سری نگر، جموں و کشمیر قانون ساز اسمبلی کے اجلاس کا دوسرا دن منگل کو اس وقت ہنگامہ خیز ہوگیا جب نیشنل کانفرنس (این سی) کے رکن اسمبلی عبدالمجید لَرمی نے این سی کے بانی شیخ محمد عبداللہ کی یوم پیدائش اور برسی کے موقع پر سرکاری تعطیلات بحال کرنے کا مطالبہ کیا۔

لرمی نے حکومت سے یہ بھی غور کرنے کی اپیل کی کہ مہاراجہ ہری سنگھ کی یوم پیدائش کے موقع پر دی جانے والی سرکاری تعطیل واپس لی جائے۔ انہوں نے کہا کہ اگر ان کے مطالبے پر غور نہیں کیا جاتا تو مہاراجہ ہری سنگھ سے متعلق موجودہ تعطیل پر بھی ازسرنو غور کیا جانا چاہیے۔

ان کے بیان پر بی جے پی ارکان اسمبلی نے سخت اعتراض کیا، جس کے بعد ایوان میں گرما گرم بحث شروع ہوگئی۔

پی ڈی پی کے رکن اسمبلی وحید پرہ نے بھی 13 جولائی کو یومِ شہدا کے طور پر سرکاری تعطیل بحال کرنے کا مسئلہ اٹھایا۔ شیخ محمد عبداللہ سے متعلق 3 دسمبر کی تعطیل بحال کرنے کی حمایت کرتے ہوئے پرہ نے کہا کہ 13 جولائی جموں و کشمیر میں جمہوری بیداری کے آغاز کی علامت تھا، اس لیے اسے بھی ریاستی تعطیل کے طور پر بحال کیا جانا چاہیے۔

اس معاملے میں مداخلت کرتے ہوئے اسمبلی اسپیکر عبدالرحیم راتھر نے ارکان اسمبلی سے وقفہ سوال چلنے دینے کی اپیل کی۔

بی جے پی ارکان نے عوامی اہمیت کے مسائل پر بحث کا مطالبہ کیا اور بعد میں احتجاجاً اسمبلی سے واک آؤٹ کر گئے۔

بی جے پی ارکان کے واک آؤٹ کے بعد اسمبلی میں وقفہ سوال شروع ہوا۔ کچھ دیر بعد بی جے پی ارکان دوبارہ ایوان میں واپس آگئے۔

یواین آئی ط ا

جموں، جموں و کشمیر کے لیفٹیننٹ گورنر منوج سنہا نے پیر کو کہا کہ وزیراعظم کی پہل کے نتیجے میں اقوام متحدہ نے 2023 کو جوار باجرے کے بین الاقوامی سال کے طور پر منانے کا اعلان کیا، جس سے بھارت کی روایتی دانش مندی کو عالمی سطح پر شناخت ملی۔

لیفٹیننٹ گورنر نے یہاں ایس کے یو اے ایس ٹی میں ’’صحت کے لیے جوار باجرے: صحت مند ماحولیاتی نظام، موسمیاتی تبدیلی سے ہم آہنگ زراعت اور پائیدار غذائی نظام کی تعمیر‘‘ کے موضوع پر قومی مکالمے کا افتتاح کرنے کے بعد خطاب کرتے ہوئے پدم شری ڈاکٹر خضر ولی، جنہیں عام طور پر ’’بھارت کا ملیٹ مین‘‘ کہا جاتا ہے، اور ’کھیتی وراثت مشن‘ کے اومندر دت کا شکریہ ادا کیا۔

لیفٹیننٹ گورنر نے مرکز کے زیر انتظام خطے جموں و کشمیر میں ’ملیٹس مشن‘ کے ذریعے نئی بیداری پیدا کرنے کے لیے ان کی کوششوں کو سراہا۔

انہوں نے کہا کہ یہ موقع محض ایک سیمینار نہیں بلکہ بھارت کے دیہات سے جڑی ایک زرعی انقلاب کی خوشی منانے کا موقع ہے۔

لیفٹیننٹ گورنر نے کہا کہ وزیراعظم نریندر مودی نے 2018 میں جوار باجرے کو ’’غذائی اناج‘‘ قرار دے کر اسے ’شری اَنّ‘ کا نام دیا تھا اور ان کا یہ قائدانہ کردار تاریخ میں یاد رکھا جائے گا۔

جوار باجرے کی روایتی اہمیت کا ذکر کرتے ہوئے لیفٹیننٹ گورنر نے کہا کہ جوار، باجرا، راگی، کوڈو ملیٹ، لٹل ملیٹ، فوکس ٹیل ملیٹ اور برن یارڈ ملیٹ نے کئی نسلوں سے کسانوں اور ان کے خاندانوں کو غذا فراہم کی ہے۔ کبھی ’’غریبوں کی غذا‘‘ کہہ کر نظرانداز کیے جانے والے یہ اناج اب روایتی علم اور جدید سائنس کے سنگم پر دوبارہ اپنی جگہ بنا رہے ہیں۔

انہوں نے قدیم تصور ’’اَنَّم برہما‘‘ یعنی غذا کو الٰہی نعمت قرار دینے کی روایت کا حوالہ دیتے ہوئے کہا کہ صحت بخش غذا صحت مند شہریوں، مضبوط معاشروں اور موسمیاتی و دیگر بحرانوں کا مقابلہ کرنے والی قوموں کی بنیاد بنتی ہے۔

