سری نگر، بجلی کے کرایوں میں اضافے کے فیصلے پر نیشنل کانفرنس کی قیادت والی جموں و کشمیر حکومت پر شدید حملہ کرتے ہوئے جموں و کشمیر پردیش کانگریس کمیٹی کے صدر طارق قرہ نے اس اضافے کو عام لوگوں کے لیے “غیر منصفانہ، بوجھل اور مکمل طور پر ناقابل برداشت” قرار دیا۔ ایک بیان میں قرہ نے کہا کہ ایسے وقت میں جب گھرانے پہلے ہی بڑھتی ہوئی قیمتوں اور معاشی دباؤ سے جوجھ رہے ہیں، حکومت کو بجلی کے اعلیٰ بلوں کے ذریعے ان کا بوجھ بڑھانے کے بجائے صارفین کو ریلیف فراہم کرنا چاہیے تھا۔

قرہ نے کہا۔”جموں و کشمیر کے لوگ حکومت سے بجلی کے بلوں میں ریلیف اور کٹوتی کا اعلان کرنے کی توقع کر رہے تھے، نہ کہ فی یونٹ ٹیرف میں اضافے کی۔ ایک عام گھرانے کے لیے، بجلی کے بل پر ہر اضافی روپیہ براہ راست خاندانی بجٹ کو متاثر کرتا ہے۔ یہ فیصلہ ہمارے لوگوں کو درپیش معاشی مشکلات کے لیے غیر حساس ہے،”

انہوں نے مطالبہ کیا کہ حکومت فوری طور پر ٹیرف میں اضافے کا جائزہ لے کر اسے واپس لے اور گھریلو صارفین، خاص طور پر معاشی طور پر کمزور طبقوں پر بجلی کا بوجھ کم کرنے کے لیے معنی خیز اقدامات کرے۔ “حکومت کو یاد رکھنا چاہیے کہ بجلی کوئی آسائش نہیں ہے؛ یہ ایک ضروری سروس ہے۔ جموں و کشمیر کے لوگ سستی اور قابل اعتماد بجلی کے مستحق ہیں، نہ کہ مسلسل بڑھتے ہوئے بلوں کے۔ کانگریس لوگوں کے ساتھ مضبوطی سے کھڑی رہے گی اور ہر اس اقدام کی مخالفت کرے گی جو ان پر غیر معقول مالی بوجھ ڈالتا ہے،” مسٹر قرہ نے کہا۔ انہوں نے جموں و کشمیر حکومت پر زور دیا کہ وہ وسیع تر عوامی مفاد میں اس فیصلے پر ثانی اور صارفین کو ریلیف بحال کرے، بجائے اس کے کہ ضروری سہولیات کو مزید پہنچ سے باہر بنایا جائے۔ کانگریس اور نیشنل کانفرنس نے 2024 کے جموں و کشمیر اسمبلی انتخابات اتحاد میں لڑے تھے۔ پیر کے روز پی ڈی پی اور اپنی پارٹی نے بھی بجلی کے ٹیرف میں اضافے کے خلاف احتجاج کیا اور اسے عوام مخالف قرار دیتے ہوئے اسے واپس لینے کا مطالبہ کیا۔

وزیراعلیٰ عمر عبداللہ نے اس اقدام کا دفاع کرتے ہوئے اسے “مجبوری” قرار دیا۔

جموں و کشمیر کے بجلی صارفین کو یکم ستمبر سے بجلی کے اعلیٰ بلوں کا سامنا کرنا پڑے گا کیونکہ جوائنٹ الیکٹرسٹی ریگولیٹری کمیشن (جے ای آر سی) نے بجلی کے ٹیرف میں 6.83 فیصد اضافے کی منظوری دی ہے۔

یو این آئی۔ ظ ا۔ م الف

نئی دہلی، وزیرِ اعظم نریندر مودی نے نوجوان سفارت کاروں پر زور دیا ہے کہ وہ بیرونِ ملک سفارت خانوں کے ذریعے زمینی سطح پر مضبوط روابط قائم کریں اور مقامی برادریوں کے ساتھ ہندستان کے تعلقات کو مزید استوار اور گہرا بنائیں۔

