میڈرڈ، اسپین کے صوبہ تولیڈو میں بدھ کے روز دو تیز رفتار ٹرینوں کے درمیان تصادم میں کم از کم 46 افراد ہلاک ہو گئے۔ حادثہ میڈرڈ کو جنوبی علاقے اندلس سے جوڑنے والی ریلوے لائن پر پیش آیا۔ علاقائی حکومت کے ترجمان، ریلوے بنیادی ڈھانچے کے منتظم ادارے ایڈف اور علاقائی شہری تحفظ کے ذرائع نے یہ اطلاع دی۔

کاستیا لا مانچا کی علاقائی حکومت کے ترجمان کے مطابق، حادثہ صبح 8 بج کر 54 منٹ پر (جی ایم ٹی کے مطابق صبح 7 بج کر 54 منٹ) پیش آیا۔ اس میں رینفے اور ایریو کمپنیوں کی ٹرینیں شامل تھیں۔ حادثے کے دوران ایریو ٹرین کے دو ڈبے پٹری سے اتر گئے۔

ریلوے بنیادی ڈھانچے کے منتظم ادارے ایڈف کے مطابق، تصادم مورا، اورگاز اور اوردا قصبوں کے درمیان ہوا۔ اس میں سرکاری کمپنی رینفے کی ایک ٹرین اور نجی کمپنی ایریو کی دوسری ٹرین شامل تھی۔ دونوں ٹرینیں جنوبی اندلس کے شہر سیویل کو میڈرڈ سے جوڑنے والے راستے پر چل رہی تھیں۔

علاقائی حکومت کے ترجمان نے بتایا کہ حادثے کی وجوہات کا ابھی تعین نہیں ہو سکا ہے اور زخمیوں کی تعداد کی تصدیق بھی باقی ہے۔

ایڈف نے کہا کہ دونوں ٹرینوں کے پیچھے سے ٹکرانے کے بعد میڈرڈ-اندلس ہائی اسپیڈ ریلوے لائن پر ٹرینوں کی آمد و رفت معطل کر دی گئی ہے۔

کاستیا لا مانچا کی علاقائی حکومت کی ترجمان ایسٹر پادیلا نے بتایا کہ ایک ٹرین میں 146 مسافر اور ایک شیر خوار بچہ سوار تھا، جبکہ دوسری ٹرین میں 397 مسافر موجود تھے۔

وزیر اعظم پیڈرو سانچیز نے ”ٹرین کے سنگین حادثے” پر صدمے کا اظہار کیا اور کہا کہ ہنگامی خدمات کی ٹیمیں متاثرہ افراد کی مدد کے لیے جائے حادثہ پر کام کر رہی ہیں۔

سانچیز نے سوشل میڈیا پلیٹ فارم ایکس پر ایک پوسٹ میں کہا، ”تمام متاثرین اور ان کے اہل خانہ کے لیے میری ہمدردی، یکجہتی اور حمایت۔”

اوردا کے میئر مینوئل گالان نے ریڈیو اسٹیشن کادینا سیر سے گفتگو کرتے ہوئے بتایا کہ شہری تحفظ کی ایجنسی کی درخواست پر زخمی مسافروں کو منتقل کرنے اور ان کی دیکھ بھال کے لیے ایک مرکز تیار کیا جا رہا ہے۔

ریال میڈرڈ، بارسلونا اور ایٹلیٹیکو میڈرڈ سمیت فٹ بال کلبوں نے بھی حادثے کے متاثرین اور ان کے اہل خانہ سے تعزیت کا اظہار کیا ہے۔

یہ حادثہ اسی ریلوے لائن پر انہی کمپنیوں کی تیز رفتار ٹرینوں کے درمیان پیش آنے والے ایک اور تصادم کے نو ماہ بعد ہوا ہے، جس میں 46 افراد ہلاک ہوئے تھے۔

جنوری میں صوبہ قرطبہ کے قریب اداموز کے مقام پر پیش آنے والے اس حادثے میں پٹری سے اترنے والی ایک ٹرین سامنے سے آنے والی دوسری ٹرین سے ٹکرا گئی تھی۔ اس واقعے کے بعد حالیہ برسوں میں ریلوے کی دیکھ بھال پر ہونے والی سرمایہ کاری کے حوالے سے بحث دوبارہ تیز ہو گئی تھی۔

