ہندوستان
اتراکھنڈ میں مسافر بس کھائی میں گرنے سے 9 افراد ہلاک، 27 زخمی
رشی کیش، اتراکھنڈ کے ضلع ٹہری گڑھوال میں منگل کی علی الصبح ایک مسافر بس گہری کھائی میں گرنے سے اس میں سوار 9 افراد ہلاک اور دیگر 27 زخمی ہوگئے۔
ہری دوار سے جوشی مٹھ جا رہی مسافروں سے بھری وشوناتھ سیوا کی بس گولر پل کے قریب بے قابو ہوکر تقریباً 120 فٹ نیچے گولر گاڈ ندی میں جاگری۔ حادثہ اتنا زبردست تھا کہ بس کے ندی میں گرتے ہی مسافروں میں چیخ و پکار مچ گئی۔ حادثے میں اب تک 9 افراد کی موت ہوچکی ہے، جبکہ 27 مسافر زخمی ہوئے ہیں۔
تمام زخمیوں کو بچا کر علاج کے لیے ایمس رشی کیش پہنچایا گیا ہے۔ مہلوکین میں بس کا ڈرائیور اور کنڈکٹر بھی شامل ہیں۔ وہیں، 4 مہلوکین کی شناخت کی کارروائی جاری ہے۔
پولیس سے موصولہ اطلاع کے مطابق آج صبح تقریباً 4:50 بجے گولر چوکی کے ذریعے منی کی ریتی تھانے کو بس حادثے کی اطلاع ملی۔ بتایا گیا کہ ایک مسافر بس گولر پل سے نیچے ندی میں گر گئی ہے۔ اطلاع ملتے ہی منی کی ریتی اور نریندر نگر تھانوں کی پولیس، فائر بریگیڈ نریندر نگر، آفات سے نمٹنے والی ٹیم اور ایس ڈی آر ایف کی ٹیمیں فوری طور پر جائے حادثہ کے لیے روانہ ہوگئیں۔ حادثے کی سنگینی کو دیکھتے ہوئے جنگی پیمانے پر راحت اور بچاؤ کا کام شروع کیا گیا۔ شیو پوری واقع آئی ٹی بی پی کیمپ سے جوانوں کی ایک ٹیم بھی موقع پر پہنچی اور بچاؤ مہم میں تعاون کیا۔
حادثے میں زخمی مسافروں کو فوری طور پر اسپتال پہنچانے کے لیے 108 ایمبولینس سروس کے ساتھ مقامی اسپتالوں، نجی اسپتالوں اور ایل اینڈ ٹی اور نو یوگا کمپنی کی ایمبولینسوں کو بھی موقع پر بلایا گیا۔ پولیس اور بچاؤ ٹیموں نے انتہائی مشکل حالات میں مہم چلاتے ہوئے 27 زخمیوں کو بحفاظت باہر نکالا اور انہیں ایمس رشی کیش روانہ کیا۔
پولیس کے مطابق حادثے کے بعد محض ایک گھنٹے کے اندر زخمیوں کو بچا کر اسپتال پہنچانے کی کارروائی مکمل کرلی گئی۔ تاہم، اس زبردست حادثے میں 7 مسافروں کی موقع پر ہی موت ہوگئی، جبکہ 2 دیگر نے اسپتال میں علاج کے دوران دم توڑ دیا۔
پولیس کے مطابق بس وشوناتھ سیوا کی تھی۔ بس علی الصبح تقریباً 3:15 بجے ہریدوار سے 34 مسافروں کو لے کر جوشی مٹھ کے لیے روانہ ہوئی تھی۔ بس کو ڈرائیور راجندر سنگھ (48) ولد کندن سنگھ، ضلع رودرپریاگ چلا رہے تھے۔ صبح تقریباً 4:50 بجے گولر پل کے قریب بس اچانک پل سے تقریباً 120 فٹ نیچے گولر گاڈ ندی میں جاگری۔ بتایا گیا ہے کہ بس میں ڈرائیور اور کنڈکٹر سمیت کل 34 افراد سوار تھے۔ حادثے میں ڈرائیور راجندر سنگھ اور کنڈکٹر انوج بھنڈاری کی موت ہوگئی۔
