دنیا
آبنائے ہرمز کے مشرقی حصے میں تیسرا آئل ٹینکر سمندری بارودی سرنگ سے ٹکرایا
تہران، ایران کی اسلامی انقلابی گارڈ کور (آئی آر جی سی) کی بحریہ نے کہا ہے کہ تہران کے طے کردہ قواعد کی خلاف ورزی کرنے والا تیسرا آئل ٹینکر آبنائے ہرمز کے مشرقی حصے میں سمندری بارودی سرنگ سے ٹکرا گیا، جس کے نتیجے میں اس میں آگ لگ گئی۔
خبر رساں ایجنسی ارنا کے مطابق، آئی آر جی سی کی بحریہ نے منگل کے روز ایک بیان جاری کر کے بتایا کہ صبح سے اب تک اس نوعیت کا یہ تیسرا واقعہ ہے۔
اس سے قبل آئی آر جی سی کی بحریہ نے بتایا تھا کہ آبنائے ہرمز میں سمندری بارودی سرنگوں سے ٹکرانے کے بعد ایک دیو ہیکل آئل ٹینکر اور مائع پیٹرولیم گیس (ایل پی جی) لے جانے والے بحری جہاز میں زوردار دھماکے ہوئے اور آگ بھڑک اٹھی۔
آئی آر جی سی کی بحریہ کے شعبہ تعلقات عامہ کے مطابق، اس سے چند گھنٹے قبل سمندری بارودی سرنگوں سے ٹکرانے کے بعد دونوں جہازوں میں شدید دھماکے ہوئے اور خوفناک آگ لگ گئی۔ ان میں سے ایک جہاز 20 لاکھ بیرل سے زائد خام تیل لے جا رہا تھا، جبکہ دوسرا ایل پی جی بردار جہاز تھا۔
آئی آر جی سی کی بحریہ نے کہا کہ ان جہازوں کو بڑی تعداد میں امریکی لڑاکا طیاروں اور دیگر طیاروں کی جانب سے فضائی تحفظ فراہم کیا جا رہا تھا۔ اس کے باوجود آبنائے ہرمز کے پانیوں میں سمندری بارودی سرنگوں سے ٹکرانے کے باعث ہونے والے زوردار دھماکوں کے بعد دونوں جہازوں میں آگ لگ گئی۔
یواین آئی۔الف الف
دنیا
اسرائیل ایران کے ساتھ نئی لڑائی اور لبنان میں جنگ کی تیاری کر رہا ہے: رپورٹ
تل ابیب، 18 نومبر اسرائیلی فوج ایران کے ساتھ لڑائی کے نئے دور اور لبنان میں جنگ کی تیاری کر رہی ہے۔ اس سلسلے میں ہوم فرنٹ کمانڈ اور ہسپتالوں میں ہنگامی حالات سے نمٹنے کے لیے مزید مشقوں کی منصوبہ بندی بھی جاری ہے۔
اسرائیلی اخبار ‘معاریو’ کے مطابق آرمی چیف ایال زامیر نے سکیورٹی اداروں کے اندر ایک اقلیتی موقف اختیار کرتے ہوئے امریکی شمولیت کے بغیر ایران پر حملہ کرنے کے خلاف خبردار کیا ہے۔ انہوں نے سیاسی قیادت کے سامنے موقف پیش کیا کہ اسرائیل کو دانش مندی اور تحمل سے کام لینا چاہیے اور ایران پر کسی بھی حملے کو امریکہ کے ساتھ مربوط کرنا چاہیے۔ ان کے مطابق موجودہ مرحلے میں اسرائیل کو تنہا حملہ نہیں کرنا چاہیے۔
رپورٹ کے مطابق آرمی چیف کا یہ موقف موساد، شاباک اور قومی سلامتی کونسل کے سربراہوں کے خیالات کے مقابلے میں اقلیتی موقف سمجھا جاتا ہے۔ زامیر کے نزدیک بنیادی ترجیحات میں امریکہ کے ساتھ تعاون یقینی بنانا شامل ہے، جس میں جنگ سے پہلے اور دورانِ جنگ انٹیلی جنس رابطہ کاری کے علاوہ امریکی فضائی ایندھن بردار طیاروں (ایئر ٹینکرز) کے استعمال میں تعاون بھی شامل ہے۔
