واشنگٹن، امریکی وزیر خارجہ مارکو روبیو نے نیویارک میں کینیڈا، ڈنمارک، جزائر فارو، فن لینڈ، گرین لینڈ، آئس لینڈ، ناروے اور سویڈن کے وزرائے خارجہ سے ملاقات کی اور آرکٹک خطے کی سلامتی، سرمایہ کاری اور علاقائی تعاون پر تبادلہ خیال کیا۔

ملاقات میں آرکٹک کے مشترکہ چیلنجوں سے نمٹنے کے لیے اتحادی ممالک کی مسلسل سرمایہ کاری اور باہمی رابطہ کاری کی ’’تزویراتی ضرورت‘‘ پر زور دیا گیا۔

اتحادی ممالک نے اتفاق کیا کہ آرکٹک کی سلامتی کے لیے ’’اس اہم خطے کے تحفظ‘‘ اور تزویراتی حریفوں کو روکنے کی خاطر مسلسل سرمایہ کاری ضروری ہے۔

بات چیت میں ’’خودمختار فوجی اور اقتصادی صلاحیتوں‘‘ کی ترقی، سرمایہ کاری کے تحفظ اور لچکدار بنیادی ڈھانچے کی تعمیر کے ذریعے آرکٹک کی سلامتی کی زیادہ ذمہ داری اتحادی ممالک کی جانب سے اٹھانے پر توجہ مرکوز کی گئی، تاکہ قابل اعتماد رسائی یقینی بنائی جا سکے اور خطے میں مشترکہ قیادت کو تقویت ملے۔

روبیو نے امریکہ، کینیڈا اور فن لینڈ کے درمیان ’آئس بریکر کولیبوریشن ایفورٹ‘ (ٓئی سی ای) معاہدے کو ’’صنعتی تعاون اور ذمہ داریوں کی مشترکہ تقسیم‘‘ کے لیے ایک نمونہ قرار دیا۔

انہوں نے صدر ڈونالڈ ٹرمپ کے امریکی آئس بریکر بیڑے میں نمایاں توسیع کے عزم کی جانب بھی اشارہ کیا اور کہا کہ اس سے اس اقدام کو مزید مضبوط بنانے میں مدد ملے گی۔

یو این آئی۔ ع ا۔

پیانگ یانگ، شمالی کوریا کے رہنما کم جونگ ان نے پارٹی عہدیداروں پر زور دیا ہے کہ وہ ’’عصر حاضر کی توقعات‘‘ کے مطابق ملک کی تشہیری اور نظریاتی مہمات کو جدید بنائیں۔ سرکاری میڈیا نے منگل کو یہ اطلاع دی۔

کوریا کی مرکزی خبر رساں ایجنسی (کے سی این اے) کے مطابق کم جونگ ان نے پیر کو اطلاعاتی شعبے کے عہدیداروں کے لیے منعقدہ پارٹی کی تیسری ورکشاپ سے اختتامی خطاب میں نظریاتی کام کے ’’مضامین، شکلوں، طریقوں اور ذرائع‘‘ کو جدید بنانے سے متعلق ’’اصولی امور‘‘ اور کاموں کی وضاحت کی۔

انہوں نے ’’اطلاعات اور ترغیبی سرگرمیوں اور ثقافتوں کی تخلیق میں جدت‘‘ لانے پر زور دیا اور عہدیداروں سے کہا کہ وہ اس بات کو یقینی بنائیں کہ نظریاتی مہمات ’’عصر حاضر، انقلاب اور عوام کی توقعات‘‘ کے مطابق ہوں۔

کم نے خاص طور پر ’’جدید اطلاعاتی اور تکنیکی ذرائع‘‘ استعمال کرتے ہوئے ’’رجعت پسند نظریاتی ثقافت کے پھیلاؤ کو مکمل طور پر روکنے‘‘ پر زور دیا۔ اس اقدام کا مقصد بیرونی خیالات اور اثرات کے داخلے کو روکنے کی کوششوں کو مزید مضبوط کرنا ہے۔

کے سی این اے نے بتایا کہ پیر کو اختتام پذیر ہونے والی چار روزہ ورکشاپ میں کم جونگ ان کے ’’انقلابی نظریات‘‘ کی بنیاد پر نظریاتی تعلیم کے علاوہ ’’انقلابی ورثے اور پارٹی کی قیادت کی کامیابیوں‘‘ پر توجہ مرکوز کی گئی۔

شرکا پر زور دیا گیا کہ ’’عوام کو کوریا کی ورکرز پارٹی کی نویں کانگریس کے فیصلوں پر عمل درآمد کے لیے متحرک کرنے کے سلسلے میں اطلاعاتی اور تشہیری مہم‘‘ تیز کی جائے، جبکہ نظریاتی کام کو مختلف شعبوں اور اداروں کی مخصوص ضروریات کے مطابق ڈھالا جائے۔

ورکشاپ میں ’’نظریاتی کام کی نئی شکلوں اور طریقوں‘‘، ’’حقیقت پسندانہ اور پرکشش انداز میں اطلاعاتی کام‘‘ انجام دینے کے طریقوں اور ’’پارٹی کی پالیسی کے تقاضوں کے مطابق بصری معاون ذرائع‘‘ کے استعمال پر بھی تبادلہ خیال کیا گیا تاکہ ان کی تاثیر کو زیادہ سے زیادہ بنایا جا سکے۔

رواں سال کی یہ ورکشاپ 2022 میں اس کے آغاز کے بعد تیسری ایسی ورکشاپ تھی۔ کم جونگ ان نے افتتاحی اور اختتامی دونوں تقریبات میں شرکت کی اور دونوں مواقع پر خطاب کیا۔