پولیس کی جانب سے جاری مہلوکین کی فہرست کے مطابق اب تک 5 افراد کی شناخت ہوچکی ہے۔ ان میں وکی (37) ولد سیوارام، ساکن پاور ہاؤس، چندوسی، سنبھل (اتر پردیش)، پنو (55) ولد گھنگھرو، ساکن میکھنڈی، ٹہری گڑھوال، راج رائے ولد دوارکاناتھ رائے، ساکن مغربی وزیر، جلپائی گوڑی، مغربی بنگال، بس ڈرائیور راجندر سنگھ (48) ولد کندن سنگھ، ساکن کیوری پوکھری، رودرپریاگ اور کنڈکٹر انوج بھنڈاری (27) ولد اتر سنگھ، ساکن بڑھل، شیو پوری، منی کی ریتی، ٹہری گڑھوال شامل ہیں۔ باقی 4 مہلوکین کی شناخت کی کوششیں کی جارہی ہیں۔
حادثے میں زخمی ہونے والے مسافروں میں اتراکھنڈ کے مختلف اضلاع کے علاوہ جھارکھنڈ، بہار، آسام، دہلی، مغربی بنگال، اتر پردیش اور مدھیہ پردیش کے باشندے بھی شامل ہیں۔ پولیس کی جانب سے جاری 27 زخمیوں کی فہرست میں محمد وہاب انصاری، راہل کمار، ابھیشیک، پرتوش، ارجن سورن، بدھن مرمو، آئرا، نور جہاں، راج کمار، جتن، پنکج نیگی، سنتوش کمار، وریندر سنگھ، منا سنگھ، ساگر، خوشی بھٹ، نوین، پریش مراٹھی، آساپنتھ، پنکج کانڈپال، انجو، آریان گپتا، رمیش چند، درشن سنگھ اور راما پرساد گھوش سمیت دیگر زخمی مسافروں کے نام شامل ہیں۔ زخمیوں میں 3 سالہ بچی آئرا اور 64 سالہ آساپنتھ بھی شامل ہیں۔ تمام زخمیوں کا ایمس رشی کیش میں علاج جاری ہے۔
حادثے کے بعد پولیس نے جائے حادثہ سے مسافروں کا سامان بحفاظت جمع کرکے گولر چوکی میں رکھوا دیا ہے، تاکہ متاثرین کے اہل خانہ کو ان کا سامان سونپا جاسکے۔ وہیں، حادثے کی اصل وجوہات کا پتہ لگانے کے لیے تحقیقات شروع کردی گئی ہیں۔
یو این آئی۔ این یو۔
ہندوستان
اردو اکادمی کے ڈرامہ فیسٹول میں صوفیانہ کلام اور موسیقی کے امتزاج سے ”بلھے شاہ” کی فنکارانہ پیشکش
نئی دہلی، اردو اکادمی، دہلی کے زیرِ اہتمام جاری 36ویں اردو ڈراما فیسٹول کے چوتھے دن معروف صوفی شاعر بلھے شاہ کی زندگی، فکر اور روحانی جدوجہد پر مبنی ڈراما ”بلھے شاہ” پیش کیا گیا۔ معروف ڈراما نگار پرتاپ سہگل کا تحریر کردہ یہ ڈراما بنیادی طور پر ہندی زبان میں تخلیق کیا گیا تھا، جسے فیسٹول میں اردو زبان میں پیش کیا گیا۔ اروند سنگھ چندرونشی کی ہدایت کاری میں اس ڈرامے کو سموکھا رنگ منڈل نے پیش کیا۔پروگرام کی نظامت ڈاکٹر فرمان چودھری نے کی۔ انھوں نے اپنے ابتدائی خطاب میں اردو اکادمی، دہلی کی تعلیمی، ادبی اور ثقافتی سرگرمیوں پر مختصراً روشنی ڈالی۔ تقریباً دس مناظر پر مشتمل اس میوزیکل ڈرامے میں ایک مرکزی، دو معاون اور تقریباً بیس ضمنی کرداروں نے حصہ لیا۔
ڈرامے کی خاص بات یہ تھی کہ پوری کہانی ایک راوی کے ذریعے آگے بڑھائی گئی، جو مختلف مواقع پر بلھے شاہ کی زندگی کے اہم ادوار اور واقعات سے ناظرین کو روشناس کراتا رہا۔ ڈرامے کا آغاز ایک صوفیانہ نغمے سے ہوا، جس نے ابتدا ہی سے روحانی اور موسیقیت سے بھرپور فضا قائم کردی۔ ڈرامے میں بلھے شاہ کے روحانی سفر اور اپنے مرشد شاہ عنایت قادری سے ان کی غیر معمولی وابستگی کو مرکزی حیثیت دی گئی ہے۔ کہانی کے مطابق بلھے شاہ خدا کی تلاش میں شاہ عنایت کے پاس پہنچتے ہیں اور ان سے روحانی رہنمائی کی درخواست کرتے ہیں۔ شاہ عنایت انھیں اس راستے کی دشواریوں سے آگاہ کرتے ہوئے واپس لوٹ جانے کا مشورہ دیتے ہیں، لیکن بلھے شاہ اپنے عزم پر قائم رہتے ہیں۔ ان کے والد اور اہلِ خانہ بھی انھیں سمجھانے کی کوشش کرتے ہیں، تاہم وہ مرشد کی محبت اور خدا کی تلاش میں اس قدر سرشار ہوتے ہیں کہ کسی کی بات پر توجہ نہیں دیتے۔
