تپران، ایران کے ایک صوبائی عہدیدار احمد نفیسی نے پیر کے روز جاری کردہ بیان میں کہا ہے کہ ایران کے جزیرے قشم پر رات گئے کئے گئے امریکی حملوں میں رہائشی مکانات، تجارتی علاقوں یا اہم بنیادی ڈھانچے کو کوئی نقصان نہیں پہنچا۔

نیم سرکاری خبر رساں ایجنسی فارس کے مطابق جنوبی صوبے ہرمزگان کے سیاسی، سکیورٹی اور سماجی امور کے نائب گورنر احمد نفیسی نے کہا ہے کہ جن مقامات کو نشانہ بنایا گیا وہ رہائشی علاقوں، کاروباری مراکز اور عوامی خدمات کی تنصیبات سے دُور تھےلہٰذا جزیرے کے اہم بنیادی ڈھانچے یا بنیادی خدمات کو کسی قسم کا نقصان نہیں پہنچا۔’

نفیسی نے کہا ہے کہ جزیرہ قشم کی صورتِ حال قابو میں ہے اور ہنگامی امدادی ٹیمیں، عوامی خدمات کے ادارے اور انتظامی محکمے انتہائی چوکس حالت میں ہیں۔

یہ بیان اتوار کی شام جنوبی ساحلی شہر بندر عباس اور اس کے قریب واقع جزیرہ قشم میں ہونے والے دھماکوں کی اطلاعات کے بعد سامنے آیا ہے۔

خبر رساں ایجنسی ‘فارس’ نے ابتدائی طور پر مقامی ذرائع کے حوالے سے جاری کردہ خبر میں دعویٰ کیا تھا کہ یہ دھماکے آبنائے ہرمز میں بحری آمدورفت کے قواعد کی خلاف ورزی کے شبہے میں بعض جہازوں پر کی گئی تنبیہی فائرنگ کا نتیجہ ہو سکتے ہیں۔ تاہم ایرانی حکام نے تاحال اس واقعے کی وجہ سے متعلق کوئی وضاحت جاری نہیں کی۔

واضح رہے کہ جزیرہ قشم، بندر عباس کے قریب آبنائے ہرمز کے داخلی راستے پر واقع ہے۔ یہ ایک اہم بحری گزرگاہ ہے جہاں سے عالمی سطح پر برآمد کیے جانے والے تیل کا ایک بڑا حصہ گزرتا ہے۔

یہ واقعات ایسے وقت میں پیش آئے ہیں جب تنازعے میں کمی لانے کے لیے سفارتی کوششیں جاری ہیں۔ تاہم آبنائے ہرمز میں سلامتی اور محفوظ سیر و سفر کے معاملات پر واشنگٹن اور تہران کے درمیان کشیدگی بدستور برقرار ہے۔

یو این آئی۔ ع ا۔

تہران، ایران کا داخلی سلامتی کا نظام ہائی الرٹ پر ہے اور حکام ان سرگرمیوں سے نمٹنے کے لیے اپنا رویہ مزید سخت کر رہے ہیں جنہیں وہ امریکہ کے ساتھ جاری جنگ کے دوران ملک پر اپنی گرفت کے لیے خطرہ سمجھتے ہیں۔

ایرانی حکام نے عوام کو حکومت مخالف مظاہروں میں شرکت پر سخت سزاؤں کی وارننگ دی ہے اور عوامی مقامات پر کنٹرول بھی سخت کیا جا رہا ہے۔ یہ اقدام ایسے وقت میں کیا جا رہا ہے جب گزشتہ کئی ماہ سے لوگوں کے لباس سے متعلق پابندیوں کے نفاذ میں نسبتاً نرمی دیکھی جا رہی تھی۔

مختصراً، ایرانی حکام یہ تاثر دینے کی کوشش کرتے دکھائی دے رہے ہیں کہ آٹھ ماہ کی جنگ اور امریکہ کی جانب سے نئے، وسیع تر اور زیادہ شدید حملوں کے خطرے کے باوجود وہ اسلامی جمہوریہ کے اصولوں پر کوئی سمجھوتہ نہیں کریں گے۔

قطر یونیورسٹی کے گلف اسٹڈیز سینٹر کے ڈائریکٹر محجوب زویری نے کہا کہ ان کشیدگیوں کے درمیان حکام تہران میں حکومت کے تسلسل کے حامیوں کو عوامی سطح پر متحرک کرنے میں بھی کامیاب رہے ہیں۔

