فیصلہ اقوام عالم کو گمراہ کر نے کا اقدام،عوام اورعدالت ِعظمیٰ کو مطمئن کرنے کی کوشش:صارفین

شوکت ساحل

سرینگر:جموں وکشمیر کے سبھی22اضلاع میں موبائیل انٹر نیٹ خدمات کی 2۔جی رفتار کیساتھ مشروط بحالی اور محدود رسائی کے حکومتی فیصلے پرصارفین نے شدید برہمی کا اظہار کرتے ہوئے اِس اقدام کو درد سر اور مذاق سے تعبیر کیا۔

طلبہ،تاجروں اور صحافیوں نے حکومتی فیصلے اور حکمنانے پر تبصرہ کرتے ہوئے کہا کہ یہ اقوام عالم کو گمراہ کرنے کا اقدام اور عوام وسپریم کورٹ آف انڈیا کو مطمئن کرنے کی کوشش ہے۔
کشمیر نیوز سروس (کے این ایس) کے مطابق سنیچر کی سہ پہر سے جموں وکشمیر کے سبھی22اضلاع میں موبائیل انٹر نیٹ خدمات 2۔جی رفتار اور مشروط بنیادوں پر بحال کی گئی،تاہم صارفین محدود طور ہی انٹر نیٹ کا استعمال کرسکتے ہیں۔

سوشل میڈیا تک رسائی پر مکمل پابندی عائد ہے جبکہ حکومت کی جانب سے سفید فہرست میں شامل کی گئیں 301ویب سائٹس تک صارفین کی رسائی ہوگی۔اس حوالے سے جموں وکشمیر کے محکمہ داخلہ نے جمعہ کی شب 10صفحات پر مشتمل ایک حکمنامہ بھی جاری کیا۔یہ فیصلہ قریب قریب چھ ماہ تک جاری رہنے والے’انٹر نیٹ کرفیو‘ کے بعدلیا گیا۔

اتوار کو 26جنوری کے پیش نظر سہ پہر تک پوری وادی میں دوبارہ مکمل طور پر مواصلاتی بریک ڈاؤن کیا گیا۔حکومتی فیصلے پر عوامی ردِ عمل:

حکومتی فیصلے،دعوے اور حکمنامے پر سماج کے مختلف طبقہ ہائی فکر سے تعلق رکھنے والے افراد نے اپنے خیالا ت کا اظہار کرتے ہوئے کہا کہ آج کے تیز رفتار دور میں کشمیر، حکومتی اقدام کی وجہ سے پتھر کے زمانے میں واپس لوٹ چکا ہے۔ایک نجی کمپنی کے منیجنگ ڈائریکٹر محبوب جیلانی کہتے ہیں:’مجھے حکومتی فیصلے پر حیرانی ہے،حکومت ہند ڈیجٹل انڈیا کے منصوبہ کو عملانے کا بڑا دعویٰ کررہی ہے،لیکن دوسری طرف کشمیر گذشتہ چھ ماہ سے انٹر نیٹ کی سہولیت سے محروم ہے‘۔

بی ایس سی سیکنڈ ائر کی طالبہ،رابعیہ نور کہتی ہیں:’2۔جی رفتار کیساتھ آپ ای۔میل بھی نہیں دیکھ سکتے ہیں،مطالعہ کر نا دور کی بات ہے،اُس پر ستم ظریفی یہ کہ وائٹ لسٹ ویب سائٹس تک ہی رسائی ہے،یہ اقدام درد سر اور مذاق کے سوا کچھ نہیں ہے‘۔

