نئی دہلی، کانگریس صدر ملکارجن کھرگے نے ملک میں بڑھتی مہنگائی پر بھارتیہ جنتا پارٹی (بی جے پی) حکومت کو نشانہ بناتے ہوئے کہا کہ بی جے پی توجہ ہٹانے والے اسٹنٹ اور بے تکی باتوں میں لوگوں کو الجھا کر اپنی کرتوتوں پر پردہ ڈالنا چاہتی ہے لیکن کانگریس اور عوام مہنگائی کے مسئلے پر سوال پوچھتے رہیں گے۔

مسٹر کھرگے نے تہواروں کے درمیان عام آدمی کے باورچی خانے پر پڑ رہے مہنگائی کے اثر کا ذکر کرتے ہوئے کہا کہ پیاز کے دام ایک سال میں 59 فیصد تک بڑھ گئے ہیں اور کئی شہروں میں یہ 50 سے 60 روپے فی کلوفروخت ہورہی ہے۔ انہوں نے چینی کی قیمت 60 سے 70 روپے فی کلو اور کچھ جگہوں پر 72 روپے تک پہنچنے کا دعویٰ کیا۔ وہیں، سرسوں کے تیل کی قیمت 200 روپے فی لیٹر سے زیادہ ہونے کی بات کہی۔

کانگریس صدر نے غذائی مہنگائی کی شرح 5.52 فیصد اور تھوک مہنگائی کی شرح 9.78 فیصد کا حوالہ دیتے ہوئے کہا کہ گزشتہ 12 سال سے بی جے پی کی حکومت ہے لیکن ‘اچھے دنوں’ میں کبھی دال، کبھی سبزی، کبھی تیل اور کبھی چینی عام آدمی کا بجٹ بگاڑتی رہی ہے۔ انہوں نے کہا کہ حکومت کو توجہ ہٹانے کے بجائے مہنگائی پر جواب دینا چاہیے اور عوام کو راحت دینے کے لیے ٹھوس اقدامات کرنے چاہئیں۔

یو این آئی ایف اے

وارانسی، پیغمبر اسلام کے یومِ ولادت کی خوشی میں عید میلاد النبی بدھ کے روز کاشی میں پوری عقیدت و احترام کے ساتھ منائی جا رہی ہے۔ مسلم اکثریتی علاقوں میں دلکش سجاوٹ کی گئی ہے۔ جگہ جگہ مذہبی پروگرام منعقد کیے جا رہے ہیں اور جلوسوں کو لے کر لوگوں میں خاصا جوش و خروش دیکھنے کو مل رہا ہے۔

عید میلاد النبی کے پیشِ نظر پولیس انتظامیہ نے سکیورٹی اور ٹریفک کے وسیع انتظامات کیے ہیں۔ شہر میں تقریباً 1000 پولیس اہلکاروں کی تعیناتی کی گئی ہے۔ حساس علاقوں میں اضافی پولیس فورس لگائی گئی ہے، جبکہ جلوس کے راستوں اور آس پاس کے علاقوں میں ڈرون کیمروں سے نگرانی کی جا رہی ہے۔

پولیس حکام نے منتظمین اور جلوس میں شامل افراد سے انتظامیہ کے مقرر کردہ قواعد و ضوابط پر عمل کرنے کی اپیل کی ہے۔ ساتھ ہی جلوس کے دوران ٹریفک کے نظام کو برقرار رکھنے اور عام لوگوں کو کسی قسم کی پریشانی نہ ہو، اس کا خاص خیال رکھنے کی ہدایت دی گئی ہے۔

ایڈیشنل کمشنر آف پولیس (لا اینڈ آرڈر/ہیڈ کوارٹر) شیو ہری مینا نے بتایا کہ عید میلاد النبی کے انعقاد کو لے کر پہلے ہی کمیٹیوں کے ساتھ میٹنگ کی گئی تھی اور انہیں ضروری ہدایات دی گئی ہیں۔ منتظمین سے کہا گیا ہے کہ وہ جلوس میں شامل لوگوں اور رضاکاروں (والینٹیئرز) کو مقررہ انتظامات سے آگاہ کر کے پرامن طریقے سے پروگرام مکمل کرائیں۔

انہوں نے کہا کہ جلوس کے دوران سڑکوں پر عام شہریوں کی آمد و رفت، ایمبولینس، ہنگامی خدمات اور سکیورٹی کا نظام متاثر نہیں ہونا چاہیے۔ شہر میں دیگر تہواروں اور تقریبات کو مدنظر رکھتے ہوئے پولیس اہلکاروں کے مناسب انتظامات کیے گئے ہیں۔

