جموں، بھارتیہ جنتا پارٹی (بی جے پی) کے جموں و کشمیر صدر اور راجیہ سبھا کے رکن پارلیمنٹ ست شرما نے بدھ کو جموں ریلوے اسٹیشن کے قریب واقع شیو مارکیٹ کا دورہ کیا اور وہاں بھیانک آتشزدگی سے دکانوں کو پہنچنے والے نقصان اور تاجروں کے بھاری مالی خسارے کا جائزہ لیا۔ انہوں نے متاثرین کو یقین دلایا کہ ان کے مسائل وزیر اعلیٰ کے سامنے اٹھائے جائیں گے اور انہیں معاوضہ دلانے کی ہر ممکن کوشش کی جائے گی۔

رکن اسمبلی وکرم رندھاوا کے ہمراہ ست شرما نے متاثرہ دکانداروں سے ملاقات کی، آگ سے ہونے والی تباہی کا جائزہ لیا اور انہیں ہر ممکن مدد فراہم کرنے کی یقین دہانی کرائی۔

صورت حال پر تشویش ظاہر کرتے ہوئے ست شرما نے کہا کہ آتشزدگی نے برسوں کی محنت، جمع پونجی اور روزگار کو تباہ کردیا ہے۔ اس حادثے کے باعث کئی خاندانوں کا مستقبل غیر یقینی ہوگیا ہے، خصوصاً ایسے وقت میں جب تہواروں کا موسم جاری ہے۔

ست شرما نے کہاکہ ”شیو مارکیٹ کے تاجروں کو زبردست نقصان پہنچا ہے۔ برسوں کی محنت اور ان کی جمع پونجی چند لمحوں میں راکھ ہوگئی۔ ہم ان خاندانوں کو مصیبت کی اس گھڑی میں خود کو بے سہارا محسوس نہیں کرنے دے سکتے۔ بی جے پی مشکل ترین حالات میں عوام کے ساتھ کھڑی رہتی ہے اور متاثرین کی مدد کے لیے ہر ممکن سنجیدہ کوشش کرے گی۔”

انہوں نے تاجروں کو یقین دلایا کہ وہ اس معاملے کو جموں و کشمیر کے وزیر اعلیٰ کے سامنے اٹھائیں گے اور متاثرہ تاجروں کو مالی امداد دلانے کے لیے تمام ممکنہ راستے اختیار کریں گے۔ انہوں نے کہا کہ چاہے مناسب ریلیف فنڈ کے ذریعے مدد فراہم کرنے کا معاملہ ہو، کسی موجودہ سرکاری اسکیم کے تحت امداد کی فراہمی ہو یا مرکز کے زیر انتظام علاقے کی حکومت کی جانب سے خصوصی راحت اور بازآبادکاری پیکیج کا اعلان، وہ تمام قابل عمل امکانات کے لیے کوشش کریں گے۔

ست شرما نے انتظامیہ سے مطالبہ کیا کہ نقصانات کا جلد از جلد تخمینہ لگایا جائے اور متاثرین کو قواعد کے مطابق ہر ممکن امداد فراہم کی جائے۔ انہوں نے دہرایا کہ بی جے پی متعلقہ حکام کے سامنے اس معاملے کو مسلسل اٹھائے گی، تاکہ متاثرہ تاجروں کے جائز مطالبات پر مناسب توجہ دی جاسکے۔

رکن اسمبلی وکرم رندھاوا نے بھی متاثرین کے ساتھ یکجہتی کا اظہار کرتے ہوئے کہا کہ اس حادثے نے برسوں کی محنت اور قیمتی تجارتی سامان کو راکھ میں تبدیل کردیا ہے۔

انہوں نے دکانداروں کو یقین دلایا کہ ان کے جائز مطالبات متعلقہ محکموں کے سامنے اٹھائے جائیں گے اور انہیں راحت و معاوضہ فراہم کرنے کے لیے ضروری اقدامات کیے جائیں گے۔

