کھٹمنڈو، نیپال میں تباہ کن سیلاب کے پانچ روز بعد امدادی ٹیمیں ہزاروں لاپتہ افراد کی تلاش جاری رکھے ہوئے ہیں۔ حکام کے مطابق نیپال اور تبت میں آنے والے شدید سیلاب اور مٹی کے تودے گرنے کے واقعات میں 900 سے زائد افراد ہلاک جبکہ تقریباً 5 ہزار لاپتہ ہیںلاپتہ افراد میں کئی سو افراد کے بارے میں خیال ہے کہ وہ پن بجلی کے منصوبوں کی سرنگوں میں پھنسے ہوئے ہیں، جہاں سیلاب کے ساتھ آنے والا ملبہ، کیچڑ اور چٹانیں داخل ہوگئی ہیں۔

26 اگست کو ایک گلیشیئر کے بڑے حصے کے ٹوٹنے کے بعد تباہ کن سیلاب آیا، جو تبت سے ہوتا ہوا نیپال کے علاقوں تک پہنچا۔

گلیشیئر کے ٹوٹنے کے باعث برف، چٹانوں اور پانی کی ایک بڑی مقدار نیچے کی جانب بہنے لگی اور ملبے کے ایک انتہائی طاقتور ریلے میں تبدیل ہوگئی۔ ماہرین کا خیال ہے کہ ہمالیہ میں لنگ ٹانگ لیرونگ چوٹی کے قریب ایک گلیشیئر کا حصہ ٹوٹا، جو تقریباً 5,200 میٹر کی بلندی سے تقریباً 1,200 میٹر نیچے گرا اور اپنے ساتھ چٹانیں اور ملبہ لے گیا۔

اس کے بعد یہ ریلہ دریائے لینڈے سے ٹکرایا اور نیپال کے رسوا، نواکوٹ اور دھادنگ اضلاع کی جانب جنوب کی طرف بہہ گیا۔

نیپال کے وزیر اعظم بالیندر شاہ نے اتوار کو فیس بک پر بتایا کہ تقریباً 21 ہزار سکیورٹی اہلکار امدادی کارروائیوں میں حصہ لے رہے ہیں، جبکہ شہری کارکن اور رضاکار بھی ان کے ساتھ موجود ہیں۔

نیپال نے ابتدا میں غیر ملکی امداد لینے سے انکار کیا تھا، تاہم حالیہ دنوں میں چین اور ہندوستان کے ماہرین کو امدادی کارروائیوں میں شامل ہونے کی اجازت دے دی گئی ہے۔

چین نے 2,100 سے زائد امدادی کارکن تعینات کیے ہیں اور امدادی سرگرمیوں کے لیے کم از کم 22 کروڑ یوآن فراہم کیے ہیں۔ چین کی سرکاری نشریاتی ادارے سی سی ٹی وی کے مطابق بیجنگ امدادی کارکنوں تک سامان اور ضروری اشیا فضائی راستے سے بھی پہنچا رہا ہے۔

چینی فوج لاپتہ افراد کی تلاش کے لیے انسانی زندگی کا سراغ لگانے والے آلات بھی استعمال کر رہی ہے، جن میں عام طور پر تھرمل کیمرے اور آواز کا پتہ لگانے والے آلات شامل ہوتے ہیں۔

چینی صدر شی جن پنگ نے پیر کو بشکیک میں کرغزستان کے صدر صادیر ژاپاروف سے ملاقات کے دوران کہا کہ چین سیلاب اور مٹی کے تودوں کے باعث لاپتہ چینی اور غیر ملکی شہریوں کی تلاش کر رہا ہے۔

ہندوستان نے سرنگوں میں امدادی کارروائیوں کی تربیت رکھنے والے 18 فوجی افسران اور ڈی این اے کے ذریعے ہلاک شدگان کی شناخت کے لیے فرانزک ماہرین کی چھ ٹیمیں نیپال بھیجی ہیں۔ ہندوستان نے نیپال کو انسانی امداد کی چار کھیپیں بھی فراہم کی ہیں، جن میں بجلی کے جنریٹر، خوراک، پانی صاف کرنے کی گولیاں، خیمے، کمبل، پانی کے پمپ اور ادویات شامل ہیں۔

جاری۔ یو این آئی۔ ع ا۔

واشنگٹن، امریکہ اور ایران نے رات بھر سے پیر تک ایک دوسرے کے خلاف حملے کیے، جو ایک ماہ سے زائد عرصے میں دونوں کے درمیان پہلی براہِ راست بڑی فوجی کشیدگی ہے۔ اس پیش رفت نے کئی ہفتوں کے نسبتاً پُرسکون حالات کے بعد تنازع مزید شدت اختیار کرنے کے خدشات پیدا کر دیے ہیں۔