انہوں نے الجزیرہ کو بتایا، ”ان میں صرف اسلامی انقلابی گارڈز کور (آئی آر جی سی) کے ارکان ہی نہیں بلکہ بعض عام شہری بھی شامل ہیں اور امکان ہے کہ جنگ ختم ہونے تک یہ سلسلہ جاری رہے گا۔” آئی آر جی سی ایک فوجی ادارہ ہے جسے 1979 کے اسلامی انقلاب کے اصولوں کے تحفظ کے لیے قائم کیا گیا تھا۔
ایرانی حکام اختلافِ رائے کی کسی بھی شکل کی حوصلہ شکنی کے لیے معمول کے مطابق سخت سزائیں دیتے ہیں۔ 28 اکتوبر کو ایرانی رہنماؤں کے خلاف امریکہ اور اسرائیل کے حملوں سے شروع ہونے والی جنگ نے اس عمل کو مزید تیز کر دیا ہے۔

عدلیہ نے اتوار کو بتایا کہ جنوری میں ملک گیر احتجاج کے دوران گرفتار کیے گئے تین نوجوانوں کو پھانسی دے دی گئی ہے۔ ان پر الزام تھا کہ انہوں نے امریکہ اور اسرائیل کو فائدہ پہنچانے کے لیے تہران کے قریب سرکاری دفاتر پر حملے کیے اور عوامی املاک کو نقصان پہنچایا تھا۔

ایرانی حکام حکومت مخالف احتجاج کو امریکہ اور اسرائیل سے وابستہ ”دہشت گردوں” کی جانب سے ”تختہ پلٹنے” کی کوشش قرار دیتے ہیں۔ تاہم اقوام متحدہ کے ایک آزاد تحقیقاتی مشن نے پایا کہ مظاہرین کے خلاف پرتشدد کریک ڈاؤن کے دوران حکام نے انسانیت کے خلاف جرائم کا ارتکاب کیا۔ انسانی حقوق کی تنظیموں کے مطابق اس کارروائی میں ہزاروں افراد ہلاک ہوئے، جن میں زیادہ تر اموات 8 اور 9 جنوری کی راتوں میں ہوئیں۔

بیرون ملک قائم انسانی حقوق کی تنظیموں کا کہنا ہے کہ سزائے موت کے نتیجے میں ختم ہونے والے متعدد سیاسی مقدمات میں تشدد، جبری اعترافات اور قانونی کارروائی کے منصفانہ تقاضوں کی خلاف ورزی کے الزامات سامنے آئے ہیں۔

ناروے میں قائم انسانی حقوق کی تنظیم ہینگاؤ کے مطابق ایران میں رواں سال کم از کم 79 سیاسی یا مذہبی قیدیوں کو پھانسی دی گئی ہے، جن میں جنوری کے احتجاج کے دوران گرفتار کیے گئے 40 افراد بھی شامل ہیں۔ ان میں سے بعض کو جاسوسی کے الزامات میں سزا سنائے جانے کے بعد پھانسی دی گئی۔

جاری ۔ یو این آئی۔ ع ا۔

سانتا کلارا، دنیا کی سب سے بڑی مصنوعی ذہانت کمپنیوں میں شامل این ویڈیا کے چیف ایگزیکٹو آفیسر (سی ای او) جینسن ہوانگ نے چینی انٹیلی جنس سے مبینہ روابط رکھنے والی خاتون ایلس ہوانگ کے ساتھ معاشقے کا اعتراف کیا ہے، جس کے بعد امریکی ٹیکنالوجی اور سیاسی حلقوں میں تنازع شدت اختیار کر گیا ہے۔ امریکی کانگریس کے ارکان نے معاملے کی تحقیقات اور کمپنی کے سربراہ سے وضاحت طلب کرنے کا مطالبہ کیا ہے۔

این ویڈیا کی بنیاد رکھنے کے بعد 33 برس سے کمپنی کی قیادت کرنے والے ہوانگ نے اتوار کو ملازمین کے نام ایک خط میں اپنے معاشقے کا اعتراف کرتے ہوئے اہل خانہ سے معذرت کی۔ اس انکشاف کے بعد کمپنی کے بورڈ نے مبینہ چینی جاسوسی کارروائی کی آزادانہ تحقیقات شروع کر دی ہیں۔