انڈین فارن سروس (آئی ایف ایس) کے 2025 بیچ کے زیرِ تربیت افسران نے پیر کے روز یہاں ‘سیوا تیرتھ’ میں وزیرِ اعظم نریندر مودی سے ملاقات کی۔ اس گروپ میں ملک کی مختلف ریاستوں اور مرکز کے زیرِ انتظام علاقوں سے آئے ہوئے 50 زیرِ تربیت افسران شامل تھے۔

بات چیت کے دوران وزیرِ اعظم نے نوجوان سفارت کاروں پر زور دیا کہ وہ اپنی تعیناتی والے ممالک میں زمینی سطح پر مضبوط رابطے قائم کریں اور مقامی برادریوں کے ساتھ ہندستان کے تعلقات کو مزید گہرا بنائیں۔ انہوں نے اس بات پر زور دیا کہ ہندستانی مشنوں کو نہ صرف حکومتوں اور اداروں کے ساتھ، بلکہ برادری کی سطح پر عوام کے ساتھ بھی بامعنی تعلقات استوار کرنے چاہئیں۔ انہوں نے افسران کو روایتی سفارتی دائرہ کار سے آگے بڑھ کر اپنے روابط کو وسعت دینے اور لوگوں کے ساتھ لگاؤ کو گہرا کرنے کی ترغیب دی۔ وزیرِ اعظم نے انہیں ہندستان کی تہذیبی صلاحیتوں کو ٹیکنالوجی، جدت طرازی اور موثر مواصلات کے ساتھ جوڑ کرہندستان کے عالمی تعلقات کو مزید مضبوط بنانے کے لیے متحرک کیا۔

مسٹر مودی نے افسران کو دنیا کے ساتھ ہندستان کے اقتصادی تعلقات کے لیے ایک اہم محرک کے طور پر کام کرنے کا حکم دیا۔ انہوں نے ہندستانی مشنوں کی ڈیجیٹل موجودگی کو مضبوط بنانے کی اہمیت پر بھی زور دیا۔ انہوں نے کہا کہ کوئی بھی ویب سائٹ وہ پہلا ذریعہ ہوتی ہے جس کے ذریعے لوگ کسی ادارے سے رابطہ قائم کرتے ہیں، اور انہوں نے زیادہ آسان، جوابدہ اور شہریوں پر مرکوز طریقے سے قونصلر اور دیگر خدمات کی دستیابی کو یقینی بنانے کے لیے ٹیکنالوجی کے زیادہ سے زیادہ استعمال کی ہدایت دی۔

وزیرِ اعظم نے زیرِ تربیت افسران پر زور دیا کہ وہ ہندستان کی تہذیبی، ثقافتی اور جغرافیائی خصوصیات کو اجاگر کر کے ہندستان کو ایک زیادہ دلکش عالمی سیاحتی مقام بنانے کی سمت میں کام کریں۔ انہوں نے دنیا بھر کے نوجوانوں میں ہندستان کے تئیں زیادہ دلچسپی پیدا کرنے کے لیے “بھارت کو جانیے” کوئز کا فائدہ اٹھانے کی تجویز دی اور ایسے اقدامات کو مزید پرکشش بنانے کے لیے مصنوعی ذہانت اور گیمنگ کے استعمال کی حوصلہ افزائی کی۔

زیرِ تربیت افسران نے اپنی تربیت اور ‘بھارت درشن’ کے تجربات مشترک کیے۔ انہوں نے دنیا کے ساتھ ہندستان کے تہذیبی اور ثقافتی تعلقات کو سمجھنے کی اہمیت پر بھی اپنے خیالات کا اظہار کیا۔