کشیدگی کا آغاز اس وقت ہوا جب امریکی افواج نے ایران کے جنوبی علاقے میں واقع لارک جزیرے پر دو ایرانی راکٹ لانچروں کو نشانہ بنایا۔ امریکہ کا دعویٰ ہے کہ ایرانی افواج آبنائے ہرمز میں بارودی سرنگیں لے جانے والے راکٹ داغنے کی تیاری کر رہی تھیں۔ آبنائے ہرمز عالمی بحری تجارت کا ایک انتہائی اہم راستہ ہے اور حالیہ علاقائی کشیدگی کا مرکز بنی ہوئی ہے۔

ایران نے اس کے جواب میں اردن میں امریکی فوجی اہداف کی جانب میزائل داغے۔

اردن کی مسلح افواج نے کہا کہ اس کے فضائی دفاعی نظام نے اس کی فضائی حدود میں داخل ہونے والے آٹھ میزائلوں کو روک کر تباہ کر دیا۔ اردنی فوج کے مطابق میزائلوں کو شہریوں یا املاک کے لیے خطرہ بننے سے پہلے ہی ناکارہ بنا دیا گیا۔

متحدہ عرب امارات نے بھی کہا کہ اس نے اپنی علاقائی سمندری حدود کے اوپر ایران کی جانب سے آنے والے ایک ڈرون کو مار گرایا۔ اس سے قبل ایرانی سرکاری میڈیا نے دعویٰ کیا تھا کہ ایرانی افواج نے متحدہ عرب امارات میں واقع ایک امریکی اڈے کو نشانہ بنایا ہے۔

امریکی سینٹرل کمانڈ (سینٹ کام) کے ترجمان کیپٹن ٹم ہاکنز نے کہا کہ امریکی حملے میں ان ایرانی افواج کو نشانہ بنایا گیا جو آبنائے ہرمز میں بارودی سرنگیں بچھانے کی تیاری کر رہی تھیں۔

سینٹ کام نے اس کارروائی کو ایران کی ان ’’بارودی سرنگیں بچھانے والی فورسز‘‘ کے خلاف ’’محدود اور انتہائی درست کارروائی‘‘ قرار دیا، جو اس اہم آبی گزرگاہ کے لیے فوری خطرہ بن رہی تھیں۔

سینٹ کام نے سوشل میڈیا پلیٹ فارم ایکس پر ایک بیان میں کہا، ’’خطرہ ایران نے پیدا کیا تھا اور امریکی فوج نے شہری ملاحوں، تجارتی جہاز رانی اور عالمی تجارت کی آزادانہ روانی کے تحفظ کے لیے اسے ختم کر دیا۔‘‘

لارک جزیرہ جنوبی ایران میں بندر عباس کے قریب واقع ایک چھوٹا جزیرہ ہے۔ ایرانی سرکاری میڈیا نے امریکی حملے میں ایرانی فوجی اہلکاروں اور شہریوں کے جانی نقصان کی اطلاع دی ہے۔

ایران کا کہنا ہے کہ اس نے اتوار کو لارک جزیرے پر امریکی حملے کے بعد اردن میں واقع دو امریکی اڈوں پر میزائل داغے۔

ایرانی خبر رساں ایجنسیوں کے مطابق اسلامی پاسداران انقلاب کور (آئی آر جی سی) نے ایک بیان میں کہا کہ مشترکہ میزائل اور ڈرون کارروائی، جسے اس نے ’’جارح کو سزا‘‘ کا نام دیا، میں اردن کے کنگ حسین اور الازرق فوجی اڈوں کو نشانہ بنایا گیا۔

ایرانی صدر مسعود پزشکیان نے کہا کہ تہران جنگ نہیں چاہتا، تاہم حملوں کا جواب ضرور دے گا۔ سرکاری نشریاتی ادارے آئی آر آئی بی کے مطابق انہوں نے کہا، ’’ہم جنگ کے خواہاں نہیں ہیں، لیکن جارحیت کے مقابلے میں ہم کبھی ہاتھ پر ہاتھ رکھ کر نہیں بیٹھیں گے اور ہم فیصلہ کن جواب دینے کی صلاحیت رکھتے ہیں۔‘‘