کہانی میں ایک دلچسپ موڑ اس وقت آتا ہے جب کسی بات پر شاہ عنایت ان سے ناراض ہو جاتے ہیں۔ مرشد کو راضی کرنے کے لیے بلھے شاہ گوالیار کا سفر کرتے ہیں، جہاں وہ گلنار بیگم نامی طوائف کے کوٹھے پر پہنچ کر ان سے رقص سیکھنے کی درخواست کرتے ہیں۔ گلنار بیگم انھیں رقص کی تربیت دیتی ہیں اور بلھے شاہ اپنے رقص اور صوفیانہ انداز کے ذریعے مرشد کو منانے میں کامیاب ہو جاتے ہیں۔ اس واقعے کا ایک اہم پہلو یہ بھی ہے کہ گلنار بیگم بلھے شاہ کی فکر اور روحانی شخصیت سے متاثر ہوکر ان کی مرید بن جاتی ہیں اور اپنی سابقہ زندگی ترک کرکے ان کے ساتھ چلنے کا فیصلہ کرتی ہیں۔
مرشد کی رضا حاصل کرنے کے بعد بلھے شاہ عوام کے درمیان واپس آتے ہیں اور اپنے دوہوں، گیتوں اور شاعری کے ذریعے لوگوں کو برائیوں سے روکنے اور نیکی کی طرف راغب کرنے کی کوشش کرتے ہیں۔ وہ عشقِ حقیقی، انسان دوستی اور خدا کی بندگی کا پیغام عام کرتے ہیں۔ ان کے خیالات اور اندازِ اظہار سے اس وقت کے مذہبی پیشواؤں اور حکمران طبقے کو اختلاف ہوتا ہے۔ بالآخر انھیں گرفتار کرکے عدالت میں پیش کیا جاتا ہے، جہاں مختلف الزامات عائد کرنے کے بعد انھیں شہر بدر کرنے کا حکم دیا جاتا ہے۔
ڈرامے کی نمایاں خصوصیت یہ رہی کہ بلھے شاہ کی معروف صوفیانہ شاعری کو محض مکالموں تک محدود رکھنے کی بجائے مختلف کرداروں کے ذریعے مترنم اور تحت اللفظ انداز میں پیش کیا گیا۔ متعدد صوفیانہ نغمات اور گروپ صوفی رقص نے بھی ڈرامے کی پیشکش کو دلکش بنایا۔ بالخصوص گلنار بیگم کے کوٹھے کے مناظر میں وہاں کی فضا اور ماحول کو فنکارانہ انداز میں پیش کیا گیا۔
موسیقی، رقص، مکالموں اور شاعری کے اس امتزاج نے ڈرامے کو ایک بھرپور میوزیکل پرفارمنس کی صورت عطا کی۔ بلھے شاہ کا مرکزی کردار نریندر کمار نے ادا کیا، جبکہ مرشد شاہ عنایت کے کردار میں کبیر خان اور گلنار بیگم کے کردار میں سمرن نے اپنی اداکاری سے نمایاں تاثر قائم کیا۔ بلھے شاہ کے والد اور مولوی کے دوہرے کردار رگھو ویر جی نے ادا کیے۔ دیگر فنکاروں کی اداکاری بھی قابلِ تعریف رہی۔ برجستہ مکالموں، اردو تلفظ کی ادائیگی، موسیقی اور کرداروں کی مناسبت سے اداکاری نے پیشکش کو مزید مؤثر بنایا، جسے ناظرین نے خوب پسند کیا۔ڈرامے میں بلھے شاہ کی صوفیانہ فکر، انسان دوستی اور ذات پات و مذہبی تنگ نظری کے خلاف ان کے پیغام کو بھی نمایاں کیا گیا۔ ان کی شاعری کا بنیادی پیغام یہ ہے کہ انسان کی اصل پہچان اس کی ذات، مذہب یا سماجی مرتبہ نہیں، بلکہ محبت، اخلاص اور انسانیت ہے۔ یہی آفاقی پیغام بلھے شاہ کے کلام کو آج بھی مختلف مذاہب اور معاشرتی طبقات میں مقبول بنائے ہوئے ہے۔