یواین آئی۔ ظ ا

سری نگر، جموں و کشمیر کے وزیر اعلیٰ عمر عبداللہ نے منگل کو اپنی کابینہ میں پہلی مرتبہ توسیع کی۔
نیشنل کانفرنس (این سی) کے چار ارکان اسمبلی علی محمد ساگر، میر سیف اللہ، شمیمہ فردوس اور الطاف احمد وانی عرف کلو نے وزیر کے عہدے کا حلف لیا۔ چاروں وزراء کا تعلق وادیٔ کشمیر سے ہے۔

لیفٹیننٹ گورنر منوج سنہا نے منگل کو لوک بھون میں منعقدہ تقریبِ حلف برداری میں جموں و کشمیر کی وزارتی کونسل میں شامل کیے گئے نئے وزراء کو عہدے اور رازداری کا حلف دلایا۔ اس موقع پر وزیر اعلیٰ عمر عبداللہ بھی موجود تھے۔

تقریب میں جموں و کشمیر اسمبلی کے اسپیکر عبدالرحیم راتھر، جموں و کشمیر نیشنل کانفرنس کے صدر فاروق عبداللہ، نائب وزیر اعلیٰ سریندر کمار چودھری، وزراء سکینہ مسعود ایتو، جاوید احمد رانا اور جاوید احمد ڈار، رکن پارلیمنٹ گرویندر سنگھ اوبرائے سمیت کئی معزز شخصیات اور سینئر افسران موجود تھے۔

کابینہ میں شامل کیے گئے نئے وزراء میں سری نگر کے خان یار حلقے کے رکن اسمبلی علی محمد ساگر، ترہگام کے رکن اسمبلی میر سیف اللہ، پہلگام کے رکن اسمبلی الطاف احمد کلو اور سری نگر کے حبہ کدل حلقے کی رکن اسمبلی شمیمہ فردوس شامل ہیں۔

واضح رہے کہ علی محمد ساگر اور میر سیف اللہ اس سے قبل 2008 سے 2014 تک عمر عبداللہ کی قیادت والی حکومت میں وزیر رہ چکے ہیں۔

ان چاروں ارکان اسمبلی کو کابینہ میں شامل کرنے اور ستیش شرما کو وزارت سے ہٹائے جانے کے بعد اب وزیر اعلیٰ سمیت وزارتی کونسل کے ارکان کی مجموعی تعداد نو ہو گئی ہے، جو مقررہ زیادہ سے زیادہ حد ہے۔ عمر عبداللہ نے آزاد رکن اسمبلی ستیش شرما کو وزارتی کونسل سے ہٹا دیا ہے۔ اس کے نتیجے میں جموں خطے کے میدانی علاقوں کو کابینہ میں کوئی نمائندگی حاصل نہیں رہی۔

ستیش شرما کے پاس خوراک، شہری رسد و امور صارفین، ٹرانسپورٹ، سائنس و ٹیکنالوجی، انفارمیشن ٹیکنالوجی، نوجوانوں کی خدمات و کھیل اور اے آر آئی و تربیت جیسے محکموں کی ذمہ داری تھی۔

جموں و کشمیر میں عمر عبداللہ کی حکومت کے قیام کے دو سال سے زیادہ عرصے بعد کابینہ میں یہ توسیع کی گئی ہے۔ آئینی دفعات کے مطابق، 90 رکنی اسمبلی والی ریاست جموں و کشمیر میں وزیر اعلیٰ سمیت وزارتی کونسل کے ارکان کی زیادہ سے زیادہ تعداد نو ہو سکتی ہے۔

نیشنل کانفرنس کے صدر فاروق عبداللہ نے کہاکہ ”کابینہ میں ردوبدل ایک بہت اچھا قدم ہے۔ ان لوگوں کو کام کرنے اور عوام کے مسائل کم کرنے کی کوشش کرنے کا موقع ملے گا۔”

