سری نگر، کشمیر کے مذہبی رہنما اور حریت چیئرمین میرواعظ عمر فاروق نے جمعہ کو دعویٰ کیا کہ تاریخی جامع مسجد سری نگر کے منبر پر پابندیاں عائد کرنا اور اسے خاموش کرانے کی کوششیں موجودہ ریاستی پالیسی کا حصہ معلوم ہوتی ہیں۔

انہوں نے کہا کہ تاریخی منبر ہمیشہ عوام کے حقوق، فرائض، پُرامن بقائے باہمی اور تصادم کی بجائے مذاکرات کی حمایت کرتا رہا ہے۔

تقریباً دو ہفتوں کے بعد جامع مسجد سری نگر میں جمعہ کے اجتماع سے خطاب کرتے ہوئے میرواعظ نے کہا کہ انہیں تاریخی مسجد میں جمعہ کا خطبہ دینے سے روکا گیا تھا اور نقشبند صاحب کی زیارت گاہ پر بھی اجتماع سے خطاب کرنے کا موقع نہیں دیا گیا۔

انہوں نے کہا کہ عوام کے درمیان واپس آکر ان سے خطاب کرنے کا موقع ملنا وہ اللہ کی طرف سے ایک نعمت سمجھتے ہیں۔

میرواعظ نے کہا، ”بدقسمتی سے منبر پر پابندیاں عائد کرنا اور اسے خاموش کرانے کی کوششیں اس وقت ریاستی پالیسی کا حصہ معلوم ہوتی ہیں۔” انہوں نے کہا کہ یہ صبر کا مظاہرہ کرنے اور ہر ممکن طریقے سے نیک کام جاری رکھنے کا وقت ہے۔

پابندیاں عائد کرنے والوں سے مخاطب ہوتے ہوئے میرواعظ نے کہا کہ شاید وہ کشمیری معاشرے میں جامع مسجد کے منبر کے تاریخی کردار سے واقف نہیں ہیں۔

انہوں نے کہا کہ نسلوں سے اس منبر نے لوگوں کی تعلیم و تربیت اور مذہبی و اخلاقی بنیادوں پر معاشرے کی تشکیل میں اہم کردار ادا کیا ہے۔ اس کے ساتھ ہی اس نے لوگوں کو ان کے حقوق اور فرائض کے بارے میں بھی بیدار کیا ہے۔

انہوں نے کہا، ”جب بھی ضرورت پیش آئی، یہ منبر لوگوں کی مؤثر آواز بنا، ان کے خدشات کو اجاگر کیا اور ان کی خواہشات کی وکالت کی۔”

میرواعظ نے کہا کہ اس منبر نے مختلف برادریوں کے درمیان پُرامن بقائے باہمی کو بھی فروغ دیا اور اقلیتوں کے حقوق کے لیے بھرپور آواز اٹھائی۔

انہوں نے زور دے کر کہا کہ اس کا طرزِ عمل ہمیشہ اسلامی تعلیمات پر مبنی رہا ہے اور یہ پُرامن، اصول پسند اور باوقار رہا ہے، جہاں تصادم کے مقابلے میں مذاکرات کو ترجیح دی گئی اور شخصیات کے بجائے مسائل کو اہمیت دی گئی۔

میرواعظ نے مزید کہا، ”ان شاء اللہ، جب بھی موقع ملا، یہ سلسلہ جاری رہے گا۔ یہ میرے بزرگوں کی میراث اور جموں و کشمیر کے عوام کی مشترکہ وراثت ہے۔”

میرواعظ کو اکثر نظر بند رکھا جاتا ہے یا ان کی نقل و حرکت پر پابندیاں عائد کی جاتی ہیں، خاص طور پر جمعہ کے روز۔

یو این آئی۔ م س۔ م الف

جموں، جموں و کشمیر کے لیفٹیننٹ گورنر منوج سنہا نے نوجوانوں کو مشورہ دیا ہے کہ وہ غیر ملکی ماڈلز کی اندھی تقلید کرنے سے گریز کریں۔ انہوں نے ان پر زور دیا کہ وہ اپنے کھیتوں، کسانوں، آب و ہوا اور مقامی چیلنجوں کا مطالعہ کریں اور خطے کی مخصوص ضروریات کے مطابق حل تیار کریں۔