انہوں نے کہاکہ ’’ماہرین اس بات سے واقف ہیں کہ ملک کے مختلف حصوں میں چھوٹے اور معمولی رقبے والے کسانوں کے خاندانوں کو کئی دہائیوں تک جوار باجرے نے غذا فراہم کی۔ اس وقت جدید آبپاشی کی سہولتیں دستیاب نہیں تھیں۔ چھوٹے کسانوں کو نہ کھاد تک مناسب رسائی حاصل تھی اور نہ ہی موسم کی درست پیش گوئی کی سہولت موجود تھی۔

’’تاہم، جوار باجرے کی فصلوں کو ان سہولتوں کی اتنی ضرورت نہیں ہوتی تھی، کیونکہ یہ انتہائی نامساعد موسمی حالات میں بھی اگ سکتی تھیں اور خاندانوں کے لیے غذائی سہارا فراہم کرتی تھیں۔

یواین آئی۔ ظ ا

سری نگر، جموں و کشمیر قانون ساز اسمبلی کے سات نشستوں پر مشتمل خزاں اجلاس کے پہلے ہی دن پیر کو اس وقت ہنگامہ آرائی اور کارروائی میں خلل پیدا ہوگیا جب بی جے پی ارکان نے یومیہ اجرت پر کام کرنے والے ملازمین، قومی صحت مشن (این ایچ ایم) کے ملازمین، بجلی کے نرخوں اور عمر عبداللہ کی قیادت والی حکومت کی مبینہ ناکامیوں سمیت مختلف مسائل پر احتجاج کرتے ہوئے ایوان کے ویل میں پہنچ کر نعرے بازی شروع کردی۔

احتجاج کا آغاز تعزیتی قراردادوں کے فوراً بعد ہوا، جب بی جے پی ارکان نے یومیہ اجرت والے ملازمین کو مستقل کرنے اور این ایچ ایم ملازمین کے مسائل کے حل کے لیے کارروائی کا مطالبہ کرتے ہوئے نعرے لگائے اور پلے کارڈز لہرائے۔

بی جے پی نے بجلی کے نرخوں میں اضافے کا مسئلہ بھی اٹھایا۔ ارکان ’’یومیہ اجرت والے ملازمین کے ساتھ انصاف کرو‘‘ اور ’’این ایچ ایم ملازمین کے ساتھ انصاف کرو‘‘ جیسے نعرے لگا رہے تھے۔ انہوں نے ’’بھارت ماتا کی جے‘‘ کے نعرے بھی لگائے اور حکومت پر عوام سے متعلق مسائل حل کرنے میں ناکام رہنے کا الزام عائد کیا۔

صورتحال اس وقت مزید کشیدہ ہوگئی جب بی جے پی ارکان ایوان کے ویل میں پہنچ گئے اور حکومت کے خلاف نعرے بازی تیز کردی۔

اس کے جواب میں حکمراں بنچوں، جن میں نیشنل کانفرنس کے ارکان اور اس کے اتحادی شامل تھے، نے جموں و کشمیر کا ریاستی درجہ بحال کرنے کا مطالبہ کرتے ہوئے نعرے لگائے۔ کانگریس کے ارکان ’’ووٹ چور سرکار کو ایک دھکا اور دو‘‘ کے نعرے لگاتے ہوئے بھی نظر آئے۔

اسپیکر عبدالرحیم راتھر نے احتجاج کرنے والے بی جے پی ارکان سے بار بار اپنی نشستوں پر واپس جانے کی اپیل کی اور خبردار کیا کہ اگر کارروائی میں خلل جاری رہا تو ان کے خلاف کارروائی کی جائے گی۔ انہوں نے یہ بھی ہدایت دی کہ احتجاج کے دوران لگائے گئے بعض نعروں اور دیے گئے بیانات کو اسمبلی کی کارروائی کے سرکاری ریکارڈ کا حصہ نہ بنایا جائے۔

شور شرابے کے باوجود وقفہ سوالات جاری رہا اور وزرا نے ارکان اسمبلی کی جانب سے اٹھائے گئے سوالات کے جوابات دیے۔

نائب وزیراعلیٰ سریندر چودھری نے اپوزیشن پر سیاسی مقاصد کے لیے جان بوجھ کر اسمبلی کی کارروائی میں خلل ڈالنے کا الزام عائد کیا۔ انہوں نے کہا کہ حکومت عوامی مسائل سے متعلق سوالات کے جواب دینے کے لیے تیار ہے۔

وقفہ سوال کے بعد نیشنل کانفرنس کے رکن اور ریٹائرڈ جسٹس حسنین مسعودی نے مرکز کے زیر انتظام خطے جموں و کشمیر میں ’جل جیون مشن‘ (جے جے ایم) کے نفاذ میں مبینہ بے ضابطگیوں کی تحقیقات کے لیے قائم ایوان کی کمیٹی کی رپورٹ اسمبلی کے میز پر پیش کی۔

اس کمیٹی کو 9 اپریل 2025 کے ایک حکم نامے کے ذریعے جموں و کشمیر میں جل جیون مشن کے نفاذ میں مبینہ بے ضابطگیوں کا جائزہ لینے کے لیے تشکیل دیا گیا تھا۔

یواین آئی۔ ط ا