برلن، جرمنی کے صوبہ زیریں ساکسونیاکےنیوسٹاد ایم روب برگ شہر میں ایک گاڑی کے جان بوجھ کر شہریوں پر چڑھانے کے نتیجے میں کم از کم 4 افراد زخمی ہو گئے۔

جرمن نیوز ایجنسی (دی پی اے) نے ہانوور کے پولیس ترجمان کے حوالے سے بتایا کہ ہانوور کے قریب واقع نیوسٹاد ایم روب برگ میں گزشتہ شب ایک شخص نے گاڑی کو ہجوم پر چڑھا دیا۔

جائے وقوعہ کے قریب ٹریفک پولیس کے اہلکاروں نے گاڑی کو روکنے کے لیے اس پر فائرنگ کی۔

گاڑی میں سوار مشتبہ افراد، جن کی تعداد کا تاحال علم نہیں ہو سکا، جائے وقوعہ سے فرار ہو گئے۔ مشتبہ افراد کی گرفتاری کے لیے شروع کردہ کارروائی تا حال کامیاب نہیں ہو سکی۔

پولیس ترجمان نے کہا کہ مشتبہ افراد نے ہجوم کو حادثاتی طور پر نہیں بلکہ غالباً خاص طور پر نشانہ بنایا؛ اس واقع میں 4 سے 5 افراد زخمی ہوئے ہیں، جن میں سے بعض شدید زخمی ہیں۔”

یو این آئی۔ ع ا۔

واشنگٹن، ایران کے خلاف امریکی جنگ کے اخراجات اکتوبر کے وسط تک بڑھ کر کم از کم 47.1 ارب ڈالر ہو گئے ہیں۔ امریکی سینٹرل کمانڈ (سینٹ کام) کی جانب سے قانون سازوں کو فراہم کردہ تخمینے کے مطابق، اخراجات کا بڑا حصہ استعمال کیے جا چکے گولہ بارود اور میزائلوں کی جگہ نئے ہتھیاروں کی خریداری پر مشتمل ہے۔

صدر ڈونالڈ ٹرمپ کی جانب سے امریکی وسط مدتی انتخابات کے بعد ایران پر حملے دوبارہ شروع کرنے کے امکان پر غور کے درمیان، جنگ کے اخراجات گزشتہ ماہ کے مقابلے میں 3 ارب ڈالر سے زیادہ بڑھ گئے ہیں۔

16 اکتوبر کے تخمینے کے مطابق، استعمال شدہ گولہ بارود اور میزائلوں کی جگہ نئے ہتھیاروں کی فراہمی پر تقریباً 29 ارب ڈالر خرچ ہونے کا اندازہ ہے، جبکہ تباہ یا ضائع ہونے والے فوجی سازوسامان کی جگہ نئے آلات کی خریداری کے لیے مزید 6.1 ارب ڈالر مختص کیے گئے ہیں۔ امریکی ذرائع ابلاغ کی رپورٹوں کے مطابق، فوجی کارروائیوں سے متعلق اضافی اخراجات کے لیے تقریباً 11.9 ارب ڈالر رکھے گئے ہیں۔

اس تخمینے میں مشرق وسطیٰ میں امریکی فوجی اڈوں کو پہنچنے والے نقصانات کی مرمت کے اخراجات شامل نہیں ہیں۔ ان میں سے متعدد اڈوں کو ایرانی ڈرونز اور میزائلوں سے نشانہ بنایا گیا ہے۔

تازہ ترین تخمینہ ستمبر کے اوائل میں پینٹاگون کے پیش کردہ تقریباً 43.6 ارب ڈالر کے تخمینے سے زیادہ ہے۔ اس سے تین ماہ قبل وزیر دفاع پیٹ ہیگستھ نے امریکی فوجی اڈوں کو پہنچنے والے نقصانات کو شامل کیے بغیر جنگ کے اخراجات تقریباً 37.5 ارب ڈالر بتائے تھے۔

