض رانی میں آگ لگنے سے 22 لوگوں کی جان چلی گئی۔ ہر بار زندگیاں، خواب اور ارمان ملبے میں دبتے ہیں، لیکن کارروائی نہیں ہوتی۔ انہوں نے کہا کہ جوابدہی مانگنے والوں کو وزیراعظم نریندر مودی کی طرف سے ‘دماغی نکسل’ اور ‘ناراض پھوپھا’ جیسے توہین آمیز تمغے دیے جاتے ہیں۔ اس کا مقصد سوال پوچھنے والوں کو شرمندہ، بدنام اور خاموش کرانا ہے۔

کانگریس رہنما نے کہا کہ 12 سال سے حکومت دنیا بھر کی باتیں کر کے لوگوں کو ‘گول گول گھما’ رہی ہے، لیکن اصل معاملے پر بات نہیں کرتی۔ انہوں نے سوال کیا، ”دہلی میں ‘ٹریپل انجن’ حکومت ہے، تو اب کس بات سے لاچار ہے؟“ مسٹر گاندھی نے خود ہی سوال کا جواب دیا اور کہا، ”لاچاری ہے نیت کی، کیونکہ جہاں نیت نہیں ہوتی، وہاں جوابدہی بھی نہیں ہوتی۔“

یواین آئی ایف اے

نئی دہلی، وزیراعظم نریندر مودی منگل کو گجرات اور مہاراشٹر کے دورے پر جائیں گے اور وڈودرا میں 35 ہزار کروڑ روپے سے زائد کے منصوبوں کا سنگ بنیاد، افتتاح اور قوم کے نام وقف کریں گے۔

وزیراعظم دفتر نے پیر کو بتایا کہ نریندر مودی اس موقع پر عوامی ریلیوں سے بھی خطاب کریں گے۔ وڈودرا میں وزیراعظم مغربی ڈیڈیکیٹڈ فریٹ کوریڈور کے 326 کلومیٹر طویل تین حصوں کو قوم کے نام وقف کریں گے، جن پر 20,700 کروڑ روپے سے زائد خرچ ہوئے ہیں۔ ان میں سانند (شمال)-مکر پورہ، نیو عمر گاؤں-نیو سفالے اور نیو سفالے- جے این پی ٹی (جواہر لعل نہرو پورٹ ٹرسٹ) حصے شامل ہیں۔ جے این پی ٹی سے براہ راست ریل کنیکٹیویٹی سے در آمدات و برآمدات کے سامان کی نقل و حمل تیز ہوگی، صنعتی مراکز اور بندرگاہوں کے درمیان رابطہ مضبوط ہوگا، لاجسٹکس لاگت میں کمی آئے گی اور ممبئی کے ریل نیٹ ورک پر دباؤ کم ہوگا۔ ان حصوں کے شروع ہونے کے ساتھ ہی ڈیڈیکیٹڈ فریٹ کوریڈور نیٹ ورک اپنی پوری لمبائی میں چالو ہو جائے گا۔

وزیراعظم نیو سانند (شمال)، نیو مکر پورہ، نیو عمر گاؤں اور نیو جے این پی ٹی، ممبئی سے مال گاڑی کی خدمات کو ہری جھنڈی دکھائیں گے۔ وڈودرا اور ٹانڈا روڈ کے درمیان نئی ٹرین سروس بھی شروع کی جائے گی، جس سے وڈودرا، چھوٹا ادے پور اور علی راج پور اضلاع کے لوگوں کو فائدہ ہوگا۔ چھوٹا ادے پور-دھار منصوبے کے تحت بنی جوبٹ-ٹانڈا روڈ نئی ریل لائن بھی قوم کے نام وقف کی جائے گی، جو علی راج پور کے دور دراز اور آدیواسی علاقوں کو قومی ریل نیٹ ورک سے جوڑے گی۔ وزیراعظم 329 کلومیٹر طویل تین ریلوے منصوبوں کا سنگ بنیاد رکھیں گے، جن کی لاگت 9,700 کروڑ روپے سے زائد ہے۔ ان میں وڈودرا-رتلام تیسری اور چوتھی لائن، میاگام کرجن-چورانڈا-ملسر گیج تبدیلی اور وشوامتری-دبھوئی ریل لائن کوڈبل کرنے کا منصوبہ شامل ہے۔ ان سے مسافر اور مال برداری کی صلاحیت بڑھے گی، ریل کا ہجوم کم ہوگا نیز گجرات اور مدھیہ پردیش کے درمیان رابطہ مضبوط ہوگا۔

تقریباً 1,780 کروڑ روپے کے تین قومی شاہراہوں کے منصوبوں کا بھی سنگ بنیاد رکھا جائے گا۔ ان میں این ایچ-48 کے کامریج-چلتھان حصے کو چھ لین کرنا، وڈودرا-سورت حصے میں تاپی اور نربدا پر بڑے پلوں سمیت اضافی ڈھانچے بنانا نیز این ایچ-53 پر ابھوا، مندھولا اور کھجود جنکشن پر گریڈ سیپریٹڈ ڈھانچے شامل ہیں۔ وڈودرا-سورت این ایچ-48 پر کنداری چوکڑی اور لوارا پٹیا میں چھ لین فلائی اور کا افتتاح بھی ہوگا۔

گجرات حکومت کے تقریباً 2,600 کروڑ روپے کے منصوبوں کا سنگ بنیاد اور افتتاح کیا جائے گا۔ ان میں وڈودرا شہری ترقیاتی اتھارٹی رنگ روڈ فیز-II، کڈانا باندھ پر 110 میگاواٹ کا فلوٹنگ سولر پروجیکٹ اور وڈودرا میونسپل کارپوریشن کا نیا دفتر شامل ہیں۔ پی ایم آواس یوجنا کے تحت رہائشی منصوبوں اور مشرقی وڈودرا کے 11 دیہاتوں کے لیے واٹر سپلائی پروجیکٹ سمیت دیگر منصوبوں کا افتتاح بھی کیا جائے گا۔ ممبئی میں وزیراعظم گلوبل فن ٹیک فیسٹ 2026 کے ساتویں ایڈیشن کا افتتاح کریں گے۔ سال 2020 سے یہ کانفرنس پالیسی سازوں، ریگولیٹرز، مرکزی بینکوں، مالیاتی اداروں، فن ٹیک کمپنیوں، تکنیکی کمپنیوں، سرمایہ کاروں اور ماہرین تعلیم سمیت عالمی متعلقین کو مالیات کے مستقبل پر بحث کے لیے ایک پلیٹ فارم فراہم کررہی ہے۔

کانفرنس میں ایجنٹک اے آئی، پروگرام ایبل فائنانس، کوانٹم ٹیکنالوجی اور دیگر ابھرتی ہوئی ٹیکنالوجیز کے ذریعے شہریوں، کاروباروں اور عالمی معیشتوں کے لیے قابل اعتماد اور جامع نتائج تیار کرنے پر بات چیت ہوگی۔

یواین آئی ایف اے