ایک راہ گیر نور محمد کہتے ہیں:’انٹر نیٹ کی مشروط اور محدود بحالی کا فیصلہ اقوام عالم کو گمراہ کرنے کا اقدام ہے‘۔
ای۔کامرس اور آئی ٹی سیکٹر:ایک نوجوان انٹر پرینور نے اپنا نام ظاہر نہ کرنے کی شرط پر بتایا:’میں نے سال2018میں اپنا اسٹارٹپ،ای ڈی آئی کی وساطت سے شروع کیا،لیکن میرے خواب چکنا چور ہوئے،میں جموں وکشمیر سے باہر ایک ملٹی نیشنل کمپنی میں 65ہزار ماہانہ تنخواہ پر ملازمت کرتا تھا،لیکن سوچا تھا کشمیر واپس آکر خود روزگار منصو بے کے تحت اپنے لئے اور دوسروں کیلئے روزگار کے وسائل پیدا کروں گا،اب افسوس ہی ہورہا ہے،میں لوٹ کر کیوں واپس آیا،سب کچھ تباہ ہوگیا‘۔ایک محتاط اندازے کے مطابق کشمیر میں ای۔ کامرس اور آئی ٹی سیکٹر سے 50سے زیادہ افراد بلواسطہ یا بلا واسطہ وابستہ ہیں،سب بے روزگار ہوگئے ہیں،کیونکہ یہ دونوں سیکٹر زمین بوس ہوگئے جبکہ کئی افراد نے ذریعہ آمدنی کیلئے متبادل ڈھونڈ نے کی تلاش بھی شروع کردی۔

سمارٹ فون تجارت بھی متاثر:برطانوی نشریاتی ادارے بی بی سی اردو ڈاٹ کام کی ایک رپورٹ کے مطابق کشمیر میں تقریباً 6 مہینے سے انٹرنیٹ پر پابندی نے تقریباً 500 کروڑ روپے کی سمارٹ فون کی تجارتی صنعت کو خاتمے کے دہانے پر پہنچا دیا ہے۔رپورٹ کے مطابق ایسا سمجھیں کہ جیسے کشمیر میں مہنگے سمارٹ فونز اب سمارٹ نہیں رہے۔رپورٹ میں سرینگر کے لال چوک میں سمارٹ فون سٹور کے مالک مْنیر احمد قریشی حوالہ دیتے ہوئے بتایا گیا کہ ’کشمیر میں ہر ماہ 40ہزار فونز فروخت ہوتے تھے، لیکن اب مشکل سے 2ہزار فون بکتے ہیں، اس تجارت سے جْڑے لوگوں میں شدید مایوسی پائی جاتی ہے۔‘موبائل سٹور میں کام کرنے والے وسیم احمد کہتے ہیں ’میرے کئی ساتھیوں کو نوکری سے نکالا گیا، اور جس ڈسٹری بیوٹر کے پاس میں ہوں وہاں بھی ہماری نوکری ختم کرنے کی بات ہورہی ہے۔ کئی سال سے میں یہ کام کررہا تھا، اب سمجھ نہیں آتا کہ میں کیا کروں۔‘

تجارت پر منفی اثرات:انٹرنیٹ پر تاریخ کی طویل ترین پابندی کے اثرات کا یہ محض ایک پہلو ہے، چھ مہینے سے جاری غیر یقینی کی صورتحال کے باعث کشمیر کی مجموعی معیشت کو بھاری نقصان پہنچا ہے۔کشمیر چیمبر آف کامرس کے ایک تازہ سروے کے مطابق کشمیر کی زرعی اور غیرزرعی تجارت کو کل ملاکر 18ہزار کروڑ روپے کا نقصان پہنچا ہے، جس کے نتیجے میں پانچ لاکھ لوگ بے روزگار ہوگئے ہیں۔

میڈیا سہولیاتی مرکز کا وجود برقرار:گذشتہ چھ ماہ سے وادی کشمیر میں صحافت محکمہ اطلاعات وعوامی رابطہ عامہ کی سرکاری عمارت کے ایک چھوٹے سے کمرے تک محدود ہے۔

کشمیر میں میڈیا ادارے بھی انٹر نیٹ سروس سے مسلسل محروم ہیں۔ میڈیا اداروں میں انٹر نیٹ کی بحالی کو’حلف نامہ‘سے مشروط کردیا گیا ہے۔ نوجوان صحافی الطاف وانی کہتے ہیں:’حکومتی فیصلہ زخموں پر نمک پاشی کے مترادف ہے،چھ ماہ کے بعد انٹر نیٹ کی مشروط اور محدود بحالی تذلیل ہے،5۔جی اور ڈیجٹل ایج میں 2۔جی کی رفتار بے معنیٰ ہے،اس فیصلے کا سپریم کورٹ آف انڈیا کو نوٹس لینا چاہئے، کیوں کہ اقدام سپریم کوٹ کو مطمئن کرنے کی کوشش بھی ہے،میں سمجھتا ہوں کہ صحافی پرندے کی مانند ہوتا ہے،لیکن انٹر نیٹ سے محروم کرکے ہمارے’پَر‘ ہی کاٹ دیئے گئے‘۔

