کورونا وائرس کے پھیلتے خطرات اور خدشات کے پیش نظر وادی کشمیر میں جمعہ کو مسلسل دوسرے روز بھی عملی لاک ڈاؤن رہا جبکہ نماز جمعہ اجتماعات کو محدود کرنے کیلئے انتظامیہ نے وادی بھر میں دفعہ144کے تحت سخت ترین کرفیو جیسی بندشیں اور پابندیاں عائد کیں۔ ادھر وادی بھر میں کہیں نماز جمعہ اجتماعات کو محدود کیا گیا اور کہیں ان اجتماعات کو مکمل طور پر معطل کیا گیا۔ کشمیر نیوز سروس کے مطابق دنیا بھر کو اپنی لپیٹ میں لینے والی عالمگیر وبا ’کورونا وائرس‘ نے وادی کشمیر میں بھی باضابط طور پر دستک دی ہے اور اس مرض میں ایک خاتون کے مبتلاء ہونے کے بعد تشویش کی لہر دوڑ گئی،وہیں انتظامیہ بھی متحرک ہوگئی اورجمعہ کو مسلسل دوسرے روز بھی شہر میں بندشیں اور پابندیاں عائد کیں۔
کشمیر میں کورونا کے خوف کے باعث جہاں جمعہ کو مسلسل دوسرے بھی حقیقی لاک ڈاؤن رہا،وہیں انتظامیہ نے بھی نماز جمعہ اجتماعات کو محدود کرنے کیلئے احتیاطی اقدامات کے تحت پوری وادی میں بندشیں اور پابندیاں عائد کیں۔سرینگر سمیت پوری وادی میں جمعہ کو دکانات،پیٹرول پمپ،کاروباری ادارے اور تجارتی مراکز بند رہے جبکہ پبلک ٹرانسپورٹ بھی سڑکوں سے غائب رہا۔حکام کا کہنا ہے کہ وادی کشمیر میں جمعہ کو احتیاطی اقدامات کے تحت بندشیں اور پابندیاں عائد کی گئیں،تاکہ کورونا وائرس کی روکتھام کو یقینی بنایا جاسکے۔سرینگر میں سیکیورٹی فورسز نے جگہ جگہ خار دار تار استعمال کرکے راستوں کو مکمل طور پر سیل کردیا تھا جبکہ اس کے علاوہ لوگوں کی نقل وحرکت کو محدود کرنے کیلئے جگہ جگہ رکاوٹیں کھڑی کی گئیں۔اس دوران جمعہ کی علی الصبح پولیس گاڑیوں کے ذریعے اعلان بھی کیا گیا کہ لوگوں گھروں میں رہیں اور قانون کی خلاف ورزی کرنے والوں کے خلاف قانونی کارروائی عمل میں لائی جائیگی۔
پولیس لاؤڈ اسپیکروں کے ذریعے یہ اعلان کررہی تھی کہ پورے شہر میں دفعہ144نافذ کی گئی،لہٰذا لوگ گھروں میں ہی رہیں جبکہ پولیس یہ بھی کہہ رہی تھی کہ کورونا وائرس کی روکتھام کیلئے لوگوں کا تعاؤن لازمی ہے اور مل جل کر ہی اس وبا سے محفوظ رہا جاسکتا ہے۔ جمعہ کی صبح صرف سرکاری اور لازمی سروس کے ملازمین،میڈیا نمائندوں اور ایمرجنسی کی صورت میں گھروں سے باہر آنے والے افراد کو ہی جانے اور آنے کی اجازت دی جاتی تھی۔حکام نے بین الضلعی اور اندرونی ضلعی ہر طرح کی پبلک ٹرانسپورٹ سروس کیساتھ ساتھ وادی بھر میں بارہمولہ۔بانہال ریل سروس کو معطل رکھنے کا اعلان کر رکھا ہے۔ادھر وادی بھر میں پہلے ہی پرائمری سے لیکر یونیورسٹی سطح کے سبھی تعلیمی اداروں کو31مارچ تک بند کرنے کا اعلان بھی کیا گیا ہے۔ادھر موصولہ اطلاعات کے مطابق سری نگر شہر میں متعدد مساجد میں جمعہ کی نماز کو معطل کر دیا گیاجبکہ متعدد مساجد میں 25 منٹ سے بھی کم وقت میں اجتماعی نماز ادا کی گئی جس کے دوران ائمہ کرام نے مختصر نماز ادا کی۔
جمعہ کی نماز میں شریک لوگوں کو ماسک پہنے دیکھا گیا اور وہ اپنے دوستوں اور عزیزوں سے مصافحہ کرنے سے گریزاں رہے۔ آثار شریف شریف حضرتبل،مرکزی جامع مسجد سرینگر،امام باڈہ بڈگام سمیت دیگر کئی بڑی اور مرکزی جامع مسا جد میں جمعہ اجتماعات کو یا محدود کیا گیا اور یا تو مکمل طور پر معطل کردیا گیا۔کشمیرمیں ایک مذہبی تنظیم، جمعیت اہل حدیث نے جمعرات کے روز کورونا وائرس کے خطرے کے پیش نظر جموں و کشمیر بھر میں جمعہ کی مکمل نماز کو معطل کرنے کا فیصلہ کیا تھا۔ مسجد میں صرف لازمی فرض نماز کی ادائیگی کی جائے گی اور باقی تمام ارکان معطل کر دئے جائیں گے۔تنظیم کا اجلاس صدر غلام محمد المدنی کی زیر صدارت ہوا۔