یو این آئی ایف اے

واشنگٹن، امریکی صدر ڈونلڈ ٹرمپ نے پیر کو دعویٰ کیا کہ ’’ایران مکمل طور پر تباہ ہو رہا ہے!‘‘۔ ان کا یہ بیان ایسے وقت میں سامنے آیا ہے جب ایرانی کرنسی امریکی ڈالر کے مقابلے میں نئی ریکارڈ کم ترین سطح پر پہنچ گئی ہے اور امریکہ ایران کی پہلے سے کمزور معیشت پر دباؤ بڑھانے کے لیے نئی پابندیوں کا اعلان کرنے کی تیاری کر رہا ہے۔

ٹرمپ نے ٹروتھ سوشل پر مختصر پوسٹ میں یہ تبصرہ کیا۔ ادھر امریکی محکمہ خزانہ ایران کے ساتھ کاروباری تعلقات رکھنے والے اداروں اور ممالک پر ثانوی پابندیوں کا دائرہ وسیع کرنے کی تیاری کر رہا ہے۔

ان اقدامات کا مقصد ان ممالک کے لیے آخری انتباہ کے طور پر کام کرنا ہے جو تہران کے ساتھ تجارتی تعلقات برقرار رکھے ہوئے ہیں، تاکہ وہ ایران کے ساتھ کاروباری روابط ختم کردیں۔

یہ مہم واشنگٹن کی اس کوشش کا حصہ ہے جس کے ذریعے تقریباً چھ ماہ سے جاری جنگ کے خاتمے کے لیے ایران پر دباؤ بڑھایا جا رہا ہے۔ جنگ کے باعث آبنائے ہرمز میں بحری آمدورفت متاثر ہوئی ہے اور خلیجی خطے سے توانائی کی برآمدات بھی محدود ہوئی ہیں۔

امریکی وزیر خزانہ اسکاٹ بیسنٹ سے توقع تھی کہ وہ پیر کو ٹرمپ کی جانب سے اعلان کردہ اقتصادی ’’ڈی ڈے‘‘ کے حوالے سے مزید تفصیلات فراہم کریں گے۔ ان اقدامات کے ذریعے ممکنہ طور پر ممالک کو ایران کے ساتھ تعلقات برقرار رکھنے یا اہم کمپنیوں اور اداروں کے لیے ڈالر پر مبنی عالمی مالیاتی نظام تک رسائی برقرار رکھنے میں سے کسی ایک کا انتخاب کرنے پر مجبور کیا جا سکتا ہے۔

گزشتہ ہفتے ٹرمپ نے مبینہ طور پر پاکستان کے فوجی سربراہ سے بھی بات کی تھی تاکہ ایران کے ساتھ مذاکرات بحال کرنے کی کوشش کی جا سکے۔ ادھر ایران آبنائے ہرمز میں بحری آمدورفت پر پابندیاں جاری رکھے ہوئے ہے، جس کے باعث عالمی سطح پر بحری نقل و حمل کے اخراجات میں اضافہ ہوا ہے۔

دوسری جانب ایران نے نئی امریکی پابندیوں کے ممکنہ اثرات کو کم اہمیت دینے کی کوشش کی ہے۔

ایرانی وزارت خارجہ کے ترجمان اسماعیل بقائی نے کہا کہ امریکہ کی جانب سے تہران پر دباؤ ڈالنے کی سابقہ کوششیں ناکام رہی ہیں اور ’’ایرانی عوام یہ ثابت کریں گے کہ وہ اپنے حقوق کے تحفظ کے لیے پرعزم اور ثابت قدم ہیں۔‘‘

بقائی نے کہا کہ نئی پابندیاں ٹرمپ انتظامیہ کی ایک غلط حکمت عملی کی عکاسی کرتی ہیں۔ انہوں نے امریکی انتظامیہ پر الزام عائد کیا کہ وہ یہ سمجھتی ہے کہ ’’فوجی جارحیت ایرانی عوام کو گھٹنے ٹیکنے پر مجبور کر سکتی ہے۔‘‘

یو این آئی۔ ع ا۔