امریکی حکام کو شبہ ہے کہ این ویڈیا کی صارف کمپنی میگاسپیڈ کی ایگزیکٹو ایلس ہوانگ کو چین کی انٹیلی جنس ایجنسیوں نے جینسن ہوانگ کے ساتھ تعلقات قائم کرنے اور ان کے ذریعے حساس کاروباری معلومات حاصل کرنے کے مقصد سے بھرتی کیا تھا۔ مبینہ طور پر ان کا ایک مقصد ہوانگ کو امریکی حکام پر دباؤ ڈالنے کے لیے آمادہ کرنا بھی تھا، تاکہ چین کو جدید سیمی کنڈکٹرز کی برآمد پر عائد پابندیاں نرم کرائی جا سکیں۔

‘نیویارک ٹائمز’ نے 29 اکتوبر کو پہلی بار دونوں کے قریبی تعلقات اور ایلس ہوانگ کے بیجنگ سے مبینہ روابط کے بارے میں رپورٹ دی تھی۔ اخبار کے مطابق، امریکی انٹیلی جنس حکام نے اس معاملے پر تشویش ظاہر کی تھی اور صدر ڈونالڈ ٹرمپ کو بھی بریفنگ دی گئی تھی۔ 31 اکتوبر کو ‘وال اسٹریٹ جرنل’ نے رپورٹ کیا کہ امریکہ، سنگاپور اور تائیوان کے انٹیلی جنس حکام کو خدشہ ہے کہ ایلس ہوانگ چینی حکومت کو معلومات فراہم کر سکتی ہیں۔ بعد ازاں 6 نومبر کو ‘نیویارک ٹائمز’ اور ‘فنانشل ٹائمز’ نے دعویٰ کیا کہ چین کے اعلیٰ انٹیلی جنس حکام نے انہیں خاص طور پر جینسن ہوانگ سے تعلقات استوار کرنے کے لیے بھرتی کیا تھا۔

این ویڈیا نے ان الزامات کی تردید کرتے ہوئے کہا ہے کہ دونوں کے درمیان رابطے معمول کے کاروباری معاملات تک محدود تھے اور کوئی حساس معلومات شیئر نہیں کی گئیں۔ کمپنی کے مطابق، علاقائی کلاؤڈ صارفین کو عام تجارتی معلومات فراہم کی جاتی ہیں، نہ کہ خفیہ کاروباری راز یا قومی سلامتی سے متعلق مواد۔ کمپنی کے بورڈ نے بھی کہا ہے کہ اس کے پاس قومی سلامتی یا کمپنی کے رازوں سے متعلق معلومات افشا ہونے کا کوئی ثبوت نہیں ہے اور اسے ہوانگ پر اعتماد ہے۔ ہوانگ نے بھی تحقیقات کے دوران سی ای او کے عہدے پر برقرار رہنے کا ارادہ ظاہر کیا ہے۔

صدر ٹرمپ نے اتوار کو ہوانگ کا دفاع کرتے ہوئے انہیں ”ایک معزز شخص” قرار دیا اور کہا کہ ان کی بے وفائی کے لیے ”شاید کوئی جواز” ہو۔ یہ پوچھے جانے پر کہ کیا ہوانگ ان کے آئندہ دورہ ایشیا میں ساتھ جائیں گے، ٹرمپ نے کہا، ”مجھے نہیں معلوم، لیکن میں یقیناً انہیں ساتھ لے جاؤں گا۔” انہوں نے مزید کہا کہ انہوں نے ہوانگ کے کسی غلط کام کے بارے میں نہیں سنا اور ذاتی تعلقات قائم کرنا کوئی غیر معمولی بات نہیں ہے۔

اس معاملے نے ٹرمپ انتظامیہ کے کردار پر بھی سوالات کھڑے کر دیے ہیں۔ ‘نیویارک ٹائمز’ کے مطابق، صدر کو 2025 میں مبینہ انٹیلی جنس کارروائی کے بارے میں بریفنگ دی گئی تھی، جبکہ وزیر خارجہ مارکو روبیو نے رواں سال موسم بہار میں ایک خفیہ انٹیلی جنس میمو کی نگرانی کی تھی، جس میں اعلیٰ حکام کو خبردار کیا گیا تھا۔ ان انتباہات کے باوجود ہوانگ کو صدر تک رسائی حاصل رہی، وہ وائٹ ہاؤس کی تقریبات میں شریک ہوتے رہے اور رواں سال کے اوائل میں ٹرمپ کے ساتھ چین کا دورہ بھی کیا۔ واشنگٹن میں چین کو جدید سیمی کنڈکٹرز کی برآمد پر پابندیوں سے متعلق بحث کے دوران وہ انتظامیہ کے نمایاں کارپوریٹ مشیروں میں شمار ہوتے رہے ہیں۔

جاری۔ یو این اآئی۔ ع ا۔