تپران، ایران کے ایک صوبائی عہدیدار احمد نفیسی نے پیر کے روز جاری کردہ بیان میں کہا ہے کہ ایران کے جزیرے قشم پر رات گئے کئے گئے امریکی حملوں میں رہائشی مکانات، تجارتی علاقوں یا اہم بنیادی ڈھانچے کو کوئی نقصان نہیں پہنچا۔

نیم سرکاری خبر رساں ایجنسی فارس کے مطابق جنوبی صوبے ہرمزگان کے سیاسی، سکیورٹی اور سماجی امور کے نائب گورنر احمد نفیسی نے کہا ہے کہ جن مقامات کو نشانہ بنایا گیا وہ رہائشی علاقوں، کاروباری مراکز اور عوامی خدمات کی تنصیبات سے دُور تھےلہٰذا جزیرے کے اہم بنیادی ڈھانچے یا بنیادی خدمات کو کسی قسم کا نقصان نہیں پہنچا۔’

نفیسی نے کہا ہے کہ جزیرہ قشم کی صورتِ حال قابو میں ہے اور ہنگامی امدادی ٹیمیں، عوامی خدمات کے ادارے اور انتظامی محکمے انتہائی چوکس حالت میں ہیں۔

یہ بیان اتوار کی شام جنوبی ساحلی شہر بندر عباس اور اس کے قریب واقع جزیرہ قشم میں ہونے والے دھماکوں کی اطلاعات کے بعد سامنے آیا ہے۔

خبر رساں ایجنسی ‘فارس’ نے ابتدائی طور پر مقامی ذرائع کے حوالے سے جاری کردہ خبر میں دعویٰ کیا تھا کہ یہ دھماکے آبنائے ہرمز میں بحری آمدورفت کے قواعد کی خلاف ورزی کے شبہے میں بعض جہازوں پر کی گئی تنبیہی فائرنگ کا نتیجہ ہو سکتے ہیں۔ تاہم ایرانی حکام نے تاحال اس واقعے کی وجہ سے متعلق کوئی وضاحت جاری نہیں کی۔

واضح رہے کہ جزیرہ قشم، بندر عباس کے قریب آبنائے ہرمز کے داخلی راستے پر واقع ہے۔ یہ ایک اہم بحری گزرگاہ ہے جہاں سے عالمی سطح پر برآمد کیے جانے والے تیل کا ایک بڑا حصہ گزرتا ہے۔

یہ واقعات ایسے وقت میں پیش آئے ہیں جب تنازعے میں کمی لانے کے لیے سفارتی کوششیں جاری ہیں۔ تاہم آبنائے ہرمز میں سلامتی اور محفوظ سیر و سفر کے معاملات پر واشنگٹن اور تہران کے درمیان کشیدگی بدستور برقرار ہے۔

یو این آئی۔ ع ا۔

تہران، ایران کا داخلی سلامتی کا نظام ہائی الرٹ پر ہے اور حکام ان سرگرمیوں سے نمٹنے کے لیے اپنا رویہ مزید سخت کر رہے ہیں جنہیں وہ امریکہ کے ساتھ جاری جنگ کے دوران ملک پر اپنی گرفت کے لیے خطرہ سمجھتے ہیں۔

ایرانی حکام نے عوام کو حکومت مخالف مظاہروں میں شرکت پر سخت سزاؤں کی وارننگ دی ہے اور عوامی مقامات پر کنٹرول بھی سخت کیا جا رہا ہے۔ یہ اقدام ایسے وقت میں کیا جا رہا ہے جب گزشتہ کئی ماہ سے لوگوں کے لباس سے متعلق پابندیوں کے نفاذ میں نسبتاً نرمی دیکھی جا رہی تھی۔

مختصراً، ایرانی حکام یہ تاثر دینے کی کوشش کرتے دکھائی دے رہے ہیں کہ آٹھ ماہ کی جنگ اور امریکہ کی جانب سے نئے، وسیع تر اور زیادہ شدید حملوں کے خطرے کے باوجود وہ اسلامی جمہوریہ کے اصولوں پر کوئی سمجھوتہ نہیں کریں گے۔

