نئی دہلی، وزیردفاع راج ناتھ سنگھ منگل کے روز یہاں عوامی شعبے کے 16 دفاعی اداروں کی سالانہ کارکردگی کا جائزہ لیں گے، جس میں نئی ملکی ٹیکنالوجی کو تیار کرنے اور برآمدات کو بڑھانے کی اہمیت پر توجہ مرکوز کی جائے گی وزارتِ دفاع نے پیر کے روز بتایا کہ اس پروگرام کے دوران سات اداروں – ہندوستان ایروناٹکس لمیٹڈ، مزگاؤں ڈاک شپ بلڈرز لمیٹڈ، بھارت الیکٹرانکس لمیٹڈ، بھارت ڈائنامکس لمیٹڈ، گارڈن ریچ شپ بلڈرز اینڈ انجینئرز لمیٹڈ، بی ای ایم ایل، اور مِِشر دھاتو نگم لمیٹڈ (مدھانی) کے چیف منیجنگ ڈائریکٹرز مالیاتی سال 26-2025 کے لیے حکومت کے ایکویٹی شیئرز کے منافع کے چیک دفاعی وزیر کو پیش کریں گے۔

اس موقع پر مسٹر سنگھ چار کتابوں کا اجراء کریں گے۔ ان میں ‘آتم نربھر رکشا اپکرم – آتم نربھرتا کی اور رکشا اپکرموں کی یاترا’، ‘دشا، رکشا پرودیوگکیوں ایوم آدھونک و نِرمانو پرکریاؤں کے بارے میں چھاتراؤں میں ویوہارک جاگروکتا کے لیے رکشا اپکرموں کی ایک پہل’، ‘ایچ اے ایل کا آدھونیکی کرن روڈ میپ’ اور ‘ایچ اے ایل کا سودیشی کرن روڈ میپ’ شامل ہیں۔

مالی سال 26-2025 میں عوامی شعبے کے اداروں کی کارکردگی قابلِ ستائش رہی ہے۔ ان کا کل کاروبار 1.29 لاکھ کروڑ روپے رہا، جو مالیاتی سال 25-2024 کے اعداد و شمار سے 15.4 فیصد زیادہ ہے۔ دفاعی شعبے کے اداروں نے 26-2025 میں 23,136 کروڑ روپے کا مجموعی بعد از ٹیکس منافع درج کیا، جو گزشتہ سال کے مقابلے میں 15.6 فیصد کا اضافہ ہے۔ معلوم ہو کہ 26-2025 میں دفاعی اداروں نے گزشتہ مالیاتی سال کے مقابلے میں برآمدات میں 151.2 فیصد کا اضافہ حاصل کیا۔

یو این آئی ایف اے

نئی دہلی، بھارتیہ جنتا پارٹی (بی جے پی) نے وزیرِ اعظم نریندر مودی کے دورہ ازبکستان کو تاریخی قرار دیتے ہوئے کہا ہے کہ اس دوران دونوں ممالک کے درمیان یورینیم کی سپلائی کے تعلق سے ہوا معاہدہ ملک کی مستقبل کی توانائی ضروریات کے لیے اہم ہے بی جے پی کے قومی ترجمان سدھانشو ترویدی نے پیر کے روز یہاں مسٹر مودی کے دورہ ازبکستان پر ردِعمل کا اظہار کرتے ہوئے نامہ نگاروں سے کہا کہ ان کا ازبکستان کا دورہ تاریخی رہا ہے۔ انہوں نے کہا، “پورا ملک جانتا ہے کہ تاشقند ہی وہ جگہ ہے، جہاں ہمارے سابق وزیرِ اعظم لال بہادر شاستری کی پراسرار حالات میں موت ہو گئی تھی۔”

انہوں نے کہا کہ اس دور میں کئی ایسی طاقتیں بھی تھیں جو جوہری توانائی کے شعبے میں ہندوستان کے خود انحصاری کی طرف بڑھتے قدموں کے حق میں نہیں تھیں۔ آج، تقریباً 60 سال بعد تاشقند کی اسی زمین سے مسٹر مودی نے ہندوستان کی توانائی سکیورٹی اور جوہری توانائی کے تسلسل کو یقینی بنانے کی سمت میں یورینیم کی سپلائی کے تعلق سے ایک تاریخی معاہدے پر دستخط کیے ہیں۔ یہ معاہدہ ہندوستان کی مستقبل کی توانائی ضروریات کے لیے اہم ہے۔

