اسلام آباد، پاکستان کے صوبہ خیبر پختونخوا کے کوہاٹ میں پولیس ہیڈکوارٹر پر ہونے والے خودکش دھماکے میں ہلاکتوں کی تعداد بڑھ کر 31 ہوگئی ہے۔

پاکستان پولیس نے ہفتے کو یہ اطلاع دی۔ پولیس کے مطابق مرنے والوں میں 16 پولیس اہلکار شامل ہیں۔ حملے میں 100 سے زائد افراد زخمی ہوئے ہیں، جن میں کئی کی حالت تشویشناک بتائی جاتی ہے۔

جمعہ کی دوپہر دہشت گردوں نے تقریباً 2.2 لاکھ آبادی والے کوہاٹ شہر کے ’اولڈ پولیس لائنز‘ احاطے میں خودکش دھماکہ کیا تھا۔ اس احاطے میں انسداد دہشت گردی محکمہ، اسپیشل برانچ سمیت پولیس کی کئی اہم یونٹس کے دفاتر موجود ہیں۔

تحریک طالبان پاکستان (ٹی ٹی پی) سے وابستہ مقامی گروپ ’اتحاد المجاہدین پاکستان‘ نے اس حملے کی ذمہ داری قبول کی ہے۔

یو این آئی۔ ع ا۔

پشاور، پاکستان کے شمال مغربی صوبہ خیبر پختونخوا کے کوہاٹ ضلع میں ایک مسجد کے قریب دھماکہ خیز مواد سے بھری گاڑی میں دھماکے اور اس کے بعد دہشت گردوں کے احاطے میں داخل ہو کر پولیس تنصیبات پر حملے کے واقعے میں 5 پولیس اہلکاروں سمیت کم از کم 16 افراد ہلاک اور 50 سے زیادہ افراد زخمی ہو گئے۔

خیبر پختونخوا کے پولیس انسپکٹر جنرل (آئی جی پی) ذوالفقار حامد نے جیو نیوز کو بتایا کہ دھماکے سے پہلے دھماکہ خیز مواد سے لدی ایک گاڑی اولڈ پولیس لائنز کے گیٹ سے ٹکرا گئی۔ انہوں نے کہا، ’’گاڑی گیٹ سے ٹکرائی اور پھر اس میں دھماکہ ہو گیا اور فائرنگ بھی ہوئی۔‘‘ انہوں نے بتایا کہ دہشت گردوں کے ساتھ فائرنگ کے تبادلے کے دوران پولیس کی خصوصی شاخ کی عمارت میں ایک اور خودکش دھماکہ ہوا۔

آئی جی کی جانب سے جاری بیان میں کہا گیا کہ دھماکہ کوہاٹ پولیس لائنز کی ایک مسجد میں ہوا۔ اس میں کہا گیا کہ ابتدائی اطلاعات کے مطابق دھماکہ خیز مواد سے لدی گاڑی کو عمارت سے ٹکرایا گیا۔ بعد میں انہوں نے کہا کہ خصوصی شاخ کی عمارت کے قریب ایک خودکش حملہ آور نے خود کو دھماکے سے اڑا لیا۔ انہوں نے بتایا کہ ’فتنہ الخوارج‘ کے دہشت گردوں کے ساتھ فائرنگ کا تبادلہ جاری تھا۔ انہوں نے کہا، ’’فتنہ الخوارج کے مکمل خاتمے تک کارروائی جاری رہے گی۔‘‘ انہوں نے کہا کہ پولیس کا حوصلہ بلند ہے۔

قابل ذکر ہے کہ ’فتنتہ الخوارج‘ اس اصطلاح کا حصہ ہے جسے پاکستان حکومت کالعدم تحریک طالبان پاکستان سے وابستہ دہشت گردوں کے لیے استعمال کرتی ہے۔

پولیس نے بتایا کہ تقریباً 3:30 بجے تک تلاشی اور حفاظتی کارروائی آخری مرحلے میں تھی۔ بیان میں بتایا گیا کہ دھماکے کے بعد 7 دہشت گردوں نے پولیس لائنز میں داخل ہونے کی کوشش کی تھی۔ انہوں نے کہا، ’’اب تک ایک خودکش حملہ آور سمیت 6 دہشت گرد مارے جا چکے ہیں۔‘‘ 2021 میں طالبان کے افغانستان پر قبضے کے بعد سے پاکستان میں دہشت گردی کے واقعات میں تیزی سے اضافہ ہوا ہے۔

