اسلام آباد، پاکستان میں انتظامیہ نے جیل میں بند سابق وزیر اعظم عمران خان کی رہائی کے مطالبے پر مجوزہ مظاہرے سے قبل دارالحکومت اسلام آباد میں داخل ہونے والی اہم سڑکوں کو بند کرنا شروع کر دیا ہے۔

اسلام آباد پولیس نے بدھ کو بتایا کہ اسلام آباد-پشاور موٹروے، اسلام آباد-ڈیرہ اسماعیل خان موٹروے اور گرینڈ ٹرنک روڈ کو بدھ کی شام سے متعدد مقامات پر بند کیا جائے گا۔ پولیس نے لوگوں سے اپیل کی ہے کہ وہ اسی کے مطابق اپنے سفر کا منصوبہ بنائیں۔

پاکستانی مقامی میڈیا کے مطابق، سڑکوں کی بندش غیر معینہ مدت کے لیے ہے اور اس کا مقصد عمران خان کی پارٹی پاکستان تحریک انصاف (پی ٹی آئی) کے حامیوں کو 27 ستمبر کو دارالحکومت کی جانب مارچ کرنے سے روکنا ہے۔

عمران خان اگست 2023 سے جیل میں ہیں۔ انہیں متعدد مقدمات میں قصوروار قرار دیا گیا تھا، تاہم ان کی پارٹی نے ان مقدمات کو سیاسی بنیادوں پر قائم قرار دیا ہے۔ ان میں سے زیادہ تر مقدمات میں بعد میں اپیل کے دوران سزائیں معطل یا فیصلے منسوخ کیے جا چکے ہیں۔

عمران خان کی صحت، بالخصوص ان کی دائیں آنکھ کی حالت پر بھی تشویش کا اظہار کیا جا رہا ہے۔ بتایا جاتا ہے کہ ان کی آنکھ کے علاج کے لیے کئی ماہ سے ماہر طبی نگہداشت کی ضرورت ہے۔ پی ٹی آئی نے ان کی رہائی کے لیے اپنی مہم تیز کر دی ہے۔

مجوزہ مارچ میں شرکا کی پاکستان کے سب سے بڑے شہر کراچی سے تقریباً 1,150 کلومیٹر اور لاہور سے تقریباً 270 کلومیٹر کا فاصلہ طے کرکے اسلام آباد پہنچنے کی منصوبہ بندی تھی۔

مقامی میڈیا کے مطابق، حکام نے دارالحکومت اور شمال مغربی صوبہ خیبر پختونخوا سے آنے والے اہم راستے اٹک پل پر تقریباً 2,000 مال بردار کنٹینر تعینات کیے ہیں۔ خیبر پختونخوا اور پنجاب کے درمیان ایک اور اہم راستے ہارون پل پر بھی کنٹینر اور ریت کی بوریاں رکھی گئی ہیں۔ ضلع اٹک میں تقریباً 30,000 سکیورٹی اہلکار تعینات کیے گئے ہیں۔

وزیر داخلہ محسن نقوی نے پیر کو پی ٹی آئی کو مظاہرے کے خلاف خبردار کیا تھا۔ انہوں نے کہا تھا کہ ایسے اقدامات سے کوئی مقصد حاصل نہیں کیا جا سکتا اور پارٹی کو مظاہرے سے قبل اپنی حکمت عملی پر نظر ثانی کرنی چاہیے۔

دریں اثنا، ایک اور اپوزیشن جماعت جماعت اسلامی نے ایندھن کی بلند قیمتوں کے خلاف اتوار کو کراچی سے اسلام آباد کے لیے اپنا مارچ شروع کیا تھا۔ پارٹی کے سربراہ حافظ نعیم الرحمن نے روانگی سے قبل کہا تھا کہ اگر حکومت پٹرولیم مصنوعات پر فی لیٹر 100 پاکستانی روپے سے زائد کا لیوی واپس نہیں لیتی تو یہ تحریک حکومت ہٹانے کی مہم میں تبدیل ہو سکتی ہے۔

پنجاب کے شہر ملتان پہنچنے کے بعد نعیم الرحمن نے منگل کو کہا کہ وزیر اعظم شہباز شریف کی درخواست پر مارچ ملتوی کیا جائے گا۔ اس معاملے پر دونوں رہنماؤں کے درمیان ملاقات بھی مجوزہ ہے۔