قطر یونیورسٹی کے گلف اسٹڈیز سینٹر کے ڈائریکٹر محجوب زویری نے کہا کہ ان کشیدگیوں کے درمیان حکام تہران میں حکومت کے تسلسل کے حامیوں کو عوامی سطح پر متحرک کرنے میں بھی کامیاب رہے ہیں۔

انہوں نے الجزیرہ کو بتایا، ”ان میں صرف اسلامی انقلابی گارڈز کور (آئی آر جی سی) کے ارکان ہی نہیں بلکہ بعض عام شہری بھی شامل ہیں اور امکان ہے کہ جنگ ختم ہونے تک یہ سلسلہ جاری رہے گا۔” آئی آر جی سی ایک فوجی ادارہ ہے جسے 1979 کے اسلامی انقلاب کے اصولوں کے تحفظ کے لیے قائم کیا گیا تھا۔
ایرانی حکام اختلافِ رائے کی کسی بھی شکل کی حوصلہ شکنی کے لیے معمول کے مطابق سخت سزائیں دیتے ہیں۔ 28 اکتوبر کو ایرانی رہنماؤں کے خلاف امریکہ اور اسرائیل کے حملوں سے شروع ہونے والی جنگ نے اس عمل کو مزید تیز کر دیا ہے۔

عدلیہ نے اتوار کو بتایا کہ جنوری میں ملک گیر احتجاج کے دوران گرفتار کیے گئے تین نوجوانوں کو پھانسی دے دی گئی ہے۔ ان پر الزام تھا کہ انہوں نے امریکہ اور اسرائیل کو فائدہ پہنچانے کے لیے تہران کے قریب سرکاری دفاتر پر حملے کیے اور عوامی املاک کو نقصان پہنچایا تھا۔

ایرانی حکام حکومت مخالف احتجاج کو امریکہ اور اسرائیل سے وابستہ ”دہشت گردوں” کی جانب سے ”تختہ پلٹنے” کی کوشش قرار دیتے ہیں۔ تاہم اقوام متحدہ کے ایک آزاد تحقیقاتی مشن نے پایا کہ مظاہرین کے خلاف پرتشدد کریک ڈاؤن کے دوران حکام نے انسانیت کے خلاف جرائم کا ارتکاب کیا۔ انسانی حقوق کی تنظیموں کے مطابق اس کارروائی میں ہزاروں افراد ہلاک ہوئے، جن میں زیادہ تر اموات 8 اور 9 جنوری کی راتوں میں ہوئیں۔

بیرون ملک قائم انسانی حقوق کی تنظیموں کا کہنا ہے کہ سزائے موت کے نتیجے میں ختم ہونے والے متعدد سیاسی مقدمات میں تشدد، جبری اعترافات اور قانونی کارروائی کے منصفانہ تقاضوں کی خلاف ورزی کے الزامات سامنے آئے ہیں۔

ناروے میں قائم انسانی حقوق کی تنظیم ہینگاؤ کے مطابق ایران میں رواں سال کم از کم 79 سیاسی یا مذہبی قیدیوں کو پھانسی دی گئی ہے، جن میں جنوری کے احتجاج کے دوران گرفتار کیے گئے 40 افراد بھی شامل ہیں۔ ان میں سے بعض کو جاسوسی کے الزامات میں سزا سنائے جانے کے بعد پھانسی دی گئی۔

جاری ۔ یو این آئی۔ ع ا۔

الزوایدہ، غزہ پٹی، غزہ کے وسطی علاقے الزوایدہ میں جابر الکسیح کے خیمے میں ہفتے کی رات اچانک پانی داخل ہونے لگا۔ غزہ میں موسلادھار بارش کے باعث پانی خیمے میں گھس آیا، جس سے جابر اور ان کے اہل خانہ کی آنکھ کھل گئی۔ دیکھتے ہی دیکھتے خیمے کا فرش پانی سے بھر گیا اور گدے، قالین، کمبل بھیگ گئے، جبکہ خاندان نے بڑی مشکل سے جو تھوڑا بہت کھانا محفوظ رکھا تھا، وہ بھی خراب ہو گیا۔