یو این آئی۔ ع ا۔

برلن، جرمنی کے صوبہ زیریں ساکسونیاکےنیوسٹاد ایم روب برگ شہر میں ایک گاڑی کے جان بوجھ کر شہریوں پر چڑھانے کے نتیجے میں کم از کم 4 افراد زخمی ہو گئے۔

جرمن نیوز ایجنسی (دی پی اے) نے ہانوور کے پولیس ترجمان کے حوالے سے بتایا کہ ہانوور کے قریب واقع نیوسٹاد ایم روب برگ میں گزشتہ شب ایک شخص نے گاڑی کو ہجوم پر چڑھا دیا۔

جائے وقوعہ کے قریب ٹریفک پولیس کے اہلکاروں نے گاڑی کو روکنے کے لیے اس پر فائرنگ کی۔

گاڑی میں سوار مشتبہ افراد، جن کی تعداد کا تاحال علم نہیں ہو سکا، جائے وقوعہ سے فرار ہو گئے۔ مشتبہ افراد کی گرفتاری کے لیے شروع کردہ کارروائی تا حال کامیاب نہیں ہو سکی۔

پولیس ترجمان نے کہا کہ مشتبہ افراد نے ہجوم کو حادثاتی طور پر نہیں بلکہ غالباً خاص طور پر نشانہ بنایا؛ اس واقع میں 4 سے 5 افراد زخمی ہوئے ہیں، جن میں سے بعض شدید زخمی ہیں۔”

یو این آئی۔ ع ا۔

تل ابیب، اسرائیل کے وزیر اعظم بنجامن نیتن یاہو کا اتحاد بدھ کو پارلیمانی انتخابات کے جزوی نتائج میں آگے ہے، لیکن اسے پارلیمنٹ میں اکثریت حاصل ہوتی نظر نہیں آ رہی ہے۔ اس صورتحال میں ملک کا سیاسی مستقبل غیر یقینی ہو گیا ہے اور اپوزیشن جماعتیں حکومت سازی کے لیے اپنے امکانات کا جائزہ لے رہی ہیں۔

مرکزی انتخابی کمیٹی کے جاری کردہ جزوی نتائج کے مطابق، تقریباً 55 فیصد ووٹوں کی گنتی کے بعد 120 رکنی کنیسٹ (اسرائیلی پارلیمنٹ) میں نیتن یاہو کے اتحاد کو 56 نشستیں حاصل ہوئی ہیں۔ سابق فوجی سربراہ گادی آئزن کوٹ کی قیادت والے اپوزیشن اتحاد کو 49 نشستیں ملنے کا امکان ہے، جبکہ ذرائع ابلاغ کے اندازوں کے مطابق عرب قیادت والی جماعتیں 16 نشستیں حاصل کر سکتی ہیں۔

اگر اپوزیشن رہنما عرب جماعتوں کے ساتھ تعاون پر آمادہ ہو جاتے ہیں تو یہ جماعتیں حکومت سازی میں فیصلہ کن کردار ادا کر سکتی ہیں۔ دونوں عرب جماعتوں کو اب تک کے کسی بھی انتخاب کے مقابلے میں زیادہ نشستیں ملنے کا امکان ہے۔ عرب شہریوں میں ووٹنگ کی شرح میں اضافے کے بعد یہ پیش رفت سامنے آئی ہے۔ عرب شہری اسرائیل کی مجموعی آبادی کا تقریباً پانچواں حصہ ہیں اور ان میں سے بہت سے خود کو اسرائیل کے فلسطینی شہری قرار دیتے ہیں۔

اسرائیل کے بڑے ٹیلی ویژن نیٹ ورکس کے ایگزٹ پول کے مطابق، ووٹروں کی اکثریت نے نیتن یاہو کے اتحاد کی مخالف جماعتوں کی حمایت کی ہے، تاہم ان کی لیکوڈ پارٹی سب سے بڑی واحد جماعت برقرار ہے۔ نیتن یاہو اور اپوزیشن، دونوں میں سے کسی کے پاس بھی حکومت سازی کے لیے درکار 61 نشستیں حاصل کرنے کا واضح راستہ نظر نہیں آ رہا ہے۔