یواین آئی۔الف الف

واشنگٹن، ٹرمپ انتظامیہ نے دنیا بھر میں امریکی سفارت خانوں اور قونصل خانوں میں امیگرنٹ ویزا اپائنٹمنٹس عارضی طور پر روک دی ہیں۔ محکمہ خارجہ نے قونصلر افسران کے لیے نئی ’’جامع تربیت‘‘ شروع کی ہے، جس سے انتظامیہ کی وسیع تر امیگریشن پابندیوں میں ایک اور اقدام کا اضافہ ہوگیا ہے۔

محکمہ خارجہ نے کہا کہ اس نے امریکی سفارتی مشنز میں عالمی سطح پر تربیتی پروگرام شروع کیا ہے اور اس پروگرام کے لیے ویزا اپائنٹمنٹس میں تبدیلی کی جائے گی۔ تاہم، اس نے یہ نہیں بتایا کہ تربیت کتنے عرصے تک جاری رہے گی یا متاثرہ درخواست گزاروں کو انٹرویو کی نئی تاریخیں کب دی جائیں گی۔

تربیت کا مقصد اس بات کو یقینی بنانا ہے کہ قونصلر افسران ویزا درخواست گزاروں کا ’’جامع اور یکساں‘‘ طریقے سے جائزہ لیں، بالخصوص ایسے درخواست گزاروں کی شناخت پر توجہ دی جائے جو مستقبل میں امریکی حکومت کی عوامی فلاحی سہولیات پر انحصار کرسکتے ہیں۔

جن امیگرنٹ ویزا درخواست گزاروں کے انٹرویوز پہلے سے امریکی سفارت خانوں اور قونصل خانوں میں طے تھے، انہیں مبینہ طور پر ای میلز کے ذریعے بتایا گیا ہے کہ ان کی اپائنٹمنٹس دوبارہ مقرر کی جارہی ہیں۔ انہیں کہا گیا ہے کہ نئی تاریخ اور وقت کے بارے میں بعد میں اطلاع دی جائے گی۔

انتظامیہ ایسے درخواست گزاروں کی جانچ مزید سخت کرنا چاہتی ہے جن کے بارے میں خیال ہو کہ انہیں امریکی حکومت کی مالی یا دیگر امداد کی ضرورت پڑسکتی ہے۔ اس اقدام سے امیگریشن قانون کے نام نہاد ’’پبلک چارج‘‘ معیار پر مزید توجہ مرکوز ہوگئی ہے۔

امریکی امیگریشن قانون کے تحت قونصلر افسران یہ فیصلہ کرتے وقت درخواست گزار کی مالی حالت، عمر، صحت، تعلیم، مہارتوں اور خاندانی صورتحال سمیت مختلف عوامل کو مدنظر رکھ سکتے ہیں کہ آیا وہ بنیادی طور پر حکومتی امداد پر انحصار کرنے کا امکان رکھتا ہے۔

انتظامیہ کا مؤقف ہے کہ امیگرنٹ ویزا کے خواہش مند افراد کو یہ ثابت کرنے کے قابل ہونا چاہیے کہ وہ اپنے اخراجات خود پورے کرسکتے ہیں اور بڑے پیمانے پر سرکاری امداد پر انحصار نہیں کریں گے۔

یہ اقدام ایسے وقت سامنے آیا ہے جب چند روز قبل ایک وفاقی جج نے ٹرمپ انتظامیہ کی ایک اور پالیسی کو کالعدم قرار دیا تھا، جس کے تحت 75 ممالک کے شہریوں کے لیے امیگرنٹ ویزا جاری کرنے کا عمل معطل کیا گیا تھا۔

مین ہٹن کی امریکی ضلعی جج جینیٹ ورگاس نے جمعہ کو فیصلہ دیا کہ محکمہ خارجہ نے درخواست گزاروں کی قومیت کی بنیاد پر ویزا معطلی عائد کرکے اپنے قانونی اختیارات سے تجاوز کیا ہے۔

جنوری میں اعلان کی گئی اس پالیسی سے پاکستان، بنگلہ دیش، برازیل، کولمبیا اور یوراگوئے سمیت بلقان، افریقہ، مشرق وسطیٰ اور کیریبین کے متعدد ممالک کے درخواست گزار متاثر ہوئے تھے۔

ورگاس نے اس پالیسی کو غیر قانونی قرار دیتے ہوئے کہا کہ وفاقی امیگریشن قانون قونصلر افسران سے تقاضہ کرتا ہے کہ وہ قانونی طریقہ کار کے تحت امیگرنٹ ویزا درخواستوں کا انفرادی جائزہ لیں، نہ کہ صرف قومیت کی بنیاد پر مکمل پابندی عائد کریں۔

یہ فیصلہ ٹرمپ انتظامیہ کے لیے ایک قانونی دھچکہ ہے، جو امیگریشن کے معاملے میں انتظامی اختیارات بڑھانے اور قانونی و غیر قانونی دونوں طرح کی امیگریشن پر مزید پابندیاں عائد کرنے کی کوشش کر رہی ہے۔

جاری۔ یو این آئی۔ ع ا۔