بیلگوروڈ، روسی شہر بیلگوروڈ میں 25 اکتوبر کو یوکرین کے ڈرون حملوں میں زخمی ہونے والے شہریوں کی تعداد بڑھ کر 18 ہوگئی ہے۔ گورنر الیگزینڈر شووایف نے پیر کو بتایا کہ پانچ مزید افراد نے اسپتالوں میں علاج کے لیے رجوع کیا۔

اتوار کو یوکرینی مسلح افواج نے بیلگوروڈ پر بڑے پیمانے پر ڈرون حملہ کیا تھا، جس میں دو شہری ہلاک اور ایک طبی امدادی کارکن سمیت 13 افراد زخمی ہوگئے تھے۔ روسی تحقیقاتی کمیٹی نے اس واقعے کے سلسلے میں دہشت گردی کے شبہے میں مجرمانہ تحقیقات شروع کی ہیں۔

شووایف نے سوشل میڈیا پلیٹ فارم میکس پر کہا، ”تازہ ترین اعداد و شمار کے مطابق، رات کے وقت بیلگوروڈ پر ہونے والے حملے میں دو افراد ہلاک اور 18 زخمی ہوئے۔”

گورنر کے مطابق، گزشتہ 24 گھنٹوں کے دوران پانچ افراد نے اسپتالوں میں علاج کرایا، جن میں 16 سالہ لڑکی بھی شامل ہے۔ ان سبھی کو دھماکے سے ہونے والی چوٹوں کی تشخیص کے بعد علاج کرکے اسپتال سے رخصت کردیا گیا۔

شووایف نے بتایا کہ علاقے کے دیگر مقامات پر یوکرینی حملوں میں بھی 14 شہری زخمی ہوئے ہیں۔

انہوں نے کہا کہ بیلگوروڈسکی، گرے وورونسکی اور شیبیکنسکی اضلاع میں مجموعی طور پر 14 افراد زخمی ہوئے، جن میں سے 10 اب بھی اسپتال میں زیر علاج ہیں۔

گورنر کے مطابق، زخمیوں کو طبی امداد فراہم کی جا رہی ہے۔

یو این آئی۔ ع ا۔

نئی دہلی، وزیر اعظم نریندر مودی نے پیر کے روز برازیل کے صدر اور بائیں بازو کے رہنما لوئیز اناسیو لولا دا سلوا کو دوبارہ صدر منتخب ہونے پر مبارک باد دی۔

مسٹر مودی نے ہندوستان اور برازیل کے درمیان اسٹریٹجک شراکت داری کو مضبوط بنانے، مختلف شعبوں میں تعاون بڑھانے اور گلوبل ساؤتھ کی مشترکہ ترجیحات کو آگے بڑھانے کی خواہش ظاہر کی۔

وزیر اعظم نے سوشل میڈیا پلیٹ فارم ‘ایکس’ پر جاری ایک پیغام میں مسٹر لولا کو اپنا ‘عزیز دوست’ قرار دیتے ہوئے ان کی شاندار انتخابی کامیابی پر ‘دلی مبارک باد’ پیش کی۔

مسٹر مودی نے ہندوستان اور برازیل کے تعلقات کو مزید مستحکم بنانے کے عزم کا اظہار کرتے ہوئے کہا، ”میں کثیرجہتی ہندوستان-برازیل اسٹریٹجک شراکت داری کو مزید گہرا اور وسیع بنانے کے لیے ان کے ساتھ مل کر کام کرنے کا منتظر ہوں۔ ہم مل کر مختلف شعبوں میں اپنے تعاون کو مضبوط بنانے کا سلسلہ جاری رکھیں گے، عالمی جنوب کی مشترکہ ترجیحات کو آگے بڑھائیں گے اور ایک زیادہ جامع دنیا کی تعمیر کے لیے کام کریں گے۔”

ہندوستان اور برازیل کے درمیان تجارت و سرمایہ کاری، توانائی، زراعت، دفاع، سائنس و ٹیکنالوجی، ڈیجیٹل تعاون، صحت کی دیکھ بھال اور موسمیاتی تبدیلی جیسے مختلف شعبوں میں وسیع اسٹریٹجک شراکت داری قائم ہے۔ ‘عالمی جنوب’ میں اہم اثر و رسوخ رکھنے والی دو بڑی ترقی پذیر معیشتوں کی حیثیت سے دونوں ممالک نے ہمیشہ بین الاقوامی فورموں پر ترقی پذیر ممالک کی آواز کو مضبوطی سے اٹھانے اور عالمی اقتصادی و سیاسی چیلنجوں سے نمٹنے کے لیے بہتر تال میل کی حمایت کی ہے۔