ستر برس سے زائد عمر کے جابر نے الجزیرہ کو بتایا، ”سب کی آنکھ کھل گئی اور ہم جاگتے رہے۔ لوگ اپنے پڑوسیوں سے نقصان کی صورتحال اور بچوں کے بارے میں پوچھتے رہے۔”

انہوں نے بے گھر افراد کے اس کیمپ کے باہر کے علاقے کی صورتحال بیان کرتے ہوئے کہا کہ وہاں ہزاروں فلسطینیوں نے پناہ لے رکھی ہے اور پورا علاقہ کسی سوئمنگ پول کا منظر پیش کر رہا تھا۔

غزہ کے سرکاری میڈیا دفتر کے مطابق جمعہ کی دیر رات سے شروع ہونے والی موسلادھار بارش کے باعث 70 ہزار سے زائد خیمے زیرِ آب آ چکے ہیں۔ لاکھوں بے گھر فلسطینی ایسے مقامات پر پناہ لیے ہوئے ہیں جہاں مزید سیلاب کا خطرہ انتہائی زیادہ ہے۔

اسرائیل اور حماس کے درمیان نام نہاد جنگ بندی معاہدے پر دستخط کے ایک سال سے زیادہ عرصہ گزر جانے کے باوجود اسرائیل معاہدے کی شرائط کی خلاف ورزی کرتے ہوئے غزہ میں اشیا کی آمد روک رہا ہے۔ ان میں 60 ہزار موبائل مکانات اور دو لاکھ خیمے بھی شامل ہیں۔

اب تک صرف 20 ہزار خیموں کو غزہ میں داخلے کی اجازت دی گئی ہے، جبکہ موبائل مکانات مصر کی سرحد کے دوسری جانب کھڑے ہیں۔ ان میں سے کئی دو برس سے زیادہ عرصے سے وہیں موجود ہیں۔

جابر اور ان کا خاندان الزوایدہ کے علاقے میں خیمے میں رہتے ہوئے چوتھی سردی کا سامنا کر رہا ہے۔ ان کا تعلق شمالی غزہ کے بیت لاہیا سے ہے اور وہ بھی 7 اکتوبر 2023 کو اسرائیل کی جنگ شروع ہونے کے بعد بیشتر فلسطینیوں کی طرح کئی بار نقل مکانی کر چکے ہیں۔

اس جنگ کے باعث 90 فیصد سے زیادہ فلسطینی بے گھر ہو چکے ہیں اور ان میں سے بہت سے افراد کو متعدد مرتبہ اپنا گھر بار چھوڑنا پڑا ہے۔ اس جنگ کو عالمی سطح پر شدید مذمت کا سامنا کرنا پڑا ہے۔

جابر کے مطابق گزشتہ موسم سرما میں ان کے کیمپ میں تین سے چار مرتبہ سیلاب آیا، جس کے باعث کئی خاندانوں کو وہاں سے نقل مکانی کرنا پڑی۔ اب بھی تقریباً 40 خیمے موجود ہیں، لیکن تازہ بارش نے ان کی حالت مزید خراب کر دی ہے۔انہوں نے کہا، ”اب تمام خیمے خراب، پھٹے ہوئے اور کیچڑ سے بھرے ہیں۔ ہمیں آنے والے مشکل دنوں سے بچنے کے لیے فوری طور پر خیموں، ترپالوں، پلاسٹک کی چادروں، گدوں، کمبلوں اور قالینوں کی ضرورت ہے۔

”ہم سنتے رہتے ہیں کہ خیمے اور ترپالیں تقسیم کی جا رہی ہیں، لیکن ہمیں کچھ بھی نہیں ملا۔

”ہمیں امید تھی کہ جنگ بندی معاہدے کے تحت جن موبائل مکانات اور عارضی رہائشی یونٹوں کا وعدہ کیا گیا تھا، ان سے ہمیں کچھ راحت ملے گی اور ہم محفوظ و پُرامن زندگی کی طرف لوٹ سکیں گے۔ لیکن یہ سب محض زبانی وعدے ثابت ہوئے۔ ہم نے عملی طور پر کچھ نہیں دیکھا۔”

جاری ۔ یو این آئی۔ْ ع اْ