یہاں شیر کشمیر یونیورسٹی آف ایگریکلچرل سائنسز اینڈ ٹکنالوجی میں منعقدہ ایک پروگرام سے خطاب کرتے ہوئے لیفٹیننٹ گورنر نے کہا کہ زراعت اور اس سے منسلک شعبے دنیا بھر میں جدت کے نئے محاذ کے طور پر ابھر رہے ہیں۔ نیدرلینڈز، اسرائیل، نیوزی لینڈ اور برازیل کی تکنیکی مثالوں کا حوالہ دیتے ہوئے انہوں نے کہا کہ ان ممالک نے اپنے مسائل کے مطابق حل تلاش کیے ہیں، اور اب وقت آگیا ہے کہ جموں و کشمیر اپنے مقامی چیلنجوں سے نمٹنے کے لیے اختراع کریں۔

پروگرام کے دوران لیفٹیننٹ گورنر نے یونیورسٹی کے تحت “اسٹارٹ اپ آؤٹ ریچ پروگرام” کا آغاز کیا اور یونیورسٹی میں کئی اہم بنیادی ڈھانچے کی سہولیات کا افتتاح کیا۔ ان میں انتی گرلز ہاسٹل، سنٹر فار اے آئی اور ایم ایل ان ایگریکلچر، مشروم ریسرچ اینڈ انوویشن سینٹر، ایڈوانسڈ سیریکلچر لیبارٹری، اور ڈیجیٹل میڈیا اینڈ پبلشنگ سینٹر شامل ہیں۔

لیفٹیننٹ گورنر منوج سنہا نے ان نئی سہولیات کو محض بنیادی ڈھانچے سے زیادہ بلکہ خطے کے محققین، کاروباری افراد اور کسان خاندانوں کے لیے ایک مضبوط وابستگی قرار دیا۔ اس تقریب میں جموں ڈویژن کے محققین، نوجوان صنعت کاروں اور کسانوں کی ایک بڑی تعداد نے شرکت کی۔

یو این آئی۔ الف الف۔ م الف

جموں، جموں و کشمیر پولیس نے کٹھوعہ ضلع کے بلاور علاقے میں منشیات کے ایک معاملے کے سلسلے میں جرم سے حاصل شدہ آمدنی کے طور پر شناخت کی گئی ایک گاڑی کو ضبط کرلیا ہے۔

پولیس ترجمان نے بتایا کہ منسلک کی گئی گاڑی (کار) کٹھوعہ ضلع کی تحصیل مڑہین کے کرنڈی کلاں کے رہنے والے شبیر شاہ کے نام پر رجسٹرڈ ہے۔

واقعے کے وقت یہ گاڑی اس کے بھائی باغ شاہ چلا رہا تھا، جو منشیات فروش ہے۔ اسے پی آئی ٹی-این ڈی پی ایس ایکٹ کے تحت گرفتار کیا گیا ہے اور فی الحال ضلع جیل کشتواڑ میں بند ہے۔ یہ معاملہ پولیس اسٹیشن بلاور میں متعلقہ دفعات کے تحت درج کیا گیا ہے۔

تحقیقات کے دوران معلوم ہوا کہ مذکورہ گاڑی اکثر منشیات کی اسمگلنگ کی وارداتوں میں استعمال کی جاتی تھی۔

قانونی کارروائی مکمل کرنے اور عدالت سے ضروری احکامات حاصل کرنے کے بعد گاڑی کو بھارتیہ ناگرک سرکشا سنہتا (بی این ایس ایس) کی دفعہ 107 اور دفعہ 6 کے تحت ضبط کیا گیا۔

انہوں نے کہا کہ جموں و کشمیر پولیس کٹھوعہ نے منشیات کی اسمگلنگ اور دیگر مجرمانہ سرگرمیوں کے خلاف سخت کارروائی کرنے کے اپنے عزم کا اعادہ کیا ہے۔

پولیس نئے فوجداری قوانین کے تحت مضبوط قانونی دفعات کا استعمال کرتے ہوئے فوری اور مؤثر انصاف کو یقینی بنانے کے لیے کارروائی جاری رکھے گی۔

یو این آئی۔ الف الف۔ م الف