ڈرامے کے اختتام پر دہلی اردو اکادمی کے سکریٹری اور محکمہ فن، ثقافت و السنہ، حکومتِ دہلی کے اسپیشل سکریٹری لیکھ راج نے خطاب کرتے ہوئے کہا کہ دہلی حکومت فنون اور ثقافت کے مختلف شعبوں سے وابستہ نوجوان اور باصلاحیت فنکاروں کی حوصلہ افزائی کے لیے مسلسل کوشاں ہے اور اردو ڈراما فیسٹول بھی اسی کوشش کا ایک اہم حصہ ہے۔ انھوں نے اس سلسلے میں وزیر برائے فن، ثقافت و السنہ جناب کپل مشرا کے تعاون اور حوصلہ افزائی کا خصوصی ذکر کیا۔
انھوں نے اردو اکادمی کی خدمات کو سراہتے ہوئے کہا کہ ان پروگراموں کی کامیابی میں اکادمی کی منظم کوششوں اور انتظامی اہتمام کا اہم کردار ہے۔ انھوں نے مزید بتایا کہ دہلی حکومت اردو کے علاوہ ہندی، سندھی اور سنسکرت اکادمیوں کے ڈراما فیسٹول بھی ہر سال منعقد کرتی ہے۔
مسٹر لیکھ راج نے ڈرامے کے ہدایت کار اروند سنگھ چندرونشی کو پودا پیش کرکے ان کی فنی کاوشوں اور ہدایت کاری کو سراہا۔ اس موقع پر سامعین نے بھی فنکاروں اور ہدایت کار کی بھرپور پذیرائی کی۔ مجموعی طور پر ”بلھے شاہ” موسیقی، شاعری اور رقص سے آراستہ ایک خوب صورت صوفیانہ پیش کش رہی، جس نے ناظرین کو محظوظ کرنے کے ساتھ محبت، رواداری، انسان دوستی اور عشقِ حقیقی کے آفاقی پیغام سے بھی روشناس کرایا۔
یو این آئی۔ م س۔ م الف
ہندوستان
کھرگے نے یوم شہادت پر ‘پنجاب کیسری’ لالہ لاجپت رائے کو خراج عقیدت پیش کیا
نئی دہلی، کانگریس صدر اور راجیہ سبھا میں قائد حزب اختلاف ملکارجن کھرگے نے منگل کو عظیم مجاہد آزادی لالہ لاجپت رائے کے یوم شہادت پر انہیں خراج عقیدت پیش کیا اور ان کی غیر معمولی جرأت، حب الوطنی اور برطانوی نوآبادیاتی جبر کے خلاف مزاحمت کو یاد کیا۔
سوشل میڈیا پلیٹ فارم ‘ایکس’ پر ایک پوسٹ میں مسٹر کھرگے نے لالہ لاجپت رائے کے ان لازوال الفاظ کا حوالہ دیا، جو ہندوستان کی تحریک آزادی کے دوران مزاحمت کے طاقتور ترین اعلانات میں سے ایک بن گئے تھے: ”میرے جسم پر پڑنے والی ہر لاٹھی برطانوی سلطنت کے تابوت میں ایک کیل ثابت ہوگی۔”
‘پنجاب کیسری’ کے نام سے مشہور مجاہد آزادی کو یاد کرتے ہوئے مسٹر کھرگے نے کہا کہ لالہ لاجپت رائے نے ملک کی آزادی کے لیے اپنی عظیم قربانی پیش کی اور ان کا ناقابل تسخیر حوصلہ اور ناانصافی کے خلاف غیر متزلزل موقف آنے والی نسلوں کو تحریک دیتا رہے گا۔
مسٹر کھرگے نے کہا، ”عظیم مجاہد آزادی ‘پنجاب کیسری’ لالہ لاجپت رائے جی کو ان کے یوم شہادت پر دلی خراج عقیدت۔ ان کی ناقابل تسخیر جرأت، حب الوطنی اور ناانصافی کے خلاف جدوجہد آنے والی نسلوں کو تحریک دیتی رہے گی۔”