انہوں نے کہا کہ برکس، جی-20 اور اقوام متحدہ میں دونوں ممالک کی رکنیت عالمی حکمرانی، پائیدار ترقی، کثیرجہتی اداروں میں اصلاحات اور ابھرتی ہوئی معیشتوں کے مفادات کے تحفظ کے لیے ایک اہم پلیٹ فارم فراہم کرتی ہے۔ دونوں ممالک نے ہمیشہ ‘جنوب-جنوب تعاون’ کو مضبوط بنانے اور زیادہ نمائندہ عالمی نظام کو فروغ دینے کی کوشش کی ہے۔

مسٹر مودی کے پیغام میں مسٹر لولا کی قیادت میں برازیل کے ساتھ ہندوستان کے دیرینہ تعلقات کو مزید مضبوط بنانے کے ہندوستان کے ارادے پر زور دیا گیا۔ امید ہے کہ دونوں ممالک کے درمیان بڑھتا ہوا تعاون اقتصادی اور تجارتی تعلقات کو وسعت دینے، بین الاقوامی مسائل پر اپنے مؤقف میں تال میل پیدا کرنے اور ترقی و عالمی حکمرانی سے متعلق مشترکہ ترجیحات کو آگے بڑھانے کی کوششوں میں اہم کردار ادا کرتا رہے گا۔

یواین آئی ۔ ایف اے

جموں، جموں توی ریلوے اسٹیشن کے باہر واقع شیو مارکیٹ میں اتوار کی دیر رات لگی بھیانک آگ میں تقریباً 35 دکانیں جل کر خاکستر ہوگئیں۔

افسران نے بتایا کہ اتوار کی دیر رات بازار میں آگ لگ گئی، جس نے دیکھتے ہی دیکھتے کچھ ہی وقت میں تقریباً 30 سے 35 دکانوں کو اپنی لپیٹ میں لے لیا۔ آگ لگنے کی وجہ شارٹ سرکٹ ہونے کا خدشہ ظاہر کیا جا رہا ہے۔

افسران کے مطابق، ہوشیار دکانداروں نے آگ لگنے کی اطلاع دی اور فوراً فائر بریگیڈ اور ہنگامی خدمات کے محکمے کو فون کیا۔ اس کے بعد 12 سے زیادہ فائر بریگیڈ گاڑیوں اور بڑی تعداد میں فائر فائٹرز کو جائے حادثہ پر بھیجا گیا۔

افسران نے کہا، ”آگ بہت بھیانک تھی اور اس پر قابو پانا انتہائی مشکل تھا۔” انہوں نے بتایا کہ فائر فائٹرز نے کئی گھنٹوں تک آگ بجھانے کی کوشش کی اور صبح تک اس پر قابو پا لیا۔ اس بازار میں بنیادی طور پر کپڑوں، خشک میووں اور دست کاری کی دکانیں ہیں۔ اس کے علاوہ یہاں مقامی ڈھابے اور کھانے پینے کی دکانیں بھی ہیں۔ متاثرہ دکانداروں کا اندازہ ہے کہ آگ میں کروڑوں روپے کا سامان جل کر خاکستر ہوگیا ہے۔

آگ لگنے کی صحیح وجہ کی جانچ کے لیے فارنسک سائنس لیبارٹری (ایف ایس ایل) کی ٹیمیں جائے حادثہ پر پہنچ گئی ہیں۔ افسران نے بتایا کہ حادثے میں کسی کے زخمی ہونے یا جان گنوانے کی اطلاع نہیں ہے۔ آگ پوری طرح بجھانے کو ترجیح دیے جانے کے باعث فی الحال مالی نقصان کا اندازہ لگایا جا رہا ہے۔

بھارتیہ جنتا پارٹی (بی جے پی) کے رکن اسمبلی وکرم رندھاوا نے اتوار کی دیر رات جائے حادثہ کا دورہ کیا۔ انہوں نے کہا کہ شیو مارکیٹ ریلوے اسٹیشن کے قریب ایک اہم تجارتی مرکز ہے۔

مسٹر رندھاوا نے کہا، ”جب تک فائر بریگیڈ کی گاڑیاں جائے حادثہ پر پہنچیں، تب تک پورا بازار آگ کی لپیٹ میں آ چکا تھا۔” انہوں نے اندازہ ظاہر کیا کہ تقریباً 35 سے 40 دکانیں پوری طرح جل گئی ہیں۔ انہوں نے دکانداروں کو یقین دلایا کہ آگ پوری طرح بجھنے کے بعد نقصان کا مناسب اندازہ لگایا جائے گا۔ انہوں نے کہا، ”ہم بعد میں انتظامیہ کے ساتھ معاوضے کے معاملے پر بات کریں گے۔ نقصان یقیناً بہت زیادہ ہوا ہے۔”

جموں کے ڈپٹی کمشنر منگا شیرپا، پولیس سپرنٹنڈنٹ (جنوبی) ورون جندیال اور شہری و پولیس انتظامیہ کے کئی دیگر سینئر افسران بھی جائے حادثہ پر پہنچے اور راحت رسانی اور آگ بجھانے کے کاموں کی نگرانی کی۔

یو این آئی۔ ایم جے