اسرائیلی فوج کو خدشہ ہے کہ ایران کے ساتھ کسی بھی فوجی تصادم کے نتیجے میں شمالی محاذ پر بھی لڑائی شروع ہو سکتی ہے۔ اسی تناظر میں ہوم فرنٹ کمانڈ بدھ کو تباہ شدہ مقامات پر امدادی کارروائیوں کی ایک اور مشق کرے گی۔ یہ گزشتہ چند دنوں کے دوران ہونے والی متعدد مشقوں کا حصہ ہے۔ جنوبی اسرائیل کے ہسپتال بھی فوج کے ساتھ مشترکہ مشق کریں گے، جس کا مقصد بڑے پیمانے پر جانی نقصان کے واقعے سے نمٹنے کی تیاری کرنا ہے۔
دریں اثنا، اسرائیلی فوج نے منگل کو بتایا کہ اسے ایک مکمل باقاعدہ فوجی ڈویژن کے برابر، تقریباً 12 ہزار 500 اہلکاروں کی کمی کا سامنا ہے۔ ان میں 7 ہزار 500 باقاعدہ سروس کے جنگجو شامل ہیں۔ فوج کے مطابق جنرل اسٹاف کی کوششوں کے باوجود 2027 کے دوران ریزرو فوجیوں کو 40 سے 50 دن تک خدمات کے لیے طلب کیا جائے گا۔
رپورٹ کے مطابق، ایران کے ساتھ لڑائی کا نیا دور یا شمالی محاذ پر حزب اللہ کے ساتھ جنگ شروع ہونے سے پہلے ہی یہ صورت حال ریزرو فوجیوں کے لیے طویل عرصے تک گھروں سے دور رہنے کا سبب بن سکتی ہے۔ اندازے کے مطابق انہیں سال کے تقریباً ایک تہائی حصے تک فوجی خدمات انجام دینا پڑ سکتی ہیں۔
یو این آئی۔ م ع
دنیا
پاکستان، سعودی عرب اور ترکیہ مشترکہ دفاعی اتحاد پر پیش رفت کے لیے رواں ماہ پھر ملیں گے
انقرہ، 18 نومبر : پاکستان، سعودی عرب اور ترکیہ اپنے مشترکہ دفاعی اتحاد کو عملی اور ادارہ جاتی شکل دینے کے لیے رواں ماہ دوبارہ ملاقات کریں گے، جبکہ جرمنی میں علاقائی سلامتی سے متعلق ایک الگ اجلاس بھی متوقع ہے۔ ترکیہ کے وزیر خارجہ خاقان فیدان نے منگل کو یہ بات کہی۔
شام کے وزیر خارجہ اسعد الشیبانی کے ساتھ مشترکہ پریس کانفرنس سے خطاب کرتے ہوئے خاقان فیدان نے کہا، ”امید ہے کہ آئندہ دنوں، خصوصاً نومبر میں، ہم مکہ دفاعی اتحاد کو ادارہ جاتی شکل دینے کے لیے ایک اور اجلاس کریں گے۔”
اس سے قبل اگست میں استنبول میں ہونے والے پہلے کمیٹی اجلاس میں تینوں ممالک نے سعودی عرب میں اتحاد کا مستقل سیکریٹریٹ قائم کرنے پر اتفاق کیا تھا۔ بعد ازاں 5 اکتوبر کو ریاض میں ہونے والے اجلاس میں کمیٹی نے پاکستان کے ریٹائرڈ لیفٹیننٹ جنرل نعمان محمود کو تین سالہ مدت کے لیے اتحاد کا پہلا سیکریٹری جنرل نامزد کیا تھا۔
جرمنی میں متوقع الگ اجلاس میں پاکستان، سعودی عرب، ترکیہ اور مصر کے نمائندوں کے علاوہ جرمنی، فرانس، برطانیہ اور اٹلی کے ہم منصب بھی شرکت کریں گے۔ ان آٹھ ممالک کے درمیان پہلی ملاقات 23 اکتوبر کو استنبول میں ہوئی تھی، جس میں مشرق وسطیٰ کو متاثر کرنے والے تنازعات اور اہم بحری راستوں کی سلامتی سے متعلق سفارتی امور پر تبادلہ خیال کیا گیا تھا۔
توقع ہے کہ آئندہ اجلاس میں بھی علاقائی تنازعات اور جہازرانی کے اہم راستوں کی سلامتی سمیت انہی موضوعات پر گفتگو ہوگی۔
یو این آئی۔ م ع
دنیا