نیتن یاہو کے موجودہ اتحاد میں شامل انتہائی قوم پرست اور الٹرا آرتھوڈوکس یہودی جماعتوں کی مجموعی نشستیں کم ہونے کا امکان ہے۔ اس اتحاد کو سبکدوش ہونے والی پارلیمنٹ میں 68 نشستیں حاصل تھیں۔

نیتن یاہو اور آئزن کوٹ، دونوں کو حکومت سازی کے لیے مطلوبہ اکثریت حاصل کرنے کی خاطر مشکل مذاکرات کا سامنا کرنا پڑ سکتا ہے۔

عرب جماعتوں کی بہتر کارکردگی ایسے وقت میں سامنے آئی ہے جب عرب آبادی والے علاقوں میں جرائم اور تشدد سے نمٹنے کے معاملے پر دائیں بازو کی سخت گیر حکومت کے خلاف وسیع پیمانے پر ناراضگی پائی جاتی ہے۔ تاہم، مقامی ذرائع ابلاغ کے مطابق، نیتن یاہو اور اپوزیشن کے کئی رہنما عرب جماعتوں کی حمایت سے حکومت بنانے سے انکار کر چکے ہیں۔ ان کا استدلال ہے کہ عرب جماعتوں کی شمولیت سے قومی سلامتی اور علاقائی تنازعات کے حوالے سے اسرائیل کی پالیسی متاثر ہو سکتی ہے۔

اگر اپوزیشن رہنما اپنا موقف تبدیل کر لیتے ہیں تو وہ ممکنہ طور پر حکومت تشکیل دے کر نیتن یاہو کے دور اقتدار کا خاتمہ کر سکتے ہیں۔ تاہم، عرب ارکان پارلیمنٹ کے ساتھ تعاون کے معاملے پر اپوزیشن کے اندر اختلافات آئزن کوٹ کی اقتدار حاصل کرنے کی کوششوں کو پیچیدہ بنا سکتے ہیں۔

یہ انتخابات 7 اکتوبر 2023 کو حماس کی قیادت میں ہونے والے حملوں کے بعد اسرائیل میں پہلے عام انتخابات ہیں۔ ان حملوں نے اسرائیل کی سلامتی کے نظام کی سنگین خامیوں کو اجاگر کیا تھا اور ایک ایسے علاقائی تنازعے کو جنم دیا جس میں غزہ، لبنان اور شام بھی شامل ہو گئے۔ اسرائیل ایران کے ساتھ براہ راست تصادم کے دو ادوار سے بھی گزر چکا ہے، جبکہ نیتن یاہو مزید فوجی کارروائیوں کی وکالت کرتے رہے ہیں۔

لبنان اور ایران سمیت متعدد محاذوں پر تقریباً تین برس سے جاری جنگ کے بعد انتخابی مہم میں سلامتی اور ملک کے مستقبل کی سمت اہم موضوعات رہے۔

اسرائیل کے سب سے طویل عرصے تک وزیر اعظم رہنے والے نیتن یاہو نے موقف اختیار کیا کہ ان کی حکومت کو اپنے فوجی اہداف حاصل کرنے اور مخالفین پر دباؤ برقرار رکھنے کے لیے مزید وقت درکار ہے۔

آئندہ چند روز میں ووٹوں کی گنتی مکمل ہونے کے ساتھ نشستوں کے حتمی اندازوں میں تبدیلی آ سکتی ہے۔

نتائج کی توثیق کے بعد صدر اسحاق ہرزوگ سیاسی جماعتوں کے نمائندوں سے مشاورت کریں گے اور اس کے بعد اس امیدوار کو حکومت بنانے کی دعوت دیں گے جس کے بارے میں خیال ہوگا کہ وہ پارلیمنٹ میں اکثریت حاصل کر سکتا ہے۔

یو این آئی ۔ ع ا۔