ہندوستان کی تحریک آزادی کی ممتاز ترین شخصیات میں شامل لالہ لاجپت رائے نے برطانوی حکومت کے خلاف عوامی رائے عامہ کو بیدار کرنے میں اہم کردار ادا کیا۔ بال گنگا دھر تلک اور بپن چندر پال کے ساتھ مل کر انہوں نے مشہور ‘لال-بال-پال’ سہ رکنی اتحاد تشکیل دیا، جس نے جارحانہ قوم پرستی کی وکالت کی اور سودیشی تحریک کو رفتار دینے میں مدد کی۔
برطانوی نوآبادیاتی اقتدار کے ساتھ ان کی ٹکراؤ کی ایک فیصلہ کن مثال اکتوبر 1928 میں سامنے آئی، جب انہوں نے سائمن کمیشن کے خلاف لاہور میں ایک بڑے احتجاج کی قیادت کی۔ برطانوی حکومت کی جانب سے مقرر کردہ اس کمیشن میں ایک بھی ہندوستانی رکن شامل نہیں تھا۔ اسے ملک کی سیاسی امنگوں کی توہین سمجھا گیا اور اس کے خلاف ‘سائمن واپس جاؤ’ کے نعرے کے ساتھ پورے ہندوستان میں مظاہرے شروع ہوئے۔
30 اکتوبر 1928 کو لالہ لاجپت رائے لاہور میں احتجاج کی قیادت کرنے والوں میں شامل تھے، جب پولیس نے مظاہرین پر بے رحمانہ لاٹھی چارج کیا۔ اس حملے میں وہ شدید زخمی ہوئے، لیکن نوآبادیاتی جبر کے سامنے جھکنے سے انکار کر دیا۔ اجتماع سے خطاب کرتے ہوئے انہوں نے اعلان کیا کہ ان پر پڑنے والی ہر لاٹھی برطانوی سلطنت کے تابوت میں ایک کیل ثابت ہوگی۔
ان کا یہ مزاحمتی بیان ہندوستان کی جدوجہد آزادی کی تاریخ میں ہمیشہ کے لیے درج ہو گیا۔ لالہ لاجپت رائے نے 17 نومبر 1928 کو 63 سال کی عمر میں زخموں کی تاب نہ لاتے ہوئے دم توڑ دیا۔ ان کی موت سے پورے ملک میں صدمے کی لہر دوڑ گئی اور برطانوی حکومت کے خلاف بڑے پیمانے پر غم و غصہ پیدا ہوا۔
سیاسی رہنما اور قوم پرست ہونے کے علاوہ لالہ لاجپت رائے نے تعلیم، صحافت اور سماجی اصلاح کے شعبوں میں بھی اہم خدمات انجام دیں۔ نوآبادیاتی اقتدار کے خلاف عوام کو متحد کرنے اور قومی بیداری کے لیے ان کی کوششوں نے ابھرتے ہوئے ہندوستان کے سیاسی شعور کو تشکیل دینے میں مدد کی۔
ان کی موت کے تقریباً ایک صدی بعد بھی ان کی قربانی اس جرأت اور عزم کی ایک طاقتور یاد دہانی ہے، جس کے ساتھ ہندوستان کے مجاہدین آزادی نے نوآبادیاتی ناانصافی کا مقابلہ کیا۔ یوم شہادت پر مسٹر کھرگے کا خراج عقیدت ایسے رہنما کی میراث کی دائمی اہمیت کو اجاگر کرتا ہے، جس کی مزاحمت ہندوستان کی آزادی کی جدوجہد کی علامت بن گئی۔
یواین آئی۔ ایف اے
ہندوستان
نرملا سیتا رمن نے مرکزی بجٹ 2027-28 سے قبل مینوفیکچرنگ سیکٹر کے ساتھ تیسری پری بجٹ مشاورت کی
نئی دہلی، خزانہ و کارپوریٹ امور کی مرکزی وزیر نرملا سیتا رمن نے منگل کے روز مرکزی بجٹ 2027-28 کی تیاریوں کے سلسلے میں مینوفیکچرنگ سیکٹر کے ماہرین اور نمائندوں کے ساتھ پری بجٹ مشاورت کے تیسرے دور کی صدارت کی۔
نئی دہلی میں منعقد ہوئی اس میٹنگ کا مقصد صنعتی ماہرین اور مینوفیکچرنگ سیکٹر کے رہنماؤں سے تجاویز اور سفارشات حاصل کرنا تھا تاکہ آئندہ مالی سال کے لیے حکومت کی پالیسی ترجیحات اور بجٹ تجاویز کو مرتب کرنے میں مدد مل سکے۔
