سری نگر، جموں و کشمیر میں سکیورٹی فورسز نے مختلف مشترکہ کارروائیوں کے دوران 8 مبینہ دہشت گرد ساتھیوں کو گرفتار کرکے کشمیر میں امن و سلامتی کو متاثر کرنے کی کوششوں کو ناکام بنانے کا دعویٰ کیا ہے۔ پلوامہ، شوپیان اور سوپور میں کی گئی کارروائیوں کے دوران اسلحہ، گولہ بارود اور دیگر قابل اعتراض مواد بھی برآمد کیا گیا۔

جنوبی کشمیر کے پلوامہ اور شوپیان اضلاع میں الگ الگ مشترکہ کارروائیوں کے دوران مجموعی طور پر 8 مبینہ دہشت گرد ساتھی گرفتار کیے گئے۔ پلوامہ میں دو افراد کو گرفتار کرکے ایک پستول، 12 کارتوس اور ایک دستی بم برآمد کیا گیا، جبکہ شوپیان میں پولیس، فوج اور سی آر پی ایف کی مشترکہ کارروائیوں میں 6 افراد کو گرفتار کرکے دستی بم، اے کے-47 میگزین، گولہ بارود اور دیگر مواد برآمد کیا گیا۔

پولیس کے مطابق پلوامہ میں راجپورہ کے یروان جنگلات میں دہشت گردانہ سرگرمیوں سے متعلق خفیہ اطلاع ملنے پر پولیس، فوج کی 44 راشٹریہ رائفلز اور سی آر پی ایف کی 183 بٹالین نے مشترکہ کارروائی شروع کی۔ سی بی ناتھ کے قریب یروان جنگلات میں تلاشی کے دوران دو مشتبہ افراد کو گاؤں کی جانب آتے ہوئے دیکھا گیا، جنہیں فورسز نے فوری طور پر گرفتار کرلیا۔

گرفتار افراد کی شناخت پلوامہ کے لسی ڈبن کے رہنے والے لطیف احمد اور بون کھا بامنو کے رہنے والے اعجاز احمد کے طور پر ہوئی ہے۔ تلاشی میں ان کے قبضے سے ایک پستول، 12 کارتوس اور ایک دستی بم برآمد ہوا۔ راجپورہ تھانے میں اسلحہ ایکٹ کی دفعہ 7/25 اور غیر قانونی سرگرمیاں (روک تھام) ایکٹ کی دفعات 13، 18، 23 اور 39 کے تحت مقدمہ درج کیا گیا ہے۔

شوپیان میں ایک ناکہ چیکنگ کے دوران ہیئرپورہ علاقے میں موٹر سائیکل پر سوار تین افراد کو روکا گیا۔ ان کی شناخت کلگام کے رہنے والے جنید مظفر ڈار، عامر یوسف اور جنید بشیر ڈار کے طور پر ہوئی ہے۔ ان کے قبضے سے دو دستی بم اور قابل اعتراض پوسٹر برآمد کیے گئے۔

ایک اور کارروائی میں شوپیان کے امام صاحب علاقے میں پولیس، 34 راشٹریہ رائفلز اور سی آر پی ایف کی 178 بٹالین کی مشترکہ گشت ٹیم نے مزید تین افراد کو گرفتار کیا۔ ان کی شناخت اننت ناگ کے حارث منظور، عاشق حسین اور عارف احمد کمار کے طور پر ہوئی ہے۔ ان کے قبضے سے ایک دستی بم، دو اے کے-47 میگزین، 20 کارتوس اور قابل اعتراض پوسٹر برآمد ہوئے۔

پولیس کے مطابق دونوں معاملات میں متعلقہ دفعات کے تحت مقدمات درج کرکے مزید تحقیقات جاری ہیں، جن کا مقصد گرفتار افراد کی سرگرمیوں اور ان کے مبینہ دہشت گرد روابط کا پتہ لگانا ہے۔

ایک الگ کارروائی میں سوپور کے منجسیر علاقے میں فوج، سی آر پی ایف اور جموں و کشمیر پولیس نے خفیہ اطلاع کی بنیاد پر مشترکہ تلاشی مہم چلائی۔ فوج کی چنار کور کے مطابق کارروائی کے دوران ایک اے کے سیریز رائفل، تین میگزین، چار دستی بم، بڑی مقدار میں گولہ بارود اور دیگر جنگی سازو سامان برآمد کیا گیا۔ تلاشی مہم جاری تھی۔

یو این آئی۔ م س

جموں، جموں و کشمیر کے سانبہ ضلع کے وجے پور علاقے میں منگل کو فلائی اوور کی تعمیر کے دوران ایک گرڈر گرنے سے ایک شخص ہلاک اور تین دیگر زخمی ہوگئے۔

حکام کے مطابق سانبہ کے جکھ علاقے میں زیر تعمیر فلائی اوور کے ایک حصے کو اٹھانے کے دوران گرڈر اچانک گرگیا، جس کی زد میں آکر چار افراد متاثر ہوئے۔ حادثے میں ایک شخص کی موت ہوگئی جبکہ تین زخمیوں کو علاج کے لیے قریبی اسپتال منتقل کیا گیا۔

پولیس نے مقدمہ درج کرکے حادثے کی تحقیقات شروع کردی ہے۔

یو این آئی۔ م س

سری نگر، کرائم برانچ کشمیر کی اقتصادی جرائم ونگ (ای او ڈبلیو) نے ایک شخص کے خلاف چارج شیٹ دائر کی ہے، جس پر کینسر میں مبتلا بیوی کے علاج کے لیے سستی ادویات فراہم کرنے کا جھانسہ دے کر اپنے سابق اسکول ساتھی سے لاکھوں روپے کی دھوکہ دہی کا الزام ہے۔ حکام کے مطابق نیو کالونی، حضرت بل، اننت ناگ کے رہنے والے اور اس وقت جموں کے سنجوان میں مقیم افاق احمد ٹھگ کے خلاف بھارتیہ نیائے سنہتا (بی این ایس) کی دفعہ 318(4) کے تحت درج ایف آئی آر نمبر 25/2026 کے سلسلے میں سری نگر کی سب جج عدالت میں چارج شیٹ پیش کی گئی ہے۔ ای او ڈبلیو کے مطابق تحریری شکایت میں الزام لگایا گیا تھا کہ ملزم نے شکایت کنندہ کو یقین دلایا کہ وہ اس کی کینسر میں مبتلا بیوی کے علاج کے لیے درکار ادویات کم قیمت پر فراہم کرے گا، جس کے بعد اس نے مختلف مواقع پر لاکھوں روپے وصول کیے، لیکن ادویات فراہم نہیں کیں۔ تحقیقات کے دوران الزامات درست پائے گئے۔ تفتیش میں یہ بھی سامنے آیا کہ ملزم اور شکایت کنندہ چار دہائی سے زیادہ عرصہ قبل ایک بورڈنگ اسکول میں ایک ساتھ پڑھتے تھے۔ تحقیقات مکمل ہونے کے بعد اقتصادی جرائم ونگ نے قانونی کارروائی کے لیے چارج شیٹ عدالت میں پیش کردی۔

یو این آئی۔ م س