کانگریس کے بجٹ دفتر نے گزشتہ ماہ کہا تھا کہ تنازع جاری رہنے کی صورت میں اس پر ہر ماہ 2 سے 3 ارب ڈالر خرچ ہو سکتے ہیں۔ اس کی ایک اہم وجہ ایرانی حملوں سے دفاع کے لیے استعمال ہونے والے انٹرسیپٹر میزائلوں کے ذخیرے کو دوبارہ بھرنے کی ضرورت ہے۔

جنگ کے باعث امریکی فوج کے ہتھیاروں کے ذخائر کے حوالے سے بھی تشویش بڑھ گئی ہے۔ پینٹاگون کے انسپکٹر جنرل نے گزشتہ ماہ کہا تھا کہ تنازع کے دوران بڑی تعداد میں گولہ بارود استعمال کیے جانے کے سبب فوج کو ”اسٹریٹجک ذخائر میں کمی” کا سامنا ہے، جس کے بعد ہتھیاروں کی پیداوار تیز کرنے کی کوششیں شروع کی گئی ہیں۔

تاہم، ٹرمپ انتظامیہ نے گولہ بارود کی قلت سے متعلق خدشات کو مسترد کیا ہے۔ صدر ٹرمپ نے ستمبر کے اوائل میں کہا تھا کہ امریکہ کے پاس درمیانے اور اعلیٰ معیار کے گولہ بارود کی ”تقریباً لامحدود مقدار” موجود ہے۔

اس سے قبل ذرائع ابلاغ کی رپورٹوں میں بتایا گیا تھا کہ سینٹ کام نے وائٹ ہاؤس کی منظوری ملنے کی صورت میں ایران پر مزید حملوں کے مختلف منصوبے تیار کیے ہیں۔ ٹرمپ اشارہ دے چکے ہیں کہ اگر تہران کسی معاہدے پر رضامند نہیں ہوتا تو اگلے ماہ امریکی وسط مدتی انتخابات کے بعد فوجی کارروائیاں دوبارہ شروع کی جا سکتی ہیں۔

ٹرمپ نے منگل کو ٹیکساس میں ایک انتخابی ریلی سے خطاب کرتے ہوئے کہا کہ امریکہ مشرق وسطیٰ کی صورتحال سے ”بے پناہ دولت کما رہا ہے”۔ انہوں نے پیش گوئی کی کہ جنگ ”بہت جلد ختم ہو جائے گی”۔

اس تنازع کے اخراجات امریکی گھرانوں پر بھی پڑے ہیں۔ موڈیز اینالیٹکس کے اندازے کے مطابق، اب تک جنگ کے باعث امریکہ کے ہر گھرانے پر اوسطاً تقریباً 2,000 ڈالر کا اضافی بوجھ پڑا ہے۔

ٹرمپ انتظامیہ نے اس سے قبل جنگ کے اخراجات سمیت دیگر دفاعی ضروریات پوری کرنے کے لیے کانگریس سے فوجی فنڈنگ کی مد میں مزید دسیوں ارب ڈالر طلب کیے تھے۔ یہ درخواست ابھی منظور نہیں ہوئی ہے، جبکہ ڈیموکریٹس نے ہیگستھ سے جنگ پر ہونے والے اخراجات کی مزید تفصیلی وضاحت پیش کرنے کا مطالبہ کیا ہے۔

یو این آئی ۔ ع ا۔

رام اللہ، اسرائیلی فوج نے قابض مغربی کنارے کے شہر الخلیل میں نافذ کیا گیا محاصرے کو پانچویں روز بھی جاری رکھا، جبکہ 4 ہزار 969 فلسطینیوں کو زبردستی بے گھر کر دیا گیا۔

الخلیل بلد یہ نے بتایا کہ شہر کے عین دیربہا اور جیلدہ علاقوں میں محاصرے کی وجہ سے گھر چھوڑنے والے فلسطینیوں کی تعداد روز بروز بڑھ رہی ہے ، ان کی صورتحال کے بارے میں معلومات فراہم کی گئی ہیں۔