پولیس اور انسداد دہشت گردی محکمہ (سی ٹی ڈی) نے حملہ آوروں کے ساتھ مڈبھیڑ کی اور ان میں سے 6 کو ہلاک کر دیا، جن میں ایک خودکش حملہ آور اور ایک سنائپر بھی شامل تھا۔ خیبر پختونخوا پولیس نے ہلاک ہونے والوں کی شناخت 11 عام شہریوں اور 5 پولیس اہلکاروں کے طور پر کی ہے۔

صوبے کے پولیس سربراہ ذوالفقار حامد نے کہا کہ خودکش بم دھماکے میں 16 افراد ہلاک ہوئے ہیں۔ کوہاٹ ضلع اسپتال کے سینئر افسر طاہر علی شاہ نے کہا کہ 15 لاشیں اور 50 سے زیادہ زخمی افراد کو اسپتال لایا گیا ہے۔ دھماکے سے پولیس احاطے کے اندر مسجد کے باہر ایک گڑھا بن گیا۔

اتحاد المجاہدین پاکستان نامی ایک تنظیم نے حملے کی ذمہ داری قبول کی ہے۔ یہ گروپ حافظ گل بہادر گروپ، حرکت انقلاب اسلامی پاکستان اور لشکر اسلام کا اتحاد ہے، جسے اپریل 2025 میں تشکیل دیا گیا تھا۔

پاکستان کے صدر آصف علی زرداری نے تعزیت کا اظہار کیا اور زخمیوں کی جلد صحت یابی کی خواہش کی۔ وہیں وزیر اعظم شہباز شریف نے بھی واقعے کی مذمت کی اور حکام کو متاثرہ افراد کو ہر ممکن سہولت فراہم کرنے کی ہدایت دی۔ انہوں نے متعلقہ حکام سے دھماکے کی نوعیت اور اس کے اسباب کے بارے میں رپورٹ بھی طلب کی۔ وزیر داخلہ محسن نقوی نے ہلاک ہونے والوں کے اہل خانہ سے تعزیت کی اور زخمیوں کی جلد صحت یابی کے لیے دعا کی۔

خیبر پختونخوا کے وزیر اعلیٰ سہیل آفریدی نے اس معاملے میں پولیس حکام سے رپورٹ طلب کی ہے۔ انہوں نے اس واقعے کی مذمت کرتے ہوئے دہشت گردی کی اس کارروائی کو ’بہت افسوسناک اور ناقابل قبول‘ قرار دیا۔

یو این آئی۔ ظ ا۔ م ا لف

اسلام آباد، پاکستان کے صوبہ خیبر پختونخوا کے ضلع کوہاٹ میں جمعہ کی نماز کے دوران ایک مسجد میں کار بم دھماکے کے نتیجے میں 15 سے زائد افراد ہلاک اور 50 سے زیادہ زخمی ہوگئے۔

طلوع نیوز کے مطابق خیبر پختونخوا پولیس کے سربراہ ذوالفقار حامد نے بتایا کہ دھماکہ خیز مواد سے بھری ایک گاڑی مسجد کی دیوار سے ٹکرانے کے بعد پھٹ گئی۔انہوں نے کہا کہ دھماکے کے بعد فائرنگ کی اطلاعات بھی موصول ہوئی ہیں۔

تحریک طالبان پاکستان (ٹی ٹی پی) نے حملے میں ملوث ہونے کی تردید کی ہے۔

دھماکے سے مسجد کے باہر گہرا گڑھا بن گیا، عمارت کا بیرونی حصہ متاثر ہوا اور ایک دیوار منہدم ہوگئی۔

پولیس کے مطابق حملہ آور نے گاڑی کو احاطے کی بیرونی دیوار سے ٹکرا دیا۔ اس وقت پولیس اہلکار، ان کے اہل خانہ اور دیگر شہری پولیس دفاتر سے متصل مسجد میں نماز ادا کر رہے تھے۔

یو این آئی ۔ ع ا۔