تاہم، کابینہ میں توسیع کے معاملے پر نیشنل کانفرنس کے بعض رہنماؤں میں ناراضگی بھی دیکھی گئی۔ پارٹی کے سینئر رہنما مبارک گل نے کابینہ میں جگہ نہ ملنے پر عوامی طور پر مایوسی کا اظہار کیا۔

مسٹر گل نے سری نگر میں لوک بھون کے باہر صحافیوں سے بات کرتے ہوئے کہاکہ ”میں اب تک 30 حلف برداری کی تقریبات میں شرکت کر چکا ہوں۔ ہر مرتبہ مجھے کابینہ سے باہر رکھا گیا اور آج بھی مجھے باہر ہی رکھا گیا ہے۔”

مبارک گل کے حامیوں نے پارٹی ہیڈکوارٹر میں احتجاج بھی کیا۔ ان کی جانب سے ناراضگی ظاہر کیے جانے کے فوراً بعد نیشنل کانفرنس کے صدر فاروق عبداللہ نے ان سے رابطہ کیا اور انہیں پارٹی کا نیا جنرل سکریٹری نامزد کر دیا۔

پارٹی کے ایک اور رکن اسمبلی عبدالحمید لَرمی نے بھی کابینہ میں شامل نہ کیے جانے پر مایوسی کا اظہار کیا۔

یواین آئی۔ ط ا

سرینگر، سرینگر پولیس نے خان یار علاقے میں ایک مکان میں چوری کے الزام میں دو گھریلو ملازمین کو گرفتار کیا ہے۔ پولیس کے مطابق، ان کے قبضے سے چوری کیے گئے سونے کے زیورات برآمد ہوئے ہیں، جن کی مالیت تقریباً 45 لاکھ روپے بتائی گئی ہے۔

پولیس اسٹیشن خان یار کو 25 اکتوبر کو مسکین باغ، سرینگر کے رہنے والے بشارت حسین کی جانب سے شکایت موصول ہوئی تھی۔ شکایت میں انہوں نے اپنے مکان سے قیمتی سونے کے زیورات چوری ہونے کی اطلاع دی تھی۔

شکایت کی بنیاد پر پولیس نے خان یار پولیس اسٹیشن میں بھارتیہ نیائے سنہتا (بی این ایس) کی دفعہ 306 کے تحت ایف آئی آر درج کرکے تحقیقات شروع کر دی تھیں۔

پولیس نے بتایا کہ ملزمان کی شناخت اور گرفتاری کے لیے متعدد ٹیمیں تشکیل دی گئیں۔ تفتیش، انسانی ذرائع سے حاصل ہونے والی معلومات اور تکنیکی نگرانی کی مدد سے پولیس ٹیموں نے دونوں ملزمان کا سراغ لگا کر انہیں گرفتار کر لیا۔ ان کی شناخت 24 سالہ نکیتا داس اور 28 سالہ دیپ باروا کے طور پر ہوئی ہے۔ دونوں کا تعلق آسام کے ضلع موریگاؤں سے ہے۔

پولیس کے مطابق، تحقیقات میں انکشاف ہوا کہ دونوں ملزمان شکایت کنندہ کے گھر میں گھریلو ملازمین کے طور پر کام کرتے تھے۔ الزام ہے کہ انہوں نے چوری کی واردات انجام دینے کے بعد وہاں سے فرار اختیار کر لی تھی۔

تفتیش کے دوران پولیس نے چوری کیے گئے زیورات بھی برآمد کر لیے، جن میں سونے کی 16 انگوٹھیاں، پانچ ہار، چار چوڑیاں، دو بروچ، تین ٹائی پن، سات لاکٹ اور کانوں کی نو جوڑیاں شامل ہیں۔

پولیس کے مطابق، برآمد شدہ سونے کے زیورات کی مجموعی تخمینہ شدہ مالیت تقریباً 45 لاکھ روپے ہے۔
پولیس نے بتایا کہ معاملے کی مزید تفتیش جاری ہے۔

یواین آئی۔ ط ا