بی جے پی ترجمان نے کہا کہ یہ تبدیلی صرف ایک معاہدے تک محدود نہیں ہے، بلکہ یہ دکھاتی ہے کہ گزشتہ چھ دہائیوں میں ہندوستان کی عالمی حیثیت اور اسٹریٹجک صلاحیتیں کیسے بدلی ہیں۔ انہوں نے بتایا کہ مسٹر مودی کے دورے کے دوران یورینیم کی سپلائی کے ساتھ ساتھ، 2030 تک تجارت کو موجودہ تقریباً ایک ارب ڈالر سے بڑھا کر پانچ ارب ڈالر کرنے کا ہدف بھی مقرر کیا گیا ہے۔ ساتھ ہی، اہم معدنیات کی سپلائی کے تعلق سے بھی ایک اہم معاہدہ ہوا ہے۔

مسٹر ترویدی نے کہا کہ ہندوستان اور ازبکستان کے درمیان قدیم ثقافتی تعلقات کے نقطہء نظر سے مسٹر مودی کا یہ دورہ بے حد اہم رہا ہے۔ ازبکستان کے ترمذ علاقے میں بھگوان بدھ سے جڑے ورثے کے مقامات کے تحفظ کی ذمہ داری ہندستانی آثارقدیمہ (اے ایس آئی) کی جانب سے لینا ہماری مشترکہ تہذیبی میراث کو نئی مضبوطی دیتا ہے۔

انہوں نے کہا کہ اس دوران ازبکستان کی جانب سے مسٹر مودی کو اپنے اعلیٰ ترین شہری اعزاز سے نوازنا بھی ایک تاریخی لمحہ ہے۔ یہ صرف وزیرِ اعظم کا ذاتی اعزاز نہیں ہے، بلکہ ہندوستان کی بڑھتی ہوئی عالمی ساکھ، پہچان اور قومی وقار کا احترام ہے۔

یو این آئی ایف اے

نئی دہلی، ہندوستان اور برازیل نے آئندہ پانچ برسوں میں باہمی تجارت کو دوگنا کرکے 30 ارب ڈالر تک پہنچانے کا ہدف مقرر کیا ہےبرازیل کے دارالحکومت برازیلیا میں منعقدہ بھارت-برازیل تجارتی نگرانی نظام (ٹی ایم ایم) کے آٹھویں اجلاس میں بھارت -برازیل اسٹریٹجک شراکت داری کو مضبوط بنانے والے ادارہ جاتی ڈھانچے اور دونوں ممالک کے درمیان اسٹریٹجک و اقتصادی تعلقات کو مزید مستحکم کرنے کے مشترکہ عزم پر تبادلہ خیال کیا گیا۔ دونوں فریقوں نے زیادہ متنوع، متوازن اور پائیدار شراکت داری کے ذریعے، بالخصوص دواسازی، کیمیکلز، انجینئرنگ مصنوعات اور مشینری کے شعبوں میں، 2030 تک باہمی تجارت کو 30 ارب ڈالر تک پہنچانے کے عزم کا اظہار کیا۔

اجلاس کی مشترکہ صدارت وزارت تجارت کے سکریٹری راجیش اگروال اور برازیل کی خارجہ تجارت کی سکریٹری تاتیانا لاسردا پرازیریس نے کی۔ راجیش اگروال نے برازیل کی حکومت میں ترقی، صنعت، تجارت اور خدمات کے وزیر مارسیو الیاس روزا سے بھی ملاقات کی اور باہمی تجارت و سرمایہ کاری کے تعلقات کو مزید مضبوط بنانے اور ترجیحی شعبوں میں اقتصادی تعاون بڑھانے پر تبادلہ خیال کیا۔

بھارت اور برازیل کے درمیان باہمی تجارت میں مسلسل اضافہ دیکھا گیا ہے۔ مالی سال 2025-26 میں یہ تجارت 15.07 ارب ڈالر تک پہنچ گئی ہے۔

بات چیت کے دوران دونوں فریقوں نے بھارت-مرکوسور کے حوالے سے طے شدہ شرائط پر ہونے والی پیش رفت کا جائزہ لیا۔ سال 2025 میں طے پانے والے اس معاہدے کے تحت بھارت-مرکوسور باہمی تجارت کو 20.84 ارب ڈالر تک پہنچانے کا ہدف مقرر کیا گیا ہے۔ بھارت-مرکوسور ترجیحی تجارتی معاہدے میں توسیع اور جدید کاری کے وسیع امکانات موجود ہیں۔

اجلاس میں بھارتی دواسازی کی مصنوعات کے لیے مارکیٹ تک رسائی کو آسان بنانے پر بھی تبادلہ خیال کیا گیا۔ بھارت نے زیادہ مستحکم ضابطہ جاتی طریقہ کار کی حمایت اور مارکیٹ تک وسیع رسائی کو آسان بنانے کی ضرورت پر زور دیا۔ بھارت نے کہا کہ وہ سستی اور معیاری ادویات کی دستیابی میں اپنا کردار ادا کرسکتا ہے اور زیادہ قابل رسائی صحت خدمات کی فراہمی کی کوششوں کو مزید مضبوط بنا سکتا ہے۔

جاری۔یواین آئی۔ ظ ا