ماسکو، روس کے صدر ولادیمیر پوتن کے اہم غیر ملکی پالیسی کے مشیر یوری اوشاکوف نے بدھ کے روز کہا کہ روس، یوکرین اور امریکہ کے درمیان سہ فریقی بات چیت چار نومبر کے بعد پھر شروع ہوگی۔ تاہم سہ فریقی بات چیت کی حتمی تاریخ ابھی طے نہیں ہوئی ہے۔

مسٹر اوشاکوف کے مطابق تینوں ملکوں کے درمیان حالانکہ بات چیت دوبارہ شروع ہونے کا وقت کافی حد تک زمین پر بدلتی صورتحال اور جنگ کے محاذ پر ہونے والی پیش رفت پر منحصر کرے گا۔

انہوں نے روسی وفد کے بارے میں کہا کہ اس کے ارکان کی حتمی فہرست جلد ہی طے کی جائے گی۔ انہوں نے بتایا کہ بات چیت ٹیم کے اہم ارکان پہلے سے ہی طے ہیں لیکن روس کی جانب سے بات چیت شروع ہونے کی تاریخ کو لے کر ابھی تک کوئی واضح اشارہ نہیں دیا گیا ہے۔

مسٹر اوشاکوف نے امن کے عمل میں یورپی ممالک کے کردار پر بھی بات کی۔ انہوں نے واضح کیا کہ فی الحال اس بات پر کوئی بحث نہیں ہو رہی ہے کہ فن لینڈ کے صدر الیگزینڈر اسٹب یا ناروے کے وزیر اعظم جوناس گہر اسٹور پورے یورپ کی نمائندگی کرتے ہوئے بات چیت میں اہم کردار ادا کریں گے۔

اس کے علاوہ، مسٹر اوشاکوف نے بتایا کہ روس اور امریکہ کے درمیان روسی ڈائریکٹ انویسٹمنٹ فنڈ (آرڈی آئی ایف) پر عائد پابندیوں کو ہٹانے کے امکان کے سلسلے میں بات چیت جاری ہے۔

یواین آئی/اسپوتنک۔الف الف

ماسکو، روس کے صدر ولادیمیر پوتن نے روس۔افریقہ سربراہ اجلاس کے دوران مصر کے صدر عبدالفتاح السیسی سے ملاقات کی ہے۔

اس دوران دونوں رہنماؤں نے تجارت، توانائی، سیاحت اور معاشی تعاون پر تبادلہ خیال کیا۔

مسٹرپوتن نے کہا کہ روس کے تعاون سے بنے ایل دابا جوہری بجلی گھر کی تعمیر طے شدہ وقت پر جاری ہے، جب کہ 2026 کے پہلے چھ مہینے میں 12 لاکھ سے زیادہ روسی سیاح مصر گئے۔ مسٹر السیسی نے تجارت، معیشت اور اناج کی سپلائی میں تعاون سمیت روس کے ساتھ تعلقات کو مزید مضبوط کرنے کے مصری عزم کا اعادہ کیا۔

یواین آئی/اسپوتنک۔الف الف

میڈرڈ، اسپین کے صوبہ تولیڈو میں بدھ کے روز دو تیز رفتار ٹرینوں کے درمیان تصادم میں کم از کم 46 افراد ہلاک ہو گئے۔ حادثہ میڈرڈ کو جنوبی علاقے اندلس سے جوڑنے والی ریلوے لائن پر پیش آیا۔ علاقائی حکومت کے ترجمان، ریلوے بنیادی ڈھانچے کے منتظم ادارے ایڈف اور علاقائی شہری تحفظ کے ذرائع نے یہ اطلاع دی۔

کاستیا لا مانچا کی علاقائی حکومت کے ترجمان کے مطابق، حادثہ صبح 8 بج کر 54 منٹ پر (جی ایم ٹی کے مطابق صبح 7 بج کر 54 منٹ) پیش آیا۔ اس میں رینفے اور ایریو کمپنیوں کی ٹرینیں شامل تھیں۔ حادثے کے دوران ایریو ٹرین کے دو ڈبے پٹری سے اتر گئے۔

ریلوے بنیادی ڈھانچے کے منتظم ادارے ایڈف کے مطابق، تصادم مورا، اورگاز اور اوردا قصبوں کے درمیان ہوا۔ اس میں سرکاری کمپنی رینفے کی ایک ٹرین اور نجی کمپنی ایریو کی دوسری ٹرین شامل تھی۔ دونوں ٹرینیں جنوبی اندلس کے شہر سیویل کو میڈرڈ سے جوڑنے والے راستے پر چل رہی تھیں۔

علاقائی حکومت کے ترجمان نے بتایا کہ حادثے کی وجوہات کا ابھی تعین نہیں ہو سکا ہے اور زخمیوں کی تعداد کی تصدیق بھی باقی ہے۔

ایڈف نے کہا کہ دونوں ٹرینوں کے پیچھے سے ٹکرانے کے بعد میڈرڈ-اندلس ہائی اسپیڈ ریلوے لائن پر ٹرینوں کی آمد و رفت معطل کر دی گئی ہے۔

کاستیا لا مانچا کی علاقائی حکومت کی ترجمان ایسٹر پادیلا نے بتایا کہ ایک ٹرین میں 146 مسافر اور ایک شیر خوار بچہ سوار تھا، جبکہ دوسری ٹرین میں 397 مسافر موجود تھے۔

وزیر اعظم پیڈرو سانچیز نے ”ٹرین کے سنگین حادثے” پر صدمے کا اظہار کیا اور کہا کہ ہنگامی خدمات کی ٹیمیں متاثرہ افراد کی مدد کے لیے جائے حادثہ پر کام کر رہی ہیں۔

سانچیز نے سوشل میڈیا پلیٹ فارم ایکس پر ایک پوسٹ میں کہا، ”تمام متاثرین اور ان کے اہل خانہ کے لیے میری ہمدردی، یکجہتی اور حمایت۔”

اوردا کے میئر مینوئل گالان نے ریڈیو اسٹیشن کادینا سیر سے گفتگو کرتے ہوئے بتایا کہ شہری تحفظ کی ایجنسی کی درخواست پر زخمی مسافروں کو منتقل کرنے اور ان کی دیکھ بھال کے لیے ایک مرکز تیار کیا جا رہا ہے۔

ریال میڈرڈ، بارسلونا اور ایٹلیٹیکو میڈرڈ سمیت فٹ بال کلبوں نے بھی حادثے کے متاثرین اور ان کے اہل خانہ سے تعزیت کا اظہار کیا ہے۔

یہ حادثہ اسی ریلوے لائن پر انہی کمپنیوں کی تیز رفتار ٹرینوں کے درمیان پیش آنے والے ایک اور تصادم کے نو ماہ بعد ہوا ہے، جس میں 46 افراد ہلاک ہوئے تھے۔

جنوری میں صوبہ قرطبہ کے قریب اداموز کے مقام پر پیش آنے والے اس حادثے میں پٹری سے اترنے والی ایک ٹرین سامنے سے آنے والی دوسری ٹرین سے ٹکرا گئی تھی۔ اس واقعے کے بعد حالیہ برسوں میں ریلوے کی دیکھ بھال پر ہونے والی سرمایہ کاری کے حوالے سے بحث دوبارہ تیز ہو گئی تھی۔

یو این آئی۔ ع ا۔