روزنامہ ایشین میل کے مدیر اور سینئر صحافی رشید راہل کہتے ہیں ’سرکار کا یہ فیصلہ بہت ہی غلط ہے،یہ کیسے ممکن ہے کہ یہاں کے میڈیاادارے تحریر طور ضمانت دیں کہ کوئی اُنکے انٹر نیٹ کنیکشن کو ہیک نہیں کرسکتا ہے،انٹر نیٹ کی مشروط بحالی نہیں ہونی چاہئے بلکہ میڈیا اداروں میں انٹر نیٹ خدمات بحال ہونے چاہئے،چھ ماہ ہو رہے ہیں،صحافی مشکلات اور مسائل سے دوچار ہیں،2۔جی رفتار کا آج کے دور میں کوئی خریدار ہی نہیں ہے‘۔

محکمہ داخلہ کا حکمنامہ:موبائیل انٹر نیٹ کی رفتار2۔جی تک محدود کردی گئی،سوشل میڈیا تک کوئی رسائی نہیں ہوگی،صرف سفید فہرست والی 301ویب سائٹس کا ہی صارفین استعمال کر سکتے ہیں۔

سکیورٹی ایجنسیوں کوخدشہ:سیکیورٹی ایجنسیوں نے انٹر نیٹ کی بحالی پر خد شات اور تحفظات کا اظہار کرتے ہوئے کہا ہے کہ امن مخالف عناصر وادی میں انٹر نیٹ کا استعمال غلط کاموں خاص طور ملی۔ٹینسی سے متعلق پروگنڈا مواد کو پھیلانے کیلئے کرسکتے ہیں۔

سپریم کورٹ کا فیصلہ:۔ حالیہ سماعت کے دوران جسٹس این وی رامانا، آر سبھاش ریڈی اور بی آر گوائی پر مشتمل عدالتی بینچ نے جموں و کشمیر کی انتظامیہ کو خطے میں انٹرنیٹ سروس پر عائد پابندیوں پر نظرثانی کا حکم دیاتھا۔جسٹس این وی رمنا کی سربراہی میں 3ججوں پر مشتمل سپریم کورٹ کے بینچ نے اپنے ریمارکس میں کہا تھا کہ ’انٹرنیٹ کی عارضی معطلی اور شہریوں کی بنیادی آزادیوں کو کم کرنا صوابدیدی نہیں ہونا چاہیے اور یہ معاملہ عدالتی جائزے کے لیے کھلا ہے۔‘

عدالت نے جموں و کشمیر کی انتظامیہ کو انٹرنیٹ کی بندش کے معاملے کا جائزہ لینے کی ہدایت کرتے ہوئے کہا کہ ’انٹرنیٹ کے استعمال کی آزادی آرٹیکل 19 (1) (اے) کے تحت آزادانہ تقریر کا ایک بنیادی حق ہے اور انٹرنیٹ کے ذریعے تجارت کو آرٹیکل 19 (1) (جی) کے تحت محفوظ کیا گیا ہے۔

سپریم کورٹ نے ریمارکس دیے کہ ’کسی خاص مدت کے بغیر اور غیر معینہ مدت‘ تک انٹرنیٹ کی معطلی ٹیلی کام قوانین کی خلاف ورزی ہے۔عدالتی بینچ نے ریمارکس دیے کہ ’ہماری محدود تشویش لوگوں کی آزادی اور سیکیورٹی سے متعلق توازن تلاش کرنا ہے، ہم شہریوں کو حقوق کی فراہمی یقینی بنانے کیلئے یہاں موجود ہیں، ہم ان احکامات کے پیچھے موجود سیاسی خواہشات تلاش نہیں کریں گے‘۔

مرکزی حکومت نے 5 اگست 2019 کو آئین کے آرٹیکل 370 کے خاتمے کا اعلان کیا تھا، جس کے تحت کشمیر کی محدودخصوصی حیثیت ختم کر دی گئی تھی۔ دوسری جانب خطے میں سخت کرفیو نافذ کرکے انٹرنیٹ اور ذرائع مواصلات کو بند کردیا گیا تھا۔(کے این ایس)