بیان کے مطابق، اسرائیلی فوج کے پانچویں روز محاصرے کے تحت شہر میں زبردستی گھر چھوڑنے والے خاندانوں کی تعداد 780 تک اور بے گھر ہونے والے افراد کی مجموعی تعداد 4,969 ہو گئی ہے۔

جبری بے گھر کیے گئے افراد میں 336 شیرخوار بچے، 441 بزرگ، 216 حاملہ یا زچہ، 44 معذور اور 312 دائمی مریض شامل ہیں۔

مقامی ذرائع اور عینی شاہدین کے مطابق، اسرائیلی فوج کی اضافی قوتوں نے فوجی گاڑیوں کے ہمراہ رات گئےالخلیل کے بعض محلے میں چھاپے مارے اور فلسطینیوں کے گھروں کی تلاشی لی۔

علاوہ ازیں، شہر کے داخلی راستوں کے ساتھ ساتھ قصبوں اور پناہ گزین کیمپوں کے داخلی راستے بھی اسرائیلی فوجیوں نے بند کر رکھے ہیں اور فلسطینیوں کو گزرنے کی اجازت نہیں دی جا رہی۔

جیلدہ چوک کے نزدیک قائم فوجی چوکیوں پر فلسطینیوں کو روکا جاتا ہے، ان کی تلاشی لی جاتی ہے اور تلاشی کے دوران ان کے ساتھ بدسلوکی کی جاتی ہے۔

مزید یہ کہ محاصرے والے علاقے عین دیر بہا میں اسرائیلی فوج کو اضافی دستوں سے تقویت دی گئی، اور اسرائیلی فوجیوں نے بعض فلسطینی عمارتوں میں ٹھہر کر انہیں فوجی ہیڈکوارٹرز میں تبدیل کر دیا۔

فلسطینی اسیران سوسائٹی نے کل اپنے بیان میں کہا تھا کہ محاصرے کے دوران کیے گئے چھاپوں میں 85 فلسطینیوں کو حراست میں لیا گیا۔

الخلیل میں فوجی حملہ اور محاصرہ اس وقت شروع ہوا جب شہر کے شمال مغربی داخلی راستے کے علاقے فرش الحوا میں 23 اکتوبر کو ایک اسرائیلی چیک پوائنٹ پر ایک مسلح حملہ ہوا۔اس حملے میں 2 اسرائیلی فوجی ہلاک اور 3 زخمی ہوئے۔ حملہ کرنے والے 2 فلسطینی بھی اسرائیلی فوج کے ہاتھوں مارے گئے۔

اسرائیلی فوج نے کہا کہ الخلیل کے خلاف یہ حملہ اور محاصرہ چند روز تک جاری رہ سکتا ہے۔

اسرائیلی وزیر دفاع یسرائیل کاٹس نے محاصرے کے آغاز کے دو دن بعد کہا کہ الخلیل سے گھر چھوڑنے والے تقریباً دو ہزار فلسطینی اس وقت تک اپنے گھروں کو واپس نہیں جا سکیں گے جب تک اسرائیل شہر میں وہ عمارتیں ختم نہ کر دے جنہیں وہ حماس کا ‘انفراسٹرکچر’ قرار دیتا ہے۔

وزیراعظم بن یامین نیتن یاہو نے حملے کے بعد قابض مغربی کنارے میں 1967 کی جنگ کے بعد کے ایک وسیع ترین پیمانے کے حملے کی دھمکی دی ہے۔

الخلیل کے واقعات اکتوبر 2023 میں غزہ پٹی پر حملوں کے آغاز کے بعد سے قابض مغربی کنارے میں بڑھتے ہوئے فوجی چھاپوں، فلسطینیوں کی ہلاکتوں اور گرفتاریوں، گھروں اور کاروبار کی تباہی، زرعی اراضی کو پہنچنے والے نقصان اور جبری بے دخلی کی دیگر کارروائیوں کے ساتھ جڑی ہوئی ہیں۔

یو این آئی۔ ع ا۔