نئی دہلی، مرکزی وزیر ہردیپ سنگھ پوری کو مدھیہ پردیش سے راجیہ سبھا کی ایک نشست کے ضمنی انتخاب کے لیے بھارتیہ جنتا پارٹی (بی جے پی) کا امیدوار نامزد کیا گیا ہے۔ اس نشست کے لیے ضمنی انتخاب 12 نومبر کو ہونا ہے۔

بی جے پی کے جنرل سکریٹری ترون چُگ کی جانب سے بدھ کے روز جاری کردہ بیان کے مطابق، پارٹی کی مرکزی انتخابی کمیٹی نے مسٹر پوری کو مدھیہ پردیش سے راجیہ سبھا کا امیدوار بنانے کا فیصلہ کیا ہے۔ مسٹر پوری کی راجیہ سبھا کی موجودہ مدت 25 نومبر کو ختم ہو رہی ہے۔ وہ اس وقت اتر پردیش سے ایوان بالا کے رکن ہیں۔

اس نشست کے لیے نامزدگی کا عمل 26 اکتوبر سے شروع ہو چکا ہے اور 2 نومبر تک جاری رہے گا۔ 3 نومبر کو نامزدگی کے کاغذات کی جانچ ہوگی، جب کہ 5 نومبر تک امیدوار اپنے نام واپس لے سکیں گے۔

یہ نشست سابق مرکزی وزیر ایل مروگن کے استعفے کے باعث خالی ہوئی ہے۔

یواین آئی۔ ایف اے

نئی دہلی، مرکزی کابینہ نے 2026 سے 2033-34 تک کے لیے 1,856.67 کروڑ روپے کی لاگت سے ‘کھیلو انڈیا کھیلوں کے سامان کی تیاری کی اسکیم’ کو منظوری دے دی ہے۔ اس اسکیم کا مقصد ملک میں کھیلوں کے سامان کی تیاری، ٹیکنالوجی، تحقیق، اختراع اور برآمدات کو فروغ دینا اور عالمی بازار میں ہندوستان کی پوزیشن کو مضبوط بنانا ہے۔

وزیر اعظم نریندر مودی کی صدارت میں بدھ کے روز منعقدہ مرکزی کابینہ کی میٹنگ میں اس سلسلے میں پیش کی گئی تجویز کو منظوری دی گئی۔

میٹنگ کے بعد اطلاعات و نشریات کے وزیر اشونی ویشنو نے پریس کانفرنس میں بتایا کہ اس اسکیم کے تحت کھیلوں کے سامان کی تیاری کے مراکز قائم کیے جائیں گے، جہاں مینوفیکچررز، سپلائرز، جانچ کے مراکز اور ڈیزائن کی سہولتیں ایک ہی جگہ دستیاب ہوں گی۔ ملکی اور غیر ملکی کمپنیوں کو سرمایہ کاری کے لیے ترغیب دی جائے گی۔ اس مقصد کے لیے پیداوار میں اضافے اور مینوفیکچرنگ کی صلاحیت کو وسعت دینے سے متعلق امداد پر 1,130 کروڑ روپے خرچ کیے جائیں گے۔

انہوں نے کہا کہ اس اسکیم میں چھوٹی اور درمیانہ صنعتوں کے موجودہ پیداواری مراکز کو جدید بنانے، مشترکہ سہولتوں کی ترقی اور بین الاقوامی کھیلوں کی فیڈریشنوں سے معیار کی تصدیق حاصل کرنے کے لیے بھی امداد فراہم کرنے کی تجویز ہے۔ سرٹیفکیشن کے لیے 105 کروڑ روپے مختص کیے گئے ہیں۔ اس کے علاوہ کھیلوں کے آلات، نئے مواد اور جدید مینوفیکچرنگ ٹیکنالوجی سے متعلق تحقیق کو فروغ دیا جائے گا۔ اسٹارٹ اپس، ہنرمندی کے فروغ اور ہندوستانی کھیلوں کے سامان کی بین الاقوامی بازاروں تک رسائی بڑھانے پر بھی زور دیا جائے گا۔

مسٹر ویشنو نے کہا کہ اس اسکیم سے ملک میں کھیلوں کے سامان کی پیداواری صلاحیت مضبوط ہوگی، درآمدات پر انحصار کم ہوگا، سرمایہ کاری اور روزگار میں اضافہ ہوگا اور ہندوستانی کھیلوں کے سامان کی برآمدات کو فروغ دینے میں مدد ملے گی۔

یواین آئی۔ ایف اے

نئی دہلی، کانگریس صدر ملکارجن کھرگے نے بدھ کے روز کہا کہ ووٹ کا حق چھیننے پر آمادہ مودی حکومت اب لوگوں سے جینے کا حق بھی چھیننا چاہتی ہے۔

مسٹر کھرگے نے کہا کہ تہواروں کے موسم میں کمر توڑ مہنگائی عام لوگوں کی کمائی کا ایک ایک پیسہ نگل رہی ہے، جس سے عام خاندانوں کے لیے گھر چلانا مشکل ہوتا جا رہا ہے۔ انہوں نے مہنگائی اور گھریلو معاشی صورت حال سے متعلق اعداد و شمار کا حوالہ دیتے ہوئے حکومت کو نشانہ بنایا۔ انہوں نے دعویٰ کیا کہ غذائی مہنگائی 2.13 فیصد سے بڑھ کر 7.74 فیصد تک پہنچ گئی ہے، جب کہ خردہ مہنگائی 5.54 فیصد اور تھوک مہنگائی 11.39 فیصد ہے۔ انہوں نے یہ بھی کہا کہ گھریلو قرض میں 36.7 فیصد کا اضافہ ہوا ہے اور گھریلو مالی بچت میں چار فیصد کی کمی آئی ہے۔

کانگریس صدر نے بی جے پی کے پرانے انتخابی نعروں کا ذکر کرتے ہوئے کہا کہ اگر اقتدار میں بیٹھی بی جے پی اور وزیر اعظم نریندر مودی کو بیان بازی سے فرصت ملے تو انہیں 2014 سے پہلے اپنے اشتہار ‘بہت ہوئی مہنگائی کی مار’ کو دوبارہ دیکھنا چاہیے۔ مسٹر کھرگے نے طنز کرتے ہوئے کہا کہ عوام نے ‘اچھے دن’ کی امید میں 12 سال گنوا دیے ہیں۔

یواین آئی۔ ایف اے