اسلام آباد، پاکستان کی عدالت عالیہ نے سابق وزیر اعظم عمران خان کو طبی علاج کے لیے جیل حکام کی جانب سے ہسپتال منتقل کرنے اور کیس کی اگلی سماعت یعنی 16 ستمبر تک ہسپتال میں رہنے کی اجازت دینے کا حکم دیا ہے۔

جسٹس شاہد وحید کی سربراہی میں تین رکنی سپریم کورٹ کے بینچ جس میں جسٹس نعیم اختر افغان اور جسٹس اشتیاق ابراہیم شامل ہیں انہوں نے حکومت کو حکم دیا کہ عمران خان کو طبی معائنے اور علاج کے لیے اڈیالہ جیل سے اسلام آباد کے شفا انٹرنیشنل ہسپتال منتقل کیا جائے۔

یہ درخواستیں عمران خان کی ہمشیرہ اور ماہر جراح ڈاکٹر عظمیٰ خان اور پارٹی کے دیگر رہنماؤں کی جانب سے دائر کی گئی تھیں، درخواستوں میں موقف اختیار کیا گیا تھا کہ جیل میں ان کی صحت بگڑ رہی ہے اور وہ مختلف بیماریوں میں مبتلا ہیں، اس لیے انہیں فوری طبی امداد فراہم کی جائے۔

عدالت نے 73 سالہ سابق وزیر اعظم کے معائنے اور علاج کے لیے ایک میڈیکل بورڈ تشکیل دینے کا بھی حکم دیا۔عدالت نے یہ بھی ہدایت کی کہ طبی معائنے اور علاج کے دوران ڈاکٹر عظمیٰ خان اور عمران خان کے ذاتی معالج ڈاکٹر فیصل سلطان موجود رہیں۔ اس کے علاوہ حکام کو عمران خان کی ان کے اہل خانہ سے ملاقاتیں یقینی بنانے کا بھی حکم دیا گیا۔

اس فیصلے پر ردعمل ظاہر کرتے ہوئے، وفاقی وزیر برائے پارلیمانی امور طارق فضل چوہدری نے کہا کہ حکومت سپریم کورٹ کے فیصلے پر اس کی ‘روح اور الفاظ’ کے ساتھ عمل درآمد کرے گی۔ انہوں نے کہا کہ عمران خان کی پارٹی نے اب یہ محسوس کر لیا ہے کہ عدالتیں انصاف فراہم کر رہی ہیں۔

چوہدری نے مزید کہا کہ ماضی میں بھی ہر کوئی عدالتوں کے ذریعے ہی رہا ہوا ہے اور عدلیہ قانونی چارہ جوئی اور ریلیف کے لیے بہترین راستہ بنی ہوئی ہے۔

انہوں نے یہ بھی کہا کہ سابق وزیر اعظم کو ان کی پارٹی کی جانب سے درخواست نہ ہونے کے باوجود بہترین ممکنہ طبی سہولیات فراہم کی جا رہی تھیں۔

عمران خان متعدد مقدمات میں سزا سنائے جانے کے بعد اگست 2023 سے جیل میں ہیں۔

2018 میں اقتدار میں آنے والے سابق کرکٹر اپنی مدتِ ملازمت پوری ہونے سے تقریباً ایک سال قبل اپریل 2022 میں پارلیمان میں عدم اعتماد کی تحریک ہار گئے تھے۔

تب سے انہیں توشہ خانہ اور بد عنوانی سے متعلق مقدمات سمیت متعدد قانونی چیلنجز کا سامنا ہے۔

ان کی کچھ سزائیں معطل یا کالعدم ہو چکی ہیں جبکہ کئی اپیلیں اعلیٰ عدالتوں میں زیر التوا ہیں۔

یو این آئی۔ ع ا۔

اسلام آباد، پاکستان کی سپریم کورٹ نے ایک اہم فیصلے میں جیل میں بند سابق وزیر اعظم اور پاکستان تحریک انصاف پارٹی کے بانی عمران خان کو اگلے 48 گھنٹوں کے اندر بہتر علاج کے لیے اسلام آباد کے ایک اسپتال میں منتقل کرنے کا حکم دیا ہے۔