ایران کی طاقتور اسلامی پاسداران انقلاب کور (آئی آر جی سی) نے امریکی حملے کو ٹرمپ انتظامیہ کی ’’اسٹریٹجک اور مہلک غلطی‘‘ قرار دیتے ہوئے جوابی کارروائی کا عزم ظاہر کیا۔

تازہ حملوں کا یہ تبادلہ صدر ڈونلڈ ٹرمپ کے چند روز قبل آبنائے ہرمز کو بارودی سرنگوں سے پاک قرار دینے کے بعد ہوا ہے۔ امریکی فوج نے گزشتہ ہفتے کہا تھا کہ اس نے اس اہم آبی گزرگاہ میں بین الاقوامی بحری راستوں سے سمندری بارودی سرنگیں صاف کرنے کا عمل مکمل کر لیا ہے۔

تازہ حملے ایران کے خلاف واشنگٹن کی حالیہ حکمت عملی میں تبدیلی کی نشاندہی کرتے ہیں، کیونکہ امریکا حالیہ عرصے میں تہران پر بنیادی طور پر اقتصادی دباؤ بڑھانے پر زور دے رہا تھا۔ صدر ٹرمپ نے پابندیوں پر زیادہ توجہ مرکوز کرتے ہوئے کہا ہے کہ امریکا کی مالیاتی طاقت ایران کو ان کے بقول ’’بہت بڑی فتح‘‘ کی جانب دھکیل سکتی ہے۔

یو این آئی۔ ع ا۔

کٹھمنڈو، تباہ کن سیلابوں نے چین سے ملحقہ نیپال میں کم از کم 903 افراد کی جانیں لے لیں، جبکہ ملک میں لاپتہ افراد کی تعداد 4,247 تک پہنچ گئی ہے، اور امدادی کام چھٹے دن بھی جاری ہیں۔

چینی سرکاری میڈیا نے پہلے تصدیق کی کہ بدھ کی اس آفت کے بعد تبت میں 16 افراد ہلاک اور 546 لاپتہ ہوئے، جس سے مجموعی ہلاکتیں 919 اور لاپتہ افراد کی تعداد 4,793 ہو گئی۔

نیپال کی لاپتہ افراد کی فہرست میں 592 غیر ملکی شامل ہیں۔

نیشنل ڈیزاسٹر رسک ریڈکشن اینڈ مینجمنٹ اتھارٹی کے مطابق اس میں دریا کنارے جاری ہائیڈروپاور منصوبوں کے 933 کارکن بھی شامل ہیں جنہیں طغیانی نے بہا دیا۔

نیپال کی آفات ایجنسی نے پیر کی صبح اپنی تازہ کاری میں 3,655 شہریوں کو لاپتہ درج کیا۔

لاپتہ افراد میں 45 نیپالی فوجی، 38 پولیس اور مسلح پولیس اہل کار، اور 19 کسٹمز اور امیگریشن اہل کار شامل ہیں۔

ہندوستان میں، اتر پردیش کے حکام نے کہا کہ انہوں نے نیپال سے بہنے والی ندیوں سے 17 لاشیں برآمد کی ہیں، جنہیں سیلاب کے متاثرین سمجھا جا رہا ہے۔

ہندوستانی حکام لاشوں کی شناخت کرنے کی کوشش کر رہے ہیں اور انہیں ہلاکتوں کی مجموعی تعداد میں شامل نہیں کیا گیا ہے۔

نیپالی فوج کے ترجمان بریگیڈیر جنرل راجہ رام باسنیٹ،، نے کہا کہ حکام نے آفت زدہ علاقوں میں اپنی ریسکیو کوششیں تیز کر دی ہیں۔

بدھ کے فلیش سیلاب ایک گلیشیئر کے منہدم ہونے کے بعد شروع ہوئے جو ہمالیائی علاقے کے بالائی حصے میں تھا۔ سیٹلائٹ تصاویر کا تجزیہ کرنے والے سائنسدانوں نے کہا کہ ہمالیہ میں ایک گلیشیئر کے نیچے بیڈ راک منہدم ہو گیا، جس کے ساتھ گلیشیئر کا ایک حصہ بھی نیچے آ گیا۔ چٹانوں کا یہ گرنا اس قدر شدید تھا کہ اسے 5.2 شدت کے سسمک واقعے کے طور پر ریکارڈ کیا گیا۔

پھر چٹانیں اور پگھلا ہوا پانی نیچے وادیوں میں بہہ کر ندیوں کو پھلا دیا، جس سے ایک طاقت ور سیلاب آیا جس نے تبت اور نیپال میں عمارتوں، پلوں اور زمین کو بہا دیا۔

یو این آئی۔ ع ا۔