وزارت خزانہ کی جانب سے جاری کردہ ایک بیان کے مطابق، اس مشاورتی اجلاس میں اعلیٰ حکام نے شرکت کی، جن میں محکمہ اقتصادی امور، محکمہ برائے فروغ صنعت و داخلی تجارت (ڈی پی آئی آئی ٹی)، وزارت کان کنی اور وزارت کارپوریٹ امور کے سکریٹریز شامل تھے۔ حکومت ہند کے چیف اکنامک ایڈوائزر بھی اس موقع پر موجود تھے۔
یہ مشاورت حکومت کی پری بجٹ مشق کا حصہ ہے، جو معیشت کے مختلف شعبوں سے وابستہ شراکت داروں کو سالانہ بجٹ کی تیاری سے قبل اپنی توقعات، پالیسی تجاویز اور سفارشات پیش کرنے کا موقع فراہم کرتی ہے۔
گھریلو صنعتی صلاحیت کو مضبوط بنانے، مسابقت کو بہتر کرنے، سرمایہ کاری کو راغب کرنے، اختراعات کو فروغ دینے اور روزگار کے مواقع بڑھانے سے متعلق مباحثوں میں مینوفیکچرنگ سیکٹر کو نمایاں اہمیت دیے جانے کی توقع ہے۔ صنعتی نمائندوں کی تجاویز ہندوستان کے مینوفیکچرنگ ایکو سسٹم کو مستحکم کرنے اور عالمی سپلائی چینز میں اس کے انضمام کو بڑھانے کے حکومت کے وسیع تر مقصد کے لیے بھی انتہائی اہم ہیں۔
تیسری مشاورت مرکزی بجٹ 2027-28 سے قبل مختلف شعبوں کے شراکت داروں کے ساتھ وزیر خزانہ کے جاری رابطوں کا تسلسل ہے۔ توقع ہے کہ حکومت آئندہ مالی سال کے لیے اپنی مالیاتی اور اقتصادی ترجیحات طے کرتے وقت ان مباحثوں سے سامنے آنے والی تجاویز پر غور کرے گی۔
یو این آئی۔ م ع
-
دنیا1 week agoٹرمپ کا اعتراف، ملک بدری کی سخت پالیسی حد سے زیادہ سخت تھی، وسط مدتی انتخابات میں ریپبلکن پارٹی کی شکست کا سبب
-
دنیا1 week agoجزیرہ قشم کو کوئی نقصان نہیں پہنچا: ایران
-
ہندوستان1 week agoیمنا کے تئیں ہماری عقیدت عہد بستگی کی علامت: ریکھا گپتا
-
دنیا1 week ago”خیمے ہمیں بارش سے نہیں بچاتے”: غزہ میں بارش سے بے گھر فلسطینیوں کے خیمے زیرِ آب
-
ہندوستان1 week agoوزیر اعظم مودی نے اتراکھنڈ کے یومِ تاسیس پر روحانی ورثے، قدرتی خوبصورتی اور ترقی کی ستائش کی
-
ہندوستان6 days agoمودی جمعہ کو کرناٹک اور گجرات کا دورہ کریں گے، 15,600 کروڑ روپے سے زیادہ کے ترقیاتی منصوبوں کا تحفہ دیں گے
-
دنیا1 week agoاین ویڈیا کے سربراہ جینسن ہوانگ کا چینی انٹیلی جنس سے مبینہ روابط رکھنے والی خاتون سے معاشقے کا اعتراف، امریکی کانگریس میں تحقیقات کا مطالبہ
-
دنیا1 week agoٹرمپ نے وسط مدتی انتخابات میں ریپبلکن پارٹی کی شکست کی وجوہات میں اسرائیل کی حمایت میں کمی کو بھی شامل کیا
-
دنیا1 week agoامریکی حملوں کی دھمکیوں کے درمیان ایران میں داخلی سلامتی کے سخت اقدامات
-
ہندوستان1 week agoجے رام رمیش کا صاف ستھری ہوا کے لیے اصلاحات کا مطالبہ، کہا: کاروبار میں آسانی سے زیادہ صاف ہوامیں سانس لینے کاحق ہے
-
دنیا6 days agoٹرمپ کی تجویز کردہ 250 فٹ اونچی فتح یادگار کے خلاف کینیڈی خاندان عدالت پہنچ گیا
-
ہندوستان1 week agoگجرات کو 2028 تک منشیات سے پاک بنانے کا ہدف: شاہ