سابق وزیر اعظم خان کی پارٹی نے منگل کو ایک سوشل میڈیا پوسٹ میں اس کا اعلان کیا۔ اس میں کہا گیا ہے کہ عدالت نے یہ حکم خان کی بگڑتی صحت سے متعلق دائر درخواست کے بعد جاری کیا۔ عدالت نے اسپتال میں ماہرین کا میڈیکل بورڈ تشکیل دینے کی بھی ہدایت کی جس میں عمران خان کی بہن ڈاکٹر عظمیٰ خان اور ان کے ذاتی معالج ڈاکٹر فیصل سلطان شامل ہوں گے۔ عدالت نے جیل حکام کو ان کے اہل خانہ سے ہفتہ وار ملاقات کو یقینی بنانے کی بھی ہدایت کی۔

عدالت کے فیصلے کا خیرمقدم کرتے ہوئے پی ٹی آئی کے سکریٹری جنرل سلمان اکرم راجہ نے کہا کہ تاریخی فیصلے سے راحت کی کرن آئی ہے۔ انہوں نے کہا کہ ‘سپریم کورٹ نے واضح طور پر حکم دیا ہے کہ خان صاحب کی صحت سب سے اہم ہے اور انہیں شفا اسپتال بھیجا جائے، ان کے ذاتی معالج اور خاندان کے افراد کو میڈیکل بورڈ میں شامل کرنے کی ہدایت ہمارے لیے ایک بڑا یقین دہانی ہے’۔

وزیر اعلیٰ خیبرپختونخوا سہیل خان آفریدی نے فیصلے پر ردعمل ظاہر کرتے ہوئے کہا کہ انصاف کی فتح ہوئی ہے۔ انہوں نے کہا کہ “عمران خان ملک کے مقبول ترین لیڈر ہیں، یہ عدالتی فیصلہ خوش آئند ہے، اگرچہ 9 اپریل 2022 سے ہونے والی ناانصافیوں کو ختم نہیں کیا جا سکتا لیکن ہم آئینی حقوق اور مکمل انصاف کا مطالبہ کرتے رہیں گے”۔

عمران خان کی بہن علیمہ خان فیصلے پر انتہائی جذباتی ہوگئیں اور کہا کہ ہم انصاف کی امید تقریباً کھو چکے تھے، ہمیں صرف اللہ پر بھروسہ تھا، آج عدالت نے اسپتال میں خان صاحب کا مکمل چیک اپ کرنے کا حکم دیا، جس پر ہم اللہ کا شکر ادا کرتے ہیں۔

قابل ذکر بات یہ ہے کہ اگست 2023 سے جیل میں بند 73 سالہ عمران خان کی صحت اور خاص طور پر ان کی آنکھوں کے بارے میں خدشات جاری تھے۔ سپریم کورٹ کے حکم کے بعد پارٹی کے حامیوں اور ان کے اہل خانہ نے راحت کی سانس لی ہے۔

سابق وزیر اعظم عمران کی موت کے حوالے سے بہت سی افواہیں گردش کر رہی ہیں اور عدالت کے اس حکم کے بعد ان سب پر روک لگ گئی ہے۔

یو این آئی۔ ع ا۔

کوئٹہ،بلوچستان کے ضلع ژوب میں خوفناک حادثہ پیش آیا ہے جہاں بس گہری کھائی میں گرنے سے 39 مسافر جاں بحق ہو گئے ہیں۔

اے آر وائی نیوز کے نمائندے رفیق ژوب مطابق حادثہ شیرانی کے علاقے دانہ سر میں اس وقت پیش آیا، جب موڑ کاٹتے ہوئے تیز رفتاری کے باعث بس کے بریک فیل ہو گئے، جس کے نتیجے میں بس گہری کھائی میں جا گری۔

حادثے کی اطلاع ملتے ہی پولیس، ضلع انتظامیہ اور ریسکیو ادارے جائے حادثہ پہنچ گئے اور امدادی سرگرمیاں شروع کر دیں۔

حادثہ اتنا سنگین تھا کہ بس مکمل طور پر تباہ ہو گئی اور بس کے حصوں کو کاٹ کر لاشوں اور زخمیوں کو نکالنا پڑا۔ جاں بحق ہونے والوں میں خواتین اور بچے بھی شامل ہیں۔

ریسکیو حکام نے لاشوں اور زخمیوں کو قریبی اسپتال پہنچایا، جہاں کئی زخمیوں کی حالت تشویشناک بتائی جاتی ہے۔

ڈی سی ژوب حضرت ولی کاکڑ کے مطابق حادثے میں 16 افراد موقع پر ہی جاں بحق ہو گئے تھے جب کہ باقی افراد نے امدادی سرگرمیوں اور اسپتال پہنچنے کے بعد دم توڑا۔

یو این آئی۔ ع ا۔