یو این آئی۔ ع ا۔

نیویارک، ہندوستان اور چار رکنی ویشے گراڈ گروپ (وی 4) نے سیاسی، اقتصادی اور دفاعی تعاون کو مزید مستحکم کرنے پر اتفاق کیا ہے اور اپنے وزرائے خارجہ کے درمیان سالانہ مذاکرات کا نیا سلسلہ شروع کرنے کا فیصلہ کیا ہے۔ وزیر خارجہ ایس جے شنکر نے اقوام متحدہ کی جنرل اسمبلی کے اجلاس کے موقع پر پہلی ایسی میٹنگ کے بعد یہ بات کہی۔

پہلی وی4-انڈیا وزرائے خارجہ میٹنگ اقوام متحدہ کی جنرل اسمبلی کے 81ویں اجلاس کے موقع پر نیویارک میں وی 4 کی سلوواک صدارت کے تحت منعقد ہوئی۔

جے شنکر کے ساتھ میٹنگ میں سلوواکیہ کے وزیر خارجہ و یورپی امور یوراج بلانار، پولینڈ کے نائب وزیر اعظم و وزیر خارجہ رادوسلاو سِکورسکی، جمہوریہ چیک کے نائب وزیر اعظم و وزیر خارجہ پیتر ماچِنکا اور ہنگری کی نائب وزیر اعظم و وزیر خارجہ انیتا اوربان نے شرکت کی۔

افتتاحی وی 4 انڈیا وزرائے خارجہ میٹنگ وسطی یورپی بلاک کی سلوواکیہ کی گردشی صدارت کے تحت منعقد ہوئی، جس کی صدارت سلوواکیہ کے وزیر خارجہ یوراج بلانار نے کی۔

اقوام متحدہ کی جنرل اسمبلی کے 81ویں اجلاس کے موقع پر منعقدہ پہلی وی 4 اور ہندوستان وزرائے خارجہ میٹنگ کے بعد میڈیا سے بات کرتے ہوئے جے شنکر نے اس اجتماع کو ’’ایک نیا تاریخی موقع‘‘ قرار دیا اور وزرائے خارجہ کی سالانہ ملاقاتوں اور سالانہ بزنس فورم کے قیام کے منصوبے کا اعلان کیا۔

جے شنکر نے کہا، ’’چونکہ خود یورپی یونین کے ساتھ بھارت کے تعلقات بھی گہرے ہو رہے ہیں، اس لیے وی 4 کے ساتھ ہم کچھ خصوصی اقدامات کریں گے اور ایک سالانہ بزنس فورم قائم کریں گے۔ وزرائے خارجہ کی حیثیت سے ہم ہر سال ملاقات کریں گے—یہ اتفاق رائے تھا۔‘‘

انہوں نے کہا کہ ہندوستان اور وی4 ممالک ٹیکنالوجی اور اختراع کے شعبوں میں بھی زیادہ تعاون کے امکانات تلاش کریں گے اور موجودہ دفاعی تعلقات کو مزید مضبوط بنانے کی کوشش کریں گے۔

وزیر خارجہ نے کہا، ’’دفاع کے شعبے میں تمام وی 4 ممالک کے ساتھ ہماری بہت مضبوط تاریخ رہی ہے۔ ہم اس ریکارڈ اور تعاون کو تازہ کرتے ہوئے اسے آگے بڑھانا چاہتے ہیں۔‘‘

بات چیت میں خلائی شعبے، رابطہ کاری اور عوام سے عوام کے روابط کو بھی شامل کیا گیا۔ جے شنکر نے کہا کہ ہندوستان کے طلبہ وی 4 کے چاروں ممالک میں موجود ہیں۔

وزرائے خارجہ نے ’’ہندوستان اور ویشے گراڈ گروپ کے درمیان روابط کو مضبوط بنانے‘‘ کے طریقوں پر تبادلہ خیال کیا اور ہندوستان کے وی 4 کے ہر ملک کے ساتھ مضبوط دوطرفہ تعلقات کو تسلیم کیا۔

انہوں نے کہا کہ نیا ’’وی 4-انڈیا فارمیٹ‘‘ وسطی یورپ کے ان چاروں ممالک کے ساتھ بھارت کے موجودہ تعلقات کو ’’مکمل کرنے اور انہیں مزید رفتار دینے‘‘ میں مددگار ثابت ہو سکتا ہے۔

بات چیت میں متعدد شعبوں میں تعاون کو وسعت دینے پر توجہ مرکوز کی گئی، جن میں ’’تجارت و سرمایہ کاری، ٹیکنالوجی و اختراع، مضبوط اور لچکدار سپلائی چین، دفاع و سلامتی، رابطہ کاری، تعلیم، نقل و حرکت اور عوام سے عوام کے روابط‘‘ شامل ہیں۔

وزرائے خارجہ نے ہندوستان اوروی 4 رکن ممالک کے کاروباری اداروں، تعلیمی و تحقیقی اداروں اور دیگر متعلقہ فریقوں کے درمیان زیادہ رابطوں پر بھی تبادلہ خیال کیا، جس سے اقتصادی، تکنیکی اور ادارہ جاتی شراکت داری کو مزید مضبوط بنانے کے امکانات پیدا ہوئے ہیں۔

وزرائے خارجہ نے یوکرین تنازع اور خلیج کی صورتحال سمیت اہم عالمی پیش رفت پر بھی خیالات کا تبادلہ کیا۔

جاری۔ یو این آئی۔ ع ا۔