اسی دوران پولیس نے اتوار کو عمران خان کی بہن علیمہ خان کو لاہور میں واقع ان کی رہائش گاہ سے امن عامہ سے متعلق قانون کے تحت گرفتار کر لیا۔ ان کی دو دیگر بہنوں، عظمیٰ خان اور نورین نیازی سمیت کئی دیگر رشتہ داروں کو بھی گرفتار کیا گیا ہے۔

یو این آئی۔ ع ا۔

اسلام آباد، پاکستان کے سابق وزیرِ اعظم عمران خان کی تین بہنیں گرفتار کر لی گئیں۔

پاکستان تحریکِ انصاف کے بانی کے ترجمان زلفی بخاری نے اپنے ایکس اکاؤنٹ پر کہا کہ پنجاب پولیس نے علیم خان کے گھر پر چھاپہ مارا اور عمران خان کی دو اور بہنوں کو بھی حراست میں لیا، نیز ان کے بھتیجوں اور ان کے بچوں کو بھی پکڑ لیا۔

پی ٹی آئی کے سیکرٹری اطلاعات کے شیخ وقاص اکرم نے اے ایف پی کو بتایا کہ خان صاحب کی بہنیں اور بچے حراست میں لیے گئے تھے تاہم بچوں کو بعد میں رہا کر دیا گیا۔

اکرم نے مزید کہا کہ تینوں خواتین کو لاہور کی کوٹ لکھپت جیل منتقل کر دیا گیا ہے۔

اتوار کو لاہور کے ڈپٹی کمشنر نے تین بہنوں کو پنجاب کے عوامی نظم و نسق کے قوانین کے تحت 30 دن کے لیے حراست میں رکھنے کا حکم دیا تھا۔

تحریکِ انصاف نے 27 ستمبر کو ایک احتجاجی مظاہرہ کرنے کی اپیل کی تھی۔

وزیر اطلاعات عطا اللہ تارڑ نے اتوار کو کہا کہ احتجاج کی کال غیر قانونی ہے اور انہوں نے وارننگ دی کہ ‘ہم انہیں راستے بند کرنے اور عوام کی زندگی متاثر کرنے کی اجازت نہیں دیں گے’۔

عمران خان، جو 2023 سے جیل میں ہیں، کو بدعنوانی کے الزامات کے سلسلے میں اپنی اہلیہ کےہمراہ 17 سال قید کی سزا سنائی گئی تھی، جنہیں دونوں نے مسترد کیا ہے۔

73 سالہ سابق وزیرِ اعظم، جو ایک سابق کرکٹ اسٹار بھی ہیں، 2018 سے 2022 تک عہدے پر رہے اور انہیں حکومت اور ملک کی طاقتور فوج کے درمیان کشیدگی کے باعث بھڑکنے والے سیاسی بحران کے دوران کیے گئے عدم اعتماد کے ووٹ کے ذریعے عہدے سے ہٹایا گیا تھا۔

یو این آئی۔ ع ا۔

اسلام آباد، پاکستان کے صوبہ خیبر پختونخوا کے کوہاٹ میں پولیس ہیڈکوارٹر پر ہونے والے خودکش دھماکے میں ہلاکتوں کی تعداد بڑھ کر 31 ہوگئی ہے۔

پاکستان پولیس نے ہفتے کو یہ اطلاع دی۔ پولیس کے مطابق مرنے والوں میں 16 پولیس اہلکار شامل ہیں۔ حملے میں 100 سے زائد افراد زخمی ہوئے ہیں، جن میں کئی کی حالت تشویشناک بتائی جاتی ہے۔

جمعہ کی دوپہر دہشت گردوں نے تقریباً 2.2 لاکھ آبادی والے کوہاٹ شہر کے ’اولڈ پولیس لائنز‘ احاطے میں خودکش دھماکہ کیا تھا۔ اس احاطے میں انسداد دہشت گردی محکمہ، اسپیشل برانچ سمیت پولیس کی کئی اہم یونٹس کے دفاتر موجود ہیں۔

تحریک طالبان پاکستان (ٹی ٹی پی) سے وابستہ مقامی گروپ ’اتحاد المجاہدین پاکستان‘ نے اس حملے کی ذمہ داری قبول کی ہے۔

یو این آئی۔ ع ا۔