ایران کا آبنائے ہرمز کے قریب امریکی ایم کیو 9 ڈرون مار گرانے کا دعویٰ
تہران، 18 نومبر ایران کی فوج نے دعویٰ کیا ہے کہ اس نے آبنائے ہرمز کے مشرقی علاقے میں امریکی ساختہ ایم کیو 9 ڈرون مار گرایا ہے۔ یہ دعویٰ ایسے وقت میں سامنے آیا ہے جب امریکی صدر ڈونلڈ ٹرمپ ایشیائی ممالک کے دورے کے سلسلے میں چین پہنچے ہیں۔
ایرانی خبر رساں ادارے اور فوج کے شعبہ تعلقات عامہ کے مطابق، بدھ کو ایرانی فضائی دفاعی نظام نے آبنائے ہرمز کے مشرقی علاقے میں ایک امریکی ڈرون کی موجودگی کا پتا لگایا، جس کے بعد فوری کارروائی کرتے ہوئے اسے تباہ کر دیا گیا۔
ایرانی فوج کے بیان میں کہا گیا کہ ڈرون کو ملک کے جنوب مشرقی علاقے میں نصب مقامی طور پر تیار کردہ دفاعی نظام کی مدد سے نشانہ بنایا گیا۔ یہ کارروائی ایران کے مربوط فضائی دفاعی نظام کے تحت انجام دی گئی۔
آذربائیجان کے خبر رساں ادارے ٹرینڈ کے مطابق، ایرانی فوج نے اس کارروائی کو امریکی بغیر پائلٹ طیاروں کے خلاف اپنی فضائی دفاعی کارروائیوں کا تسلسل قرار دیا ہے۔ تاہم، امریکی حکام کی جانب سے اس تازہ واقعے کی آزادانہ تصدیق سامنے نہیں آئی ہے۔
واضح رہے کہ امریکی فوج نے 17 نومبر کو آبنائے ہرمز میں واقع ایرانی جزیرے قشم پر حملے کیے تھے۔ ان حملوں میں ایرانی پاسداران انقلاب کے میزائل ٹھکانوں کو نشانہ بنایا گیا تھا۔
یو این آئی۔ م ؑع
-
ہندوستان1 week agoیمنا کے تئیں ہماری عقیدت عہد بستگی کی علامت: ریکھا گپتا
-
ہندوستان1 week agoمودی جمعہ کو کرناٹک اور گجرات کا دورہ کریں گے، 15,600 کروڑ روپے سے زیادہ کے ترقیاتی منصوبوں کا تحفہ دیں گے
-
دنیا1 week agoترکی کے اسٹیل کارخانے میں دھماکہ، کم از کم 17 افراد ہلاک، 12 زخمی
-
دنیا1 week agoامریکی ایوانِ نمائندگان نے پیٹ ہیگسیتھ کے خلاف مواخذے کی کارروائی شروع کرنے کی کوشش ناکام بنا دی
-
جموں و کشمیر1 week agoگاندربل میں سڑک حادثے میں گجرات اور مغربی بنگال کے آٹھ سیاح زخمی
-
دنیا1 week agoٹرمپ کی تجویز کردہ 250 فٹ اونچی فتح یادگار کے خلاف کینیڈی خاندان عدالت پہنچ گیا
-
دنیا1 week agoکوپ 31 میں امریکہ اور اسرائیل کی کارروائیوں سے ماحولیاتی نقصان کا معاملہ اٹھائیں گے: پزشکیان
-
ہندوستان1 week agoمدر ڈیری کے دودھ کی قیمتوں میں جمعرات سے فی لیٹر 2 سے 4 روپے تک اضافہ ہوگا
-
جموں و کشمیر7 days agoکشتواڑ کے دچھن علاقے میں لاپتہ ایس پی اوز کی گولیاں لگی لاشیں برآمد
-
دنیا1 week agoشیخ حسینہ کو پاسپورٹ جاری کرنے کی کوئی قانونی بنیاد نہیں: آئی سی ٹی کے چیف پراسیکیوٹر
-
دنیا1 week agoغزہ جنگ کے ساتھ ماحولیاتی تباہی کا بھی شکار ہے: رجب طیب اردوغان
-
ہندوستان1 week agoحیدرآباد میں 13 اور 14 نومبر کو ‘بھارت سمٹ’، 70 ممالک کے تقریباً ایک ہزار نمائندے شریک ہوں گے: خورشید