اس میں جنرل سکریٹری ڈاکٹر لطیف الکندی اور مفتی جموں و کشمیر محمد یعقوب بابا نے بھی شرکت کی۔اجلاس کے دوران فیصلہ کیا گیا کہ کورونا وائرس کے خطرے کے پیش نظر جمعہ کی مکمل نماز جموں و کشمیر میں 31 مارچ تک ملتوی کردی جائے گی۔ کشمیر میں بھی مذہبی رہنما ہفتے کے روز اس معاملے پر اجلاس منعقد کر رہے ہیں۔ کشمیر کے مفتی اعظم ناصر الاسلام نے کہا کہ انہوں نے ہفتے کے روز تمام مذہبی رہنماوں کا اجلاس دن دو بجے بلایا ہے۔ہفتہ کے اجلاس میں شرکت کرنے والے اس اجلاس میں جماعت اسلامی، جمعیت اہل حدیث، عوامی ایکشن کمیٹی، متحدہ مجلس علما، جمعیت ہمدانی، اتحاد المسلمین، متحدہ مسلم کونسل، انجمن اتحاد اتحاد المسلمین،مسلم پرسنل لا بورڈ، دارالعلوم رحیمیہ بانڈی پورہ اور لال بازار، کاروان اسلامی، انجمنِ حمایت الاسلام، اسلامک اسٹڈی سرکل، اور انجمن شرعی شیعان اور دیگر تنظیمیں شرکت کریں گی۔مفتی ناصر الاسلام نے کہا کہ ہم تین نکات پر تبادلہ خیال کریں گے جس میں مسجدوں کو صرف نماز جمعہ کے لئے محدود رکھنا، جمعہ کے روز مختصر خطبہ، اور مساجد میں نماز کو مکمل طور پر منسوخ کرنا شامل ہیں۔ ہمارے پاس اسلام میں یہ آپشن ہے۔ اس میں کوئی گناہ نہیں ہے۔کاروان اسلامی کے سرپرست مولانا غلام رسول نے کہا کہ اسلام میں ایک ایسی شق موجود ہے جس کے تحت زندگی کو خطرے میں ڈالنے والی صورتحال کے وقت مساجد میں نماز عارضی طور پر منسوخ کی جاسکتی ہے۔ دریں اثنا، مختلف افکار سے وابستہ مختلف مذہبی اداروں کی تنظیم متحدہ مجلس علما (ایم ایم یو)، جس کی سربراہی میر واعظ عمر فاروق کر رہے ہیں،نے علمائے کرام، خطیبوں اور مساجد کے انتظامات سے اپیل کی ہے کہ وہ رہنما اصولوں پر سختی سے عمل کریں۔
جمعہ کی نماز میں عربی خطبہ انتہائی مختصر اور دعا صرف موجودہ وبا سے بچنے کیلئے کی جائے۔جموں و کشمیر شیعہ ایسوسی ایشن کی جانب سے آنے والی تمام مجالس اور محفلوں کو فی الحال ملتوی کرنے کا فیصلہ کیا گیا ہے-جموں و کشمیر شیعہ ایسوسی ایشن کے صدر اور سینئر پیپلز کانفرنس رہنما مولانا عمران رضا انصاری نے اپنے ایک ٹوئٹ میں اس بات کا اعلان کیا ہے کہ جموں و کشمیر شیعہ ایسوسی ایشن کی جانب سے آنے والے دنوں میں جس طرح کی بھی مجلس یا محفل منعقد ہونے والی تھی انہیں فی الحال موخر کردیا گیا ہے۔
اب کسی بھی طرح کے عوامی اجتماعات منعقد نہیں کیے جائیں گے۔کشمیر کے گرمائی صدر مقام سری نگر اور وادی کے چند دوسرے علاقوں میں جزوی لاک ڈاؤن کر دیا گیا ہے۔یہ اقدام سری نگر کے گنجان آبادی والے خان یار علاقے سے تعلق رکھنے والی 67سالہ خاتون کا کرونا ٹیسٹ مثبت آنے کے بعد کیا گیا ہے۔کرونا وائرس کی شکار خاتون چند روز قبل ہی عمرہ کی ادائیگی کے بعد واپس پہنچی تھی۔ متاثرہ خاتون کے اہلِ خانہ کو قرنطینہ میں رکھا گیا ہے اور ڈاکٹروں کی ایک ٹیم خان یار میں گھر گھر جا کر لوگوں کا موقع ہی پر طبی معائنہ بھی کیا۔وادی میں کرونا وائرس کا یہ پہلا کیس ہے۔ جس کے بعد پورے علاقے خاص طور پر سری نگر میں خوف و ہراس پھیل گیا ہے۔